Mariko 14
14
Nama yareita Yesu
(Mat 26:1-6; Luk 22:1-2; Yoh 11:45-53)
1Kwabaa kwashiba biro bibiri lubere lwa lwire lukulu lwa Pasaka, na lwa mikati yoitalimo chachu. Boshebakungu na beyisa ba Muomba baxonda nchira yetsimba Yesu mu buxuma kwebula mbu bamwite. 2Wetuwe niabanabula mbu: «Tutamutsimbaa mwa lwire lukulu kwebula mbu hatangechehuluka kahinchangano mwa bandu.»
Amukatsi ahungulira Yesu yo lungo
(Mat 26:6-13; Yoh 12:1-8)
3Yesu abaa ali i Betaniya mwa nyumba ya Simoni Mubentsi. Babere bali yobalya, mukatsi muuma nianaingira mwa nyumba. Abaa na ngaha ye bale ya lungo lwa kichiro kinene lolukolirwe mu mauwa ma narito ikwirire. Nianapfunula angaha iyo nehungulira alungo kwa mutwe wa Yesu. 4Bauma mwa bandu bobabaa aho bayongerwa kinwa ikyo, nebula mbu: «Alungo ulu lwamepfa busha kuki?» 5Alungo ulo nge lungautsibwa mu kichiro kya tinari maana mashatu ma faranga#14:5 Abichere bya safaranga ibyo, byabaa abilukwa «Tinari». Asatinari maana mashatu ayo, sabaa faranga sepfuha mundu yamekola mulimo wa mwaka muuma., neabira abitwe ibyo kwa bachene. Niabanakemera amukatsi uyo kutsibu. 6Wetuwe Yesu nianabwirabo mbu: «Mumulike! Amumunubya kubushi bwaki? Iye amenikolera kinwa kibuya kutsibu.» 7Kubwishi mukendereba na bachene abiro byoshe, na kubatyo mungakocha iyasikyabo akashangi koshe ko mushashire. Wetuwe ingye nitendeba kuuma nemwe abiro byoshe. 8Amukatsi uyo amekola nga kwangakocha. Amehaka amubiri wani wo lungo buxondotsi, kwenitunganyanya kubwishi bwa retabwa rani. 9Mwa kuli anibabwira mbu kubwishi bwareubuka amukatsi uyu, akinwa kyamekola iki, kyendereshambalwa ahoshe ha Mwatsi Mubuya akenderepfulwa kwa kihuo kyoshe.
Yuta Isikariote aikiritsa ihota Yesu
(Mat 26:14-16; Luk 22:3-6)
10Yuta Isikariyote, muuma wa mwa bemitsa ikumi na babiri, nianaendera boshebakungu kwehotera Yesu kubo. 11Babere bahulikya amwatsi uyo, niabanamoa kutsibu. Niabanamuha manihisa memuha faranga. Yuta nianatangira ixonda nchira ikwirire ye muhotera.
Abemitsa batunganyanya ambiya ya Pasaka
(Mat 26:17-25; Luk 22:7-23; Yoh 13:21-30)
12Alwire lukulu lubere lwa mikati yoitalimo chachu, mwa mango babaa abakera ambuli ya Pasaka, abemitsa ba Yesu niabanamubutsa mbu: «Hai houxonda mbu tukulingiriranyitse ambiya ya Pasaka?» 13Niyo Yesu alika babiri mwa bemitsa bewe nebwirabo mbu: «Muende mwa mulungu, nomo mukatimanamo mundu muuma yahete kibindi kya mechi. Munakulikira amundu uyo, 14na mwakaingira ni mwabwira nina anyumba iyo mbu: ‹Mwiyisa abutsa mbu mbeni hai ho hali akyumba kiwe mwakalira ambiya ya Pasaka kuuma na bemitsa bewe?› 15Naye akababwerekya mbyangali ya kwa korofa ilingiriranyibwe netondwa kushe. Umo momukatutunganyitsa ambiya ya Pasaka.» 16Abemitsa niabanaenda. Babere bahika mwa mulungu, niabanatimana abindu byoshe ni biri nga ko Yesu shabwirabo. Nabo niabanatunganyanya ambiya ya Pasaka.
Ambiya ya Pasaka
(Mat 22:14-23; Yoh 13:21-30)
17Bwabere bwameoloba, Yesu nianawicha kuuma na bemitsa bewe ikumi na babiri. 18Babere bali yobalya, Yesu nianabula mbu: «Mwa kuli anibabwira ku muuma mwimwe yalya kuuma nani akanihotera.» 19Abemitsa bewe niabanayongwa nemubutsa muuma muuma mbu: «Mbeni ingye?» 20Yesu nianaxubyitsabo mbu: «Muuma mwimwe, mwe ikumi na babiri, yabobetsa amukati kuuma nani mwa mbale yakanihotera. 21Kureba Muala wa Mundu akapfa nga kwa Maandiko Makomire mabwire kuluenda iye; wetuwe alyae amundu yamuhotera! Ni shalirirene amundu uyo ni shatangabutirwe.»
Amubiri na shiama ya Yesu
(Mat 26:26-30; Luk 22:14-20)
22Babere bali yo balya, Yesu nianatsimba amukati, nianaashanirao, nianacha muo, nehao abemitsa bewe mbu: «Mutole amukati uyu, wo mubiri wani.» 23Inyuma kwaho, nianatsimba alungu, nianasima Ongo, nehalobo. Aboshe niabanaxoma. 24Nianabwirabo mbu: «Iyi yo shiama yani yoikapfubuka kubwishi bwa bandu bangi kwebereretsa andaane ya Ongo.» 25Mwa kuli anibabwira mbu: «Ihuluka tsene, nitikyendexoma kandi ku tifai ihikira alwire lonikendexomamo buhya mwa Bwami bwa Ongo.»
26Babere bameotola iwimba niabanabatuka kweya kwa kitwa kye Miseituni.#t14:26 aBayahuti babaa banaimba asaburi 115 ihikira ku 118 inyuma wa mbiya ya Pasaka.
Petero alahitsa ku atiiane Yesu
(Mat 26:31-35; Luk 22:31-34; Yoh 13:36)
27Yesu nianabwira abemitsa bewe mbu: «Mwe boshe mukanisiya, kubwishi aMaandiko Makomire mabwire mbu: ‹Nikaita amusumba na sa mbuli sikashanchwa.› 28Mwa mango nikapfuka, nikabaxondolera kweya i Ngalilaya.» 29Petero nianamubwira mbu: «Nakiro mbu abandi boshe bakakusiya, wetuwe ingye, nitikusiye kiro na hake.» 30Yesu nianamuxubitsa mbu: «Mwa kuli, anikubwira ku mwe kiro muno, buxondotsi axongole ikokobike kabiri, ukaba ni wameiana ingye kashatu.» 31Wetuwe Petero nianaiminga kutsibu, neneena mbu: «Nakiro mbu nilirene ipfa kuuma nawe, nitiyiane iwe kiro na hake.» Na bandi boshe niabananeena batyo.
Yesu ahemera mwexwa re Ngetsemani
(Mat 26:36-46; Luk 22:39-46)
32Inyuma kwaho, niabanahika mu ixwa rolilukwa mbu Ketsemani, ne Yesu nianabwira abemitsa bewe mbu: «Muikale hano nani naya ihema.» 33Nianaenda kuuma ne Petero, ne Yakobo, ne Yohana. Nianatangira iyongwa neiririkana. 34Batyo nianabwirabo mbu: «Amwete wani auchwire buyongwa bwehikira luero lwepfa! Mushibe hano, mukohye!» 35Inyuma kwaho nianaisiika hake kubo, nianashinga amapfi hashi kwehema Ongo mbu liri lingakocheka, akashangi ka minubo kamutengerere. 36Nianabula mbu: «Abba#14:36 «Abba» Kinwa kya Kiaramu kyokiahula ishe uwe kushekushe yaneena, neri yo baahula., ee Tata! Abyoshe bingakocheka kwiwe. Anikuhema mbu unitengyetse alungu lwa minubo ulu. Wetuwe litabaa nga konishashire, wetuwe libe nga koushashire.» 37Abere afuluka ha bemitsa bashatu bali, nianatimanabo ni bameya tulo. Nianabwira Petero mbu: «Simoni, wameya tulo? Utakochitse ikereresa kiro na saa nguma? 38Mukohye, nehema Ongo, mutangechetoera mu miereko, kubwishi amutima murai, wetuwe amubiri mutetera.» 39Nianasiabo kandi kweya ihema, nexuba mwa binwa ibyoho. 40Abere afuluka kandi, nianatimana abemitsa abo ni bamexuba iya tulo, kubwishi amesha mabo ni mametama, ni batakichi na kobangamuxubitsa. 41Abere afuluka ra kashatu, nianabwirabo mbu: «Mukinali tulo netamuka? Koshoko! Tsene akashangi kameeraho. Muala wa Mundu akaterekwa mwa minwe sa bandu ba santsambi. 42Mubatuke, tuende! Yanihotera ahara hofi.»
aBahayuti batsimba Yesu
(Mat 26:47-56; Luk 22:47-53; Yoh 18:3-12)
43Yesu abere akinali aneena, Mu kashalimo, Yuta muuma wa bemitsa ikumi na babiri, nianahika kuuma na kichiri kinene kya bandu bobali na mahombo, na ngonyi. Aboshi abobabaa nibamelikwa na boshebakungu, na beyisa ba Muomba, na bangumwa. 44Yuta yahoteraa Yesu, abaa ni ameotola ibwerekyabo akalolero aka mbu: «Ula yanikakokera niye. Ni mwamutsimba, nemutwala ni mumulangire kushe.» 45Yuta abere ahika, nianasheera ho Yesu ali nemubwira mbu: «Mwiyisa!» Nianamukokera. 46Niyo abandu abo batsimba Yesu nemumina. 47Wetuwe muuma mu bobabaa aho, nianatomola abuhombo buwe mwa hara necha arekwitwi ra mupfuku wa shebakungu.
48Inyuma kwaho, Yesu nianabwirabo mbu: «Mwamewicha na mahombo, na ngonyi, kwenitsimba ngakuno bandu bobaya itsimba munyai? 49Nabaa nereba kuuma nemwe abiro byoshe nianiyisa mwa hekalu, mutanitsimbaa. Wetuwe abinwa ibi byameba bitya kwebula mbu aMaandiko Makomire mabererere.»
50Abemitsa bewe boshe niabanashaa nemusiya. 51Wetuwe mutabana muuma yabaa aimbere kikwembe, nianakulikira Yesu. Baereka imutsimba, 52wetuwe nianalikula akikwembe kiwe neshaa bwambura.
Yesu ahura mwa Bushenge Bukulu
(Mat 26:57-68; Luk 22:54-55,63-71; Yoh 18:13-14,19-24)
53Niabanatwala Yesu ira mwa shebakungu mukulu#14:53 Mwa ndungo ya Bayahuti mwabaa munaba shebakungu mukulu muuma, yabaa anaimanira aboshebakungu boshe., na bemanitsi boshe ba bakungu, na bangumwa, na beyisa ba Muomba boshe, niabanabuanana aho. 54Petero nianakulikira Yesu kashando bunono, abaneingira mwa kati ka mbuwa ya shebakungu. Nianaikala hauma na basura, kweota kwa muchanwa. 55aBoshebakungu, na bakulukulu ba Bushenge Bukulu niabanaxonda kaliho ke songera Yesu kwebula mbu bamwite. Wetuwe batabonekyakyo. 56Bandu bangi niabanamuhambika binwa, wetuwe abinwa byobapfula ni bite byobiuma. 57Bauma mubo niabanabatuka kwepfula myatsi ya bubesi kuluenda iye mbu: 58«Itwe twaumpfaa ni aneena mbu: ‹Ingye nikashambula ahekalu iyi yoyahimbwaa na bandu, na mu biro bishatu nikahimba indi yoitahimbirwe na bandu.›» 59Wetuwe nakiro lwaba lutyo, abinwa byobamusongera ni bite byobiuma. 60Niyo shebakungu mukulu abatuka mwa mubuanano, nebutsa Yesu mbu: «Kuutauxubya ku kiro na kinwa?» Abandu aba abakusongera kubwishi bwaki? 61Yesu nianatsira ataxubya kiro kinwa. Shebakungu nianamubutsa kandi mbu: «Mbeni iwe we Kirisitu, Muala wa Ongo yalirene isingibwa?» 62Yesu nianaxubya mbu: «Ingye, ngye iye! Nemwe mukaxunga, Muala wa Mundu ni aikere kwa malyo ma Ongo Nina Maala. Mukamuxunga kandi ni awicha mwa bipfu bya mu mbingu!» 63Shebakungu abere ahulikya abinwa ibi, nianaberenga asangimba siwe, nebula mbu: «Tutakilaire ku kandi kaliho kwa mundu uyu! 64Mwameiumpfira mwenabene ku amekamba Ongo. Amuanikira mute?» Aboshe niabanamuchira lubancha kwalirene ipfa.
65Na bandi mubo niabanatangira ichira ku Yesu ko mate, niabanamuxwika mwa busu, nemukubita mpfundo, nemubwira mbu: «Kola butahwa, tubwire inde yamekukubita!» Na basura nabo niabanamutsimba nemukubita bihyu.
Petero aiana Yesu
(Mat 26:69-75; Luk 22:56-62; Yoh 18:15-18,25-27)
66Petero abaa akinali hetako mwa mbuwa ya kyumba kyo Yesu abaa ahuriramo, mucha muuma wa shebakungu nianahika aho. 67Abere axunga ku Petero kwaota kwa muchanwa, nianamusindera, nemubwira mbu: «Iwe nawe wabaa kuuma ne Yesu we Nasareti.» 68Wetuwe Petero nianaiana mbu: «Nitechi, neri nitechi abinwa byouxonda ineena.» Inyuma kwaho, nianahuluka neya kwa lukyo lwa ira mbua. Niyo axongole yakokobika.
69Wetuwe amucha uyo nianamuxunga aho, netangira ineena kandi na bobabaa aho mbu: «Amundu uyu muuma wa mwa bemitsa bewe.» 70Wetuwe Petero nianaiana kandi. Inyuma hake, abandu abo niabanabwira Petero kandi mbu: «Mwa kuli uli muuma wa mwa bemitsa bewe, kubwishi uli mwicha i Ngalilaya.» 71Niyo Petero atangira ineena mbu: «Nitukangwe, niri anineena bubesi! Anilahitsa ku ndechi amundu yomuahula uyu!» 72Abere ameotola ineena atyo, axongole niainakokobika ngendo ya kabiri. Petero nianaubuka abinwa byo Yesu amubwiraa mbu: «Buxondotsi axongole ikokobike ngendo ya kabiri, ukaba ni wameiana ingye kashatu, mbu utanichi.» Ni yatangira ilira!
Currently Selected:
Mariko 14: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
