1 Yohana 4
4
Roho waNyasaye, naroho womufukuli waKristo
1Abaheelwa banje, murasuubila buli roho ta; ne muteeme abaroho, nibaba nibali baNyasaye nohomba; shichila abanabii bobubeeyi abanji barulile nibasalaana khushialo. 2Mwikhuwa lino mumanye Roho waNyasaye; mbu buli roho owiyama shinga Yesu Kristo olwa wamala okhwitsa mumubili, arula khuNyasaye. 3Nebutswa buli roho oureeyama Yesu, shiyarula khuNyasaye tawe; ne niye roho womufukuli waKristo, owa mwahulilakhwo mbu ali okhwitsa; ne kata bulaano aliho mushialo.
4Inywe mwarula khuNyasaye, rwana rwanje; ne mwabahula; shichila ouli mwinywe ashila oyo ouli mushialo. 5Bo bali abeshialo; niko akachila nibaboola akeshialo, eshialo nashio nishibahulila. 6Ifwe khuli baNyasaye; oumanyile Nyasaye akhuhulilanga; ne ourali owaNyasaye shiakhuhulilanga tawe. Khukano khumanyile okhwahukhasia roho wobwatoto nende roho wobukorwi.
Nyasaye niye obuheeli
7Abaheelwe banje, khuheelanenje; shichila obuheeli burula khuNyasaye; buli mundu yesi ouheelanga yeebulwa nende Nyasaye, khandi wamanya Nyasaye. 8Ouraheelanga shiyamumanya Nyasaye ta; okhuba Nyasaye nobuheeli. 9Mulino nimwo omwa obuheeli bwaNyasaye bwalolosilibwa mwifwe, mbu Nyasaye waruma Omwanawe omuteelwa mushialo, mbu ifwe khube mwoyo khululwe. 10Mulino nimwo omwa obuheeli buli; shilili mbu ifwe khwamuheela Nyasaye ta, habula mbu ye yakhuheela ifwe, naruma Omwanawe abe eshitiso shiebionoono bieefwe. 11Abaheelwa banje, olwa Nyasaye yakhuheela ifwe ario, neefu khukhoyile okhuheelananga. 12Abulaho owamulolakhwo Nyasaye tawe; ne nikhuba nikhuheelananga, Nyasaye aba namenyanga mwifwe, obuheelibwe nabwo nibukholwa obulamba mwifwe.
13Mwikhuwa lino nimwo omwa khumanyiile shinga olwa khumenyanga muye, naye mwifwe, mbu shichila yakhukabiilekhwo khuRohowe. 14Neefu khwalola nikhurumbula akobuloli khwikhuwa lino, mbu Samwana yaruma Omwana okhuba Omuhonia weshialo. 15Omundu yesi owiyama shinga Yesu olwa ali Omwana waNyasaye, Nyasaye amenyanga muye, naye muNyasaye. 16Neefu khumanyile khandi khusuubiliile obuheeli obwa Nyasaye ali ninabwo khwifwe.
Nyasaye niye obuheeli; ne oumenyanga mubuheeli amenyanga muNyasaye, naye Nyasaye amenyanga muye. 17Mwikhuwa lino nimwo omwa obuheeli bukholelwamwo obulamba mwifwe, mbu khube abeikholo nyumu khunyanga yeshiina, shichila shinga ye olwa ali, nindio ifwe khuli mushialo shino. 18Obuheeli shibulimwo oburii bwosi ta; nebutswa obuheeli obulamba bwilusinjia oburii, okhuba oburii bulimwo obukuumwi; ne ouriitsanga shiakholwa omulamba mubuheeli ta. 19Ifwe khuheelanga, shichila ye yaranjilila okhukhuheela ifwe. 20Omundu naba naboola ari Emuheelanga Nyasaye, ne nakiya omwana wabwe, nomubeeyi; shichila ouraheela omwana wabwe, owa alolanga, shikakhanyalikha mbu amuheela Nyasaye owa aralolakhwo tawe. 21Lilako lino khuli ninalio okhurula khuye, mbu ouheela Nyasaye aheele nende omwana wabwe yesi.
Currently Selected:
1 Yohana 4: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
