Obufwimbuli 13
13
1Nikusinjila khulukuku lweinyanza.
Tsisolo tsibili
Mana ndalola isolo niyitikulukha niyirula munyanza, niyili nende tsinzika ekhumi nemirwe musaafu; ne khunzika tsiayo bialikhwo ebimwata ekhumi biobwami; khandi khumirwe chiayo, ameera kamanyeko. 2Nayo isolo eya ndalola yafwana shinga ingwe; habula ebilenje biayo bieengana ebieitubu, omunwa nakwo nikwingana okweitalanyi; okuyokha nikuchiheelesia obunyali bwakwo, neshifumbi shiakwo shiobwami, noburuchi obunji. 3Nindola omurwe kwayo mulala nikufwana shinga okwaarwa olukuma okhuula khukhufwa; habula olukuma Iwokhufwa lwali nilwahona; ne eshialo shiosi shiali nishing'ang'aalila isolo tsana. 4Nibakwinamila okuyokha, shichila kwali nikuheelesiye isolo oburuchi bwakwo; nibachiinamila isolo, nibasunga bari Ali heena owingana isolo eyo? Kata ali heena owakhanyala okhuchiseera?
5Mana isolo yaheebwa obwiyangu okhuboola nomunwa kwayo amakhuwa amakhulumamu nende amanyeko; niyiheebwa oburuchi bwemiesi amakhumi kane nachibili. 6Niyichinga omunwa niyisindobola amanyeko khuNyasaye, niyinyeka eliiralie, neshimenyoshie, kata nende abo abamenyanga mwikulu. 7Khandi yafuchiililwa okhuseera abatakatifu bosi nokhubahula; niyiheebwa oburuchi khubuli luyia nabuli bandu nabuli lulimi nabuli lihanga. 8Nabo bosi abamenya mushialo balachiinamila, buli mundu owa eliiralie lirahandiikwa mushitabu shiobulamu shieLikondi elieerwa okhurula khumusuule ta.
9Omundu yesi ouli namarwi, ahulile. 10Omundu yesi oukhoyeele obubohwi, atsie mububohwi. Omundu yesi owira nolukanga, khatimba yeerwe nolukanga. Hano niho aha obwifwili nobusuubili bwabatakatifu bwenyelungwa.
11Mana ndalola isolo yindi khandi niyitikulukha niyirula mwiloba; nayo yali netsinzika tsibili shingana likondi; ne okhuboola yaboola shinga okuyokha. 12Nayo niyiikhoonyela oburuchi bwosi bweisolo yambeli eyo, niyili imbeli wayo. Niyihachilisia eshialo nende abamenyangamwo okhwinamila isolo yambeli eyo, eya olukuma lwayo Iwokhufwa lwali nilwahona. 13Niyikhola ebilolelo ebikhongo, kata okhuula khukhwisia omulilo khushialo okhurula mwikulu, imbeli wabandu. 14Niyibakaatia abamenya mushialo khulwa ebilolelo ebia yafuchiililwa okhukhola imbeli weisolo; niyiboolela abamenyanga mushialo okhuchikasilia isolo eyo eshifwanani, eyo eyaremwa nolukanga, nebutswa yishilinji mwoyo. 15Khandi niyifuchiililwa okhushiheelesia omuuya eshifwanani shieisolo eshio, mbu eshifwanani shieisolo shiboole, khandi mbu shichile abo abareenamila eshifwanani shieisolo ta, beerwe. 16Khandi niyihachilisia bosi, abatuutu nabakhongo, abayinda nabamanani, abeebule nabasumba, mbu baheebwe eshimanyilo mushikalo shiomukhono musaatsa kata khubweni; 17khandi mbu omundu yesi arafuchiililwa okhukulanga kata okhukusinjia ebindu ta, habula ouli neshimanyilo tsana, niIwo eliira lieisolo kata isabu yeliira liayo. 18Hano niho aha obuchesi bwenyelungwa. Ouli omuchesi abasie isabu yeisolo; isabu yene yisinjilila eliira liomundu, khandi tsisabu tsietsinyukuta tsihela ebikhumi bisasaba amakhumi kasasaba natsisasaba.
Currently Selected:
Obufwimbuli 13: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
