Genesis 50
50
1Naye Yusufu namukwakhwo samwana mubweni, namulililakhwo, namutsunzuuna. 2Yusufu nabalaka abasumbabe abasilishi mbu bamubashe samwana emisaaia, omulambo kuleshe okhubola; abasilishi nabo nibamubakha Isiraeli emisaala bario. 3Mana tsindaalo amakhumi kane tsiahwa khululwe; shichila nolwa tsindaalo tsiokhubakha emisaala echio tsiamalungwa; abaMisiri nabo nibamulilila tsindaalo amakhumi musaafu.
4Tsindaalo tsiamasika olwa keeya, Yusufu yasungana nende abomunzu yaFarao, mbu Nimba ninyoolile obukoosia imbeli weenywe, nimuchama musunjile Farao muri nanwa, 5mbu Papa yanditsubia, mbu Lola, isie efwa; mung'ani yanje eya ndeeyabila mushialo shiaKanaani, nimwo omwa olanzabila muyo. Kho bulaano ekhusaaya mbu umbeelesie obwiyango endikulushe enzie emuyabile papa, ne khandi nenjelele. 6Farao naboola mbu Otsie, omuyabile so, shinga olwa yakhwitsubia.
7Kho Yusufu yatikulukha natsia okhumuyabila samwana, abasumba bosi baFarao nibatikulukha halala ninaye, nabakofu bomunzuye, nende abakofu bosi abomushibala shiaMisiri, 8nende abomunzu yaYusufu bosi, nende abaana babwe, nende abomunzu yasamwana; habula abaana abatiiti nende ebiayo nende tsing'ombe, babilekha mushialo shiaGosheni. 9Nibatikulukha ninaye abachendela khutsifarasi, nende amakaari; nikuba omukanda omukhongo muno. 10Niboola khulutse lwaAtadi injelekha weYorodani, nibeekhuulilayo nibakhupa tsimbungu tsinyinji muno; naye nakholayo amasika kasamwana tsindaalo musaafu. 11Nolwa abeene shialo, nibo abaKanaani, balola amasika mulutse lwaAtadi, baboola mbu Amasika kano kabaMisiri namakali muno; nibakulikha eliira liahabwenaho mbu Abeli-misiraimu, injelekha weYorodani. 12Abaanabe nibamukholela kosi shinga olwa yabalaka; 13okhuba abaanabe bamuchinga nibamukalusia mushibala shiaKanaani nibamuyabila mumbinga yomukunda kwaMakhapela, okuli imbeli waMamure, eya Aburahamu yakula halala nende omukunda khuEferoni omuHiti, kube okukwe khulwa ebilindwa. 14Naye Yusufu nakalukha eMisiri, ye omwene, nende abaana babwe, nende bosi aba yatikulukha ninabo okhumuyabila samwana, olwa yali namalile okhumuyabila samwana.
Yusufu yabalemia abaana babwe omwoyo
15Ne abaana babwe Yusufu olwa balola mbu saabwe wafwile, baboola mbu Haundi Yusufu alakhukiya, nakhurunjila elala amabii kosi aka khwamukholela. 16Nibamuupila Yusufu omunwa okhusunga mbu So olwa yali nashili okhufwa yalaka mbu 17Musunjile Yusufu muri Ekhusaaya mbu bulaano obaleshele abaana beenywe okhuyiira khwabwe, nende obwonooni bwabwe, shinga olwa bakhukholela obubii; kho bulaano khukhusaaya mbu okhuleshele ifwe abasumba baNyasaye waso obuyiiri bweefwe. Naye Yusufu nalila amasika olwa basungana ninaye. 18Abaana babwe nabo nibatsia nibeekhupa hasi imbeliwe; nibaboola mbu Lola, nifwe abasumbabo. 19Yusufu nabasunjila mbu Muraria tawe; isie endi mushilenje shiaNyasaye noho? 20Inywe, mwachooma okhukholela obubii; ne Nyasaye yakachoomia khubulayi, okhuusia akaliho leelo, okhuhonia abandu abanji babe mwoyo. 21Ne bulaano muraria ta; ndalamuliisinjia halala nende abaana beenywe abatiiti. Nabalemia emioyo, nasungana ninabo neshisa.
Okhufwa khwaYusufu
22Mana Yusufu yamenya eMisiri, ye omwene nende abeinzu yasamwana. Yusufu nayindila emiyika eshikhumi nende ekhumi. 23Yusufu nalola abaana baEfuraimu okhuula khulwibulo lwakhataru; abaana baMakiri omwana waManase nabo nibeebulwa mumakulu kaYusufu. 24Yusufu nabasunjila abaana babwe mbu Isie efwa; ne Nyasaye shialichweya okhumukoonya ta, namutikulusia namurusia mushialo shino okhuula mushialo eshia yabasuubisia Aburahamu, nende Isaka, nende Yakobo. 25Yusufu nabeetsubia abaana baIsiraeli, naboola mbu Nyasaye shialichweya okhumukoonya tawe, neenyu mulitikulukha nende amakumba kanje okhukarusia yino. 26Mana Yusufu nafwa, nali owemiyika eshikhumi nende ekhumi; nibamubakhakhwo emisaala, omulambo kuleshe okhubola, mana nareebwa mwisanduku eMisiri.
Currently Selected:
Genesis 50: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
