Abaheburania 10
10
1Amalako kali lihunjesil butswa liamalayi ako akali okhwitsa, niyirali likondo liene liamakhuwa tsana ta. Yikalushilanga okhumala emisango milala, omuyika buli muyika; ne niyiikhoonyelanga echienechio shiyinyala okhubakhola abalamba abo abasitanga ahambi tawe. 2Nikaba nikakhanyaliishe, khane shichiakhaakaame okhumalungwa? Okhuba abamwinamiIanga Nyasaye abo, nibakhamala okhutiswa, shibakheeluutsinji mbu nabebionoono khandi ta. 3Nebutswa muchienechio mulimwo eshiitsulilo shiebionoono omuyika buli muyika. 4Shichila shikanyalikha tawe, amalasile ketsisurusi naketsimbusi okhuyiniaho ebionoono ta.
5Ne niko akachila ye, olwa yeetsa mushibala, yasunga ari
Emisango nende ebihaanwa, shiobienyanga ta;
ne wayangasilia omubili.
6Shiosangaalilanga emisango emisambe emiIamba kata echiobwonooni ta.
7Mana nisunga mbu Lola, enzitsile okhukhola aka wenya, e Nyasaye,
shinga olwa kambandiichilwa mushitabu eshikanye.
8Olwambeli yaboola mbu Emisango, nebihaanwa, nemisango emisambe emilamba, nende echiobwonooni, shiobienyanga ta, kata shiobisangaalilanga ta; ne nibio ebihaanungwa shinga olwa amalako kalaka. 9Mana aboola, mbu Lola, enzitsile okhukhola aka wenya. Mbu ayininjiaho eliambeli lilia, mbu mana asinjisieho eliakhabili. 10Okhwenya khukhwe tsana nikhwo okhwakhwahula, khulwa okhuhaanwa khwomubili kwaKristo lulala lwenolwo lwonyene.
11Kata buli mukuhani asinjilanga inyanga buli nyanga nakhalabana nende okhumala akhandi akhanji emisango milala chiatsana echiranyala okhuyiniaho ebionoono nahatuutu ta; 12habula ye, olwa yali namalile omusango mulala khulwa ebionoono okhuula khubisoni nebisoni, yamala yeekhale khumukhono omusaatsa kwaNyasaye; 13nokhurula olwenolwo alindiililanga okhuula olwa abasukube baba nibakholwa aba alambisiakhwo ebilenje. 14Shichila khulwa obuhaani bulala, wabakhola abalamba okhuula khubisoni nebisoni abeenabo abaahulwa. 15Kata Roho Omutakatifu yesi akhurumbulilanga akobuloli; okhuba waboola, ari
16Omwami yaboola mbu
Yino niyo indakano eya ndalalakana ninabo olunyuma lwetsindaalo etsio;
ndaleenjisia amalako kanje mumioyo chiabwe,
kata ndalakahandiika mumayililisio kabwe;
mana nameeta, mbu
17Kata ebionoono biabwe netsimbii tsiabwe shindalabiitsulilakhwo khandi ta.
18Ne aha obulesheli bwa ebio buli, obumali bwemisango khulwa obwonooni shibushilikhwoho ta.
Khusite ahambi, nikhutinya khubunaayi
19Kho mana, baana beefwe, olwa khuumanga ikholo okhwinjila habundu ahatakatifu khulwa amabanga kaYesu, 20nikhulonda khunjila imbia khandi inamu eya yakhwikulila, eyibirila mungubo ishinga, niyo omubilikwe; 21khandi olwa khuli nende omukuhani omukhongo ouli hekulu khukeinzu yaNyasaye, 22khusitekhwo ahambi, nemioyo chiobwatoto mubwitsulu bwobusuubili, emioyo chieefwe nichimiitsilwakhwo nichisiiywa nichirusibwamwo tsiyemi tsimbii, emibili chieefwe nachio nichiosilibwa amatsi ameeleleshe. 23Khutinye khukobunaayi obwo obwa khwiyamanga, buleshe okhusikukha, shichila owakhusuubisia nomwisiikwa. 24Khuyililisaninjiekhwo, nikhuyakulana khubuheeli nebikhole ebilayi; 25khuralekhanga okhukhung'aana halala, shinga abandi olwa bayinya a okhukhola ta, habula mbu khuchesihaninjie, nokhushila muno olwa mulolanga induukho eyo niyisitanga ahambi.
26Shichila nikhuba nikhwonoonanga netsiyemi olwa khumalile okhumanyibwa akobwatoto shinga olwa kali, shikushiliho omusango khulwa ebionoono khandi ta, 27habula okhulindiilila eshiina noburii obukhongo, nende omulilo omuIulu okulasambanga abo abamufukula Nyasaye. 28Omundu oufwolile amalako kaMusa yeerungwa narabeelwa tsimbabasi ta, khulwa oburumbusi bwabaloii babili bataru; 29ne mulola murie? Shiakhoyile okhukuumwa okhushila muno, oyo owaseenela Omwana waNyasaye hasi wamakuluke, nakulikha amabanga keindakano akachila omwene niyaahulwa mbu nomusilo. Nanyeka Roho wobukoosia? 30Shichila khumanyile ye owaboola, mbu Eshikwoli neshianje, nasi ndilirunga; kata khandi, mbu Omwami alayaasia abandube. 31Nelikhuwa liokhuriisia muno, okhukwa mumukhono kwaNyasaye oubeetsanga mwoyo.
32Mwitsulile tsindaalo tsiambeli tsilia, nimwakhamala okhukhosibwakhwo obulafu, etsia mweefwilamwo obulwani obunji bwobusaalili. 33Elubeka, mwabakalwa habulafu khukhunyekwa nokhusakanibwa; nelubeka, mwasanjilana nende abakholelungwa bario. 34Shichila mwababeelelela abali mumbohe, nimwifwila nobusangaafu okhuyaaywa emiandu chieenywe, nimumanyile mbu mukari mweenywe muli nemiandu chindi echichishila, khandi echiyindilanga. 35Kho mureebala butswa ikholonyumu eya muli ninayo ta; yileeranga omurungo okuhela habwene. 36Okhuba kamukhoyeele okhwisimilisia, mbu olwa muba nimukholile aka Nyasaye yeenya, munyoole ako aka mwasuubisibwa.
37Shichila shishili eshise eshitiiti butswa,
mana omwenoyo owitsa aleetsa, nareshinda ta.
38Omulunjishi wanje alabeetsanga mwoyo khulwa obusuubili,
nebutswa naba naria niyeebeeya omwoyo kwanje shikumusangaalila ta.
39Ne ifwe shikhuli khubo abaria nibeebeeya ta, habula khubo abali nobusuubili abahonia emioyo chiabwe.
Currently Selected:
Abaheburania 10: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
