Yakobo 5
5
Obuchesiyii khubayinda
1Mukhali murie, inywe abayinda; khalile nimukhupa tsimbungu khulwa amasila akali okhumwitsila. 2Ebiobuyinda bieenywe biayoonoonekha, ebiifwalo bieenywe nabio amatsilili kabilia. 3Itsahaabu yeenywe neifeetsa yeenywe bieekhupa tsindebelende; tsindebelende tsiabio natsio tsilaba oburumbusi obumufukula; tsilalia emibili chieenywe shinga omulilo. Mweebiishila ebiobuyinda mundaalo tsiobumaliilishi. 4Lole, omushaara kwabakholi abamuchesela emikunda, okwa mwatinyakhwo munjila yoburana, omwoyo kwakwo kwayulanga; nalwo oluyoka lwa abo abachesa luhuliliishe mumarwi kOmwami wamahe. 5Mwamenya eshiami mushibala, nimukhola aka mwenya, nimwinusia shinga tsing'ombe khulwa inyanga yobusinzi. 6Mwamukhalachila eshiina omundu oubula eshikha, nimumwira; kata shiamukaya ta.
Obwisimilisii nende okhusaaya
7Kho mwisimilisie, baana beefwe, okhuula khukhwitsa khwOmwami. Lole, omulimi alindiilila ebiamo ebikoosi bieliloba, nabiisimilisilia, okhuula olwa liba nilinyoolile ifula eyiranjilila nende eyihelelesia. 8Neenyu mwesi mwisimilisie murio; mwitinyie emioyo chieenywe; shichila okhwitsa khwOmwami khuli ahambi. 9Murabuuluulilananga abeene khubeene ta, baana beefwe, mbu muleshe okhuyaasibwa; lole, omuyaasii mwene usinjiile mumuliango. 10Baana beefwe, muhenje obusaalili nobwisimilisii bwabanabii ababoolanga muliira liOmwami, bube eshilolelo khwinywe. 11Lole, khubalanganga mbu nabeikhabi abo abeefwila; mwahulila akobwifwili bwaAyubu, khandi mwalola aka Omwami yamala namukholela; shinga Omwami olwa yeetsuulemwo eshisa nende tsimbabasi.
12Ne okhushila akandi kosi, baana beefwe, mureetsubanga ta; kata khwikulu, kata khushibala, kata khushiitsubo shindi shiosi tawe; nebutswa Ee yeenywe yibe Ee toto; kata Tawe yeenywe yibe Tawe toto; eshiina shileshe okhumufwila.
13Aliho mwinywe ousaalila? Asaaye. Aliho ousangaala? Yeembe akobwitsoomii. 14Aliho mwinywe oulwala? Alanje abakofu beikanisa; nabo bamusaayile, nibamutsushiililakhwo amafura muliira liOmwami; 15ne lisaayo liobusuubili lilamuhonia omulwale, Omwami naye alamubuusia; ne naba nali niyoonoona, alabileshelwa. 16Mwiyamilanenje ebionoono bieenywe, nimusaayilana, mbu muhonibwe. Okhusaaya khwomundu omulunjishi khuli nobunyali muno mukhukhola khwakhwo. 17Eliya yali omundu woburulanda shingana obweefwe; yasaaya muno mbu ifula yileshe okhukwa; nayo niyirakwakhwo khushibala ta, emiyika chitaru nemiesi chisasaba. 18Mana khandi nasaaya; likulu nilikwisia ifula, eshibala nishirusia ebiamo biashio.
19Baana beefwe, oundi yesi khwinywe naba nashiama niyeebera khubwatoto, oundi naye namukalusia, 20mumanye likhuwa lino, mbu oukalusia omwonooni arule mubushiamu bweinjilaye, amuhonia omwoyokwe mukhufwa, nafuunikha ebionoono ebinji muno.
Currently Selected:
Yakobo 5: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
