1 Petero 3
3
Akabakhasi nabasaatsa babwe
1Kata inywe abakhasi mwesi murio, muhulilenje abasaatsa beenywe; mbu kata abandi khubo abakhaba nibarahulilanga Likhuwa tsana ta, banyoolwe khulwa injenda yabakhasi babwe aharali likhuwa liosi ta, 2olwa balola injenda yeenywe yobweleleeshe, halala noburii. 3Okhwisiaha khweenywe khuraba obwisiayi bwelwanyi, obwokhubasa liswi, kata obwokhwifwala ebimili bieitsahaabu, kata obwokhwifwala ebiifwalo ta; 4nebutswa khube imela eyo eyamabiswi eyomumwoyo, mubiifwalo ebirasasikha ta, mbu roho yobuholo nobuholeelefu, eyili yobukusi obunji mumoni tsiaNyasaye. 5Shichila nindio abakhasi abatakatifu bakhale, abachoomia obunaayi bwabwe khuNyasaye, beesiahanga bario, nibahulilanga abasaatsa babwe; 6shinga Sara olwa yahulilanga Aburahamu, namulanga mbu "Omwami". Ne bulaano muli abaana bebe, nimuba nimukholanga amalayi, ikholo niyiramurimukha khulwa eshiriisio shiosi ta.
7Rata inywe abasaatsa mwesi murio, mumenyenje nabakhasi beenywe nobuchesi; heelesia owashio weshikhasi oluyali, shinga amaani komubilikwe olwa kaleema khukoko, khandi shinga olwa muli abalaame abalaamilwa halala obukoosia obwo, nibwo obulamu; mana okhusaaya khweenywe shikhuleekalilwa ta.
Okhusaalisibwa khulwa obulunjishi
8Elihelelesia ndielino; mbu mubeetsenje abomwoyo mulala, abeshisa, nimuheelananga nabaana beenywe; mube abetsimbabasi, khandi abaholo. 9Muramurunga omundu yesi obubii khulwa obubii, kata amanyeko khulwa amanyeko, tanebutswa mubasabile ikhabi; okhuba lino niiio elia mwalanjilwa, mbu mulie obulaame, nibwo ikhabi. 10Okhuba mbu
Owenya okhuheela obulamu nokhulola tsindaalo tsindayi,
yeekalile olulimilwe khububii bwosi,
kata omunwakwe kuleshe okhuboola akobukaatii;
11yeehaanye okhurula khububii, akholenje obulayi,
akhaabenje omulembe, nakulondachilila.
12Okhuba tsimoni tsiOmwami tsichoomile khubalunjishi,
amarwike nako nikarechelesia obusaayi bwabwe;
habula Omwami ahenga abeenabo abakhola obubii nabafukula.
13Ali heena oulamukholela libii liosi, nimuba nimuli abalumilifu khukali amalayi? 14Nebutswa nimuba nimusaalisibwa khulwa obulunjishi, muba abeikhabi; ne murabariitsanga, kata okhubeeyabeeya ta. 15Mwahule Kristo mumioyo chieenywe abe ye Omwami. Beetsenje nimwirecheeshe okhwiteetsa khumundu yesi oumureeba khushisina shiobunaayi obuli mwinywe; habula khube nobuholo nende obwongoli. 16Mube nende omwoyo omulayi, mbu olwa mufukulungwa, abo abanyekanga injenda yeenywe indayi eyili muKristo bafwimbwe omurwe.
17Shichila Nyasaye naba niyeenya mbu musaalisilibwe amalayi aka mukhola, elo liakhashila okhusaalisilibwa ebikhole ebibii. 18Okhuba Kristo yesi yasaalilila ebionoono lulala, omulunjishi khulwabo ababula obulunjishi, mbu akhuyile khuNyasaye. Yeerelwa mumubili, nebutswa yalamusilibwa muroho; 19ne muyeneyo nimwo omwa yatsiila niyeelwatsila tsiroho etsiali mumbohe; 20ne nibo abali nibakhaya okhuhulila khale, olwa obwisimilisii bwaNyasaye bwalindiilila, mundaalo tsilia tsiaNoa, olwa isafina yali niyishikasibungwa; ne musafina eyo abandu abatuutu, mbu munaane bonyene, bahonilibwa namatsi. 21Nako amatsi, eshisina mbu obubatisii, obwa omuyembo okwo nikwo eshifwanani shiabwo, bulaano niko akamuhonia, khulwa obulamushi bwaYesu Kristo; ne obubatisii shibuli obuyinii bwelikhwe liomubili ta, habula nikhwo okhusaaya Nyasaye omwoyo omulayi. 22Naye Yesu Kristo oyo ali khumukhono musaatsa kwaNyasaye, ewa yatsia mwikulu; abamalaika nabobunyali nabamaani bosi nibeesibwa hasiwe okhumuhulilanga.
Currently Selected:
1 Petero 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
