1 Yohana 2
2
Kristo niye Omuhabini weefwe
1Orwana rwanje, emuhandiichila amakhuwa kano mbu muleshe okhwonoona. Ne omundu yesi naba niyoonoona, khuli nende Omuhabini ewaSeefwe, niye Yesu Kristo omulunjishi; 2ne ye niye eshitiso khulwa ebionoono bieefwe; kata shikhuli khulwa ebieefwe bionyene ta, habula nende khulwa ebiabomushialo shiosi pe.
3Ne lino nilio elichila nikhumanya shinga olwa khumumanyile ye; mbu nikhuba nikhuhulilanga amalakoke. 4Ouboola mbu Ndamumanya, ne narahulilanga amalakoke ta, nomubeeyi; kata obwatoto shibuli muye ta. 5Nebutswa omundu yesi ouhulilanga likhuwalie, toto mwene obuheeli bwaNyasaye bwakholwa obulamba muye Ne niko akachila nikhumanya shinga olwa khuli muye. 6Ousunga mbu amenyanga muye, kamukhoyeele mbu achendenje shinga ye olwa yachendanga.
Lileko liyia
7Abaheelwa banje, shimuhandiichila lilako liyia liosi ta, habula lilako liakhale elia mwali ninalio okhurula khukhuchaaka; nalio lilako liakhale nilio likhuwa liene elia mwahulila. 8Ne kata kario, nilio lilako liyia elia emuhandiichila, likhuwa elili liatoto muye khandi mwinywe; shichila eshiilima shili okhuhwaho, ne kata bulaano obulafu bwatoto bwakhanga. 9Ouboola mbu ali mubulafu, ne nakiyanga omwana wabwe, ali butswa mushiilima okhuula bulaano. 10Ouheela omwana wabwe amenyanga mubulafu, kata shibulaho eshiisichirasio shiosi muye. 11Nebutswa oukiya omwana wabwe ali mushiilima, khandi achenda mushiilima, naramanya ewa atsia ta, shichila eshiilima shimubofusiye tsimoni.
12Emuhandiichila, orwana rwanje, okhuba mulesheelwe ebionoono bieenywe khulwa eliiralie.
13Emuhandiichila inywe, abasamwana baana, okhuba mwamumanya ye oubeetsangaho okhurula khukhuchaaka.
Emuhandiichila inywe, abasooliili, okhuba mwamuhula omubii oyo.
Emuhandiichila inywe, orwana rwanje, okhuba mwamumanya Seefwe.
14Emuhandiichila inywe, abasamwana baana, okhuba mwamumanya ye oubeetsangaho okhurula khukhuchaaka.
Emuhandiichila inywe, abasooliili, okhuba muli abamaani, khandi likhuwa liaNyasaye limenyanga mwinywe; khandi mwamuhula omubii oyo.
15Muraheelanga eshialo, kata ebindu ebiamwo tawe. Omundu yesi ouheela eshialo, muye obuheeli bwaSeefwe bubulamwo. 16Okhuba biosi ebili mushialo, mbu obwikombi bwomubili, nobwikombi bwetsimoni, nokhwichinjimisilia ebia muli ninabio, ebio shibirula ewaSeefwe ta, habula nebieshialo. 17Nashio eshialo shihweetsangaho, halala nobwikombi bwashio; nebutswa oyo oukhola aka Nyasaye yeenya ayindilanga obushia nobushia.
Omufukuli waKristo
18Baana batii inywe, eshise eshihelelesia shiulile, ne shinga olwa mwahulila mbu omufukuli waKristo ali okhwitsa, kho kata bulaano babuushile abafukuli baKristo abanji; ne khulwako khumanyile mbu neshise eshihelelesia. 19Barula mwifwe, nebutswa shibalinji khwifwe ta; nibakhabeele khwifwe, khane bakhatsiililiile halala nineefwe. Ne barula mbu bamanyishe shinga olwa bosi barali khwifwe ta.
20Ne inywe ninywe abanyoola okhutsushiililwa amafura okhurula khu Oyo Omutakatifu, nimumanya amakhuwa kosi. 21Shimuhandiichiile shichila mwakorwa akobwatoto ta, habula shichila mwakamanya, khandi shichila okhurula mukobwatoto shimurulamwo obubeeyi bwosi ta.
22Omubeeyi niwina, habula oyo owambakhana mbu Yesu shiali ye Kristo ta? Naye niye omufukuli waKristo, omwenoyo owambakhana Samwana nende Omwana. 23Oyo owambakhana Omwana, shialikhwo nende Samwana ta; ne oumwiyama Omwana, kho ali nende Samwana yesi. 24Neenyu, akeenako aka mwahulila okhurula khukhuchaaka kamenyenje mwinywe. Ako aka mwahulila okhurula khukhuchaaka nikaba nikamenya mwinywe, neenyu mwesi mulamenyanga muMwana, khandi muSamwana. 25Ne shino nishio eshisuubisie eshia yakhusuubisia, mbu obulamu bwobumeli.
26Amakhuwa kano emuhandiichiile khukabeenabo abeenya okhumushiamia. 27Neenyu, okhutsushiililwa amafura okhwa mwanyoola okhurula khuye khumenyanga mwinywe; kata shimutamba mbu omundu amwibaalile ta; ne shinga obutsushiililwibwe olwa bumwibaalilanga mumakhuwa kosi, nabwo nibuli obwatoto, niburali obwobubeeyi ta, khandi shinga olwa bumwibaaliile, mumenyenje murio muye.
28Ne bulaano, baana batii inywe, menyenje muye, mbu olwa alaba nabisuulwe khube neitswoni, nikhurafwimbwa omurwe imbeliwe khukhwitsakhwe ta. 29Nimuba nimumanyile mbu ye nomulunjishi, khandi mumanyile murio mbu buli mundu yesi oukholanga akobulunjishi yeebuulwa ninaye.
Currently Selected:
1 Yohana 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
