Yeremia 6
6
Akeetsa okhukwila Yerusalemu nende Yuda
1Inywe abaana baBenyamini, mwilushe mbu mwihonokoshe,
okhurula muYerusalemu!
Khupe olwika eTekoa,
nimuchinguula eshilolelo khuBetsi-hakheremu.
Okhuba obubii burumbile enotsi, nende obumululi obukhongo.
2Omukaasu oyo, omutorotoro, mbu omukhaana waSayuni,
ndalamutibia.
3Abaayi balamwitsila nebiayo biabwe;
balakhoma amaheema kabwe nibamufumbila;
balaayanga, buli mundu habunduwe.
4Kasie lihe okhumuseera;
chende khutikulusheyo okhumwinjilila mushiteere!
Woowe! Eshialo shiilukhana,
ebiiniini biamungoloobe birambiihe.
5Chende khutikulusheyo okhumwinjilila mushilo
khumulule tsinzutsie tsikhulundu.
6Okhuba kano niko aka OMWAMI wamahe aboolile,
mbu Rikande emisaalachie,
nimuswalila Yerusalemu eshituuli okhuliyinga.
Lino nilio litookho elikwanile okhukuumwa;
akali mulio nakobusandii konyene.
7Shinga liyabo olwa liikhasinjia amatsi kalio,
nindio litookho lino liikhasinjia obubii bwalio;
akamayukuba nobumululi kahuliliishilanga muye;
ebibeetsanga imbeli wanje obushia nobulwale namafumire.
8Ochesihale, iwe Yerusalemu,
endeshe okhwahukhasibwa ninawe;
endeshe okhukhukwisia likunda,
mbu eshialo eshibula abamenyamwo.
9Kano niko aka OMWAMI omwene mahe aboola;
mbu Rulumila elala omusikalo kwaIsiraeli shinga omutsabibu;
omukhonokwo kwiluule shinga omunochi wetsinzabibu khumasaka kakwo.
10Nibeena aba nemboolele nimbachesiyia mbu bahulile?
Lole, amarwi kabwe keenga amasinde;
shibanyala okhureka amarwi ta;
lole, likhuwa liOMWAMI libakwiliile eliokhuchaywa;
kata shibalisangaalila ta.
11Niko akachila enyaliishe obululu bwOMWAMI;
enjoonyile okhubusibila.
Busundule khubaana abali khunjila,
nokhumukhung'aano kwabasooliili bosi.
Omusaatsa nomukhasiwe balabukulwa bombi,
abakofu nende abo aba tsindaalo tsiabwe tsihelile.
12Tsinzu tsiabwe natsio tsilakalukhasibwa khubandi,
emikunda chiabwe nabakhasi babwe halala;
okhuba ndalanyiila omukhono kwanje okhuyinga abamenya mushialo,
nilwo olwa OMWAMI aboola.
13Okhuba okhurula khubashila obutuutu okhuula khubashila obukhongo
buli mundu alangushilanga inganga yobukaatii
okhurula khumunabii okhuula khumukuhani buli mundu akholanga akobukaatii.
14Khandi bahoniye amafumire kabandu banje ikulu butswa,
nibaboola mbu Omulembe, omulembe, ne omulembe nikubulayo.
15Batiilwa tsisoni olwa bakhola akebisinyo noho?
Tawe, shibatiilwakhwo tsisoni,
kata shibanyala okhufwimbwa omurwe ta.
Niko akachila balakwa mubakwitsanga;
olwa enzitsa okhubakuuma balakwisibwa;
nilwo olwa OMWAMI aboola.
16Kano niko aka OMWAMI aboola;
mbu Sinjile khutsinjila, mulole;
reebe akemihanda chiakhale,
mbu injila indayi yili heena? Mana muchendekhwo,
ne mulanyoola obuhuluushi bwemioyo chieenywe.
Nebutswa basunga mbu Shikhulachendakhwo ta.
17Mana niraho abalindi khwinywe,
bari Reche amarwi khumwoyo kwolwika.
Nebutswa basunga mbu Shikhulareka amarwi ta.
18Khulwako, hulile, inywe amahanga,
nimumanya, inywe abomukhung'aano, akeetsa okhubakwila shinga olwa kali.
19Hulila, iwe eshialo shiosi;
lola, ndalakhupia abandu bano khushibii,
nashio nebiamo ebia amapaaro kabwe kaamanga;
okhuba shibarechelesiye amakhuwa kanje ta;
ne amalako kanje nako, bakalobile.
20Obubaane bunzitsilanga okhurula eSheba khulwa shiina?
Kata olusi Iweshing'aari okhurula khushialo shiehale?
Emisango chieenywe emisambe shichifuchiilikha,
kata emisango chindi shichinjamisia ta.
21Khulwako, kano niko aka OMWAMI aboola;
mbu Lole, ndalara imbeli wabandu bano ebiisichirasio;
abaana nende basaabwe bosi baleesichiralakhwo;
omumenyani nomwitsa bosi balasikha.
22Kano niko aka OMWAMI aboola;
mbu Lole, oluyia lwabandu beetsanga nibarula mushialo shienotsi;
lihanga likhongo liyakulwa okhurula khushihesi shieshialo.
23Batiila obuyingo nelifumo;
nabaraasi, ababula tsimbabasi;
amakhu kabwe kahoola shinga inyanza;
baniina khutsifarasi, nibachenda,
nibeeyanzile shinga omundu outsia mwihe okhukhuyinga, iwe omukhaana waSayuni.
24Khuhuliile akeifuma yabwe;
amakhono keefwe katubukha obusaalili bukhutiilile;
inumwa shinga eyomukhasi owibula.
25Orarula okhutsia ebulafu kata okhuchenda khunjila ta;
okhuba luliho olukanga mumukhono kwomusuku;
oburisii buliho tsimbeka tsiosi.
26Iwe omukhaana wabandu banje,
wibohe tsinnubo tsiamakunia,
nokalakala mwikoshe;
wikhuule shinga oufwikva omwana omuteelwa,
tsimbungu tsindulu muno;
okhuba outibia alakhwitsila meetsukhana.
27Ndakhukholile obe omucheli nomuteemi mubandu banje
mbu omanye injila yabwe nochiteema.
28Bosi nabakhayi abeinumba; bachendachendanga nibachiikha;
bali omukasa butswa neshibia bosi bakholanga akobumayaanu.
29Omukuba kuhuutsa obutinyu;
amasasi kahweele mumulilo;
batsiilililanga okhutsienula, ne shiabula;
okhuba amamuma shikeelwamwo ta.
30Balalangwa mbu ifeetsa eyalobwa;
okhuba OMWAMI wabalobile.
Currently Selected:
Yeremia 6: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
