Mariko 12
12
Mushinga wa bahingi babi
(Mat 21:33-46; Luk 20:9-19)
1Inyuma kwaho, Yesu nianaxuba ineena mu mishinga na bakulukulu ba Bayahuti mbu: «Mundu muuma nianabyala misabibu mu ixwa liwe. Nianatsungutsako mupfunda, nehimbamo mulinga we kamiramo abipfuma bya misabibu. Nianahimbamo na nyumba nyire yarelangiramo arexwa. Inyuma kwaho nianabwekyaro kwa bahingi nianaya mu kihuo mbinga. 2Abiro byarexola byabere byaeraho, nianalika mupfuku uwe muuma kwebinga amuhango uwe wa mwexwa ra misabibu. 3Wetuwe abahingi abo batsimba amupfuku uyo, bamuhumba nemufulukya minwe misha. 4Nina arexwa nianalika undi mupfuku kubo. Uyo naye, niabanamubabatsa kwa mutwe nemukamba. 5Nina arexwa nianalika kandi undi mupfuku, uyo niabanamwita. Inyuma kwaho, nianalika bandi bapfuku bangi. Abahingi abo, bahumba bauma mubo na bandi baitabo. 6Nina arexwa anashibaaho na mundu muuma, naye abaa ni muala mutsiyirwa uwe. Mwa ntsindiro, nianamulika kubo mbu: ‹Nichi ku bakapfa muala wani yo xoni.› 7Wetuwe abahingi abo babere bamuxunga kwahika, niabananeena bonabene ku bonabene mbu: ‹Mulole kuyu ye muli wa mwandu wa rexwa lino. Kunchi tumwite, na rexwa lino likaba mwandu wetu!› 8Kubatyo niabanatsimba muala uyo, nemwita nelekera andundwe kwa musike wa rexwa ra misabibu.»
9Niyo Yesu abutsabo mbu: «Amuanikira mbu nina arexwa ra misabibu iyo akakolaki? Akawicha ikonola abahingi abo. Nenyuma kwaho niakendexonda bandi bapfuku behinga arexwa iro. 10Mutatsa mwasoma kwa Maandiko Makomire mabwire mbu:
‹Arebale ra bahimbi batindaa,
rorameba ibale linene ra kwa musingi wa nyumba.›»
11Ninakuwetu yamekola akinwa iki,
nakyo kyametushishatsa kutsibu!#12:11 kutsibu! Soma Saburi 118:22-23.
12Niyo abakulukulu abo baxonda itsimba Yesu, kubwishi ni bamekengula kwa mushinga washacha uyo, ali kubo. Wetuwe kubwishi bwareubaha amubuanano wa bandu, niabanamusiya mbu aiendere.
Arefuta akoli ya Kaisari
(Mat 22:15-22; Luk 20:20-26)
13Inyuma kwaho, niabanalika Bafarisayo bauma kuuma na kikanga kya Herote kweya itea Yesu kinwa mu bya neena. 14Niabanawicha imubwira mbu: «Mwiyisa, twichi ku uli mundu wa kuli. Utaubahire mundu, abandu boshe balingene mwa mbere sawe, kubwishi utalinda waneena mbu uyu mundu mukulukulu. Aubaneiyisa abandu akuli ya nchira ya Ongo. Utubwire ngakuno aMuomba atuhere rubu lwefuta koli kwa mwami Kaisari neri ihi?»
15Wetuwe Yesu nianakengula ku abandu abo, ba tulimi tubiri. Nianabwirabo mbu: «Amuniereka kubwishi bwaki? Muniletere kichere kiuma kya lufaranga hano nilole kukyo.»
16Niabanamuletera akichere kya lufaranga, nianabutsabo mbu: «Ashushani iyi yande? Na aretsina iri rande?»
Niabanamuxubyitsa mbu: «Bya Kaisari.»
17Niyo Yesu abwirabo mbu: «Muhe Kaisari biwe ne Ongo biwe.»
Arepfuka ra bapfu
(Mat 22:23-33; Luk 20:27-40)
18 Basandukayo bauma bobananeena mbu abapfu batendepfuka, bahikira Yesu nemubutsa mbu: 19«Mwiyisa, Musa atuhere iteeko roliandikirwe mbu: ‹Mulume yahikitse akepfa atabutire mwana, mulumuna uwe ni aingirira amuxumbakatsi uyo, kwebutira wali mukulu uwe yo bana.› 20Kubatyo, aho habaa balume balinda ba bula buuma. Afula niainahikya mukatsi, wetuwe nianapfa butsira ibuta kiro na mwana. 21Muala wabo wa kabiri nianaingirira amuxumbakatsi uyo, naye nianapfa butsira ibuta mwana. Nialunaba lutyo ku muala wabo wa kashatu, 22na balinda boshe bapfa butsira mwana. Inyuma wa lupfu lwabo, amukatsi naye nianapfa. 23Kubatyo, mwa lwire lwarepfuka ra bapfu, amukatsi uyo, endeba wande kubwishi abalinda boshe babaa naye?»
24Yesu nianaxubitsabo mbu: «Mwameitinga kureba mutechi aMaandiko Makomire neri amaala ma Ongo. 25Kureba mwa mango abapfu bendepfuka, bendebaho ngakuno kwa bamalaika banabaho mu mbingu. Batendehikya neri ihikibwa. 26Na kuluenda arepfuka ra bapfu, mutatsamwasoma mwa kitabo kya Muomba wa Musa, kyo Ongo amubwiraa mwa kitundi kyokyabaa akiulumira? Nianamubwira mbu: ‹Ingye, ngye Ongo wa Iburahimu, Ongo wa Isake, ne Ongo wa Yakobo.›#12:26 Soma Mafuluko 3:6.»
27Yesu nianaxuba ibwirabo mbu: «Ongo ate Ongo wa bapfu, wetuwe Ongo wa bobaliho. Kubatyo, imwe muhabukire kutsibu.»
Areteeko rolirengitse amoshe
(Mat 22:34-40; Luk 10:25-28)
28Mwiyisa muuma wa Muomba abaa aliho, mwa mango Yesu abaa akubirisanya na Basandukayo. Iye nianakengula ku Yesu amexubyitsabo kushe. Kubatyo, nianaipfunda hofi naye nemubutsa mbu: «Lihe reteeko rolirengitse amandi moshe?»
29Yesu nianamuxubitsa mbu: «Areteeko rolilengitse amandi mateeko moshe rolino: ‹Umpfa mwe luanda lwa Isiraeli, Ninakuwetu Ongo ye Ninakuwetu yenawene. 30Tsiyira Ninakuwetu Ongo wawe, mwa mwete wawe woshe, na mwa mutima wawe woshe, na mwa bwenge bwawe bwoshe, na mwa maala mawe moshe.›#12:30 Soma Muubuko 6:4-5. 31Na reteeko rakabiri ni rolino: ‹Uneretsiyira amuhuwene wawe ngakuno kouitsiyire wonawene.›#12:31 Soma Balawi 19:18. Hatali lindi teeko lirengitse ayo.»
32Amwiyisa wa Muomba uyo nianabwira Yesu mbu: «Likwirire, ee Mwiyisa! Wameneena kuli ku Ongo muuma yenaweneho na ku hatali undi Ongo ali ate iye. 33Na mundu alirene itsiyira Ongo mwa mwete uwe woshe, na mwa bwenge buwe bwoshe, na mwa maala mewe moshe. Naye alirene itsiyira amuhuwene uwe nga kwanaitsiyire yenawene. Ibyo bikwirire irengya itula Ongo yo mutulo wa nyama ishititse na indi mitulo yoshe.»#12:33 Soma Oseya 6:6. 34Yesu abere amexunga ku amexubya mu bwenge, nianamubwira mbu: «Ute hale na Bwami bwa Ongo.» Inyuma kwaho hataboneka mundu yamubutsa kindi kinwa.
Alubuto na bukulukulu bwa Yesu Kirisitu
(Mat 22:41-46; Luk 20:41-44)
35Lwire luuma Yesu abaa ni aiyisa mwa hekalu nianabutsa mbu: «Mbeni bate ko abeyisa ba Muomba banganeena mbu Kirisitu muala wa Ndauti? 36Ndauti yewene, aendibwaa na Mutima Akomire aneenaa mbu:
‹Ninakuwetu Ongo nianabwira Ninakuwetu mbu:
Ikala kwa munda wani wa malyo, ihikira
honikendehira abalenda bawe hatako wa bishando byawe.›#12:36 Soma Saburi 110:1.
37Ndauti yewene aluka Kirisitu mbu:
‹Ninakuwetu›.
Bateno ko Kirisitu uyo, angaxuba iba Muala wa Ndauti?»
Meyiso kuluenda abeyisa ba Muomba
(Mat 23:1-36; Luk 20:45-47)
Kikanga kinene kya bandu babaa abaumpfiritsa Yesu mu lumoo.
38Mwa meyiso mewe nianabwirabo mbu: «Munerekohya kwa beyisa ba Muomba. Baneretsiyira itamba ni baimbere twantsu tule, neketsibwa mu lubaho mwa mibuanano. 39Na kandi banatsiira ikala kwa bipfumbi bya ira buxondotsi mwa masinakoki na ho hali linye. 40Banerenyaa abitwe bya baxumbakatsi, nehema mahemo ma kishangi kire kwebula mbu balolweko na bandu. Kubwishi bwekyo bendechirwa lubancha lutsibu!»
Amutulo wa muxumbakatsi muchene
(Luk 21:1-4)
41Inyuma kwaho, Yesu nianaikala mwa hekalu hofi na sanduku ya mitulo. Nialola kwabandu abatula. Baxoki bangi niabanatula bitwe bingi mwa sanduku umo. 42Muxumbakatsi muuma muchene, naye nianawicha. Nianatoetsamo bichere bibiri bya faranga bya kichiro kike kutsibu. 43Niyo Yesu abirangira abemitsa bewe nebwirabo mbu: «Mwa kuli anibabwira ku amuxumbakatsi muchene uyu, yametula bingi irengya abandu boshe bobametula faranga mwa sanduku ya mitulo. 44Kureba abandi boshe aba bametula amisialitsa ya kwa muhango wa kwa bitwe byabo. Wetuwe amuxumbakatsi uyu mwa buchene buwe, ametula abitwe biwe byoshe, byaweteko kwebaho liwe.»
Currently Selected:
Mariko 12: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
