Okhukalushila 1
1
Obukuumi bwaNyasaye khuIsiraeli
(Obub. 14.20-35)
1Kano niko amakhuwa aka Musa yasunjila oluyia lwosi lwaIsiraeli injelekha weYorodani mushitsiimi, muAraba ahahengana naSufi hakari weParani naTofeli naLabani naHazerotsi naDizahabu. 2Ne noluchendo lwetsindaalo ekhumi nandala okhurula eHorebu nobirila enashikulu shiaSeiri okhuula eKadeshi-barinea. 3Ne mumuyika kwamakhumi kane, mumwesi kwekhumi nalulala, khunyanga yambeli yomwesi, Musa yaboolela abaana baIsiraeli amakhuwa kosi aka OMWAMI yali nalachilisiye khukabwe shinga olwa kali, 4olwa yali namalile okhuhula Sihoni omuruchi wabaAmori, owamenya eHeshiboni, nende Ogu omuruchi waBashani, owamenya eAshitarotsi, eEderai. 5Injelekha weYorodani mushialo shiaMoabu niho aha Musa yachaaka okhwinoosilia amalako kano, nasunga mbu 6OMWAMI Nyasaye weefwe yakhuboolela muHorebu ari Okhumenya khweenywe mushikulu muno khuhelile. 7Shiukhane, mubuusie oluchendo, mutsie mushialo shiebikulu shiabaAmori, khubosi abamenya muAraba, nomushialo shiebikulu, nomwibanda, nomuNegebu, nokhulukuku Iweinyanza, eshialo shiabaKanaani, nende Lebanoni, okhuula khumwalo okwo omukhongo, mbu omwalo kwaEuferati. 8Lole ereeleho eshialo eshio imbeli weenywe; mwinjile, mubukule eshialo eshia OMWAMI yeetsubila abakuuka beenywe, Aburahamu naIsaka naYakobo, okhubaheelesia bo nolwibulo lwabwe inyuma wabwe.
9Nasi ndasungana nineenywe mundaalo etsio, nimboola mbu Shinyala okhumuchinga sienyene ta. 10OMWAMI Nyasaye weenywe yamwinjiyiye, ne lole, leelo muli shingana tsinyininyini etsiomwikulu obunji bweenywe. 11OMWAMI, Nyasaye wabakuuka beenywe, amwinjiyie khandi eshikhumila okhushila olwa muli bulaano, namu-heelesia ikhabi, shinga olwa yamusuubisia! 12Nasi ndakhanyala endie okhuchinga sienyene obusitohu bweenywe, nomusiiko kweenywe, nobusoolo bweenywe? 13Mulobole abandu abachesi, abamanyifu khandi abamanyiishe, tsimbia tsieenywe shinga olwa tsili, nasi ndalabakhola abeemilisi khwinywe. 14Neenyu nimungalusiamwo nimusunga muri Elia okhubooleele nelilayi okhukhola. 15Kho nimbukula abeemilisi betsimbia tsieenywe, abandu abachesi khandi abamanyiishe, nimbakhola babe abeemilisi khwinywe, abaseesia bebikhumila, nabaseesia bebikhumi, nabaseesia bamakhumi karaano, nabaseesia belikhumi, nende abanyapara, tsimbia tsleenywe shinga olwa tsiali. 16Nimbalachilisia abayaasii beenywe mundaalo etsio, mbu Muhulilenje ebifunaane ebili hakari wabaana beenywe, nimukabukhasia amakhuwa habwene hakari womundu nomwana wabwe, kata nende omurende owa aba nali ninaye. 17Murakholanga ebiela mubandu mubuyaasii ta; muhulilenje omutuutu nomuknongo bombi; murariitsanga tsimoni tsiomundu namundu ta, okhuba obukhalachi nobwa Nyasaye; ne eshifunaane shiosi eshili eshitinyu nishimukhaya, mushindeerele, nasi ndalashihulila. 18Ne ndamulachilisia mundaalo etsio kosi aka mwali nimukhoyile okhukhola.
19Mana nikhurula eHorebu, nikhubira mushitsiimi eshio shiosi, eshikali eshiamariisia, eshia mwalola, nikhubirila khunjila eyitsia khubikulu biabaAmori, shinga OMWAMI Nyasaye weefwe olwa yakhulaka; nikhuula eKadeshi-barinea. 20Nasi nimusunjila mbu Bulaano muulile mushialo shiebikulu shiabaAmori, eshia OMWAMI Nyasaye weenywe akhuheelesia. 21Lola, OMWAMI Nyasayewo areele eshialo shino imbeliwo. Tikulukha, oshibukule, shinga OMWAMI, Nyasaye wabakuukabo, olwa akhubooleele; oraria kata okhufwa omwoyo ta. 22Neenyu mwanzitsila, buli mundu khwinywe, nimusunga mbu Khurume abandu imbeli weefwe, bakhurunilisilie akeshialo, nibakhukalusilia amakhuwa akeinjila eya khukhoyile okhulondakhwo, nakamataala aka khuloolakhwo. 23Likhuwa elo nilinjamisia muno; nimbukula abandu ekhumi nababili khwinywe, mbu mulala khulwa buli luyia; 24nabo nibarulaho, nibaniina mushialo shiebikulu, niboola khwibanda liaEshikoli, nibaliluura pe. 25Nibabukula khubiamo bieshialo eshio mumakhono kabwe, nibakholomokha nibabikhuleerela, nibakhukalusilia amakhuwa, bari Neshialo eshilayi, shino eshia OMWAMI Nyasaye weefwe Yakhuheele.
26Nebutswa mwaloba okhutikulukhayo, ne mwakhaya lilako liOMWAMI Nyasaye weenywe; 27nimubuutsuluulila mumaheema keenywe, nimusunga mbu Okhuba OMWAMI akhukiyanga, nikhwo okhuchila nakhurusia mushibala shiaMisiri mbu akhuhaane mumukhono kwabaAmori, okhukhutibia. 28Khutikulukha nikhutsia heena? Abaana beefwe bachilile emioyo chieefwe nichisalulukha, bari Abandu balia nabakhongo nabarambi okhushila ifwe; amataala namakhongo, kata tsingoba tsiako tsiulanga khwikulu bwene; khandi khuluutsi abaana babaAnaki nibaliyo. 29Mana nimuboolela mbu Muratechela kata okhubaria ta. 30OMWAMI Nyasaye weenywe, oumuranjililanga, alamulwanila, shinga olwa yamukholela muMisiri, nimulolanga; 31kata nende mushitsiimi, ewa walola shinga OMWAMI Nyasayewo olwa yakhuchinga, shinga samwana olwa achinga omwanawe, khunjila yosi eya mwachendakhwo, okhuula olwa mwoola habundu hano. 32Ne kata khulwa likhuwa elo shimwamusuubila OMWAMI Nyasaye weenywe ta, 33oyo owamuranjilila khunjila okhumukhaabila habundu ahokhuupa amaheema keenywe, mumulilo mushilo okhumumanyia injila eya mukhoyile okhulonda, khandi mwileesi mushiteere.
34Ne OMWAMI yahulila amakhuwa aka mwaboola, natiilwa oburima, niyeetsuba ari 35Toto mwene, khubandu abolwibulo luno olubii, abulaho kata mulala oulalola eshialo eshio eshilayi eshia ndeetsuba mbu ndakhaheelesia abakuuka beenywe, 36habula Kalebu waYefune, ye alashilola; khandi ye nabaanabe, ndalabaheelesia eshialo eshia yaseenakhwo eshilenje; okhuba yalonda OMWAMI nomwoyo kwosi. 37Khandi OMWAMI yandiililwa oburima khulweenywe, naboola mbu Kata wesi shioliinjilamwo tawe; 38ne Yoswa waNuni, ousinjilanga imbeliwo, ye aliinjilamwo; omuuminjie ikholo; okhuba niye oulichila Isiraeli nibashilia. 39Khandi abaana beenywe abatiiti, aba mwasunga mbu bakhakwa eshioluyiitsi, khandi abaana beenywe aba leelo luno baramanyakhwo akamalayi namabii ta, nibo abaliinjilamwo, khandi ndilishibaheelesia, nabo balishilia. 40Habula inywe, mushiukhane, mubuusie oluchendo Iweenywe okhutsia mushitsiimi, khuniila eyitsia khuNyanza Inzakhanyu.
Abalsiraeli okhuhulwa nibali eHoroma
41Mana inywe nimukalusia nimumboolela muri Khumwonooneele OMWAMI; khulatikulukha khutsie okhulasana, kosi aka OMWAMI Nyasaye weefwe yakhulaka shinga olwa kali. Mana nimwiboha buli mundu ebimanulwabie bielihe, nimutsaalikha okhuniina mubikulu. 42OMWAMI niyasunjila mbu Obaboolele ori Muraniinayo, kata okhulasana, tawe; okhuba isie shindi hakari mwinywe ta; muleshe okhurootswa imbeli wabasuku beenywe. 43Kho nimuboo-lela, ne shimwareka amarwi ta; nebutswa mwakhaya lilako liOMWAMI, nimutsaalikha, nimuniina mubikulu. 44Ne abaAmori abamenyanga mubikulu ebio nibarula okhumuyinga, nibamulonda shinga inzushi, nibamurootsa nibamukwisia muSeiri, kata okhuula khuHoroma. 45Mana nimukalukha, nimulila imbeli w; ne OMWAMI shiyahulila omwoyo kweenywe, kata okhumurechela eshirwi ta. 46Kho mwamenya eKadeshi tsindaalo tsinyinji, mbu tsindaalo etsia mwatong'ayo.
Currently Selected:
Okhukalushila 1: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
