1 Petero 2
2
Lichina lilamu, nende lihanga litakatifu
1Kho mwinaabule obumayaanu bwosi, noburana, nobwikaatii, neimbalikha, nobumoonyi bwosi. 2Mufwane shinga abaana abakheebulwa, mwenyenje amabeele ameeleleshe akeshiroho, mbu kamukhusie okhuula khubuhonia, 3nimuba nimwakoonyeelela nimulola shinga Omwami olwa ali owobukoosia.
4Mwitse khuye, ouli lichina lilamu; toto, lialobwa nabandu, ne khuNyasaye nelilobole, elioIukoosi; 5nineenyu mwesi murio, olwa muli amachina amalamu muumbakhwa inzu yeshiroho, mbu mube abobukuhani obutakatifu, okhumalanga emisango chieshiroho, echia Nyasaye anyala okhuchama, khulwa Yesu Kristo. 6Shichila kaboolekha mumahandiiko, mbu
Lole, era muSayuni lichina eliliimaasia lisiisi mukoona, elilobole, eliolukoosi muno,
ne oumusuubilila shialafwimbwa omurwe ta.
7Khulwako, olukoosi olwo luli khulweenywe, inywe abasuubili ne khubarasuubila ta, kari
Lichina elia aboombashi baloba lienelo liakholwa elikhulundu eliomukoona.
8Khandi kari
Lichina eliisichirasia khandi olwanda lwameesiralo.
Beesichiralanga olwa bakhaya likhuwa liene; ne niko akachila nibareebwaho.
9Nebutswa inywe muli oluyia olulobole, obukuhani bweshiami, lihanga litakatifu, oluyia lwabandu abali baNyasaye omwene; mbu mulolosinjie ebulafu amalayi akamangaliimwa ka oyo owamulanga murule mushiilima, mwinjisibwe mubulafubwe obwamakana. 10Mundaalo tsiakhale shimwali oluyia ta; ne bulaano muli oluyia lwaNyasaye; shimwali nimubeelwa tsimbabasi ta; ne bulaano mwabeelwa tsimbabasi.
Chendenje shinga abasumba baNyasaye
11Abaheelwa banje, emusaaya, shinga olwa muli abacheni khandi abamenyi, mbu musile obwikombi bwomubili, obuseeranga omwoyo. 12Injenda yeenywe mubamahanga yibe eyikhoyeele; mbu kata olwa bamuchiikhanga mbu muli abakholi betsimbii, khulwa ebikhole bieenywe ebilayi ebia balolanga bamuheelesie Nyasaye oluyali khunduukho yokhucheniyilwa.
13Muhulilenje buli buruchi obwareebwaho nende abandu, khulwa Omwami; kata nibwakhaba obwomuruchi mwene, olwa ali ikulu khubiosi; 14kata obwabakafuna, olwa bali abarumebe abarumwa ninaye okhukuuma abakholi betsimbii nokhwitsoomia abakholi bamalayi. 15Shichila niko aka Nyasaye yeenya, mbu khulwa okhukhola amalayi muholeelesie akokhukorwa khwabayingwa.
16Mubeetsenje abalekhuule, nebutswa murabukhola obulekhuule bweenywe okhuba eshifuunikho shiobubii ta; habula shinga olwa muli abasumba baNyasaye. 17Heelesinjie abandu bosi oluyali. Heelenje abo abalangwa mbu abaana beefwe. Riitsenje Nyasaye. Heelesinjie omuruchi oluyali.
Obwifwili bwaKristo neshilolelo khwifwe
18Inywe abakholi, muhulilenje abaami beenywe noburii; abali abalayi abaholo bonyene ta, habula nende abaraasi. 19Okhuba kano niko akafuchiililwa, mbu omundu okhwifwila amasila, nasaalilila ako aka arakwanile ta, shichila amwitsulilanga Nyasaye mumwoyo. 20Okhuba noba niwonoona mana nokhupwa, ne niwisimilisia, noluyali shiina olwa oheebwa? Nebutswa olwa muba nimukhola amalayi, nimukasaalilila, ne nimulifuchiilila nokhwisimilisia, elo nilio elifuchiilikha imbeli waNyasaye. 21Okhuba elo nilio elia mwalanjilwa; shichila Kristo yesi ario yamusaalilila inywe, namuleshela eshilolelo, mbu mulonde mumakuluke. 22Shiyakhola eshionoono shiosi, kata akobukaatii kosi shikanyoolekha mumunwakwe tawe. 23Olwa yanyekwa, shiyakalusia amanyeko kandi ta; olwa yasaalila, shiyasiomakhwo ta, nebutswa yeera mumakhono ka oyo ouyaasinjia habwene. 24Ye omwene yeetuukha ebionoono bieefwe mumubilikwe khumusaala; mbu if we, nikhufwiliile ebionoono, mana khubeetsenje mwoyo khubulunjishi; ne amakhupacheke niko akachila nimuhonibwa. 25Okhuba mwali nimutiimatiimanga shinga amakondi; ne bulaano mwamukalushiile oyo ouli Omwayi khandi Omulindi wemioyo chieenywe.
Currently Selected:
1 Petero 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
