1 Timotseo 6
6
1Abo bosi abali mwikokolo liobusumba bapaarenje khubaami babwe shinga olwa bakwaniile oluyali lwosi, mbu eliira liaNyasaye nende ameechesio keene bileshe okhunyekwa. 2Nabo aba abaami babwe bali abasuubili, barabachaya ta, shichila nabaana babwe; nebutswa bashile okhubakhalabanila, shichila abasanjilana khubiamo biobukholi bwabwe nabasuubili, khandi nabaheelwa.
Okhusangaalila ebia khuli ninabio.
Amakhuwa kano obeechesie nobachesiyia. 3Omundu yesi naba niyeechesia ameechesio kandi lukano, narafuchiilila amakhuwa amalamu ta, niko amakhuwa kOmwami weefwe Yesu Kristo, kata okhufuchiilila ameechesio akeidini, 4omwenoyo nowolukungu, ne shiamanyile likhuwa ta. Ali nobwikombi obufu khumareebano netsimbakha tsiamakhuwa; ne muko murulangamwo imbalikha, nobusoolo, namanyeko, nokhuyililisia okhubii khubandu, 5namayingano kabandu aboonoonekha amayililisii kabwe, aba akatoto kakorela, nibakaala mbu idini yilabaleerela inganga. 6Ne toto, idini neinganga ikhongo khu oyo ouchama ebia ali ninabio. 7Shichila shikhwayeenjila mushibala nikhuli nende eshindu, kata shikhulirulamwo nikhuchinjile eshindu ta; 8nebutswa nikhuli nende ebiokhulia nende ebiokhwihabikha, ebio bilakhuhela. 9Habula abo abeekomba okhuyindihala bakwitsanga mukhuteemwa nende mumubelo kwobwikombi obusilu obubasaalisia, obunyala okhuchila nibamilishila mubwonooneshi nokhutiba. 10Okhuba okhuheelanga amapeesa nikhwo eshisina shiobumayaanu bwetsimbia tsiosi. Abandi nibeehenelesia okhukanyoola bamala bashiamibwe okhurula mubusuubili, nibeefumira abeene namasila amalulu amanji.
Lihe lilayi eliobusuubili
11Nebutswa iwe, omundu waNyasaye, wihaanye ako; ne olondachilile obulunjishi, okhuria Nyasaye, obwisiikwa, obuheeli, obwisi-milisii, nende obuholo. 12Olasanenje lihe lilayi liobusuubili; hamba obulamu bwobumeli obwa walanjilwa nobwa weeyama obwiyami obulayi imbeli wabaloli abanji. 13Ekhulaka imbeli waNyasaye oulamusinjia biosi, khandi imbeli waKristo Yesu, oweeyama obwiyami obulayi imbeli waPondio Pilato, 14mbu ohulilenje lilako, harali eshiroonyelesi naharali eshikha shiosi, okhuula khukhulolekha khwOmwami weefwe Yesu Kristo, 15okhwa alilolosia khunduukhoye, oyo ouli Omwene bunyali bwosi yenyene, owitsoomibwa, Omuruchi wabaruchi, khandi Omwami wabaami; 16ne niye yenyene ourafwitsanga ta, oumenyanga mubulafu obwa omundu yesi aranyala okhuulakhwo ta; abulaho owamulola, kata owakhanyala okhumulola tawe; omwenoyo abe noluyali nende obunyali bwobumeli. Amina.
17Obakaanie abo abali abayinda mushialo shino eshiliho bulaano, mbu baleshenje okhwichinjimisia kata okhuchoomia obunaayi bwabwe khubuyinda oburaralila ta, habula khuNyasaye oukhuyindihasia nebindu biosi mbu khubitsatsahalile. 18Obalache mbu bakholenje amalayi, mana babeetsenje abayinda bebikhole ebilayi; mbu babeetsenje abahaani, abasanjilana nabandu; 19nibeebiishila abeene libiikho elilibabeela omuse omulayi mundaalo etsili imbeli, mbu bahambe obulamu obwo obuli obwatoto. 20Iwe Timotseo, lindanga ako aka waheebwa okhulinda; wihaanye obwilakalakanii bweshialo nende amayinje ebirula khubwenobwo obulangwa mbu obuchesi, niburali burio ta; 21okhuba baliho abeeyama ako, nibaroola khushindu shiosi halubeka Iwobusuubili ta. Obe nobukoosia.
Currently Selected:
1 Timotseo 6: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
