Genesis 49
49
Yakobo yarumbula akakhakwila abaanabe mundaalo ersili okhwitsa
1Mana Yakobo nabalanga abaanabe, nasunga mbu Mwikhung'aasie halala, mbu mana emuboolele amakhuwa akalimukwila mundaalo tsiolunyuma.
2Mwikhung'aasie, muhulile, inywe abaana bayakobo;
mumurechele Isiraeli seenywe amarwi.
3Reubeni, niwe omwana wanje owambeli,
amaani kanje, nolubu Iwetsingufu tsianje;
oushilaasia oluyali, noushilaasia obunyali.
4Olwa obililanga shinga amatsi, shiolabalilwa obushilaasii obwo ta;
shichila waniina khubulili bwaso;
wabwonoonia. Yaniina khubukono bwanje!
5Simeoni nende Lawi nabomunda ndala;
tsinganga tsiabwe nebilasanilo biamahababa.
6Iwe omwoyo kwanje, oreenjila mumuse kwabwe ta;
nawe oluyali lwanje, oroongana nende libukana liabwe tawe.
Okhuba muburima bwabwe beera omundu,
nomubuchiyikhani bwabwe barema ing'ombe omusi.
7Oburima bwabwe nobwoluswa, okhuba bwali obululu;
nende oburindi bwabwe, okhuba bwabula tsimbabasi.
Ndalabakabula muYakobo,
nimbasalaasia muIsiraeli.
8Yuda, niwe owa abaana beenywe baliitsoomia;
omukhonokwo kuliba mwikosi liabasukubo;
abaana baso nabo balakhwinamila.
9Yuda niye omwana weitalanyi;
orulile khushioluyiitsi, mwana wanje, notikulukha;
yabunama hasi niyeekhuuna shinga italanyi,
shinga italanyi ikhasi; niwina ounomubuusie?
10Indabushi yobwami shiyilarula ewaYuda,
kata omutunga kwomuruchi okhurula mumakuluke ta,
okhuula Shiilo olwa aliitsa;
ne niye owa abetsimbia balahulilanga.
11Alaboha eshimoosishie khumutsabibu,
nomwana weisishiliye khumutsabibu omulayi;
yosiye tsingubotsie nende idivai,
nende ebiifwalobie mumatsayi ketsinzabibu.
12Tsimonitsie tsiling'inang'ina okhushila idivai,
ameenoke nikalaba okhushila amabeele.
13Zabuloni alamenyanga habukobelo bwokhunyanza,
nabaho shinga obukobelo bwamaaro;
olwakholwe nalwo lulaba eSidoni.
14Isakhari neisishili yamaani,
niyiikhuunanga hakari mubiko;
15yalola obuhuluushilo nibuli obulayi,
nende eshibala nishili eshikaasu,
niyeenatnia libekalie okhushinga,
naba omukholi ousioba.
16Dani alayaasinjia abandube shinga lulala olwokhumbia tsiaIsiraeli.
17Dani alabeetsanga inzokha khunjila,
khandi eshilikoma khumuhanda eshirema tsimbakayu tsieifarasi,
mana ouchendelangakhwo akwa makalama.
18Enindiile obuhoniabwo, e OMWAMI.
19Gadi, abaseeri balamuseera,
ne Ye alabaseem nabarakhwo obutsobi.
20Asheri, ebiliibwa bibie bilabeetsanga ebinulu,
naye alahaananga ebiliibwa ebitorotoro ebikwanila omuruchi.
21Nafutali niye eshitsusu eshilekhuulilwe;
ayininjia amasungo amalayi.
22Yusufu niye olusaka olwamanga,
olusaka olwamanga khusebele;
amasakake kalanda khwisiisi.
23Abalasi bobuyingo bamunyasiye muno,
nibamulasa, nibamusakania;
24ne obuyingobwe bwasinjila nibutinya,
amakhonoke nako nikakufuhasibwa khulwa amakhono kOmwene Obunyali waYakobo,
khulwa eliira liOmwayi, Lichina liaIsiraeli,
25khulwa Nyasaye waso, oulakhukhoonyanga,
khnndi khulwoyo Ounyala Biosi, oulakhuheelesinjia ikhabi;
mbu tsikhabi tsiahekulu mwikulu,
tsikhabi tsiolutungu olwakona hasi,
tsikhabi tsietsimbeele nende etsiolubeleshelo.
26Tsikhabi tsiaso tsiyombile tsikhabi tsietsingulu tsiobumeli;
nobunji oburula mubikulu biebisoni biosi.
Tsilaba khumurwe kwaYusufu,
khandi khulwoLosi lwomurwe kwa oyo owaahulwa mubaana babwe.
27Benyamini niye eshisuutse eshirandulanga;
mukamba alia eshioluyiitsi,
ne mungoloobe akabula eshia ayaayile.
Okhufwa khwaYakobo nokhuyabilwakhwe
28Bano bosi nibo tsimbia tsiaIsiraeli ekhumi natsibili; ne kano niko aka saabwe yabasunjila nabasabila ikhabi; shia omundu khukhabiye, nolwa yabasabila ikhabi. 29Nabalaamila amakhuwa, nabasunjila mbu Isie endi okhukhung'aasibwa halala nende abandu banje; munzabile halala nende abeebuli banje mumbinga eyili mumukunda kwaEferoni omuHiti, 30mumbinga yilia eyili mumukunda kwaMakhapela imbeli waMamure, mushialo shiaKanaani, eya Aburahamu yakula halala nende omukunda kwene khuEferoni omuHiti, kube okukwe khulwa ebilindwa; 31ebweneyo newa bamuyabila Aburahamu nende Sara omukhasiwe; ebweneyo newa bamuyabila Isaka nende Rebeka omukhasiwe; khandi ebweneyo newa ndamuyabila Lea; 32omukunda nende imbinga eyilimwo, ebiakulwa khubaana baHetsi.
33Nolwa Yakobo yali namalilisiye okhulaamila abaanabe amukhuwa, yafumba ebilenjebie khushitali, nakhalikha omwoyo, nakhung'aasibwa halala nende abandube.
Currently Selected:
Genesis 49: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
