Ezekieli 36
36
Isiraeli yilekalusibwa habwene
1Nawe, mwana womundu, lakulila tsingulu tsiaIsiraeli, nosunga ori Inywe tsingulu tsiaIsiraeli, hulile likhuwa liOMWAMI. 2Kano niko aka Omwami NYASAYE aboola; mbu Okhuba omusuku wakhufukula nasunga mbu Ngako! Khandi mbu Khuliile habundu hosi aheechingu hakhale! 3Khulwako olakule, nosunga ori Kano niko aka Omwami NYASAYE aboola; mbu Shichila lole, shichila bamukwisia likunda, nibamutubanjila tsimbeka tsiosi, mbu mukwe omwandu khumahanga akasikaale, nimurumbukha mumbakha tsiabandu, mukhufuma okhubii; 4khulwako, inywe tsingulu tsiaIsiraeli, hulile likhuwa liOmwami NYASAYE; kano niko aka Omwami NYASAYE aboolela tsingulu nebikulu; aboolela emichela namabanda; aboolela ebitsiimi ebikhaya namakunda akalekhwa, mbu biosi ebikwile eshioluyiitsi neshiokhutseshelelwa mumahanga akasikaale, akamubotokhaane; 5niko akaakachila kano niko aka Omwami NYASAYE aboola; mbu Toto mwene, mukhuyia khweimbalikha yanje ndaboolile nifukula amahanga akasikaale, nifukula nende Edomu yosi, abeebukuliile eshialo shianje shibe omwandu kwabwe, nokhwikhoya muno khwomumwoyo nende okhuleka okhunji, okhushikwisia eshioluyiitsi. 6Kho khulwako rumbula akeshialo shiaIsiraeli, nosunjila tsingulu nebikulu, nemichela namabanda, ori Kano niko aka Omwami NYASAYE aboola; mbu Lole, ndaboolile mumbalikha yanje nomubululu bwanje shichila mweetuukha tsisoni tsiamahanga; 7ne niko akachila kano niko aka Omwami NYASAYE aboola; mbu Toto mwene, amahanga akamubotokhana akeene kaleetuukha tsisoni tsiako.
8Nebutswa inywe, tsingulu tsiaIsiraeli, mularusia tsisaka tsieenywe, nimwama ebiamo bieenywe, khulwa abandu banje Isiraeli, shichila beetsanga, bali ahambi okhuula. 9Okhuba lole, endi khulweenywe; ndalamushiukhanila, neenyu mulalimwa nimuraakwa. 10Khandi ndaleenjiyia abandu khwinywe, mbu inzu yosi yaIsiraeli, yosi pe; amataala nako kalamenywamwo, amakunda nikoombakhwamwo. 11Ndaleenjiyia khwinywe abandu; balameetekha nibeebulana; nende emiruko chirio. Khandi ndalachila nimumenywamwo shinga khale; kata ndalamukholela amalayi akashila akali akambeli; mana mulamanya mbu isie nisie OMWAMI. 12Toto, ndalachila abandu nibamuchendakhwo, mbu abandu banje Isiraeli; balakhulia, nawe olaba obulaame bwabwe; kau shibalafwilwa abaana khululwo khandi ta. 13Kano niko aka Omwami NYASAYE aboola; mbu Shichila bakhusunjila mbu Iwe eshialo, oli omumalabandu; ochilanga lihanga lieenywe nilifwilwa abaana; 14niko akachila shiolaba omumalabandu khandi, kata okhuchila lihanga lieenywe nilifwilwa abaana khandi ta, Omwami NYASAYE aboola; 15kata shindalakhuhulilisia khandi aketsisoni tsiamahanga, kata shioleetuukha okhuseywa khwabandu khandi, kata okhwisichirasia lihanga lieenywe khandi ta; Omwami NYASAYE aboola.
16Khandi likhuwa liOMWAMI nilinzitsila, liri 17Mwana womundu, olwa abeinzu yaIsiraeli bali nibamenyanga mushialo shiabwe, bashionoonia khulwa injila yabwe nebikhole biabwe; inyila yabwe imbeli wanje yeenga shinga obukaali bwomukhasi ouli mwibilu. 18Niko akachila ndabasundulila obululu bwanje, khulwa amatsayi aka bali nibasunduule khushialo, khandi shichila bashionoonia nemindu chiabwe tsana echia beenamilanga; 19nimbasalaasia mumahanga, nabo nibakabulwa mubialo; injila yabwe nebikhole biabwe shinga olwa biali, nindio ndabayaasia endio. 20Mana olwa boola mumahanga tsana, ewa batsiitsanga hosi hosi, boonooniliayo eliira lianje litakatifu; okhuba abandu basunga khukabwe, mbu Bano nibo abandu bOMWAMI, abarula mushialoshie. 21Nasi ndabeeleelela eliira lianje litakatifu, elia abeinzu yaIsiraeli bali nibalionoonilia mumahanga ewa batsiitsanga.
22Khulwako, obasunjile abeinzu yaIsiraeli ori Kano niko aka Omwanli NYASAYE aboola; mbu Shikholanga kano khulweenywe ta, inywe abeinzu yaIsiraeli, habula khulwa eliira lianje litakatifu, elia mwoonoonilia mumahanga ewa mwatsiitsanga. 23Ne ndalalolosia obutakatifu bweliira lianje likhongo, eliayoonoonilibwa mumahanga, elia mwoonoonilia hakari wako; nako amahanga kalamanya mbu isie nisie OMWAMI, olwa ndalalolosia obutakatifu bwanje mwinywe imbeli wetsimoni tsiabwe; nilwo olwa Omwami NYASAYE aboola. 24Okhuba ndalamuyinia mumahanga, nimukhung'aasia okhurula mubialo biosi, nimwinjisia mushialo shieenywe. 25Ndalamwohela amatsi amalafu, neenyu mulasiiyikha; ndalamurusiakhwo eshifwabwi shieenywe shiosi, nemindu tsana echia mwinamilanga, nimusiiya. 26Ndalamuheelesia omwoyo omuyia, nira mwinywe roho imbia; ndalayinia omwoyo kwelichina okuli munyama yemibili chieenywe, nimuheelesia omwoyo kweinyama. 27Ndalara roho wanje mukari mwinywe, nimuchesia mumalako kanje; mulalindanga akobukhalachi bwanje nimukakhola. 28Mulamenya mushialo eshia ndaheelesia abakuuka beenywe; mulaba abandu banje, nasi ndalaba Nyasaye weenywe. 29Ndalamuhonia mubukaali bweenywe bwosi; ndalalanga imele yiitse, ninjiinjiyia, oburamurakhwo inzala ta. 30Ndaleenjiyia ebiamo ebiokhumisaala, namameeto akemikunda, mbu muleshenje okhuseywa khulwa inzala mumahanga. 31Mana muleetsulila tsinjila tsieenywe tsimbii, nebikhole bieenywe ebiralinji ebilayi ta; muleesinya abeene mumoni tsieenywe khulwa obumayaanu bweenywe nokhulwa ebisinyo bieenywe. 32Omwami NYASAYE nasunga mbu Ne mumanye mbu shikholanga kano khulweenywe ta. Mufwimbwe omurwe nimukoyaasibwa khulwa tsinjila tsieenywe, inywe abeinzu yaIsiraeli.
33Kano niko aka Omwami NYASAYE aboola; mbu Khunyanga olwa ndalamusiiya obumayaanu bweenywe bwosi, ndalachila amataala kamenywemwo, amakunda nako nikoombakhwamwo. 34Eshialo eshiali eshikhaya shilalimwa, eshialinji eshikhaya kuru mumoni tsiababiri bosi. 35Nabo balasunga mbu Eshialo shino eshialinji eshikhaya shieekalula shiba shinga omukunda kwaEdeni; nako amataala akakwa amakunda, amakhaya kuru, akalikululwa, kaswalilwa tsingoba nikamenywamwo. 36Mana amahanga ako akasikaale, akamubotokhana, kalamanya mbu isie OMWAMI enyumbaashe buli hosi ahalikululwa, niraaka ahali ahakhaya; isie OMWAMI nisie ouboolile; ne ndalakhola.
37Kano niko aka Omwami NYASAYE aboola; mbu Khandi khulwa kano ndalareebungwakhwo nabeinzu yaIsiraeli, okhubakholela; mbu okhubameetelakhwo abandu shinga ebiayo. 38Ne shinga ebiayo biemisango, mbu ebiayo ebiba nibili eYerusalemu munduukho yemilukha, nolwa amataala kaleetsusibwa abandu shinga ebiayo; mana balamanya mbu isie nisie OMWAMI. Libanda liamakumba amoomu.
Currently Selected:
Ezekieli 36: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
