Obufwimbuli 1
1
Obufwimbuli bwaYesu Kristo
1Obufwimbuli bwaYesu Kristo, obwa Nyasaye yamuheelesia mbu abamanyie abasumbabe amakhuwa akali ahambi okhwikhola. Naye naruma malaikawe namumanyia omusumbawe Yohana, 2oyo owarumbula akobuloli khwikhuwa liaNyasaye, nende khumakhuwa akarumbulwa khuYesu Kristo, kata khukosi aka yalola.
3Noweikhabi ousooma nende abo abahulila amakhuwa kobulakusi buno, nibahanda khumakhuwa akahandiikwamwo; okhuba induukho yili okhuula.
Amashiesio khutsikanisa musaafu
4Eyirula khuYohana; yule khutsikanisa musaafu etsili muAsia.
Obukoosia bube khwinywe, nende omulembe, okhurula khu oyo oubeetsangaho, nowalinjiho, nouli okhwitsa; nokhurula khuBaroho musaafu abali imbeli weshifumbishie shiobwami; 5-6nokhurula khuYesu Kristo, omurumbusi wobuloli omusuubilwa oyo, oweebulwa owambeli okhurula mubafu, nomukhulundu wabaruchi beshialo.
Oluyali nende obunyali bibe khu oyo owakhuheela, nakhuboholola mubionoono bieefwe khulwa amabangake, nakhukhola khube obwami, mbu khube abakuhani baNyasayewe, niye Samwana; bibe khuye ebisoni nebisoni. Amina. 7Lole, yeetsa namaleesi; ne buli imoni yilamulola, kata nende abo abamufumira; ne tsimbia tsiosi tsiomushialo tsileekhuula khululwe. Kabe kario. Amina.
8Omwami Nyasaye aboola mbu Nisie Alifa nende Omega, oubeetsangaho, nowalinjiho, nouli okhwitsa, mbu Ounyalabiosi.
Obuloleshi bwOmwama womundu
9Isie Yohana, omwana weenywe khandi omusanjilani halala nineenywe mumasila nobwami nobwisimilisii obuli muYesu, ndali nindi mushikhalachinga eshilangwa mbu Patimo, khulwa likhuwa liaNyasaye nende amakhuwa akarumbulwa khuYesu. 10Ndali nindi muRoho khunyanga yOmwami, nimbulila omwoyo omukhongo munyuma wanje, okufwana shinga okwolwika, 11nikuboola mbu Aka olola, okahandiiche mushitabu, nokoobela tsikanisa musaafu etsio; mbu eEfeso, neSimurina, nePerigamo, neTsiatira, neSaride, neFiladelefia, nende eLaodikia. 12Mana ndashiukhana okhulola omwene mwoyo okwo okwasungana ninasi. Ne nimalile okhushiukhana ndalola ebichibi musaafu bietsitaha bieitsahaabu, 13nahakari webichibi bietsitaha, oundi owafwana shinga omwana womundu, owali niyeefwalile ingubo irambi, eyula hasi khubilenje, niyeeboheele mushilifushie omushiipi kweitsahaabu. 14Omurwekwe neliswilie biali ebilafu shinga obwoya bwamakondi amalafu tserererele, shinga itsaluchi; tsimonitsie natsio tsieengana olumemu Iwomulilo; 15ebilenjebie nibiingana emikasa echiaruutwa niching'inang'ina, shinga echialabibwa mumulilo omululu okwomwirumbi; omwoyokwe nikwingana amayoosi kamatsi amanji. 16Ne yali nende tsinyininyini musaafu mumukhonokwe musaatsa; khandi okhurula mumunwakwe mwarulamwo olukanga olumemu, olwamema tsimbeka tsiombi; mumonimwe namwo nimwingana eliuba nililangaala mumaani kalio.
17Olwa ndamulola ndakwa hamakuluke shinga omufu. Naye niyarakhwo omukhonokwe musaatsa, naboola ari Oraria ta; nisie owambeli, nowokhuhelelesia, 18noubeetsangaho mwoyo; ndali omufu, ne lola, endi mwoyo ebisoni nebisoni, nendi nende ebibohololo bioluumbe nende biemakombe. 19Kho ohandiiche amakhuwa aka oluutsi, nako akaliho, nako akaliikhola olunyuma; 20mbu libiso lietsinyininyini musaafu etsia oluutsi nindi ninatsio mumukhono kwanje musaatsa, neliebichibi musaafu bieitsahaabu bietsitaha. Tsinyininyini etsio musaafu nabamalaika betsikanisa musaafu; khandi ebichibi musaafu bietsitaha netsikanisa musaafu.
Currently Selected:
Obufwimbuli 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
