Ezekieli 38
38
Obulakusi obuyinga Gogu
1Likhuwa liOMWAMI nilinzitsila, liri 2Mwana womundu, shiukhana ohenje Gogu, oweshialo shiaMagogu, omukhulundu waRoshi, Meshekhu, naTubali; omufukule nolakula, 3nomusunjila mbu Kano niko aka Omwami NYASAYE aboola; mbu Lola, ekhufukula, iwe Gogu omukhulundu waRoshi, Meshekhu, naTubali; 4ndalakhushiukhasia, nira amahana museyatsio, nikhurusia, halala nende lihelio liosi, tsifarasi nende abachendela khutsio, bosi nibeefwalile ebimanulwa biosi, omukanda omukhongo kwabetsingabo netsikuutwa, bosi nibali netsinganga, 5nabaPeresia nabaEtiopia nabaPuti halala ninabo, bosi nibali netsingabo netsikuutwa; 6Gomeri netsing'andatsie tsioisi; Betsi-togama okhurula khushihesi shienotsi, netsing'andatsie tsiosi; mbu tsimbia tsinyinji halala ninawe.
7Obe niwirecheeshe, toto, wirecheshe bulayi iwe nemikanda chio chiosi echiba nichikhung'aanile ewa oli; nawe obe omulindi wabwe. 8Olunyuma lwetsindaalo tsinyinji olilakwa; mana mumiyika chiolunyuma oliula mushialo eshiakalusibwa okhurula mubusoolo, ewa bakhung'aasilibwa okhurula mumbia tsinyinji, khungulu tsiaIsiraeli etsialinji tsikhaya tsindaalo tsiosi; barusibwa mumbia tsiabandu, ne balamenya shisale, bosi. 9Nawe olatikulukha; oleetsa shinga imbumbuyeka; olafwana shinga lileesi elifuunikha eshialo, iwe omwene netsing'andatsio, netsimbia tsinyinji halala ninawe.
10Kano niko aka Omwami NYASAYE aboola; mbu Khunyanga yeneyo amakhuwa kaleenjila mumwoyokwo, mana olakulukunza tsiyemi tsimbii. 11Olasunga mbu Ndalatikulukha ninzia khushialo shiamataala akabula tsingoba; ndalabarulila, ninzia khubandu abali mubuholeelefu, abamenyanga shisale, bosi nibamenya nibarali netsingoba ta, kata emiyinjiilo kata tsinzichi tawe; 12okhuyaaya ebiyaayo, nokhubukula ebioluyiitsi; okhuchinga omukhono okhuseera amakunda aka bulaano kamenywamwo; nokhuseera abandu abakhung'aanile okhurula mumahanga kosi, abanyoola emiruko nemiandu, abamenya mushialo hakari bwene. 13Sheba, naDedani, nabandu bobukhala abeTarashishi, netsitalanyi tsimbuukha tsieyo, balakhureeba mbu Kho witsile okhuyaaya ebiyaayo? Okhung'aasiye omukandakwo okhubukula ebioluyiitsi? Okhuchinga tsifeetsa netsitsahaabu, nokhuyila emiruko nemiandu, okhuyaaya ebiyaayo ebinji, noho?
14Khulwako, mwana womundu, lakula nosunjila Gogu ori Kano niko aka Omwami NYASAYE aboola; mbu Khunyanga eyo olwa abandu banje Isiraeli baliba nibamenyanga shisale, iwe shiolibuukha 15niwitsa norula ewuwo, okhurula khushihesi enotsi, iwe, netsimbia tsinyinji halala ninawe, bosi nibachendela khutsifarasi, omukanda omukhongo, lihe liamaani, noho? 16Olitikulukha okhuseera abandu banje Isiraeli, shinga lileesi elifuunikha eshialo; ne mundaalo tsiolunyuma ndalakhuleera okhuseera eshialo shianje, mbu mana amahanga kamanye, olwa ndalalolosia obutakatifu bwanje mwiwe, iwe Gogu, imbeli wetsimoni tsiabwe.
17Kano niko aka Omwami NYASAYE aboola; mbu Niwe omundu tsana owa ndasungakhwo khale mubasumba banje abanabii baIsiraeli, abalinji nibalakula mundaalo etsio, emiyika eminji, mbu ndakhakhuleera okhubaseera. 18Ne khunyanga tsana, olwa Gogu aleetsa okhuseera eshialo shiaIsiraeli, obululu bwanje bulaakha muno, Omwami NYASAYE aboola. 19Okhuba ndaboola mumbalikha yanje nomukhwakha khwoburima bwanje, mbu Toto mwene, khunduukho eyo khulabaho okhurenga okhukhongo mushialo shiaIsiraeli; 20okhuula olwa tsinyeeni etsiomunyanza, namanyonyi akomwikulu, netsisolo etsiomubulimo, nebimoolanga biosi ebimoola khushialo, nabandu bosi abali khushialo, balarenga khukhubaho khwanje; tsingulu tsilakwisibwa, tsinjengulukho tsilakwa, ne buli lukoba lwosi lulakwisibwa hasi. 21Ndalalanjisia amariisia ketsimbia tsiosi okhumuyinga Gogu, ne olukanga lwabuli mundu lulayinga owashie; nolwa Omwami NYASAYE aboola. 22Ndalamukhalachila eshiina shioluumbe nende amatsayi; ndalasundula if ula inyinji khuye, nokhung'andatsie, nokhutsimbia tsinyinji etsia ali ninatsio, halala nende amachina amakhongo kelikulu, nomulilo, namalesi keshibiriti. 23Ndalalolosia obukhongo bwanje nobutakatifu bwanje, nindimanyisia mumoni tsiamahanga amanji, mana balamanya mbu isie nisie OMWAMI.
Currently Selected:
Ezekieli 38: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
