Obufwimbuli 14
14
Olwimbo lwa abo 144,000
1Mana ndahenga, nindola Likondi tsana ngwoyo, nasinijile khushikulu shiaSayuni; nabandu ebikhumila eshikhumi amakhumi kane nabine halala ninaye, abali nende eliiralie nende eliira liaSamwana nikahandiikwa khubweni bwabwe. 2Mana nimbulila omwoyo okurula mwikulu, nikwingana amayoosi kamatsi amanji, khandi shingana amayoosi komukukumo omukhongo; kata omwoyo okwa ndahulila kweengana okwaboopi bamatungu abanji nibakhupanga amatungu kabwe. 3Nibeemba olwimbo oluyia imbeli weshifumbi shioburuchi, khandi imbeli webili mwoyo ebio bine nende abakofu; ne yabulayo owanyala okhweka olwimbo olwo ta, habula abeenabo ebikhumila eshikhumi amakhumi kane nabine, nibo bonyene abali nibanunulwa mushialo shiosi. 4Bano nabandu abareeyoonoonia nabakhasi ta, shichila nabashisila. Nibo abalondanga Likondi aha atsia hosi. Nibo abanunulwa mubandu, babe abarongole baNyasaye nende beLikondi. 5Kata muminwa chiabwe obubeeyi bwosi shibwanyooleshelamwo ta; babula eshikha.
Aka abamalaika bataru baboola
6Mana ndalola malaika undi, napulukha mwikulu hakari, nali nende injiili yobumeli okhubarumbulila abamenya mushialo, khandi khubuli lihanga noluyia nolulimi nabandu. 7Yalanjisia nomwoyo omukhongo, ari Riitsenje Nyasaye, nimumuheelesia oluyali, okhuba isaa yobuyaasiibwe yulile. Mumwinamile oyo owalonga likulu neshialo neinyanza nende ebinoko biamatsi.
8Mana oundi, malaika wakhabili, nalonda munyumawe, naboola mbu Likwile; Babeli litookho likhongo, elianyweesia amahanga kosi khudivai yobuheyi bwalio, likwile.
9Mana malaika undi, owakhataru, nalonda munyuma wabwe naboola nende omwoyo omukhongo, ari Omundu yesi naba niyeenamila isolo eyo neshifwanani shiayo, naheebwa eshimanyilo khubwenibwe, kata khushikalo shiomukhono, 10kho alanywa khudivai yoburaasi bwaNyasaye eyitsukhwa ikhaya mushikombe shioburimabwe, ne alasaalisilibwa omulilo nomusaala kweshiberiti imbeli wabamalaika abatakatifu, khandi imbeli weLikondi oyo. 11Omwosi kwokhusaalisibwa khwabwe kulatuumuukhanga ebisoni nebisonikata shibalanyoola obuhuluushi bwosi ta, eshilo neshiteere, abeenamilanga isolo eyo neshifwanani shiayo, nomundu yesi ouheebwa eshimanyilo shieliira liayo. 12Hano niho aha obwifwili bwabatakatifu bwenyelungwa, abo abahulilanga amalako kaNyasaye, nibahanda khukasuubilwa khuYesu.
13Mana ndahulila omwoyo okurula mwikulu nikusunga kuri Handiika mbu Nabeikhabi abafu abafwilanga muMwami; Roho aboola mbu Okhurula olwa leelo bahuluushenje khumilimo chiabwe; shichila batsia nebikhole biabwe.
Lichesa lieshialo
14Mana ndahenga, nindola lileesi lilafu ndielo; ne khwileesi elo omundu yali niyeekhaalekhwo owafwana shinga omwana womundu. Yali nende olusimbi Iweitsahaabu khumurwekwe, nende injeso imemu mumukhono. 15Naye malaika undi narula muhekalu, nalanjisia butinyu khu oyo owali niyeekhaale khwileesi, ari Rechekha injesoyo, okhaaye; okhuba induukho yelichesa yakhoola; nalio lichesa lieshialo lilabile nilibira. 16Mana oyo owali niyeekhaale khwileesi nahuyula injesoye khushialo, nashio eshialo nishicheswa.
17Mana malaika undi narula muhekalu eyomwikulu, yesi nali neinjeso imemu. 18Malaika undi khandi narula mushimalilo shiemisango; ne niye ouli nobunyali khumulilo; nalanjisia butinyu khu oyo owali nali nende injeso imemu, ari Rechekha injesoyo imemu, okhalache ebisakanya ebiokhumitsabibu chieshialo; okhuba tsinzabibu tsiachio tsimalile okhwenga. 19Malaika oyo nahuyula injesoye khushialo, nakhalaka tsinzabibu tsieshialo, natsisukuna mushitiinyilo eshikhongo shioburima bwaNyasaye. 20Eshitiinyilo nashio nishiswalilwa elwanyi welitookho; ne mushitiinyilo tsana mwarulamwo amatsayi akayemba okhuula khutsimailo ebikhumi bibili, nikoola khuburambi bwebitiililo bietsifarasi.
Currently Selected:
Obufwimbuli 14: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
