ᓲᓗᒨᓂᐅᑉ ᐅᖃᓪᓚᖕᓂᖏᑦ 11
11
1ᓴᒡᓗᕿᑦᓯᓪᓗᑎᒃ ᐅᖁᒤᓐᓂᓂᐊᕈᑎᑎᒍᑦ ᐊᑭᓕᕐᑐᐃᔪᑦ ᐊᑕᓂᐅᑉ ᓇᕐᕈᒋᕔᑦ,
ᓱᓕᓪᓗᑎᒡᓕ ᐅᖁᒤᓐᓂᕐᓯᐅᑎᓂᒃ ᐊᑐᕐᑐᑦ ᐊᑕᓂᐅᑉ ᖁᕕᐊᒋᕔᑦ.
2ᐱᐅᔪᕆᓂᖅ ᐊᑐᕐᑕᐅᓕᕋᖓᑦ ᑕᕝᕙ ᑲᓐᖑᓲᑎᒃᓴᑦ ᕾᒋᕗᑦ,
ᒥᑭᒡᓕᑎᕐᓯᒪᔪᕐᓕ ᓯᓚᑐᓂᖃᕐᐳᖅ.
3ᐃᓱᐊᕐᑑᑉ ᓱᓕᑦᓯᐊᕐᓂᖅ ᑕᓯᐅᕐᑎᒋᕚ,
ᓱᓕᑦᓯᐊᕋᓱᐊᖏᑦᑐᓪᓕ ᐱᑦᓯᐊᖏᓐᓂᕐᒧᑦ ᐊᓯᕈᕐᑕᐅᕗᑦ.
4ᐊᒃᓗᐃᓐᓂᖅ ᓴᐳᑦᔨᓯᒪᔪᓐᓇᓐᖏᓚᖅ ᓂᓐᖓᖕᓂᐅᑉ ᐅᓪᓗᖓᓂ,
ᐃᓱᐊᕐᓂᕐᓕ ᓴᐳᑦᔨᔪᓐᓇᕐᐳᖅ ᑐᖁᒥᑦ.
5ᐃᓱᐊᕐᑐᒥ ᐃᓅᔪᖅ ᐸᓯᔭᒃᓴᐅᖏᓐᓂᕐᒥᓄᑦ ᐃᓱᐊᕐᑐᒦᑎᑕᐅᕗᖅ,
ᐱᐅᖏᑦᑐᕐᓕ ᐱᐅᖏᑦᑐᓕᓂᕐᒥᓄᑦ ᑲᑕᒃᑎᑕᐅᕗᖅ.
6ᐃᓱᐊᕐᑐᒥ ᐃᓅᔪᖅ ᓇᓛᒎᕐᓂᕐᒥᓄᑦ ᓴᐳᑦᔭᐅᓯᒪᓂᐊᕐᐳᖅ,
ᐃᓱᐊᖏᑦᑐᒥᓕ ᐃᓅᔪᖅ ᑎᒍᔭᐅᑎᑉᐳᖅ ᐃᒡᓕᒍᖕᓂᕐᒥᓄᑦ.
7ᐱᐅᖏᑦᑐᖅ ᑐᖁᒐᒥ, ᓂᕆᐅᒋᔭᖏᑦᑕᐅᖅ ᑐᖁᖃᑕᐅᕗᑦ,
ᐃᓱᐃᑦᑐᓪᓗ ᐱᓇᓱᐊᕈᒪᓯᒪᔭᖏᑦ ᓄᖅᑲᕐᐳᑦ.
8ᐃᓱᐊᕐᑐᑦ ᓴᐳᑦᔭᐅᓯᒪᓂᐊᕐᐳᑦ ᐊᑲᐅᖏᑦᑐᒥᑦ,
ᐱᐅᖏᑦᑐᓪᓗ ᑎᑭᐅᑎᖔᕐᓂᐊᕐᐳᑦ ᐊᑲᐅᖏᑦᑐᒧᑦ.
9ᑕᒃᑯᕐᒨᕐᑐᖅ ᐅᖃᐅᓯᕐᒥᓄᑦ ᐃᓅᖃᑎᒥᓂᒃ ᐊᓯᕈᐃᔪᓐᓇᕐᐳᖅ,
ᐃᓱᐊᕐᑑᓪᓕ ᖃᐅᔨᒪᓂᖓᒍᑦ ᓴᐳᑦᔭᐅᓂᕐᑕᖃᕐᐳᖅ.
10ᐃᓱᐊᕐᑐᑦ ᐱᕙᓪᓕᐊᑦᓯᐊᓕᕌᖓᑕ ᐃᒡᓗᒐᓴᒡᔪᐊᑦ ᖁᕕᐊᓱᓕᕐᐸᒃᐳᑦ,
ᐱᐅᖏᑦᑐᓪᓕ ᐊᓯᕈᕐᑕᐅᔭᕌᖓᑕ ᓯᕆᓂᕐᒧᑦ ᖁᕕᐊᓱᖕᓂᕐᑕᖃᕐᐳᖅ.
11ᐃᓱᐊᕐᑐᑦ ᓮᒻᒪᕐᑎᑦᓯᓂᖏᓐᓄᑦ ᐃᒡᓗᒐᓮᑦ ᐊᖏᔪᕈᕐᑎᑕᐅᕗᑦ,
ᐱᐅᖏᑦᑐᓪᓕ ᐅᖃᐅᓯᖏᓐᓄᑦ ᓯᖁᒥᑕᐅᓯᒪᑦᓯᐊᕈᓐᓇᕐᐳᑦ.
12ᐃᓅᖃᑎᒥᓂᒃ ᒥᑭᒡᓕᑎᕆᔪᖅ ᑐᑭᓯᐅᒪᓂᖃᓐᖏᓚᖅ,
ᓯᓚᑐᓂᖃᕐᑐᕐᓕ ᓂᓪᓕᐊᑦᔪᑎᖃᓐᖏᓚᖅ.
13ᐅᖃᐅᓯᕐᓂᒃ ᒥᓇᕋᕐᑎ ᑐᓴᕐᑕᐅᔭᕆᐊᖃᖏᑦᑐᓂᒃ ᓴᖅᑭᑎᕆᕗᖅ,
ᐅᒃᐱᕆᔭᒃᓴᐅᔪᕐᓕ ᑐᓴᕐᑕᐅᔭᕆᐊᖃᖏᑦᑐᓂᒃ ᓴᖅᑭᑎᑦᓯᓐᖏᓚᖅ.
14ᐅᖃᐅᑦᔨᒋᐊᕐᑎᒃᓴᖃᖏᑦᑐᑦ ᐃᓄᐃᑦ ᐅᕐᕈᕙᒃᐳᑦ,
ᐃᑲᔪᕐᑎᒃᓴᓂᒡᓕ ᐊᒥᒐᕐᓯᖏᑦᑐᑦ ᓴᐳᑦᔭᐅᕕᒃᓴᖃᕐᐳᑦ.
15ᖃᐅᔨᒪᔮᕆᓐᖏᑕᒥᓂᒃ ᐱᑦᔪᑦᔨᔪᒪᔪᖅ ᐅᒍᐊᓕᕈᒫᕐᐳᖅ,
ᐱᑦᔪᑦᔨᑲᑕᑐᐃᓐᓇᕈᒪᖏᑦᑐᕐᓕ ᐅᒡᒍᐊᕈᑎᒃᓴᖃᕐᓂᐊᓐᖏᓚᖅ.
16ᐊᕐᓇᐅᑉ ᐃᓄᑦᓯᐊᕙᐅᓂᖓᑕ ᐅᐱᒋᔭᐅᓂᕐᑖᕐᑎᑉᐹ,
ᐊᖑᑎᓪᓕ ᓇᒡᓕᖕᓂᖃᖏᑦᑐᑦ ᐊᒃᓗᐃᑦᔪᑎᓂ ᐱᑐᐊᕆᕔᑦ.
17ᐊᖑᑦ ᓂᑲᒍᓱᖕᓂᖃᑦᓯᐊᕐᑐᖅ ᐃᓅᑦᓯᐊᕈᑎᒃᓴᓕᐅᕐᐳᖅ ᐃᒻᒥᓄᑦ,
ᐊᑦᑕᕆᔭᖃᖏᑦᑐᕐᓕ ᑎᒥᒥᓄᑦ ᐃᓱᐊᖏᑦᔪᑎᒃᓴᓕᐅᕐᐳᖅ.
18ᐊᖑᑦ ᐱᐅᖏᑦᑐᖅ ᓯᓔᕐᕆᒃᓯᓇᓱᐊᕐᓂᕐᒥᒃ ᐱᓂᐊᕐᓂᖃᕋᔪᒃᐳᖅ,
ᐃᓱᐊᕐᓂᒥᒡᓕ ᐱᓂᐊᕈᑎᓕᒃ ᐱᑖᕐᑎᑕᐅᓗᓂ ᑭᓯᐊᓂᐅᕗᖅ.
19ᐃᓱᐊᕐᑐᒥᒃ ᑲᔪᓯᔪᖅ ᐃᓅᔪᒫᕐᐳᖅ,
ᐱᐅᖏᑦᑐᒥᒡᓕ ᐱᓇᓱᐊᕐᑐᖅ ᑐᖁᔪᒫᕐᐳᖅ.
20ᐱᐅᖏᑦᑐᓂᒃ ᐃᓱᒪᓖᑦ ᐊᑕᓂᕐᒧᑦ ᓇᕐᕈᓇᕐᐳᑦ,
ᐱᓂᐊᕐᓂᕐᒥᒃᑎᒍᓪᓕ ᐸᓯᔭᒃᓴᐅᓂᖃᖏᑦᑐᑦ ᖁᕕᐊᒋᕔᑦ.
21ᖃᐅᔨᒪᓕᕆᑦ, ᐱᐅᖏᑦᑐᑦ ᓱᒋᐊᕐᑕᐅᓐᖏᓮᓐᓇᕐᓂᐊᓐᖏᓚᑦ,
ᐃᓱᐊᕐᑐᓪᓕ ᐱᓂᐊᕐᓯᒪᔭᒥᖕᓄᑦ ᐊᓐᓇᒃᑎᑕᐅᓂᐊᕐᐳᑦ.
22ᑰᒃᑰᓯ ᒎᓗᒥᒃ ᐳᑐᓕᖕᒥᒃ ᕿᖓᕐᒥᐅᑦᓯᕐᑕᐅᓯᒪᔪᖅ,
ᐊᑦᔨᖃᕐᐳᖅ ᐊᕐᓇᑦᓯᐊᕙᖕᒥᒃ ᐅᑦᔨᕐᓱᖏᑦᑐᒥᒃ.
23ᐃᓱᐊᕐᑐᑦ ᐱᔪᒪᔭᖃᕐᐳᑦ ᐱᐅᔪᓂᒃ,
ᐱᐅᖏᑦᑐᓪᓕ ᓂᕆᐅᒋᔭᒃᓴᑐᐊᖃᕐᐳᑦ ᓂᓐᖓᐅᒪᓂᕐᒥᒃ.
24ᑐᓂᐅᖅᑬᖃᑦᑕᕐᑐᖅ ᐊᓐᓂᕈᓱᒐᓂ ᐊᔪᕐᓴᕈᓐᓃᕐᐸᓪᓕᐊᕗᖅ,
ᐊᓯᐊᓕ ᐱᓯᒪᓇᓱᐊᕐᑐᖅ ᑐᓂᔭᕆᐊᖃᕐᑕᒥᓂᒃ, ᐊᔪᕐᓴᓕᕈᓐᓇᕐᐳᖅ.
25ᐊᓐᓂᕈᓱᖏᑦᑐᖅ ᐊᒃᓗᐃᓕᓂᐊᕐᐳᖅ,
ᐃᒥᕐᑎᑦᓯᔪᕐᓗ ᐃᒥᕐᑎᑕᐅᓂᐊᕆᓪᓗᓂ.
26ᓂᐊᖂᔭᒃᓴᓂᒃ ᑭᓯᕐᖔᕐᓯᔪᖅ ᐃᓱᒪᓂᕐᓗᒡᕕᐅᓕᕐᓂᐊᕐᐳᖅ,
ᓂᐅᕐᕈᑎᖃᖃᑦᑕᕐᑐᕐᓕ ᓮᒻᒪᕐᑎᑕᐅᓂᐊᕐᐳᖅ.
27ᐱᐅᔪᒥᒃ ᐊᔪᐃᓐᓈᖃᕐᓗᓂ ᕿᓂᕐᑐᖅ ᐅᐱᒋᔭᐅᓂᒃᓴᕐᓯᕗᖅ,
ᐱᐅᖏᑦᑐᒥᒡᓕ ᕿᓂᕐᑐᖅ ᐃᓱᐊᖏᑦᑐᒧ ᑎᑭᐅᑎᓂᐊᕐᐳᖅ.
28ᐊᒃᓗᐃᑦᔪᑎᒥᓂᒃ ᑕᑎᖃᕐᑐᖅ ᓄᖑᕈᑎᓂᐊᕐᐳᖅ,
ᐃᓱᐊᕐᑐᕐᓕ ᐆᒻᒪᕐᑎᑐᑦ ᐅᖃᐅᔭᕐᑎᑐᑦ ᐱᕈᕐᐸᓪᓕᐊᓂᐊᕐᐳᖅ.
29ᐃᒡᓗᒥᐅᖃᑎᒥᓂᒃ ᐃᓱᐊᖏᑦᑐᒦᑎᑦᓯᔪᖅ ᐊᓄᕆᒥᒃ ᑭᖑᕐᖑᑦᔨᓂᐊᕐᐳᖅ,
ᓯᓔᑦᑐᕐᓗ ᐱᔨᒋᔭᐅᓂᐊᕐᐳᖅ ᓯᓚᑐᔪᒧᑦ.
30ᐃᓱᐊᕐᑐᖅ ᐸᐅᕐᖓᖃᕐᐳᖅ ᓇᐹᕐᑐᒥᒃ ᐃᓅᓯᖃᕐᓇᕐᑐᒥᒃ,
ᐱᖁᔭᖃᖏᑦᑐᕐᓕ ᐃᓅᓯᕐᒥᒃ ᐃᓱᓕᑎᑦᓯᕗᖅ.
31 #
1 ᐲᑦᑐᕉᓯ 4:18. ᐃᓱᐊᕐᑐᑦ ᐱᓂᐊᕐᓂᖏᑦ ᐊᑭᓕᕐᑕᐅᔪᓐᓇᕐᐸᑕ ᓄᓇᒥ,
ᑕᕝᕙᓕᑭᐊᖅ ᒎᑎᖃᖏᑦᑐᑦ ᐊᔪᕐᑐᓕᔪᓪᓗ
ᐱᓂᐊᕐᕕᐅᓂᕐᓴᐅᓂᐊᕐᐳᑦ ᐱᓂᐊᕐᓂᖏᑦ ᒪᓕᒡᓗᒋᑦ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 11: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
