ᓲᓗᒨᓂᐅᑉ ᐅᖃᓪᓚᖕᓂᖏᑦ 10
10
ᓲᓗᒨᓂᐅᑉ ᐅᖃᓪᓚᖕᓂᖏᑦ
1ᓲᓗᒨᓂᐅᑉ ᐅᖃᓪᓚᖕᓂᖏᑦ.
ᐃᕐᓂᐅᑉ ᓯᓚᑐᔫᑉ ᐊᑖᑕᓂ ᖁᕕᐊᓱᒃᑎᑉᐹ,
ᐃᕐᓂᐅᓪᓕ ᓯᓔᑦᑑᑉ ᐊᓈᓇᓂᒃ ᕿᒃᓵᒃᑎᑉᐹ.
2ᐊᒃᓗᐃᓕᔪᖅ ᐱᐅᖏᑦᑐᓕᓂᒃᑯᑦ ᐱᕙᓪᓕᐅᑎᖃᓐᖏᓚᖅ,
ᐃᓱᐊᕐᑐᒃᑯᓪᓕ ᐱᔪᖅ ᑐᖁᒥᑦ ᓴᐳᑎᔭᐅᕗᖅ.
3ᐊᑕᓂᐅᑉ ᓇᓛᒎᕐᑐᒥᒃ ᐃᓅᔪᑦ ᑳᒃᑎᓐᓂᐊᓐᖏᓔᑦ,
ᐱᐅᖏᑦᑐᓪᓕ ᐱᔪᒪᑐᓛᕐᓂᖏᓐᓂᒃ ᐱᑎᓐᖏᓔᑦ.
4ᐃᕿᐊᑦᑍᑦ ᐊᒃᓗᓂᕐᒧᑦ ᐃᒻᒥᖕᓂᒃ ᑎᑭᑎᑉᐸᒃᐳᑦ,
ᐃᕿᐊᑦᑍᑦᑐᓪᓕ ᐊᒃᓗᐃᓕᕙᒃᐳᑦ.
5ᐃᕐᓂᖅ ᐊᐅᔭᐅᓂᖓᓂ ᑲᑎᕐᓱᐃᑦᓯᐊᕐᑐᖅ ᓯᓚᑐᕗᖅ,
ᐃᕐᓂᕐᓕ ᑲᑎᕐᓱᐃᑎᓪᓗᒋᑦ ᓯᓂᒃᑐᖅ ᑲᓐᖑᓇᕐᑐᒥᒃ ᕾᑎᑦᓯᕗᖅ.
6ᐃᓱᐊᕐᑐᒥ ᐃᓅᔪᑦ ᓂᐊᖁᕐᒥᐅᑕᖃᕐᐳᖅ ᓮᒻᒪᕐᑎᑕᐅᓂᕐᒥᒃ,
ᐱᐅᖏᑦᑐᓪᓕ ᖃᓂᖏᑦ ᐊᓂᑦᓯᕗᑦ ᑲᑉᐱᐊᓱᒃᑎᑦᓯᓂᕐᒥᒃ ᐃᔨᕐᓯᒪᔪᒥᒃ.
7ᐃᓱᐊᕐᑐᒥ ᐃᓅᓚᐅᕐᑐᑦ ᐃᖅᑲᐅᒪᔭᐅᓂᖏᑦ ᓮᒻᒪᕐᑎᑕᐅᓐᓇᕐᐳᑦ,
ᐱᐅᖏᑦᑑᓪᓕ ᐊᑎᖓ ᓄᖑᓐᓂᐊᕐᐳᖅ.
8ᐆᒻᒪᑎᒥᒍᑦ ᓯᓚᑐᔪᑦ ᐱᖁᔭᓂᒃ ᐃᓚᓕᐅᕐᓯᑦᓯᐊᕈᓐᓇᕐᐳᑦ,
ᓯᓔᑦᑐᕐᓕ ᐅᖃᕐᓴᕅᓐᓂᕐᒥᓄᑦ ᐃᒻᒥᓂᒃ ᐊᓯᕈᕐᑕᐅᑎᑉᐳᖅ.
9ᐸᓯᔭᒃᓴᐅᖏᑦᑐᒥ ᐃᓅᔪᖅ ᐊᑕᕐᓇᖏᑦᑐᒥᒃ ᐃᓅᓯᖃᕐᐳᖅ,
ᑲᓐᖑᓇᕐᑐᓕᓂᒃᑯᓪᓕ ᐃᓅᔪᖅ ᓴᖅᑭᑎᑕᐅᔪᒫᕐᐳᖅ.
10ᐃᔨᒥᓄᑦ ᓯᑯᓐᖏᓪᓚᒃᐸᒃᑐᖅ ᖁᕕᐊᓇᖏᑦᑐᒥᒃ ᓴᖅᑭᑎᑦᓯᕗᖅ,
ᓇᓪᓕᐊᓪᓕ ᓯᕘᕋᓇᓂ ᐃᓂᕐᑎᕆᔪᖅ ᓮᒪᓇᕐᑐᒥᒃ ᐋᖅᑭᓱᐃᕗᖅ.
11ᐃᓱᐊᕐᑐᒥ ᐃᓅᔫᑉ ᖃᓂᖓ ᐃᓅᓯᖃᕐᓇᕐᑐᓂᒃ ᑰᒃᐳᖅ,
ᐱᐅᖏᑦᑐᓪᓕ ᖃᓂᖏᑦ ᐊᓂᑦᓯᕗᑦ ᑲᑉᐱᐊᓱᒃᑎᑦᓯᓂᕐᒥᒃ ᐃᔨᕐᓯᒪᔪᒥᒃ.
12 #
ᔧᒥᓯ 5:20; 1 ᐲᑦᑐᕉᓯ 4:8. ᐆᒥᓱᖕᓂᖅ ᐂᕙᓂᕐᒥᒃ ᓴᖅᑭᑎᑦᓯᕗᖅ,
ᓇᒡᓕᖕᓂᕐᓕ ᐊᑭᕋᕐᑑᑎᓂᐅᒐᔭᕐᑐᓂᒃ ᒪᑐᓯᕗᖅ.
13ᑐᑭᓯᓂᕐᒥᒃ ᐱᖃᕐᑑᑉ ᐅᖃᐅᓯᖏᑦ ᓯᓚᑐᓂᕐᒥᒃ ᓇᓂᓯᕕᐅᕗᑦ,
ᓯᓔᑦᑐᓪᓕ ᓱᒋᐊᕐᑕᐅᓂᐊᕐᒧᑦ ᑎᑭᑕᐅᔪᒫᕐᐳᑦ.
14ᓯᓚᑐᔪᑦ ᑲᑎᕐᓱᐃᕗᑦ ᖃᐅᔨᕙᓪᓕᐊᓂᕐᒥᒃ,
ᓯᓔᑦᑐᓪᓕ ᐅᖃᓪᓚᖕᓂᖏᑎᒍᑦ ᐊᓯᕈᕐᑕᐅᓂᕐᒥᒃ ᖃᒡᓕᑎᑦᓯᕗᖅ.
15ᐊᒃᓗᐃᑦᑑᑉ ᐊᔪᕐᓴᖏᓐᓂᖅ ᐊᑦᑕᕐᓁᑦᑑᑦᔪᑎᒋᕚ ᓴᐴᓗᑕᕆᓪᓗᒍ,
ᐊᒃᓗᔪᕐᓕ ᐊᔪᕐᓴᕐᓂᕐᒥᓄᑦ ᐊᓯᕈᕐᑕᐅᕗᑦ.
16ᐃᓱᐊᕐᑑᑉ ᐱᓇᓱᐊᕐᓂᖏᑦ ᐃᓅᓯᖃᕐᓇᕐᑐᒧᑦ ᐱᑎᑦᓯᕗᑦ,
ᐱᐅᖏᑦᑑᓪᓕ ᐱᓂᐊᕐᓂᖏᑦ ᐊᔪᕐᓂᕐᒥᒃ ᐊᑭᖃᕐᐳᑦ.
17ᐃᓕᓐᓂᐊᕐᑎᑕᐅᑦᔪᑎᒥᓂᒃ ᓈᓚᒃᑐᖅ ᐃᓅᓯᐅᑉ ᐊᖅᑯᑎᖓᓃᑉᐳᖅ,
ᐃᓂᕐᑎᕐᑕᐅᑦᔪᑎᒥᓂᒡᓕ ᓈᓚᖏᑦᑐᖅ ᑕᒻᒪᕐᓇᕐᑐᒧᐊᕐᐳᖅ.
18ᐆᒥᓱᖕᓂᕐᒥᒃ ᐃᔨᕐᑐᐊᓕᒃ ᓴᒡᓗᖃᑦᑕᕐᐳᖅ ᐅᖃᐅᓯᕐᒥᒍᑦ,
ᐊᓯᒥᓂᒡᓗ ᐅᖃᐅᓯᒃᑯᑦ ᓇᕐᕈᓇᕐᑎᑦᓯᕙᒃᑐᖅ ᓯᓔᑦᑑᕗᖅ.
19ᐅᓄᓗᐊᕐᑐᓂᒃ ᐅᖃᓪᓚᒃᑐᑦ ᐊᔪᕐᓂᕐᒧᑦ ᑎᑭᓴᕅᓐᓂᕐᓴᐅᕗᑦ,
ᓂᓪᓕᑦᓴᐅᑎᒋᑦᑍᓕᔪᓐᓇᕐᑐᕐᓕ ᑖᓐᓇ ᓯᓚᑐᔫᕗᖅ.
20ᐃᓱᐊᕐᑑᑉ ᐅᖃᖓ ᓯᐅᓪᕕᕆᑐᑦ ᐃᓚᖃᖏᑦᑐᑎᑐᑦ ᑍᒤᑉᐳᖅ,
ᐱᐅᖏᑦᑑᓪᓕ ᐆᒻᒪᑎᖓ ᓱᓇᐅᖏᑦᑐᑐᑦ ᐊᑭᖃᓐᖏᓚᖅ.
21ᐃᓱᐊᕐᑑᑉ ᖃᓂᖓ ᓂᕆᑎᑦᓯᕗᖅ ᐅᓄᕐᑐᓂᒃ;
ᓯᓔᑦᑐᓪᓕ ᑐᖁᕗᑦ ᓯᓚᑐᓂᕐᒥᒃ ᐊᔪᕐᓴᕐᓂᕐᒧᑦ.
22ᐊᑕᓂᐅᑉ ᓮᒻᒪᕐᑎᑦᓯᓂᖓ ᐊᒃᓗᐃᑎᑦᓯᕗᑦ,
ᕿᒃᓵᖕᓇᕐᑐᓂᒡᓗ ᐃᓚᓯᒪᓇᓂ.
23ᐱᐅᖏᑦᑐᓕᓂᖅ ᓯᓔᑦᑐᓄᑦ ᐱᓐᖑᐊᕐᓂᑐᐃᓐᓇᐅᔮᕐᐳᖅ,
ᓯᓚᑐᔪᓪᓕ ᖁᕕᐊᒋᔭᖃᕐᐳᑦ ᑐᑭᓯᑎᑕᐅᓂᕐᒥᒃ.
24ᐱᐅᖏᑦᑐᑦ ᓯᕘᕋᒋᔭᒥᖕᓄᑦ ᑎᑭᑕᐅᓂᐊᕐᐳᑦ,
ᐃᓱᐊᕐᑐᕐᓕ ᐱᔪᒪᔭᒥᓂᒃ ᐱᑎᑕᐅᓂᐊᕐᐳᖅ.
25ᐊᓄᕆᕐᔪᐊᖅ ᐊᖅᑯᓵᕐᒪᑦ ᐱᐅᖏᑦᑐᑦ ᑎᒃᑕᐅᕗᑦ
ᐃᓱᐊᕐᑐᓪᓕ ᑐᓐᖓᕕᒋᔭᒥᖕᓂᑦ ᐊᐅᓚᔭᒃᑕᐅᔪᓐᓇᓐᖏᓚᑦ.
26ᐃᕿᐊᑦᑕᖅ ᑎᓕᔭᐅᒍᓂ ᕕᓂᒐᑎᑐᑦ ᖃᓂᕐᒧᑦ ᖃᓯᓕᓇᕐᑐᑐᑦ,
ᐃᔩᖕᓄᓪᓗ ᐳᔪᕐᒧᑦ ᖃᑭᕐᓯᓇᕐᑐᑐᑦ ᑍᒤᓐᓂᐊᕐᐳᖅ.
27ᐊᑕᓂᕐᒥᒃ ᓯᕗᕋᓂᖅ ᐃᓅᓯᕐᒥᒃ ᐅᐃᒍᓯᕗᖅ,
ᐱᐅᖏᑦᑐᓪᓕ ᐊᕐᕌᒍᖏᑦ ᓁᑦᑑᕗᑦ.
28ᐃᓱᐊᕐᑐᑦ ᓂᕆᐅᒋᔭᖏᑦ ᖁᕕᐊᓇᕐᑐᓂᒃ ᐃᓱᖃᕐᐳᑦ,
ᐱᐅᖏᑦᑐᓪᓕ ᓂᕆᐅᒋᔭᖏᑦ ᓴᖅᑭᑦᑐᖃᕈᓐᓇᓐᖏᓚᑦ.
29ᐊᑕᓂᖅ ᓴᐳᑦᔭᐅᕕᒃᓴᐅᕗᖅ ᐃᓱᐊᕐᑑᑉ ᐊᖅᑯᓯᓂᖓᓂ,
ᐱᐅᖏᑦᑐᓕᔪᓪᓕ ᐊᓯᕈᕐᑕᐅᓇᕐᑐᒧᑦ ᑎᑭᐅᑎᓂᐊᕐᐳᑦ.
30ᐃᓱᐊᕐᑐᑦ ᐊᑦᑕᕐᓇᖏᑦᑐᒦᑉᐳᑦ ᐲᕐᑕᐅᓂᐊᕋᑎᒡᓗ,
ᐱᐅᖏᑦᑐᓪᓕ ᓄᓇᒥ ᓄᓇᖃᕐᑎᑕᐅᓂᐊᓐᖏᓚᑦ.
31ᐃᓱᐊᕐᑑᑉ ᖃᓂᖓ ᐊᓂᑦᓯᕗᖅ ᓯᓚᑐᓂᕐᒥᒃ,
ᐅᖃᕐᓕ ᐱᐅᖏᑦᑐᒥᒃ ᐅᖃᓪᓚᒃᑐᖅ ᓇᑲᑕᐅᓂᐊᕐᐳᖅ.
32ᐃᓱᐊᕐᑑᑉ ᖃᓂᖓ ᖃᐅᔨᒪᕗᖅ ᓈᒻᒪᒋᔭᐅᔪᓂᒃ,
ᐱᐅᖏᑦᑐᓪᓕ ᐅᖃᖓ ᐋᓐᓂᕐᓇᕐᑐᓂᒃ ᑭᓯᐊᓂ ᐅᖃᓪᓚᓲᖑᕗᖅ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 10: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
