Obufwimbuli 4
4
Obwinamili obwomwikulu
1Olunyuma lwamakhuwa ako ndahenga, nindola omuliango ngwokwo, nikwikukha mwikulu; nomwoyo okwo okwa ndali niranjiliile okhuhulila, okufwana shinga okwolwika, nikusunjila kuri Tikulukha witse hano, ne ndalakhumanyia akeenako akakhoyile okhwikhola olunyumakhwo. 2Habwenaho nimba muRoho; ne nindola eshifumbi shioburuchi shieshio, nishiliho mwikulu, oundi niyeekhaalekhwo; 3ne oyo owali niyeekhaalekhwo, okhulolekhakhwe khwali shinga lichina liayasepi, nende akiki; khandi olulindi lwabotokhana eshifumbi; ne noluhenga, lufwana shinga itsumaridi. 4Khandi ebifumbi bioburuchi amakhumi kabili nabine biabotokhana eshifumbi shioburuchi eshio; ne abakofu amakhumi kabili nabane bali nibeekhaalekhwo, nibeefwalile ebiifwalo ebilafu; khandi tsisimbi tsieitsahaabu tsiali khumirwe chiabwe. 5Ne okhurula mushifumbi shioburuchi nimurulamwo tsimbenu, nende amayoosi, nende emikukumo. Khandi ebitseso biomulilo musaafu biali nibiakhanga imbeli weshifumbi shioburuchi; ne nibo Abaroho musaafu baNyasaye; 6khandi hambeli weshifumbi hafwana shinga inyanza yeshihoo, eyeengana ibarafu.
Ne hakari bwene, ebilimwoyo bine biabotokhana eshifumbi, ebieetsula tsimoni, imbeli khandi emukongo. 7Eshilimwoyo shiambeli shieengana italanyieshili; mwoyo shiakhabili shieengana eshimoosi; eshilimwoyo shiakhataru mumoni mwashio shinga omundu; eshilimwoyo shiakhane shieengana inditsu eyipulukha. 8Nabio ebilimwoyo ebio bine, buli shilala shiali netsimbaha tsisasaba, khandi bieetsula tsimoni, ikulu nende mukari. Eshilo neshiteere bihonganga nibiimba, oburahuluukha ta, mbu
Omutakatifu, Omutakatifu, Omutakatifu, niye Omwami Nyasaye, oyo Ounyalabiosi, owalinjiho, noubeetsangaho, nouli okhwitsa.
9Ne buli olwa ebilimwoyo ebio biamuheelesia oluyali neifuma nokhwishieela oyo owikhaale khushifumbi tsana, oyo oubeetsangamwoyo ebisoni nebisoni, 10abakofu abo amakhumi kabili nabane bakwitsanga mumakulu ka oyo owikhaale khushifumbi, nibamwinamila oubeetsanga; mwoyo ebisoni nebisoni, nibasukuna tsisimbi tsiabwe imbeli weshifumbi, nibeemba bari
11Omwami weefwe khandi Nyasaye weefwe, niwe oukwanile okhuheebungwa oluyali neifuma nobunyali; okhuba niwe owalonga ebindu biosi, khandi okhwenyakhwo nikhwo okhwachila bialongwa nibibaho!
Currently Selected:
Obufwimbuli 4: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
