Obufwimbuli 12
12
Omukhasi nende okuyokha
1Mana eshilolelo eshiamakana shialolekha mwikulu; mbu omukhasi owali niyeefwalile eliuba, omwesi nikuli hasi wamakuluke, ne khumurwe yali nolusimbi Iwetsinyininyini ekhuminatsibili 2Ne yali nali inda; ne niyayula, nalumungwa okhwibula, nasaalila khulwa inumwa. 3Mana eshilolelo shiamakana shindi nashio nishilolekha mwikulumbu lola, okuyokha okukhongo okwakhanyu ngwokwo, nikuli nemirwe musaafu nende tsinzika ekhumi; ne khumirwe chiakwo bialikhwo ebimwata musaafu biobwami. 4Omushila kwakwo nikukhwesa eshitonye shiokhutaru shietsinyininyini etsiomwikulu nikutsisukuna khushialo; okuyokha nikusinjiia imbeli womukhasi oyo owali nal i okhwibula, mbu niyakheebula, kulie omwanawe. 5Omukhasi niyeebula omwana omusiani, oyo ouliruka amahanga kosi neindabushi yeshibia; naye omwanawe yakaamwa nayilwa ewaNyasaye, khandi khushifumbishie shioburuchi. 6Omukhasi naye niyeelukha natsia mushitsiimi ewa yali nahabunduwe aha Nyasaye yamukasilia, mbu aliisilibungweyo tsindaalo eshikhumila ebikhumi bibili namakhumi kasasaba.
7Mana lihe nilibaho mwikulu; mbu Mikaeli nabamalaikabe nibaseera okuyokha. Okuyokha nakwo nikubaseera, halala nabamalaika bakwo; 8habula shibahula ta, kata habundu wabwe shihatong'akhwo mwikulu khandi tawe. 9Nakwo okuyokha okukhongo okwo nikuhangulusibwa hasi; inzokha eyo yakhale, oyo oulangwa mbu Ibilisi, khandi Setani, omukaatii oukaatinjia eshialo shiosi; yahangulusibwa hasi khushialo, abamalaikabe nibasukunwayo halala ninaye.
10Mana ndahulila omwoyo omukhongo mwikulu, nikuboola mbu Bulaano buno obuhonia bwaNyasaye weefwe buulile, nobunyalibwe nobwamibwe, khandi nende oburuchi bwaKristowe; okhuba omwinjilili wabaana beefwe wasukuunwe hasi, oyo oubeenjililanga imbeli waNyasaye weefwe, eshilo neshiteere. 11Ne bamuhula khulwa amabanga keLikondi, khandi khulwa likhuwa liobuloli elia barumbuule; ne shibaheela obulamu bwabwe ta, kata okhuula khukhufwa. 12Khulwako, wikhoye, iwe Likulu, nineenywe abamenyangamwo. Woowe khwinywe, eshialo nende inyanza! Okhuba Setani wayeeshile, weenjiile mwinywe, nali noburima obunji, namanyile shinga induukhoye olwa yili inyimbichiti.
13Ne olwa okuyokha kwalola shinga olwa kwahangulusibwa khushialo, kwamusakania omukhasi oyo owali niyeebuule omwana omusiani. 14Mana omukhasi tsana yaheebwa tsimbaha tsibili tsieinditsu ikhongo eyo, mbu apulushe atsie mushitsiimi, habunduwe ewa aliisilibungwa eshise nende ebise nende inusu yeshise, arule imbeli weinzokha. 15Inzokha yarusia amatsi mumunwa kwayo shinga omwalo, inyuma womukhasi, mbu kamuyuule nemikhula chiako. 16Ne eshialo shiamuhabina omukhasi, eshialo nishiasama omunwa nishimila omwalo okwo okwa okuyokha kwarusia mumunwa kwakwo. 17Nakwo okuyokha nikutiililwa omukhasi oyo oburima, nikurulaho nikutsia okhuseera abaanabe bandi bosi, abahulilanga amalako kaNyasaye nibahanda khumakhuwa akarumbulwa khu Yesu.
Currently Selected:
Obufwimbuli 12: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
