Yeremia 7
7
Kasia tsinjila tsieenywe nende ebikkole bieenywe
1Likhuwa elieetsela Yeremia okhurula khuMWAMI ndielino; mbu 2Sinjila mushilibwa shieinzu yOMWAMI, norumbulilayo likhuwa lino, ori Hulile likhuwa liOMWAMI, inywe mwesi baYuda abeenjilanga mubilibwa bino okhwinamila OMWAMI. 3Kano niko aka OMWAMI omwene mahe Nyasaye waIsiraeli, aboola; mbu Kasie tsinjila tsieenywe nende ebikhole bieenywe, mana ndalamumenyia habundu hano. 4Murasuubilila amakhuwa kobubeeyi, mbu Yino neihekalu yOMWAMI, ihekalu yOMWAMI, ihekalu yOMWAMI, ta.
5Shichila nimuba nimukasilia elala tsinjila tsieenywe nebikhole bieenywe; nimuba nimukhalachilanga habwene amakhuwa hakari womundu nowashie; 6nimuba nimuramiinanga abarende, nabaana ababisandu, nabakhasi abalekhwa, kata okhwebeenia amabanga kababula eshikha habundu hano, kata okhulonda khubanyasaye bandi nimwichemela abeene amabii, ta; 7kho ndalamumenyia habundu hano, mushialo eshia ndaheelesia abakuuka beenywe, okhurula khale neinziayo.
8Lole, musuubililanga amakhuwa kobubeeyi; ne kabulamwo obukhoonyi. 9Kho mwitsa okhwiba, nokhwira, nokhuheya, nokhwitsuba akobubeeyi, nokhusambila Baali amalesi kelibuuliesi, nokhulonda khubanyasaye bandi aba muramanya khale ta, 10mana nimwitsa okhusinjila imbeli wanje munzu yino, eyilangwa khuliira lianje, nimusunga mbu Khuhonile; mana nimushikholanoa akebismyo bino biosi, noho? 11Inzu yino eyilangwa khuliira lianje yikhakwile imbinga yabanuuli mumoni tsieenywe noho? Lole, isie omwene engaluutsi; nilwo olwa OMWAMI aboola. 12Mutsie bulaano, mutsie habundu wanje ahalinji eShiilo, ewa ndamenyinjia eliira lianje olwambeli, mulole shinga olwa ndahakholela khulwa obubii bwabandu banje Isiraeli. 13OMWAMI aboola mbu Ne bulaano, okhuba mwakholile ako kosi, nasi nimuboolelanga, nimboolanga khale ninumilila okhuboola, nebutswa nimurahulilakhwo ta; nimulanga, nebutswa nimurafuchila ta; 14niko akachila ndalakholela inzu eyilangwa khuliira lianje, eya mwisiikanga, nende habundu tsana aha ndamuheelesia inywe nabakuuka beenywe, shinga olwa ndakholela Shiilo. 15Ndalamusukuna murule mumoni tsianje, shinga olwa ndasukuna abaana beenywe, mbu olwibulo lwosi lwaEfuraimu.
Oburima bwaNyasaye khubwinamili bwabanyasaye
16Khulwako, orasabila abandu bano, kata okhuchinga omwoyo kata lisaayo khulwabo, kata okhubalaamila ewanje ta, okhuba shindalakhuhulila tawe. 17Shioluutsi aka bakholelanga mumataala kaYuda nomumihanda chieYerusalemu? 18Abaana bareenya tsikhwi, basamwana babwana omulilo, abakhasi nabo nibanyooba eshinokho, okhuteeshela omuruchi weshikhasi owelikulu emikaate, nokhutsushila abanyasaye bandi emisango chiokhutsushila, okhunyasia. 19OMWAMI areeba mbu Kho nisie owa banyasinjia noho? Shibeenyasia abeene, nibeehambia tsisoni bario? 20Khulwako, kano niko aka Omwami NYASAYE aboola; mbu Lole, oburima bwanje nobululu bwanje bulasundulilwa habundu hano; khubandu, khumiruko, khumisaala echiomubulimo, nokhubiamo bieliloba; bulaakha nibulasimikha ta.
AbaYuda bakuumwa khulwa induliyabwe
21Kano niko aka OMWAMI omwene mahe, Nyasaye walsiraeli, aboola; mbu Mutasekhwo emisango chieenywe emisambe khumisango chindi, mulie inyama yachio. 22Okhuba shindaboolela abakuuka beenywe kata okhubalaka, khunyanga eyo olwa ndabarusia mushialo shiaMisiri, khumakhuwa kemisango emisambe kata emisango chindi ta; 23habula lino nilio elia ndabalaka; mbu Hulilenje omwoyo kwanje, nasi ndalabeetsanga Nyasaye weenywe, neenyu mulabeetsanga abandu banje; muchendenje khunjila yosi eya emulaka, mana mukaasenje. 24Nebutswa shibahulila kata okhureka amarwi ta; habula bachenda mubuchesihanii bwabwe abeene, nomubutinyu bwemioyo chiabwe emibii, nibakalukha inyuma, oburatsiililila imbeli ta. 25Okhurula khunyanga eyo olwa abakuuka beenywe barula mushialo shiaMisiri okhuula olwa leelo, ndamurumilenje abasumba banje bosi abanabii, nimbarumanga khale nilumilila khatsotselo okhubaruma; 26nebutswa shibayambulila kata okhureka amarwi ta, ne boomia amakosi; bakhola obubii okhushila abakuuka babwe.
27Nawe, olababoolela amakhuwa kano kosi; nebutswa shibalakhurechela amarwi ta; khandi olabalanga, nebutswa shibalafuchila ta. 28Olabasunjila mbu Lino nilio lihanga elirahulila omwoyo kwOMWAMI Nyasaye wabwe, kata elirachesiha ta; obwatoto busishile; bukhaliishe muminwa chiabwe.
29Beka liswalio, olisukune;
khupa tsimbungu khubutenje obukhaya bwebikulu;
okhuba OMWAMI waloba olwibulo lwoburimabwe,
khandi wabalekha.
30OMWAMI aboola mbu Okhuba abaana baYuda bakholile akali amabii mumoni tsianje; barenjeeshe ebisinyo biabwe munzu eyilangwa khuliira lianje okhushionoonia. 31Boombashile habundu heechingu hosi haTofetsi, eyili mwibanda liomwana waHinomu, okhubisia abaana babwe abasiani nabakhaana mumulilo; ako shindalakakhwo, kata shikeenjila mumapaaro kanje ta. 32OMWAMI asunga mbu khulwako, lola, tsindaalo tsiitsanga olwa lirakhalangwe mbu Tofetsi, kata Libanda liomwana waHinomu, khandi ta, habula Libanda liObwiri; okhuba balayabilanga muTofetsi, shichila habundu undi halabulaho. 33Emilambo chiabandu bano nachio chilakwa ebiliibwa biamanyonyi akomwikulu nende tsisolo etsiomushialo; kata shialibaho outsiilusia ta. 34Mana ndalaakamia mumataala kaYuda nomumihanda chieYerusalemu omwoyo kwokhwikhoya nomwoyo kwobutsatsahaafu, omwoyo kwomwene shiselelo nomwoyo kwomweha; okhuba eshialo shilakwa eshikhaya.
Currently Selected:
Yeremia 7: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
