ᓇᕼᐅᒥᐅᑉ ᐊᒡᓚᖏᑦ 2
2
ᓂᓂᕕᒥᐅᑦ ᐊᓯᕈᕐᑕᐅᓂᖓᑦ
1ᓯᖁᑦᑎᕆᔨ ᐃᓕᑦᓯᓐᓄᑦ ᒪᔪᕋᓕᕐᐳᖅ.
ᐊᕙᓗᕐᔪᐊᓯ ᖃᐅᔨᓴᕐᑎᖃᓕᕐᓕᑦ;
ᐊᖅᑯᑏᑦ ᐅᑦᔨᕐᑐᓕᕐᓯᒋᒃ;
ᐅᓇᑕᕐᓂᕐᒧᑦ ᐊᑐᐃᓐᓇᕈᓕᕆᑦᓯ;
ᓴᓐᖏᒃᑎᓴᓕᕆᑦᓯ ᓄᑭᖃᑦᓯᐊᖁᓪᓗᓯ.
2(ᐊᑕᓂᐅᑉ ᐅᑎᕐᑎᑦᓱᒫᓕᕐᒪᒍ ᔧᑰᑉ ᐅᐱᓐᓇᕐᓂᖓ ᐃᓴᕆᐊᓕᐅᑉ ᐅᐱᓐᓇᕐᓂᖓ ᐅᑎᕐᑎᓪᓗᒍ, ᓄᖑᕅᔨᓄᑦ ᓄᖑᕈᑦᔭᐅᓚᐅᕋᓗᐊᕐᑎᓪᓗᒋᑦ ᕔᓂᒃᓴᖏᑕᓗ ᐊᕙᓚᖓᔪᖏᑦ ᓱᒃᑯᑕᐅᓚᐅᕋᓗᐊᕐᑎᓪᓗᒋᑦ.)
3ᐅᓇᑕᕐᑐᒃᓴᖁᑎᖏᑕ ᓴᐴᓗᑕᖏᑦ ᐊᐅᐸᕐᐳᑦ,
ᐊᓐᓄᕌᖃᕐᓗᑎᒡᓗ ᐊᐅᐸᓪᓚᕆᒃᑐᓂᒃ.
ᕿᒧᒃᓯᐅᑏᑦ ᐊᒃᓴᓗᐊᓖᑦ ᕿᓪᓛᒋᔭᕐᓂᖏᑦ ᐃᑯᐊᓚᔪᑎᑐᑦ ᑍᒤᑉᐳᑦ;
ᐅᓇᑕᕆᐊᕐᓂᕐᒧᑦ ᐃᓄᒋᐊᒃᑐᕐᔪᐊᑦ ᐸᕐᓇᓕᕐᑎᓪᓗᒋᑦ;
ᕿᒻᒥᕐᔪᐊᖏᑦ ᓂᒪᔮᓕᕐᐳᑦ ᕿᑲᕈᓐᓁᓪᓕᓪᓗᑎᒃ!
4ᕿᒧᒃᓯᐅᑎᖏᑦ ᐊᒃᓴᓗᐊᓖᑦ ᐃᖏᕐᕋᑲᑕᒃᐳᑦ ᐊᖅᑯᑎᑎᒍᑦ ᓱᒃᑲᓕᕋᕐᓗᑎᒃ,
ᐃᒡᓗᒐᓮᓪᓗ ᐊᖅᑯᑎᖏᑕ ᐱᕕᑐᓂᖏᑎᒍᑦ ᓂᓐᓂᐅᕋᐅᑎᕗᑦ ᓇᓕᐊᖕᓄᕋᕐᑐᑦ;
ᓇᓂᕈᐊᑎᑐᑦ ᑍᒤᑉᐳᑦ, ᖃᐅᒻᒪᓪᓚᒃᑎᑐᑦ ᓱᒃᑲᑦᑑᖃᑦᑕᕐᓱᑎᒃ.
5ᐅᓇᑕᕐᑐᒃᓴᖏᑕ ᐊᖓᔪᖅᑳᖏᑦ ᕾᖁᔭᐅᕗᑦ,
ᓯᕗᒻᒧᐊᓕᕐᓗᑎᒃ ᐹᓪᓚᒃᐳᑦ.
ᑐᐊᕕᕐᓗᑎᒃ ᐃᒡᓗᒐᓮᑦ ᐊᕙᓗᕐᔪᐊᖓᓄᐊᕐᐳᑦ,
ᓴᐴᓗᑦᓯᕐᓗᑎᒡᓗ ᓴᐴᓗᑕᕐᔪᐊᓂᒃ.
6ᑰᒑᓘᓪᓕ ᓯᒥᖏᑦ ᒪᑐᐃᕐᒪᑕ,
ᐊᖓᔪᖅᑳᕐᔪᐊᑉ ᐃᒡᓗᕐᔪᐊᖓ ᓱᐱᕕᐅᕗᖅ.
7ᑯᐃᓐ ᐊᕐᓇᖅ ᓵᓚᐅᒐᒥ ᐊᐅᓪᓚᕈᑦᔭᐅᓕᕐᐳᖅ;
ᑖᑦᓱᒪᓗ ᐱᔨᖏᑦ ᓂᐹᓕᕐᐳᑦ ᐅᒡᒍᐊᕐᓂᕐᒧᑦ ᑑᕕᑎᑐᑦ,
ᓴᒡᕕᖕᒥᖕᓂᒃ ᑎᒡᓗᐊᕐᓗᑎᒃ.
8ᓂᓂᕕ ᑕᓯᓕᐊᖑᓯᒪᔪᑎᑐᑦ ᑍᒤᑉᐳᖅ,
ᐃᒪᖓᑕ ᑰᓕᕐᓂᖓᑐᑦ ᕾᒐᓛᕐᑐᑲᕐᐳᖅ.
“ᓄᖅᑲᕆᑦᓯ! ᓄᖅᑲᕆᑦᓯ!”
ᑭᓯᐊᓂᓕ ᐅᑎᕆᐊᕐᑐᖃᓐᖏᓚᖅ.
9ᓯᐅᓪᕕᕆᓂᒃ ᓇᒡᕚᕐᑕᓕᕆᑦᓯ,
ᒎᓗᓂᒃ ᓇᒡᕚᕐᑕᓕᕆᑦᓯ!
ᐱᓐᓇᕐᓇᕐᑐᑦ ᓇᓂᑐᐃᓐᓈᕐᐳᑦ,
ᐊᔪᕐᓴᖏᑦᔪᑎᒃᓴᑦ ᐱᐅᔫᑎᐊᓗᐃᑦ ᓇᓂᑐᐃᓐᓈᓕᕐᐳᑦ.
10ᓱᓁᕈᑎᕗᖅ, ᕿᒪᒃᑕᐅᓯᒪᓕᕐᐳᖅ, ᐊᓯᕈᕐᑕᐅᓪᓗᓂᓗ;
ᐆᒻᒪᑏᑦ ᓄᑮᕈᑎᕗᑦ ᑲᑉᐱᐊᓱᖕᓂᕐᒧᑦ;
ᓰᖅᑯᐃᑦ ᓴᔪᓕᕐᐳᑦ ᓄᑭᖃᕈᓐᓃᕐᓗᑎᒡᓗ;
ᑮᓇᖏᓪᓗ ᖃᒃᑯᑑᓕᕐᓱᑎᒃ.
11ᓇᐅᒡᓕ ᐃᒡᓗᒐᓮᑦ ᓛᔭᓄᑦ ᓯᑎᖃᕐᕕᐅᓚᐅᕐᑐᑦ?
ᓛᔭᓄᓪᓗ ᐃᓅᓱᒃᑐᓄᑦ ᓂᕆᕕᐅᕙᓚᐅᕐᑐᑦ,
ᓇᐅᒡᓕ ᓛᔭᓄᑦ ᐊᖑᓴᓪᓗᕐᓄᑦ ᐊᕐᓇᓪᓗᖕᓄᓪᓗ
ᕿᒫᕕᐅᕙᓚᐅᕐᑐᖅ ᕿᑐᕐᖓᖏᑕ ᐊᑦᑕᕐᓇᖏᑦᑐᒦᕝᕕᒋᓂᐊᕐᒪᒋᑦ?
12ᓛᔭ ᓂᕿᒃᓴᒥᓂᒃ ᐊᓕᒃᑐᐃᕗᖅ ᕿᑐᕐᖓᖏᑕ ᓈᒻᒪᒋᔭᖏᓐᓂᒃ
ᑐᖁᑦᓯᓪᓗᓂᓗ ᐊᕐᓇᓪᓗᖁᑎᖏᑕ ᓂᕿᒃᓴᖏᓐᓂᒃ;
ᓯᑎᓂᓗ ᐆᒪᔪᕕᓂᕐᓂᒃ ᐊᓕᒃᑐᕐᓯᒪᔪᓂᒃ ᐃᓗᓪᓕᕐᑐᕐᐹ.
13ᑕᑯᒋᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ, “ᐊᑭᕋᕐᑐᕐᓗᑎᑦ ᓵᓕᕐᐸᒋᑦ, ᕿᒧᒃᓯᐅᑎᖁᑎᑎᑦ ᐊᒃᓴᓗᐊᓖᑦ ᐃᑯᐊᓪᓚᒃᑎᑦᓱᒫᕐᐸᒃᑲ ᐳᔫᓕᕐᓗᑎᒃ, ᐅᓇᑕᕐᑎᖁᑎᑎᓪᓗ ᓛᔭᑎᑐᑦ ᑍᒤᑦᑐᑦ ᑐᖁᕋᕐᑕᐅᔪᒫᕐᐳᑦ ᐅᓇᑕᕐᑐᓂ, ᓂᕿᒃᓴᑎᑦ ᐱᑦᔪᑎᒃᓴᑎᓪᓗ ᓇᑭᑐᐃᓐᓇᖅ ᐱᓚᐅᕐᑕᓕᒫᑎᑦ ᓄᖅᑲᕐᑎᑦᓱᒫᕐᐸᒃᑲ, ᐅᖃᕆᐊᕐᑐᕐᑎᑕᓯᓗ ᑐᓴᕐᓴᐅᖃᑦᑕᕐᓂᐊᕈᓐᓃᕐᐳᖅ.
Currently Selected:
ᓇᕼᐅᒥᐅᑉ ᐊᒡᓚᖏᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
