Okhukalushila 6
6
Lilako likhulundu
1Ne lino nilio lilako, nakalachilisibwa, nende akobukhalachi, aka OMWAMI Nyasaye weenywe yandaka okhumwechesia, mbu mukakholenje mushialo eshia mulaambukha nimutsia okhushibukula; 2mbu oriitsenje OMWAMI Nyasayewo, iwe, nomwanawo, nomwitsukhuluwo, nimukhola aka alachilisia nende akamalakoke aka emulaka, tsindaalo tsiosi tsiobulamubwo; khandi mbu tsindaalotsio tsimeeteshe. 3Kho ohulile, iwe Isiraeli, niwitsulila okhukakhola, mbu okaasenje, khandi mbu mwinjihe muno, shinga OMWAMI Nyasaye wabakuukabo olwa yamusuubisia, mushialo eshiitsulem vo amabeele nende obuushi.
4Iwe Isiraeli, hulila; OMWAMI Nyasaye weefwe nOMWAMI mulala; 5omuheelenje OMWAMI Nyasayewo nende omwoyokwo kwosi, neshiimoshio shiosi, namaaniko kosi. 6Namakhuwa kano aka ekhulaka leelo, kabe mumwoyokwo; 7nawe obeechesie abaanabo neshinani, nokakhupa imbakha olwa oba nobuutsa mungo, kata olwa oba nochenda khunjila, kata olwa oba nokona, kata olwa oba nobuukha. 8Okeebohe, kabe eshilolelo khumukhono; khandi kabe ebiokhubohwa khubwenibwo. 9Okahandiiche khubiyindi bieinzuyo, nende khubilibwabio.
Obuchesiyii khukobukhayi
10Mana olwa OMWAMI Nyasayewo alakhwinjisia mushialo eshia yeetsubila abakuukabo, mbu Aburahamu, naIsaka, naYakobo, okhukhuhee-lesia; namataala amakhongo amalayi aka orayoombakha ta, 11netsinzu etsiitsuulemwo ebindu ebilayi etsia orayeetsusia ta, namayabo kamatsi akayabwa aka orayaba ta; emikunda chiemitsabibu nemitseituni echia oraraaka ta; olwa olaliitsanga niwikura; 12habwenaho wirecheshe oleshe okhwibilila OMWAMI, owakhurusia mushibala shiaMisiri, okhurula munzu yobunyakhani. 13Omuriitsenje OMWAMI Nyasayewo; omukhalabanilenje ye, niwitsuba khuliiralie. 14Muralonda khubanyasaye bandi ta, abokhubanyasaye betsimbia tsiabandu etsimubotokhana; 15okhuba OMWAMI Nyasayewo ouli hakari weenywe niye Nyasaye weimbalikha; oburima bwOMWAMI Nyasayewo bwakhakhwashila, naye nakhutibia orule khushialo pe.
16Muramuteema OMWAMI Nyasaye weenywe, shinga olwa mwamuteema eMasa ta. 17Lindenje amalako kOMWAMI Nyasaye weenywe obutinyu, nende oburumbusibwe, nende aka yalachilisia, ebia yamulaka biosi. 18Ne okholenje akali amalunji khandi amalayi imbeli wOMWAMI; mbu okaase, khandi mbu winjilemwo olie eshialo eshilayi tsana eshia OMWAMI yeetsubila abakuukabo, 19mbu alaluuma abasukubo bosi nabarusia imbeliwo, shinga OMWAMI oiwa yaboola.
20Olwa omwanawo yakhakhureeba mundaalo etsiitsa, mbu Shili heena eshisina shioburumbusi buno, nakalachilisibwa, nobukhalachi, ebia OMWAMI Nyasaye weefwe yamulaka? 21Mana olasunjila omwanawo mbu Khwali nikhuli abasumba baFarao muMisiri; ne OMWAMI yakhurusia muMisiri nomukhono kwamaani; 22khandi OMWAMI yalolosia ebilolelo nakamangaliimwa, amakhongo khandi amatinyu, aka yakholela Farao nende abeinzuye bosi, ifwe nikhulola. 23Ne yakhurusia ebweneyo mbu akhwinjisie nakhuheelesia eshialo eshia yeetsuba okhuheelesia abakuuka. 24Ne OMWAMI yakhulaka okhukholanga kano kosi aka yalachilisia, okhumuriitsanga OMWAMI Nyasaye weefwe, khulolenje amalayi tsindaalo tsiosi, mbu akhulindenje khube mwoyo shinga olwa khuli leelo. 25Kalakhubeela obulunjishi, nikhuba nikhwitsulilanga okhukhola lilako lino liosi imbeli wOMWAMI; Nyasaye weefwe, shinga olwa yakhulaka.
Currently Selected:
Okhukalushila 6: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
