Mariko 13
13
Areshambulwa ra hekalu
(Mat 24:1-2; Luk 21:5-6)
1Yesu abere atenga mwa hekalu, muuma wa mwa bemitsa bewe nianamubwira mbu: «Mwiyisa, talola kwa mabale na buhimbe ubu ko buli!»
2Yesu nianamuxubyitsa mbu: «Utsene kwa buhimbe bunene ubu? Mwa kuli anikubwira, hatendeshiba ibale literekire ku lindi. Amoshe makendeshambulwa.»
Abinwa bya ntsindiro ya kihuo
(Mat 24:3-14; Luk 21:7-19)
3Mwa mango Yesu abaa aikere kwa kitwa kye Miseituni, ierekera kwa munda wa hekalu, Petero, ne Yakobo, ne Yohana, ne Andereya babere bali bonabene kuuma naye, niabanamubutsa mbu: 4«Mwiyisa, utubwire, abinwa byowameneena ibi byendeba mangoki? Na kahe kokalolero kokakendebwerekya kwa byoshe ibi abixonda iberera?»
5Niyo Yesu atangira ibwirabo mbu: «Munakohya hatabaa mundu yabatinga. 6Kubwishi bandu bangi bendewicha mwetsina rani, ni ababula mbu: ‹Ingye, ngye Kirisitu!› Nabo bendetinga bandu bangi. 7Mwa mango mwendehulikya ahulihuli ya bulenda ni mutiubahe. Abinwa ibyo binalirene ihika. Wetuwe ni bitabibwerekya kwa ntsindiro ya kihuo yamehika. 8Kureba luanda lwendelwa na lundi. Na bwami bwendelwa na bundi. Ahoshe hendetsuka tulingiti na bulio kwa kihuo. Na byoshe ibi byendeba ngakuno ndangiro ya luhe.
9«Kubatyo, munakohya kushe, kubwishi mwendetwalwa ku kibu, nebakubita mu ngonyi mwamasinakoki. Na kandi mwendetwalwa mwa mbere sa bakulukulu, na bami kubwishi bwa ingye. Kwebula mbu mupfule amwatsi wa kuluenda ingye mwa mbere sabo.» 10Kubatyo, aMwatsi Mubuya alirene ni atangapfulwa kasa kwa nganda soshe. 11Mwa mango mukenderetsimbwa kwechirwa lubancha, ni mutiiririkane buxondotsi bwa kianiro, kuluenda abinwa byomukendereneena. Wetuwe ni mukendereneena abinwa byomukenderehabwa mo kashangi umo. Kubwishi bitenderetenga mwimwe mwenabene, wetuwe byenderetenga mwa Mutima Akomire.
12Abandu bakenderehotera banyakyabo kwebula mbu baitwe. Na babuti bakenderehotera abana babo. Na bana nabo, bakenderebindukira ababuti babo neitabo. 13Na bandu boshe benderebabaa kubwishi bwa ingye. Wetuwe yakendebeera ihikira kwa ntsindiro, endeufulwa.
Lubao lwa bubihya
(Mat 24:15-28; Luk 21:20-24)
14Wetuwe mwendeba mwaxunga ku yalukwa mbu ye «lubao lwabubihya» lolwameterekwa holutalirene iba, yasoma abinwa ibi, ni amenya iki. Aboshe bobakendeba mwa Yuteya, ni bashaira kwa bitwa. 15Na yakendeshinganwa kwa muutu wa nyumba, ni atikikime kweingira mwa nyumba mbu atengyemo bindu. 16Na mundu yakendeshinganwa mwexwa, ni atikifulukire mwa nyumba kandi kwebingamo alukimba luwe. 17Abakatsi bakule na bobaongya balyae alwire ulo. 18Muheme Ongo kwebula mbu abinwa ibyo bitendebahikira mu kibulaka. 19Kubwishi aminubo ya biro ibyo yendeba minubo mitsibu, minubo yoitatangaa yaxungwako kiro na hake, ihuluka he Ongo abumbiraa akihuo ihikira tsene. Hatikyendeba kandi kiro na indi minubo iri nga iyo. 20Ninakuwetu ali atakehyaa abiro bya minubo ibyo, nge hatali kiro na mundu muuma yangaufulwa. Wetuwe abiro ibyo amekehyabyo, kubwishi bwa bandu balondolaa.
21«Amundu akebabwira mbu: ‹Lola Kirisitu ali hano›, neri ‹ali halaa›, ni mutimwimirire. 22Kubwishi kwendepfumbuka bandu bobailuka mu bubesi mbu bo Kirisitu, kuuma na batahwa ba bubesi, nabo bakenderekola tulolero na bishishatsa kwebula mbu liri lingakocheka nehabukya abalondolwa ba Ongo. 23Mukohye! Nameotola ibatondera lubere.»
Arewicha ra Muala wa Mundu
(Mat 24:29-31; Luk 21:25-28)
24Wetuwe mo biro umo inyuma ya minubo iyo, aretsuba ritikendekola na mwetsi atikyendekoletsa, 25asanyenyetsi sendetoanga itenga mu mbingu, na byoshe byo biri na maala, byo biri mu mbingu byendetinganyibwa.#13:25 Soma Isaya 13:10; 34: 4. 26Niyo bakendexunga Muala wa Mundu na wicha mwa bipfu kuuma na maala mangi na ngulu. 27Naye endelika abamalaika bewe be mu mbingu kwa minda ine yoshe ya kihuo, nekongya abandu bewe balondolaa kwetenga kwa kihuo kyoshe.
Amushinga wa muti wa tini
(Mat 24:32-35; Luk 21:29-33)
28Amuti wa tini abe mushinga kwimwe. Mwa mango asandabi sao saxoa, na amasani maxoa, imwe ni mwakengula kwa kianiro kya kyanda kiri hofi. 29Konoko, mwa mango mwendexunga abianiro ibyo biri yobyahika, ni mwamenya kwiye ali hofi, na kwali kwa lukyo. 30Mwa kuli anibabwira kwa alubuto lwenyu luno lutendetsuka, abinwa byoshe ibi bitatsabyabererera. 31Ambingu na kihuo byendetsuka, wetuwe abinwa byani bitendetsuka kiro na hake.
Ongo yechi akashangi ka ntsindiro
(Mat 24:36-44)
32Wetuwe hatali mundu yechi alwire na saa, banabe na bamalaika ba mu mbingu, anabe ne Muala. Tata yenaweneho yanechi. 33Mukohye kubwishi mutechi ngakuno akashangi ako kakendewicha mangoki. 34Rendeba nga amundu aya mu luendo. Abere atenga mwamwe nianasiira abakotsi bewe bo mulimo. Nianaha kintsi mundu amulimo uwe. Niyo aha amulangi wa lukyo rubu mbu akohye. 35Kubatyo mukohye, kubwishi mutechi mwa mango nina anyumba endewicha. Kuti mu luoloolo, neri mu kati ka kiro, neri axongole yakokobika, neri mwemakyerakyera. 36Mukohye, atangendewicha mu kifulumuko, nebashingana ni mwameya tulo. 37Abinwa byonibabwira imwe, nabwirabyo abandu boshe mbu: «Mukohye.»
Currently Selected:
Mariko 13: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
