Okhukalushila 7
7
Oluyia olutakatifu lwOMWAMI
(Okhuru. 34.11-16)
1Olwa OMWAMI Nyasayewo alakhwinjisia mushialo eshia otsia okhubukula, niyeeya amahanga amanji imbeliwo, mbu abaHiti, nabaGirigashi, nabaAmori, nabaKanaani, nabaPerizi, nabaHiwi, nabaYebusi, amahanga ako musaafu akakhushila obukhongo netsingufu; 2khandi olwa OMWAMI Nyasayewo alabahaana imbeliwo, nawe nobarootsa; kho olabatibilia elala; oralia ninabo omuuma kwosi, kata okhubabeela tsimbabasi ta; 3kata orakhweelelana ninabo, mbu orabakha omukhaanawo khumusianiwe, kata okhubukula omukhaanawe nomukhweesia omusianiwo ta. 4Shichila ye yakhashiukhasia omusianiwo aleshe okhunondakhwo, mbu bakhalabanile abanyasaye bandi; ne nolwa oburima bwOMWAMI bwakhakhwashila, naye nakhusishia bwangu. 5Nebutswa mubakholele muri nanwa; mbu mulikulule ebimalilo biabwe biemisango, nimusasaka tsisiilo tsiabwe tsisongoknu, nimurema emiAshera chiabwe, nimusamba ebifwanani biabwe ebibaatse nomulilo.
6Shichila oli oluyia olutakatifu lw Nyasayewo; OMWAMI Nyasayewo yakhulobola obe oluyia olukoosi olwakhaba olulwe omwene, okhushila tsimbia tsiosi etsili khushialo. 7OMWAMI shiyamuhamba obwitsa, kata shiyamulobola inywe, shichila mwashila abandi obunji, tawe; okhuba mwali abatuutu abaleema khubandu bosi; 8nebutswa okhuba OMWAMI amuheelanga, khandi okhuba yeenya okhuusia eshiitsubo eshia yeetsubila abakuuka beenywe, niko akachila OMWAMI yamurusiamwo nomukhono kwamaani, namununula namurusia munzu yobunyakhani, okhurula mumukhono kwaFarao omuruchi waMisiri. 9Kho mumanye mbu OMWAMI Nyasayewo niye Nyasaye; mbu Nyasaye omwisiikwa, owusinjia indakanoye nobuheeli oburalilu khubeenabo abamuheelanga nibahulila amalakoke okhuula khunzibulo eshikhumila, 10ne abarunganga habulafu abo abamukiya, nabatibia khumwenoyo oumukiya, shiashindanga ta; alamurunga habulafu. 11Kho olindenje lilako, nende akalachilisibwa, nobukhalachi bwosi, ebia ekhulachilisia inyanga yino, mbu obikholenje.
Tsikhabi etsiitsa khulwa obuhulili
(Lawi 26.3-13; Okhuka. 28.1-14)
12Ne okhuba muhulilanga obukhalachi buno bwosi, nobulinda nobukhola, OMWAMI Nyasayewo alakhuusilinjia indakano nobuheeli oburalilu ebia yeetsubila abakuukabo; 13alakhuheelanga, nakhuheelesia ikhabi, nakhwinjiyia; alabiheelesinjia ikhabi ebiamo biomubilikwo nende ebiamo bielilobalio, imeleyo neidivaiyo namafurako, amameeto ketsing'ombetsio nebiimeeme biebiayobio, mushialo eshia yeetsubila abakuukabo mbu yakhakhuheelesia. 14Olaheebwa ikhabi okhushila tsimbia tsiosi tsiabandu; shialabamwo omundu weshisaatsa kata oweshikhasi mwinywe oulakumbahala, kata mumiruko chieenywe ta. 15Khandi OMWAMI alarusia khwinywe obulwale bwosi; shialarakhwo khwiwe oluumbe lwosi olwokhunyumbe tsimbii etsiaMisiri, etsia wamanya, ta; ne alatsira khubeenabo bosi abamukiyanga. 16Nawe omalilane tsimbia tsiosi tsiabandu etsia OMWAMI Nyasayewo alakhuhaanila; imoniyo yileshe okhubatiililwa eshisa; kata olakhalabanila abanyasaye babwe ta; okhuba liakhaba omubero khwiwe.
17Noba noliyililisia mumwoyokwo mbu Amahanga kano kashila; nenyale endie okhubukula eshialo shiabwe? 18Kho orabaria ta, yitsulila bulayi aka OMWAMI Nyasayewo yakholela Farao nende Misiri yosi; 19mbu obuteemwi obukhongo obwa tsimonitsio tsialola, nebilolelo, nakamangaliimwa, nomukhono kwamaani, nomukhono okunyiirilwe okhuhonia, ebia OMWAMI Nyasayewo yakhurusia ninabio; ne nilwo olwa OMWAMI Nyasayewo alakholela tsimbia etsio tsiosi etsia oriitsanga. 20Khandi OMWAMI Nyasayewo alaruma lihalamba elo hakari mubo, okhuula olwa abo ababa nibasikaale nibeebisa imbeliwo balaba nibatibile. 21Orabariitsanga taokhuba OMWAMI Nyasayewo ali hakariwo, Nyasaye omukhongo owamariisia. 22Khandi OMWAMI Nyasayewo alarusinjia amahanga ako imbeliwo, hatiiti hatiiti; shionyala okhubamalilana khulala ta; tsisolo etsiomubulimo tsiakhakhwinjiyila. 23Nebutswa OMWAMI Nyasayewo alabahaana imbeliwo, nabakoyaasia muno, okhuula olwa balaba nibamalilaanwe pe. 24Khandi alahaana abaruchi babwe mumukhonokwo, nawe olasishia ameera kabwe, nikaranyoolekha hasi welikulu liosi ta; shialabaho omundu yesi oulanyala okhusinjila imbeliwo ta, okhuula olwa olaba nobamalilaane. 25Ebifwanani ebibaatse biabanyasaye babwe, mubisambe nomulilo; orakhaayilwa ifeetsa kata itsahaabu eyakhaba niyili khubio, kata okhuchibukula, tawe; oleshe okhutiilwa mumubero; okhuba neshisinyo khuMWAMI Nyasayewo. 26Kata oraleera eshisinyo munzuyo, omwene nokwa owomusilo, shinga shio olwa shili, ta; shikhubiiyile elala, nishikhusinya; shichila neshiomusilo.
Currently Selected:
Okhukalushila 7: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
