Isaya 35
35
Abandu baNyasaye okhukalusibwa habwene
1Eshitsiimi nende eshialo eshiumu shilasangaala,
khandi eshitsiimi shiomuyeshe shileekhoya nishimulikha shinga litaanye.
2Shilamulikha muno, nishiikhoya omwikhoyo nende okhwimba;
shilaheelesibwa oluyali lwaLebanoni,
nende obukhulundu bwaKarameli nende Sharoni;
yaho hosi halalola oluyali lwOMWAMI,
obukhulundu bwaNyasaye weefwe.
3Tinyisie amakhono akatamba amaani,
nimuumia amasikamo amateshele.
4Sunjile abeenabo aba emioyo chiabwe chiriitsanga,
mbu Mwitinyie, murarie ta;
lole, Nyasaye weenywe aleetsa okhumala eshikwoli,
nende omurungo kwaNyasaye;
aleetsa namuhonia.
5Habwenaho tsimoni tsiababofu tsilatimbusibwa,
khandi amarwi kabasilu kaleekulwa.
6Habwenaho omundu omulema alaruuma shinga eshitsusu,
khandi olulimi Iwomusilu luleemba nilusangaala;
okhuba mushitsiimi amatsi kalafututukha,
nende emichela mushitsiimi shiomuyeshe.
7Khandi omuyeshe okung'inang'ina shiamatsi kulakwa litiba,
nende liloba lihangalafu, tsisebele tsiamatsi;
mushimenyo shiamabwe, ewa kakonanga,
bulabamwo obunyasi nende olusi nende amatundu.
8Omuhanda kulabayo, nakwo kulalangwa mbu Injila yObutakatifu;
abeshifwabwi shibalabirakhwo tawe;
abachendi, kata nibali abasilu, shibalakorakhwo ta.
9Shiyilabaho italanyi yosi, kata isolo yosi imbalaba shiyilachendelakhwo ta;
shitsilanyoolekhakhwoyo ta;
ne abanunulwa nibo abalachendelayo.
10Abanunule bOMWAMI balachelela,
nibeetsa eSayuni nibeemba;
nokhwikhoya khwobumeli khulaba khumirwe chiabwe;
balanyoola obusangaafu nende omwikhoyo,
neshibeela nende okhushenya bilahwayo bwangu.
Currently Selected:
Isaya 35: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
