ᔨᐸᓁᐊᐅᑉ ᐊᒡᓚᖏᑦ 3
3
ᔨᕉᓴᓕᐅᑉ ᐊᔪᕐᑐᓕᓂᖓ ᐅᑎᕐᑎᑕᐅᓂᖓᓗ
1ᑲᑉᐱᐊᓐᓇᒦᒃ ᑍᓐᓇ ᐃᒡᓗᒐᓴᒃ ᐊᑭᕋᕐᑐᕐᑐᖅ ᓇᕐᕈᓇᕐᓯᔪᕐᓗ, ᐱᐅᖏᑦᑐᒥᓪᓗ ᑕᑕᑦᑐᖅ! 2ᓈᓚᓚᐅᖏᒻᒪᑦ ᐊᑕᓂᐅᑉ ᓂᐱᖓᓂᒃ, ᐋᖅᑭᒋᐊᕐᑕᐅᔪᒪᓚᐅᖏᒻᒪᓗ, ᑕᑎᖃᓚᐅᖏᒻᒪ ᐊᑕᓂᕐᒥᒃ, ᒎᑎᒥᓄᑦ ᖃᓪᓕᒋᐊᓚᐅᖏᒻᒪᑦ. 3ᑖᑦᓱᒪ ᕿᑐᕐᖓᖏᑦ ᓛᔭᑎᑐᑦ ᐃᕐᓯᓵᕐᐳᑦ, ᐊᐅᓚᑦᓯᔨᖏᓪᓗ ᐊᒪᕈᕐᑎᑑᕐᐳᑦ, ᐅᓪᓛᒧᑦ ᐊᒥᐊᒃᑯᖏᑦᑐᑦ. 4ᓇᓚᐅᑦᑍᔨᖁᑎᖏᑦ ᐅᖃᐅᓯᕐᓘᑎᓖᑦ, ᑕᑎᒋᔭᒃᓴᐅᖏᑦᑐᑦ. ᑐᓂᕐᕈᓯᕐᑎᑦᓯᔨᖏᑦ ᓇᕐᕈᓇᕐᓯᑎᑦᓯᕗᑦ ᐃᑦᔪᕐᓁᑦᑐᒃᑯᕕᖕᒥᒃ. ᒎᑎᐅᑉ ᐱᖁᔭᖏᓐᓂᒃ ᐊᑐᕐᓂᕐᓗᒃᐳᑦ. 5ᐊᑕᓂᕐᓕ ᑖᑦᓱᒪᓃᑦᑐᖅ ᐃᓱᐊᕐᑑᕗᖅ, ᐃᓱᐃᑦᑐᓕᓂᐊᓐᖏᓚᕐᓗ. ᐅᓪᓛᑕᒫᑦ ᐃᓱᐊᕐᑐᓕᓂᓂ ᓴᖅᑭᑎᑉᐹ ᖃᐅᒪᔪᓄᑦ; ᐅᕐᕈᔪᓐᓇᖏᑦᑐᖅ, ᐃᓱᐃᑦᑐᓕᔪᓪᓕ ᖃᐅᔨᒪᓐᖏᓚᑦ ᑲᓐᖑᓱᖕᓂᕐᒥᒃ.
6“ᐃᓅᖃᑎᒌᒡᔪᐊᓕᒫᑦ ᓄᖑᑎᑉᐸᒃᑲ, ᓲᖑᑦᔪᑎᒋᔭᖏᓪᓗ ᓱᕋᒃᐸᒃᑲ; ᐊᖅᑯᑎᖏᓪᓗ ᐃᓄᖃᕈᓐᓁᕐᑎᑉᐸᒃᑲ, ᐊᖅᑯᓵᑕᐅᓂᐊᕈᓐᓁᕐᐳᓪᓗ, ᐃᒡᓗᒐᓴᖏᓪᓗ ᐊᓯᕈᕐᑕᐅᕗᑦ, ᐃᓄᖃᕐᓂᐊᕈᓐᓁᕐᐳᖅ ᓄᓇᒋᔭᐅᔪᓐᓁᕐᓗᓂᓗ. 7ᐅᖃᓚᐅᕐᐳᖓᓗ, ‘ᐃᒻᒪᖄᓕ ᓯᕘᕋᒋᓂᐊᓕᕐᐸᑦᓯᓐᖓ ᓈᒻᒪᒋᔭᐅᓂᐊᕐᐳᓪᓗ ᐊᖅᑭᒋᐊᕐᓯᓂᒃᑲ ᐃᓂᒋᔭᖏᓪᓗ ᓄᖑᑎᓐᓂᐊᓐᖏᓚᒃᑲ.’ ᓱᒋᐊᓚᐅᕋᓗᐊᕋᒃᑭᓪᓗ, ᐅᑎᑦᓴᐅᑎᒋᓚᐅᕐᐳᑦ ᐱᓂᐊᕐᓂᖃᓕᕐᓗᑎᒡᓗ ᐱᐅᖏᑦᑐᓂᒃ.
8“ᑍᒤᒻᒪ ᐅᕙᓐᓂᒃ ᐅᑕᖅᑭᒋᑦᓯ, ᐊᑕᓂᖅ ᐅᖃᕐᐳᖅ, ᐅᓪᓗᕐᒧᑦ ᓇᓗᓁᕐᓯᕕᒋᔪᒫᕐᑕᓐᓄᑦ. ᐃᓅᖃᑎᒌᒡᔪᐊᑦ ᑲᑎᑎᑦᓱᒪᕙᒃᑲ ᐊᑕᓂᐅᕖᓪᓗ ᑲᑎᑎᑦᓱᒪᕙᒃᑲ, ᓂᓐᖓᐅᒪᓂᓐᓂᒃ ᑯᕝᕕᕆᔪᒪᕙᒃᑲ, ᓯᖕᓇᓂᓐᓄᑦ ᓄᓇᕐᔪᐊᓕᒫᖅ ᐊᓯᕈᕐᑕᐅᔪᒫᕐᐳᖅ ᐃᑯᒪᒧᑦ.
9“ᑭᖑᓂᐊᒍᑦ ᐃᓄᖁᑎᒃᑲ ᓴᓗᒻᒪᕐᓴᕐᓂᐊᕐᐸᒃᑲ ᐅᖃᐅᓯᕐᑖᕐᑎᓪᓗᒋᓪᓗ. ᐊᑕᓂᐅᑉ ᐊᑎᖓᓄᑦ ᑐᒃᓯᐊᖁᓪᓗᒋᑦ ᑭᒡᒐᕐᑐᕐᓗᑎᒡᓗ ᐊᑕᐅᓯᐅᖃᑎᒌᒡᓗᑎᒃ. 10ᐃᑎᐅᐱᐊᒥᐅᑉ ᑰᖓᑕ ᐅᖓᑖᓂᑦ ᐃᓄᖁᑎᒃᑲ ᓯᐊᒻᒪᕐᓯᒪᔪᑦ ᓱᓕᔪᒥᒃ ᑐᒃᓯᐊᕐᓂᖃᕈᒫᕐᐳᑦ ᑐᓂᕐᕈᓯᕈᒫᕐᐳᓪᓗ ᐅᕙᓐᓄᑦ. 11ᑍᑲᓂ ᐅᓪᓗᒥ ᑲᓐᖑᓱᒃᑎᑕᐅᔪᒫᓐᖏᓚᓯ ᑕᒻᒪᕐᓂᕆᓚᐅᕐᑕᓯ ᐅᕙᓐᓄᑦ ᐱᓪᓗᒋᑦ, ᑍᒃᑯᐊ ᐊᑯᓐᓇᑦᓯᓐᓃᑦᑐᑦ ᖁᕕᐊᓲᑎᓖᑦ ᐱᐅᔪᕆᓂᕐᒥᒃ ᓄᖑᑎᑦᓱᒫᕐᐸᒃᑲ. ᐃᒻᒥᓂᒃ ᐊᖏᒡᓕᑎᓚᐅᕐᓯᒪᓂᐊᕈᓐᓁᕐᐳᓯ ᖃᖅᑲᖁᑎᓐᓂ ᐃᑦᔪᕐᓁᑦᑐᒥ. 12ᑍᒃᑯᐊ ᐊᒥᐊᒃᑰᑎᓐᓂᐊᕐᐸᒃᑲ ᒥᑭᒡᓕᑎᕐᓯᒪᔪᑦ ᐱᐅᔪᕆᖏᑦᑐᓪᓗ ᐊᑯᓐᓇᑦᓯᓐᓂᑦ, ᑕᑎᖃᕐᑐᑦ ᐊᑕᓂᐅᑉ ᐊᑎᖓᓂᒃ. 13#ᑕᑯᑎ 14:5.ᐃᓴᕆᐊᓕᒥᐅᑦ ᐊᒥᐊᒃᑯᖏᑦ ᐃᓱᐃᑦᑐᓕᓂᐊᕈᓐᓁᕐᐳᑦ ᓴᒡᓗᓂᐊᕈᓐᓁᕐᐳᓪᓗ, ᐅᖃᖏᑕᓗ ᐅᖃᕐᓂᕐᓘᑎᖏᑦ ᖃᓂᖏᓐᓂ ᓇᓂᔭᐅᓂᐊᕈᓐᓁᕐᐳᑦ. ᐆᒪᔪᖁᑎᒥᖕᓂᒃ ᓂᕆᑎᑦᓯᔪᒫᕐᐳᑦ ᐱᕙᓪᓕᐊᑦᓯᐊᕐᓗᑎᒡᓗ, ᑭᓇᒧᓪᓘᓐᓃᑦ ᑲᑉᐱᐊᓱᒃᑎᑕᐅᓂᐊᕈᓐᓁᕐᐳᑦ.”
ᖁᕕᐊᓱᖕᓂᕐᒧᑦ ᐃᓐᖏᐅᑦ
14ᐃᓐᖏᕆᑦ, ᓮᐅᓂᐅᑉ ᐸᓂᖓ!
ᕾᒐᓛᕆᑦ ᐃᓴᕆᐊᓖ!
ᖁᕕᐊᓱᒋᑦ ᓯᕆᓗᑎᓪᓗ ᐆᒻᒪᑎᒃᑯᑦ ᐃᓗᖏᕐᑐᕐᓗᑎᑦ,
ᔨᕉᓴᓕᐅᑉ ᐸᓂᖓ!
15ᐊᑕᓂᐅᑉ ᐃᖅᑲᕐᑐᐃᓂᓂ ᐲᕐᑎᒻᒪᒍ,
ᐊᑭᕋᓯᓗ ᐃᒋᓯᒪᖕᒪᒋᑦ.
ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ,
ᐊᑕᓂᖅ, ᐊᑯᓐᓇᑦᓯᓐᓃᑉᐳᖅ;
ᑲᑉᐱᐊᓱᒃᑎᑕᐅᓚᐅᕐᓯᒪᓂᐊᕈᓐᓁᕐᐳᑎᑦ.
16ᑍᑲᓂ ᐅᓪᓗᒥ ᔨᕉᓴᓕᒻ ᐅᖃᐅᑦᔭᐅᔪᒫᕐᐳᖅ,
“ᑲᑉᐱᐊᓱᖏᓪᓗᑎᑦ, ᓮᐅᓂᐅᑉ ᐃᒡᓗᒐᓴᖓ,
ᐊᒡᒐᓯ ᓴᓐᖐᑦᑑᑎᑦᑍᓕᓯᐅᒃ.
17ᐊᑕᓂᐅᑉ ᒎᑎᑦᓯ ᐃᓚᒋᕚᓯ,
ᐊᔪᒐᖃᖏᑦᑐᑐᐊᑉ ᐱᐅᓕᔪᒫᕐᐹᓯ.
ᖁᕕᐊᓲᑎᒋᔪᒫᕐᐹᓯ, ᓂᐸᖏᕐᑎᑦᓱᒫᕐᐹᓯ ᓇᒡᓕᖕᓂᕐᒥᓄᑦ,
ᖁᕕᐊᓲᑎᒋᔪᒫᕐᐹᓯ ᐃᓐᖏᕐᓗᓂ.
18ᕿᒃᓵᖕᓇᕐᑐᑦ ᓇᓪᓕᐅᕐᓂᕐᓯᐅᕐᓃᑦ ᐲᕐᑎᓐᓂᐊᕐᐸᒃᑲ,
ᓯᕘᕋᓵᕈᑎᒋᔭᒃᑲ ᐲᕐᑎᓐᓂᐊᕐᐸᒃᑲ.
19ᑕᑯᒋᑦ, ᑍᓐᓇ ᓇᓪᓕᐅᑎᒃᐸᑦ
ᐃᓕᑦᓯᓐᓂᒃ ᕿᒃᓵᒃᑎᑦᓯᔪᑦ ᑲᒪᒋᔪᒫᕐᐸᒃᑲ,
ᑐᓯᐊᑦᑐᑦ ᐱᐅᓕᓂᐊᕐᐸᒃᑲ.
ᑲᑎᑎᑦᓱᒫᕐᐸᒃᑲᓗ ᓯᐊᒻᒪᕐᑎᑕᐅᓯᒪᔪᑦ,
ᑎᓕᔪᒫᕐᐸᒃᑲᓗ ᓂᕐᑐᐃᑯᓪᓗᒋᑦ ᖃᐅᔨᒪᔭᐅᑦᓯᐊᓕᕐᑎᓪᓗᒋᓪᓗ,
ᑍᒃᑯᐊ ᓄᓇᓂ ᓇᓂᑐᐃᓐᓇᖅ ᑲᓐᖑᓱᒃᑎᑕᐅᓚᐅᕐᑐᑦ.
20ᑍᑲᓂ ᓇᓪᓕᐅᑦᑐᒥ ᐅᑎᕐᑎᑦᓱᒫᕐᐸᑦᓯ!
ᑲᑎᕐᓱᐃᓕᕈᒪᓗ ᓂᕐᑐᕐᓇᕐᓯᑎᑦᓱᒫᕐᐸᑦᓯ
ᖃᐅᔨᒪᔭᐅᑦᓯᐊᕐᓗᓯᓗ ᐃᓄᓕᒫᓄᑦ ᓄᓇᕐᔪᐊᒦᑦᑐᓄᑦ.
ᑎᒍᔭᐅᓯᒪᔪᑦ ᐅᑎᕐᑎᑦᓱᒫᕐᐸᒃᑲ ᑕᑯᓐᓇᕐᑎᓪᓗᓯ,”
ᐊᑕᓂᖅ ᐅᖃᕐᐳᖅ.
Currently Selected:
ᔨᐸᓁᐊᐅᑉ ᐊᒡᓚᖏᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
