Popular Bible Verses from 1 Yohana 2

Share

Muraheelanga eshialo, kata ebindu ebiamwo tawe. Omundu yesi ouheela eshialo, muye obuheeli bwaSeefwe bubulamwo. Okhuba biosi ebili mushialo, mbu obwikombi bwomubili, nobwikombi bwetsimoni, nokhwichinjimisilia ebia muli ninabio, ebio shibirula ewaSeefwe ta, habula nebieshialo.

Nashio eshialo shihweetsangaho, halala nobwikombi bwashio; nebutswa oyo oukhola aka Nyasaye yeenya ayindilanga obushia nobushia.

Ousunga mbu amenyanga muye, kamukhoyeele mbu achendenje shinga ye olwa yachendanga.

Orwana rwanje, emuhandiichila amakhuwa kano mbu muleshe okhwonoona. Ne omundu yesi naba niyoonoona, khuli nende Omuhabini ewaSeefwe, niye Yesu Kristo omulunjishi

Ouboola mbu Ndamumanya, ne narahulilanga amalakoke ta, nomubeeyi; kata obwatoto shibuli muye ta.

Ne lino nilio elichila nikhumanya shinga olwa khumumanyile ye; mbu nikhuba nikhuhulilanga amalakoke.

Ouboola mbu ali mubulafu, ne nakiyanga omwana wabwe, ali butswa mushiilima okhuula bulaano.

Omubeeyi niwina, habula oyo owambakhana mbu Yesu shiali ye Kristo ta? Naye niye omufukuli waKristo, omwenoyo owambakhana Samwana nende Omwana.

Oyo owambakhana Omwana, shialikhwo nende Samwana ta; ne oumwiyama Omwana, kho ali nende Samwana yesi.