ᕼᐊᒊᑉ ᐊᒡᓚᖏᑦ 1
1
ᐊᑕᓂᐅᑉ ᑎᓕᓯᓂᖏᑦ ᑐᒃᓯᐊᕐᕕᒡᔪᐊᖅ ᓴᓇᔭᐅᒃᑲᓐᓂᖁᓪᓗᒍ
1 #
ᐄᓱᕋ 4:24—5:2; 6:14. ᐊᖓᔪᖅᑳᕐᔪᐊᖅ ᑍᕉᓯ ᐴᕐᓯᐊᒥᐅᑕᖅ ᐊᐅᓚᑦᓯᓕᕐᑎᓪᓗᒍ, ᐊᕐᕌᒎᑉ ᐂᑉᐸᖓᓂ ᑕᖅᑮᑦ ᐱᖓᓲᔪᕐᑐᖓᓐᓂ, ᑕᖅᑭᐅᑉ ᐱᒋᐊᕐᓂᖓᑕ ᐅᓪᓗᖏᑕ ᓯᕗᓪᓕᕐᐹᖓᓂ, ᐊᑕᓂᐅᑉ ᐅᖃᐅᓯᖓ ᐅᖃᕐᑎᖓᒍᑦ ᕼᐊᒊᒃᑰᕐᐳᖅ ᔨᕈᐸᐱᐅᓪᒧᑦ ᓯᐅᓪᑎᐅᑉ ᐃᕐᓂᖓᓄᑦ, ᐊᐅᓚᑦᓯᔨᒧᑦ ᔫᑕᒥ, ᔮᓱᐊᒧᓪᓗ ᔨᕼᐅᔭᑕᐅᑉ ᐃᕐᓂᖓᓄᑦ, ᑐᓂᕐᕈᓯᕐᑎᑦᔨᓰᑦ ᐊᖓᔪᖅᑳᖓᓐᓄᑦ.
2ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫ ᐅᖃᕐᐳᖅ, “ᐅᑯᐊ ᐃᓄᐃᑦ ᐃᒫᒃ ᐅᖃᕐᐸᒃᐳᑦ, ‘ᓇᓪᓕᐅᑎᓐᖏᓚᖅ, ᐊᑕᓂᐅᑉ ᓴᓇᒋᐊᖁᔨᓂᖓ ᐃᒡᓗᖁᑎᒥᓂᒃ.’” 3ᑕᕝᕙ ᐊᑕᓂᖅ ᕼᐊᒊᒧᑦ ᐅᖃᕐᐳᖅ, ᐃᒫᒃ ᐅᖃᕐᓗᓂ: 4“ᐊᑲᐅᓈᕐᓯᒪᕚ ᐃᓕᑦᓯ ᐃᒡᓗᖃᑦᓯᐊᕐᑐᐊᓘᑎᓪᓗᓯ, ᐊᑕᓂᐅᑉ ᐃᒡᓗᖓ ᓱᕋᒃᓯᒪᑎᓪᓗᒎ? 5ᑍᒤᒻᒪᑦ ᒫᓐᓇ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ: ‘ᐃᓱᒪᒋᓚᐅᕐᓯᐅᒃ ᖃᓄᐃᓕᐅᕐᓯᒪᓂᓯ! 6ᑲᓐᖓᕐᓱᐃᓚᐅᕐᐳᓯ ᐊᖏᔪᓂᒃ, ᑲᑎᕐᓱᕐᑕᓯ ᒥᑭᔫᑎᓪᓗᒋᑦ; ᓂᕆᕗᓯ, ᐊᕿᐊᑦᑐᕈᓐᓇᕋᓯ; ᐃᒥᕐᐳᓯ, ᐃᒥᕈᐃᕈᓐᓇᕋᓯ, ᐊᓐᓄᕌᕋᓗᐊᕐᐳᓯ ᐅᖅᑰᓯᓇᓯᓕ, ᑮᓇᐅᔭᓕᐅᕐᑐᕐᓗ, ᐴᖅᑬᕗᖅ ᑮᓇᐅᔭᒥᓂᒃ ᐃᒃᐱᐊᕐᔪᖕᒧᑦ ᐊᖕᒪᔪᓕᖕᒧᑦ.’ 7ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ: ‘ᐃᓱᒪᒋᓚᐅᕐᓯᐅᒃ ᖃᓄᐃᓕᐅᕐᓯᒪᓂᓯ! 8ᖃᖅᑲᒧᐊᓕᕆᑦᓯ ᐂᒃᓯᕐᓗᓯ ᕿᔪᖕᓂᒃ ᑐᒃᓯᐊᕐᕕᒡᔪᐊᕐᓗ ᓴᓇᔭᕐᑐᓕᕐᓯᐅᒃ, ᖁᕕᐊᒋᓕᕐᓂᐊᕋᒃᑯ ᐱᓐᓇᕐᓇᕐᓗᖓᓗ ᓴᖅᑭᓐᓂᐊᕋᒪ.’ ᐊᑕᓂᖅ ᐅᖃᕐᐳᖅ.
9“ᑕᑯᔪᒪᓚᐅᕐᐳᓯ ᐊᖏᔪᒥᒃ, ᒥᑭᔪᒥᒡᓕ ᑕᑯᕗᓯ, ᐊᖏᕐᕋᐅᑎᔭᓯᓗ ᑎᒃᑕᐅᑎᓚᐅᕐᐸᒃᑲ, ᓱᖕᒫᑦ? ᐊᑕᓂᖅ ᐅᖃᕐᐳᖅ, ‘ᐃᒡᓗᒐ ᓱᕋᒃᓯᒪᖕᒪᑦ, ᐃᓕᑦᓯ ᐊᑐᓂᑦ ᐃᒡᓗᑦᓯᓐᓂᒃ ᓴᓇᑐᐃᓐᓇᕐᑎᓪᓗᓯ,’ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ. 10‘ᑍᒤᒻᒪᑦ, ᕿᓚᐅᑉ ᓯᓚᓗᒃ ᓄᖅᑲᖓᑎᑉᐹ ᓱᓇᒥᒡᓘᓐᓃᑦ ᓄᓇᕐᔪᐊᕐᒥ ᐱᕈᕐᑐᖃᕈᓐᓇᕋᓂ. 11ᓄᓇ ᐸᓂᕐᑎᓚᐅᕐᐸᕋ ᐱᕈᕐᓰᕖᑦ ᖃᖅᑬᓪᓗ, ᓂᐊᖂᔭᒃᓮᓪᓗ, ᕔᓂᒃᓮᓪᓗ, ᐱᕈᕐᑐᐃᓪᓗ ᐅᕐᓱᖏᑦ ᓱᓇᑐᐃᓐᓁᓪᓗ ᓄᓇᐅᑉ ᐱᕈᕐᑎᑕᖏᑦ, ᐃᓄᖕᓄᑦ ᐆᒪᔪᖁᑎᑦᓯᓐᓄᓪᓗ, ᐊᒡᒐᑦᓯᓗ ᓴᓇᔭᓕᒫᖏᑦ.’”
ᐃᓄᐃᑦ ᓈᓚᖕᓂᖏᑦ ᐊᑕᓂᐅᑉ ᐱᖁᔨᓂᖓᓂᒃ
12ᑕᕝᕙ ᔨᕈᐸᐱᐅᓪ ᓯᐅᓪᑎᐅᑉ ᐃᕐᓂᖓ, ᔮᓱᐊᓗ ᔨᕼᐅᔭᑕᐅᑉ ᐃᕐᓂᖓ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖅ, ᐃᓄᐃᓪᓗ ᐊᒥᐊᒃᑯᐃᑦ ᓈᓚᓚᐅᕐᐳᑦ ᐊᑕᓂᐅᑉ ᒎᑎᖓᑦᑕ ᓂᐱᖓᓂᒃ, ᕼᐊᒊᓪᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐅᖃᐅᓯᖏᓐᓂᒃ, ᐊᑕᓂᐅᑉ ᑖᓐᓇ ᑎᓕᓚᐅᕐᒪᒍ, ᐃᓄᐃᓪᓗ ᓯᕘᕋᓕᕐᐳᑦ ᐊᑕᓂᐅᑉ ᓇᔫᑎᓂᖓᓂᒃ. 13ᑕᕝᕙ ᕼᐊᒊ, ᐊᑕᓂᐅᑉ ᐅᖃᕐᑎᖓ, ᐊᑕᓂᐅᑉ ᐅᖃᐅᓯᖏᓐᓂᒃ ᐃᓄᖕᓄᑦ ᐅᖃᕐᐳᖅ: “ᐃᓚᒋᕙᑦᓯ, ᐊᑕᓂᖅ ᐅᖃᕐᐳᖅ.” 14ᐊᑕᓂᐅᑉ ᔨᕈᐸᐱᐅᓪ ᓯᐅᓪᑎᐅᑉ ᐃᕐᓂᖓᑕ ᐊᓂᕐᓂᖓ ᐊᐅᓚᑦᔭᒃᑎᓚᐅᕐᐹ, ᑖᓐᓇ ᐊᐅᓚᑦᓯᔨᐅᔪᖅ ᔫᑕᒥᐅᓄᑦ, ᔮᓱᐊᓪᓗ ᔨᕼᐅᔭᑕᐅᑉ ᐃᕐᓂᖓᑕ ᐊᓂᕐᓂᖓ ᐊᐅᓚᑦᔭᒃᑎᓚᐅᕐᐹ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖅ, ᐃᓄᐃᓪᓗ ᐊᒥᐊᒃᑯᓕᒫᑦ ᐊᓂᕐᓂᖏᑦ, ᑕᕝᕙ ᑲᑎᕗᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᒎᑎᒥᒃᑕ ᐃᒡᓗᖓᓂᒃ ᓴᓇᔭᕐᑐᓕᕐᓗᑎᒃ, 15ᐅᓪᓗᐃᑦ 24ᖓᓂ, ᑕᖅᑮᑦ ᐱᖓᓲᔪᕐᑐᖓᓂ, ᑍᕉᓯ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒎᑉ ᐂᑉᐸᖓᓂ.
Currently Selected:
ᕼᐊᒊᑉ ᐊᒡᓚᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
