1 Petero 1
1
Lishiesio
1Eyirula khuPetero, omurume waYesu Kristo; yule khubalobole abali abamenyi abomuMusalaano ePondo, naGalatia, naKapadokia, naAsia, naBitsinia, 2abalobolwa obumanyi bwaNyasaye ouli Samwana Omwami Yesu shinga olwa buli, owamanya khale akali imbeli, mubwahule bwaRoho, okhuula khubuhulili nende khubumiitswi bwamatsayi kaYesu Kristo; obukoosia nomulembe bimeeteshenje khwinywe.
Obunaayi obulamu
3Oyo ouli Nyasaye wOmwami weefwe Yesu Kristo khandi Samwana, yeetsoomibwe; ne niye owakhwibula khandi, tsimbabasitsie tsinyinji shinga olwa tsili, khube nobunaayi obulamu khulwa obulamushi bwaYesu Kristo okhurula mubafu; 4khandi mbu khulie obulaame oburabola kata okhusasikha kata okhuniala ta, obwamubiishilwa mwikulu, 5inywe abakurungwa nobunyali bwaNyasaye munjila yobusuubili okhuula khubuhonibwi oburecheekhwe okhufwimbulwa khunduukho yeshihesi.
6Musangaalile amakhuwa ako, kata olwa bulaano kamukhoyeele okhubeelesibwa eshise mubuteemwi bwetsimbia tsinyinji. 7Kano keekholanga mbu obwatoto bwobusuubili bweenywe, obushila itsahaabu eyitibanga kata olwa yiteemwa nomulilo, buleere obwitsoomii noluyali neifuma olwa Yesu Kristo alaba nafwimbulwa.
8Omwenoyo, mumuheelanga, kata olwa murashiamulolakhwo ta; mumusuubililanga, kata olwa muramulolanga bulaano ta; ne mubusuubili obwo mwikhoyanga muno, okhwikhoya okhurasunjikha ta, okhwoluyali muno, 9olwa munyoolanga akeenako aka obusuubili bweenywe buchoomakhwo, nibwo obuhonibwi bwemioyo chieenywe. 10Abanabii abalakula akobukoosia obuliho khulweenywe bakhaabilisia nibareebelesia muno khukobuhonia tsana; 11bareebelesia muno, mbu neinduukho shiina, kata induukho eyifwana yirie, eya Roho waKristo owali mubo yachoomakhwo, olwa yarumbula khale akobusaalili bwaKristo, nakoluyali olwakhabulonda. 12Bafwimbulilwa likhuwa, mbu mumakhuwa ako shibeekhalabanila abeene ta, habula inywe; ne bulaano kamurumbuliilwe mubeenabo abamwilwatsila injiili khulwa obunyali bwaRoho Omutakatifu owarumwa okhurula mwikulu; ne amakhuwa tsana, kata abamalaika beekomba okhukahenjelesia.
Omulango kwokhuba abatakatifu
13Khulwako mwinyiche emioyo chieenywe, mwitembelesie nimuchoomilia elala obunaayi bweenywe khubukoosia tsana obuli okhumuleerelwa khubufwimbulwi bwaYesu Kristo. 14Olwa muli abaana abahulili, mureekwisia okhufwana shinga obwikombi bweenywe bwakhale, obwomundaalo tsiokhukorwa khweenywe, shinga olwa bwali, ta. 15Ne shinga ye owamuIanga olwa ali omutakatifu, neenywe mwesi murio mube abatakatifu munjenda yeenywe yosi; 16shichila kahandiikwa mbu Mulaba abatakatifu, shichila isie endi omutakatifu.
17Nimuba nimumuhaabila nimumulanga mbu Seefwe, omwenoyo oukhalakanga ebiina, ebikhole biabuli mundu shinga olwa bili, aharali eshiela shiosi ta, kho mumale ebise biobumenyi bweenywe nimuchendela muburii. 18Mumanyile bulayi mbu ebia mwanunulilwa, okhurula mubwiyili bweenywe obukhaya obwa mwakaamilwa nabakuuka, shibiali ebindu ebibolanga, shinga ifeetsa kata itsahaabu, tawe; 19nebutswa kali amatsayi akolukoosi muno, shinga akelikondi elibula eshikha kata eshiroonyelesi shiosi, niko akaKristo. 20Toto mwene, ye yamanywa khale, eshialo nishirashiakhupwa omuse ta; ne yabakalwa ebulafu khubumaliilishi bweshise khulweenywe. 21Khululwe mwakwa abasuubililanga Nyasaye owamulamusia ye mukhufwa namuheelesia oluyali; mbu mana obusuubili bweenywe nobunaayi bweenywe bube khuNyasaye.
22Olwa mubeetsanga nimumalile okhusiiya emioyo chieenywe nimurukwa nobwatoto okhuula khukhuheela abaana beenywe aharali obukaatii ta, murekhwo omwoyo okhuheelananga nomwoyo kwosi. 23Mweebulwa obwibulwi obuyia; ne shikhuli khumwo eyibola, habula khuyeneyo eyirabola ta, khulwa likhuwa liaNyasaye, eliba mwoyo niliyindila. 24Okhuba
Abemibili bosi bafwana shinga obunyasi,
noluyali lwabo lwosi Iwingana eshimuli shiobunyasi.
Obunyasi bufululukha, eshimuli shibungulukha;
25habula likhuwa liaNyasaye libeetsangaho obushia nobushia.
Nalio nilio likhuwa lieinjiili eyamwilwatsilwa.
Currently Selected:
1 Petero 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
