2 Petero 3
3
Obusuubisie bwokhwitsa khwOmwami
1Ne bulaano, abaheelwa banje, yino niyo ibarwa yakhabili eya emuhandiichila; ne mutsio tsiombi embuusinjia emioyo chieenywe chiobwatoto nimwitsusiakhwo, 2mbu mwitsulilenje amakhuwa akaboolwa khale nabanabii abatakatifu, nende lilako liOmwami Omuhonia muminwa chiabarume beenywe.
3Ne mumanye likhuwa lino mbeli, mbu mundaalo tsiobumaliilishi abakokonyi baliitsa nibakokonya, nibachenda mubwikombi bwabwe, 4nibaboola bari Eshisuubisie shiokhwitsakhwe shili heena? Shichila okhurula khunyanga olwa abakuuka bakona tsindoolo, amakhuwa kosi katsiililila kario shinga olwa kalinji okhurula khukhuchaaka khwobulongwi.
5Nebutswa balobanga okhwitsulila likhuwa lino, mbu likulu lialinjiho okhurula khale nakhale, neshialo eshiakholwa khumatsi, khandi mumatsi, khulwa likhuwa liaNyasaye; 6ne khulwako khandi eshialo eshialiyo mundaalo etsio, amatsi kashimila, nashio nishimululwa. 7Nebutswa likulu eliliho bulaano, kata nende eshialo, biabiishilwa omulilo khulwa likhuwa tsana, nibilindiilila induukho yobuyaasii nobumululwi bwabandu abaramuria Nyasaye ta.
8Nebutswa, abaheelwa banje, mureebilila likhuwa lino elala ta, mbu imbeli waNyasaye inyanga ndala yiingana emiyika eshikhumila, kata emiyika eshikhumila chiingana inyanga ndala. 9Omwami shiashindanga okhuusia obusuubisiebwe, shinga abandi olwa bachelanga obushindi, ta; ne amwisimilisilinjia inywe, nareenya mbu omundu yesi atibe ta, habula mbu bosi boole khubwikalukhasii.
10Nebutswa induukho yOmwami yiliula shinga omwibi; khunduukho eyo likulu lilikhama nobukhachi obukhongo, ebiokhuchaachila bieene nabio nibisalulukha khulwa omulilo omululu eshialo nebikhole biosi ebilimwo nibiyia pe.
11Ne shinga biosi olwa bili okhusalulukha birio, inywe shimukhoyile okhwiyila bulayi, mubutakatifu nokhuria Nyasaye? 12Nimulindiililanga, nimwikomba muno, okhwitsa khweinduukho yaNyasaye, eyilichila likulu lilisalulukha khulwa omulilo, ebiokhuchaachila bieene nabio nibiyaka khulwa omulilo tsana omululu. 13Ne obusuubisiebwe shinga olwa buli, khulindiililanga likulu liyia nende eshialo eshiyia ebia obulunjishi bumenyanga mubio.
14Khulwako, abaheelwa banje, olwa mulindiililanga ako, rekhwo omwoyo okhunyoolekha nimuli mumulembe, nimubula eshiroonyelesi shiosi kata eshiuku mumonitsie. 15Mubasie obwisimilisii bwOmwami weefwe mbu nibwo obuhonia, shinga omwana weefwe omuheelwa Paulo yesi olwa yamuhandiichila, khulwa obuchesi obwa yaheebwa; 16kata mubarwatsie tsiosi natsio yahandiika khumakhuwa kano. Ne tsilimwo amakhuwa kandi amatinyu okhumanya eshisina shiako, aka abandu ababula obumanyi nobutinyilifu bashiaminjia, shinga olwa bashiaminjia amahandiiko kandi nako, nibeenyoolela obutibi.
17Khulwako inywe, abaheelwa banje, nimukamanyile khale, mube meeso, muleshe okhuyilwa nobukori bwabamayaanu nimwakukha okhurula khuburalilu bweenywe. 18Ne mukhulilenje mubukoosia nobumanyi bwOmwami weefwe khandi Omuhonia weefwe Yesu Kristo. Oluyali lube olulwe, bulaano neinziayo. Amina.
Currently Selected:
2 Petero 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
