Abaheburania 11
11
Obusuubili
1Obusuubili nibwo obumanyi bwatoto bwakeenako aka khunaayanga; nibwo obulolosii bwakeenako akaralolekha ta. 2Nibwo obuchila abandu bakhale bafumanga.
3Khulwa obusuubili khuhulilanga bulayi shinga eshialo olwa shialongwa nelikhuwa liaNyasaye, mbu ebilolekhanga biarula mubindi ebiralolekhanga ta.
4Khulwa obusuubili Abeli yamalila Nyasaye omusango omulayi okhushila okwaKaini; ne khulwakwo yamanyikha mbu nomulunjishi, Nyasaye naye namurumbulila akobuloli khulwa ebihaanwabie; khandi khulwako ashiboolanga, kata niyafwa.
5Khulwa obusuubili Enoka yahuyibwa mbu aralola okhufwa ta; shiyanyoolekha ta, shichila Nyasaye yali namuhuyiye. Okhuba olwa yali narashiahuyibwa ta yali niyamanyikha mbu amuchamisinjia Nyasaye; 6ne harali obusuubili shilinyalikha okhumuchamisia ta; shichila owitsila Nyasaye akhoyile okhusuubila mbu aliho, khandi mbu niye Khakaba oubakabilanga abamukhaaba.
7Khulwa obusuubili, olwa Noa yachesiyibwa naNyasaye khumakhuwa akali nikashili okhulolekha, yamuria, niyoombakha isafina, mbu abomunzuye bahonibwe bario. Khulwabwo yakhalachila abeshibala eshiina, niyeekhola omulaame wobulunjishi oburula mubusuubili.
8Khulwa obusuubili, olwa Aburahamu yalangwa yahulila, narula natsia habundu aha yali nali okhuheebwa habe obulaamebwe; narula ario, naramanyakhwo ewa atsia ta. 9Khulwa obusuubili yeekhola omumenyi mushibala eshia yasuubisibwa, shinga ouli mushibala eshirali eshishie ta, namenyanga mumaheema, halala nende Isaka naYakobo, aba yali niyalaamilwa ninabo halala akobusuubisie tsana; 10shichila yali nalindiililanga litookho elo elili nomuse kwalio, elia omukasii walio nomuumbashi walio ni Nyasaye.
11Khulwa obusuubili kata Sara yesi yaheebwa obunyali okhuhela inda, kata olwa yali nabirile emiyikachie, okhuba yalola mbu oyo owasuubisia nomwisiikwa. 12Ne khulwako, okhurula khumundu mulala, owali nali shinga omufu, barulamwo abanji muno, obunji shinga obwetsinyininyini etsiokhwikulu, kata shinga omuyeshe okuli khulukuku Iweinyanza, okurabalikha ta.
13Abo bosi bafwa nibasuubilanga, nibarashianyoola akobusuubisie ta; habula nibakaluutsi nibakashiesia nibashili ehale ninako, nibeeyama shinga olwa bali abacheni khandi abarende mushialo. 14Okhuba ababoolanga akafwana kario balolosia bario ebulafu shinga olwa bakhaabanga eshialo eshili eshiabwe abeene. 15Nibaba nibali nibakheetsuliile mumioyo chiabwe eshialo tsana eshia barulamwo, khane bakhanyoolile obwiyangu okhukalukhayo. 16Nebutswa bulaano beekomba eshialo shindi eshishila obulayi, nishio eshiomwikulu; ne niko akachila Nyasaye narabafwimbilwa omurwe ta, okhulangwa mbu niye Nyasaye wabwe; shichila wabakasiliye litookho.
17Khulwa obusuubili, olwa Aburahamu yateemwa yahaana omwanawe Isaka. Ye owali niyanyoola akobusuubisie nokhwikhoya yali nali okhuhaana omwanawe omuteelwa; 18ne niye owaboolelwa ari Olwibulolwo lulikulishilwa muIsaka. 19Yasuubila mbu Nyasaye anyala okhulamusia kata okhurula mubafu; ne yafwana shinga owamukalusilibwa okhurula mubeenabo.
20Khulwa obusuubili Isaka yasabila Yakobo naEsau ikhabi, mumakhuwa akali nikali okhwitsa. 21Khulwa obusuubili Yakobo, olwa yali nafwitsanga, yabasabila ikhabi abaana baYusufu, mulala mulala; niyeenamila Nyasaye, niyeeletile ' khumurwe kwomutungakwe. 22Khulwa obusuubili Yusufu, olwa yali nali ahambi khushiakamoshie, yarumbula akokhwinyokha khwabaana baIsiraeli, nalachilisia akamakumbake.
23Khulwa obusuubili, olwa Musa yeebulwa abeebulibe bamubisa emiesi chitaru, shichila balola shinga olwa yali omwana welikondo lilayi; kata shibaria lilako liomuruchi ta. 24Khulwa obusuubili, olwa Musa yali nakhulile yakaana okhulangwa mbu omwana womukhaana waFarao; 25nebutswa yalobola okhukholelwa amabii halala nende abandu baNyasaye, okhushila okhusangaalila emienya chiobwonooni echihweetsangaho. 26Yalola obunyekwi bwaKristo mbu nobuyinda obushila amabiikho kaMisiri; shichila yalindiiliIanga omurungo okwo okuhela habwene. 27Khulwa obusuubili yarula eMisiri, nararia oburima bwomuruchi ta; natinya shinga oumulola oyo ouralolekha tawe.
28Khulwa obusuubili niye owakhola akaPasaka, nokhumiitsal amalasile, mbu owonooninjia abeekulanda aleshe okhubatiilakhwo. 29Khulwa obusuubili babirila muNyanza Inzakhanyu shinga abachenda khwiloba eliumu; abaMisiri nabo olwa bateema okhukhola bario bamilishilamwo.
30Khulwa obusuubili olukoba lwaYeriko lwalikulukha olwa lwali nilubotokhaanwe tsindaalo musaafu. 31Khulwa obusuubili omutamba Rahabu shiyafwila halala nabakhayi ta, shichila yali niyeenjisiye abaluuri balia nomulembe.
32Kata nemboole shiina khandi? Shichila embula eshise eshihela okhutoonya akaGideoni, naBaraki, naSamusoni, naYefitsa; akaDaudi naSamweli nende abanabii bosi. 33Bo khulwa obusuubili bahula oburuchi bundi nobundi; baraho ebiina biatoto; banyoola akali nikasuubisibwa; basunia tsitalanyi eminwa; 34basimia obunyali bwomulilo; beehonokokha mutsinganga; mubuteshele bakufuhasibwa; beekhola abalulu mwihe; beelusia amahe kabasuku. 35Abakhasi bakalusilibwa abafu babwe nibalamusiibwe; abandi basaalisibwa, nibarafuchiilila okhulekhuulwa ta, mbu banyoole obulamushi obushila obulayi. 36Abandi beefwila okhunyokhoosibwa nokhunyekwa, kata nende ebibohelo nende icheela. 37Balaswa namachina, baarasibwa nemisumeno, bateemwa, beerwa nende tsinganga; bachendanga nibeefwalile amaseelo kamakondi, namaseelo ketsimbusi; nibaba abahari, nibasandibwa, nibakhupibwa khushibii; 38batiimatiimanga mubitsiimi nomubikulu nomutsimbinga nomumeena akomwiloba. Bali abandu aba abeshialo barakwanila ta. 39Abo bosi bafumanga khulwa obusuubili bwabwe; ne shibamala banyoole akobusuubisie tsana ta. 40Shichila Nyasaye yali nakasiye likhuwa elishila obulayi khulweefwe, mbu bo baleshe okhukholwa abalamba harali nineefwe ta.
Currently Selected:
Abaheburania 11: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
