Okhukalushila 8
8
Eshialo eshilayi eshia heetsa okhulia
1Lilako liosi elia ekhulachile leelo mwitsuliO lenje okhulikhola, mbu mubeetsenje mwoyo, nimwinjiha, nimwinjila nimubukula eshialo eshia OMWAMI yeetsuba okhuheelesia abakuuka beenywe. 2Witsulilenje injila yosi eya OMWAMI Nyasayewo yakhwimililakhwo emiyika echio amakhumi kane mushitsiimi, mbu akhusandie, nakhuteema, okhumanya akali mumwoyokwo, noba niwenyanga okhukhola akamalakoke nohomba. 3Ne yakhusandia, nakhuhonjia inzala, nakhuliisia imana, eya wakorwa, nabakuukabo bosi bachikorwa; mbu akhumanyie mbu omundu shiabeetsanga mwoyo khulwa omukaate kwonyene ta; habula khulwa kosi akarulanga mumunwa kwOMWAMI omundu aba mwoyo. 4Tsingubotsio shitsiakhukofulila, kata ebilenjebio okhufwimba ta, emiyika echio amakhumi kane. 5Ne oyililisie mumwoyokwo, mbu shinga omundu olwa akuuma omwanawe, nolwa OMWAMI Nyasayewo akhukuuma wesi. 6Okholenje akamalako kOMWAMI Nyasayewo, okhuchenda munjilatsie nokhumuriitsanga. 7Okhuba OMWAMI Nyasayewo yeetsa okhukhuyila mushialo eshilayi, eshialo shiemichela chiamatsi, eshietsisebele netsindungu, akafututukha mumabanda nomubikulu; 8eshialo shieingano neishayiri, nemitsabibu nemikhuyu nemikomamanga; eshialo shiemitseituni chiamafura nende obuushi; 9eshialo omwa olaliitsanga omukaate harali obuleemu ta, kata shiolatamba eshindu shiosi mushio ta; eshialo eshia amachina kashio kali ebibia, khandi ewa onyala okhuyaba eshibia shiomukasa mubikulu biashio. 10Olaliitsanga niwikura, nomwitsoomia OMWAMI Nyasayewo khulwa eshialo eshilavi eshia akhuheelesia.
Bachesiyibwa obureebilila OMWAMI ta
11Wiricheshe oleshe okhwibilila OMWAMI Nyasayewo, oburakholanga akamalakoke nobukhalachibwe nende aka yalachilisia, aka emulaka leelo, ta; 12nebutswa olwa olaba noliile niwikuure, niwumbashile tsinzu tsindayi nende okhumenyamwo; 13olwa tsing'ombetsio nebiayobio biinjiha, tsifeetsatsio netsitsahaabutsio nitsiinjiha, kata biosi ebia olaba ninabio nibiinjiha; 14mana omwoyokwo kwakheechinjimisia, niwibilila OMWAMI Nyasayewo, owakhurusia mushialo shiaMisiri, munzu yobunyakhani; 15owakhwimilila mushitsiimi eshio eshikhongo eshiamariisia, eshialimwo tsinzokha tsiobufwisi namakatia, neliloba lihalakhu, aha amatsi kabula; owakhurusilia amatsi mulwanda Iwelikhwabuye; 16owakhuliisia imana mushitsiimi, eya abakuukabo bakorwa; mbu akhusandie, khandi mbu akhuteeme, okhukhukholela amalayi khubumaliilishi; 17ne wakhapaara mumwoyokwo ori Obunyali bwanje namaani komukhono kwanje nibio ebinyooleele obuyinda buno. 18Nebutswa witsulilenje OMWAMI Nyasayewo, okhuba niye oukhunyalila okhuyindihala; mbu atinyisie indakanoye eya yeetsubila abakuukabo, shinga olwa kali leelo. 19Ne noba nomwibilila OMWAMI Nyasayewo, nolonda khubanyasaye bandi, nobakhalabanila nobeenamila, emusiomela leelo, mbu okhusikha mulasikha. 20Shinga amahanga kandi aka OMWAMI asishinjia imbeli weenywe nolwa mulasikha; okhuba mwaloba okhuhulila omwoyo kwOMWAMI Nyasaye weenywe.
Currently Selected:
Okhukalushila 8: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
