Ezekieli 37
37
Libanda liamakumba amoomu
1Omukhono kwOMWAMI kwali khwisie, niyanjinga niyarusiamwo, muRoho WOMWAMI, niyanzisia hakari mwibanda; nalio liali nilieetsulamwo amakumba; 2niyanjesia tsimbeka tsiosi hakari wako; ne lola, kali nikali amanji muno mwibanda tsana ebulafu; khandi lola, kali amoomu kar'r'ra. 3Niyasunjila mbu Mwana womundu, amakumba kano kakhanyala okhulamukha noho? Nasi ningalusia mbu E Omwami NYASAYE, niwe oumanyile. 4Khandi niyasunjila, mbu Lakulila amakumba kano amakhuwa, okaboolele mbu Inywe amakumba amoomu, hulile likhuwa liOMWAMI. 5Kano niko aka Omwami NYASAYE aboolela amakumba kano; mbu Lole, ndaleenjisia omuuya mwinywe, mana mulalamukha. 6Ndalara emisi khwinywe, nindeera inyama khwinywe, nimufuunikhakhwo likhoba, nira omuuya mwinywe, ne mulalamukha; mana mulamanya mbu isie nisie OMWAMI.
7Kho nindakula shinga olwa ndalakwa; ne olwa ndali nishilakula, obuyoka nibwikhola; lola, okhurenga khwokhwo; nako amakumba nikoongana, likumba khwikumba lindi. 8Nihenga, ne njiechio, emisi nichiba khuko, inyama niyiitsakhwo, likhoba nilifuunikha; nebutswa omuuya kwabula muko. 9Mana niyasunjila mbu Rumbulila omuuya amakhuwa; rumbula mwana womundu, osunjile omuuya mbu Kano niko aka Omwami NYASAYE aboola, mbu Witse norula khumiyeka chiosi chine, iwe omuuya, ofuure khubeerwa bano, balamushe. 10Kho nirumbula shinga olwa yandaka, omuuya nikwinjila mubo, nibalamukha, nibasinjila, lihe likhongo muno.
11Mana niyasunjila mbu Mwana womundu, amakumba kano niko inzu yosi yaIsiraeli. Lola, baboolanga mbu Amakumba keefwe koomile ka'r'r'ra; obunaayi bukhukorilekhwo; khuulile khushihesi. 12Khulwako, rumbula nobasunjila mbu Kano niko aka Omwami NYASAYE aboola; mbu Lole, ndalayabulula ebilindwa bieenywe, nimubuusia nimurusia mubilindwa bieenywe, inywe abandu banje; ne ndalamuusia mushialo shiaIsiraeli. 13Mana mulamanya mbu isie nisie OMWAMI, olwa ndalaba niyabuluule ebilindwa bieenywe, nimubuusia okhurula mubilindwa bieenywe, inywe abandu banje. 14Ndalara Roho wanje mwinywe, ne mulalamukha; mana ndalamura habundu weenywe; kho mulamanya mbu isie OMWAMI nisie ouboolile, ningakhola; nolwa OMWAMI aboola.
Obulakusi khukobusasaanibwi bwaYuda naIsiraeli
15Likhuwa liOMWAMI nilinzitsila khandi, liri 16Nawe, mwana womundu, bukula olusaala lulala, ohandiichekhwo mbu Khulwa Yuda nokhulwa abaana baIsiraeli abashie; mana obukule olusaala lundi khandi, ohandiichekhwo mbu Khulwa Yusufu, olusaala lwaEfuraimu, nabeinzu yaIsiraeli bosi, abashie. 17Mana otsiungaasie halala, tsibe olusaala lulala, tsikwe lulala mumukhonokwo. 18Ne olwa abaana babandu beenywe balakhureeba mbu Shiokhumanyia eshisina shiakano? 19Kho olababoolela mbu Kano niko aka Omwami NYASAYE aboola; mbu Lole, endi okhubukula olusaala lwaYusufu, oluli mumukhono kwaEfuraimu, nende tsimbia tsiaIsiraeli abashie; mana ndalalura halala nende olusaala lwaYuda, ninzikhola tsibe lulala, tsikwe lulala mumukhono kwanje. 20Natsio tsisaala etsia oba nohandiikakhwo tsilaba mumukhonokwo, imbeli wetsimoni tsiabwe. 21Mana obasunjile mbu Kano niko aka Omwami NYASAYE aboola; mbu Lola, ndalabukula abaana baIsiraeli, nimbarusia mumahanga ewa batsia, nimbakhung'aasia tsimbeka tsiosi, nimboosia mushialo shiabwe. 22Ndalabakhola babe lihanga elala mushialo, khungulu tsiaIsiraeli; omuruchi mulala alabaruka bosi; shibalaba amahanga kabili khandi, kata shibalakabukhana obwami bubili khandi, nahatuutu ta. 23Kata shibaleeyonoonia khandi nemindu tsana echia beenamilanga, kata nebisinyo biabwe, kata nobukhayi bwabwe ta; nebutswa ndalabahonia mukhukalukha inyuma khwabwe khwosi, omwa boonoonelamwo, nimbasiiya; mana balaba abandu banje, nasi ndalaba Nyasaye wabwe.
24Omusumba wanje Daudi alaba omuruchi oubaruka; bosi balaba nomwayi mulala; khandi balachendanga mukobukhalachi bwanje, nibeetsulila aka ndalaka, nibakakhola. 25Balamenya mushialo eshia ndaheelesia Yakobo omusumba wanje, omwa abakuuka beenywe bamenyanga; balamenyamwo, bo abeene, nabaana babwe, nabeetsukhulu babwe, inziayo, naye Daudi omusumba wanje alaba omukhulundu wabwe inziayo. 26Khandi ndalalakana ninabo indakano yomulembe; yilaba indakano eyirahwaho ta ninabo; ndalabaraho, nimbeenjiyia, nira habundu wanje ahatakatifu hakari wabwe, habeetsenjeho inziayo. 27Eshimenyo shianje nashio shilaba halala ninabo; ndalaba Nyasaye wabwe, nabo balaba abandu banje. 28Mana amahanga kalamanya mbu isie nisie OMWAMI owahula Isiraeli, olwa habundu wanje ahatakatifu halaba hakari wabwe, okhubeetsangaho inziayo.
Currently Selected:
Ezekieli 37: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
