1 Petero 4
4
Abasinjilili abalayi bobukoosia bwaNyasaye
1-2Kho mana olwa Kristo yasaalila mumubili, neenyu mwimanule amayililisio malala akeenako, mbu muleshenje okhumala tsindaalo etsishimutong'ela mumubili nimukholanga akobwikombi bwabandu ta; habula akokhwenya khwaNyasaye; shichila ousaaliliile mumubili abeetsanga naleshile obwonooni pe. 3Tsindaalo; tsieefwe etsiabira tsiakhuhela khulwa okhukholelamwo akokhwenya khwAbamahanga; okhuchendanga mubwilaasi, nobwikombi, nobumeesi, namasabo kobulangu, neminywo, nemilukha chiebifwanani, echili chiomusilo. 4Kata bulaano, olwa mukhayanga okhwanguha ninabo halala okhwinjila mubushilaasi buno bwobwitaakuli ta, bamuhukanga nibamunyeka. 5Ne balakalusia khukabwe imbeli wa oyo oubeetsanga niyeerecheeshe okhubayaasia abalamu nende abafwa. 6Shichila kano niko akachila Injiili niyiilwatsilwa kata abafwa tsana, mbu mumubili bayaasibwe shinga abandu olwa bayaasibungwa, ne muroho babe mwoyo shinga Nyasaye olwa ali mwoyo.
7Eshihesi shiamakhuwa kosi shisitile ahambi; kho mube abarechelefu, nimwiruka, mbu musaayenje. 8Okhushila kosi murekhwo omwoyo okhuheelananga; shichila obuheeli bufuunikha ebionoono ebinji muno. 9Mwinjisaninjie aharali okhubuuluula khwosi ta. 10Eshihaanwa eshia buli mundu yesi yaheebwa shinga olwa shili, ashiikhoonyele nakhalabanila abashie, shinga olwa muli abasinjilili abalayi bobukoosia bwaNyasaye tsimbia tsiabwo tsiosi. 11Omundu yesi ouboola, abe shinga ouboola amasungo kaNyasaye; omundu yesi oukhalabana, akholenje shinga ouli namaani aka Nyasaye ahaananga; mbu mukosi Nyasaye aheebungwe oluyali khulwa Yesu Kristo, ouli omwene luyali nende obunyali, ebisoni nebisoni. Amina.
Obusaalili bwomuKristayo
12Abaheelwa banje, murahuka khukokhuteemwa khweenywe khwomulilo, okhumukwila mbu khumuchele, shinga olwa kali amakhuwa amacheni akamwikholakhwo, ta. 13Ne aha musanjilanilanga khukhusaalila khwaKristo, mwikhoye; mbu khukhufwimbulwa khwoluyalilwe nakhwo muliikhoya omwikhoyo omukali. 14Nimuba nimukondeshelwa khulwa eliira liaKristo, muli abeikhabi; shichila roho woluyali, niye Roho waNyasaye, ali khwinywe. 15Omundu yesi khwinywe aleshe okhusaalisibwa shichila nomwiri, kata omwibi, kata omukholi wetsimbii, kata omwiyinjisii mumakhuwa kabeene, ta. 16Habula omundu naba nasaalila shichila nomuKristayo, arafwimbwe omurwe tawe; nebutswa aheelesie Nyasaye oluyali muliira elo.
17Okhuba induukho yakhoola eya obuyaasii okhuchaachila enanzu waNyasaye; ne nibuba nibuchaakwa burio khwifwe, obumaliilishi bwa abo abarahulilanga injiili yaNyasaye ta bulaba burie? 18Ne nikaba nikali amatinyu omulunjishi okhuhonibwa, oyo ouramuria Nyasaye ta, kata omwonooni, alanyoolekha nali heena? 19Ne niko akachila abasaalilanga okhwenya khwaNyasaye shinga olwa khuli, bare emioyo chiabwe mumakhono kOmulonji ouli omwisiikwa, nibakholanga amalayi.
Currently Selected:
1 Petero 4: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
