ᓇᕼᐅᒥᐅᑉ ᐊᒡᓚᖏᑦ 3
3
1ᑲᑉᐱᐊᓐᓇᒦᒃ ᐃᒡᓗᒐᓮᑦ ᑐᖁᑦᓯᕙᒃᑐᑦ,
ᓴᒡᓗᓂᕐᒥᒡᓗ ᑎᒡᓕᒐᕐᓂᕐᒥᒡᓗ ᑕᑕᑦᑐᑦ,
ᐱᖁᑍᕈᑦᔨᓂᕐᒥᒡᓗ ᓄᖅᑲᐅᑦᔨᔪᒪᓇᑎᒃ!
2ᐃᐸᕋᐅᑕᐅᑉ ᓯᖅᑯᕐᑕᕐᕙᓗᖓ, ᐊᒃᓴᓗᐊᓪᓗ ᐊᒃᓴᑳᕙᓗᖕᓂᖏᑦ,
ᕿᒻᒥᕐᔪᐊᑦ ᐸᖓᓕᒡᕙᓗᖏᑦ
ᕿᒧᒃᓯᐅᑎᓪᓗ ᐊᒃᓴᓗᐊᓖᑦ ᐊᑦᓴᕐᑕᕐᕙᓗᖏᑦ!
3ᕿᒻᒥᕐᔪᐊᒥ ᐃᑭᒪᔪᑦ ᐅᓇᑕᕆᐊᕐᕙᓗᖏᑦ,
ᓴᕕᒡᔪᐊᑦ ᕿᓪᓛᒋᕐᑕᕐᓂᖏᑦ, ᖃᓗᒋᐊᕐᔪᐊᓪᓗ ᕿᓛᒡᒋᕐᑕᕐᓂᖏᑦ,
ᑎᒥᕕᓃᑦ ᖃᓕᕇᒃᑐᑦ ᐳᕐᑐᓯᕗᑦ,
ᑎᒦᑦ ᑐᖁᖓᔪᑦ ᓇᓂᑐᐃᓐᓈᓕᕐᐳᑦ
ᑎᒥᕕᓃᑦ ᐊᒡᓛᑦ ᐹᓪᓚᒡᕕᐅᕙᓕᕐᓗᑎᒃ!
4ᐊᖑᓐᓂᐊᕐᑏᑦ ᐊᑭᓕᕐᓱᒐᐅᓲᑦ ᐅᓄᕐᑐᐃᕐᓱᕐᓗᑎᒃ ᓄᓕᐊᖃᑦᑕᕐᓂᖏᑦ,
ᐱᔪᒥᓇᕐᓵᕐᓂᒃᑯᑦ ᐊᖓᒃᑰᓇᓱᐊᕐᓂᒃᑯᓪᓗ,
ᑖᑦᓱᒪ ᐃᓅᖃᑎᒌᒡᔪᐊᑦ ᐅᐃᕕᕐᕆᓚᐅᕐᒪᒋᑦ,
ᐱᔪᒥᓇᕐᓵᕐᓂᕐᒥᓄᑦ ᐃᓱᒪᕐᓲᑎᒋᓕᕐᓗᒋᑦ.”
5ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ,
“ᑕᑯᒋᑦ ᓵᓐᖓᓕᕐᐸᒋᑦ,
ᐊᓐᓄᕌᑦ ᐊᕐᓇᕐᓯᐅᑦ ᖁᒻᒧᒃᑎᓐᓂᐊᕐᐸᕋ ᑮᓁᑦ ᐅᓕᒡᓗᒍ;
ᐃᓅᖃᑎᒌᒡᔪᐊᓄᑦ ᑕᑯᔭᐅᖁᓪᓗᑎᑦ ᐊᓐᓄᕌᖃᓐᖏᑎᓪᓗᑎᑦ
ᐊᖓᔪᖅᑳᕐᔪᐊᖃᕐᕖᓪᓗ ᑕᑯᖁᓪᓗᒋᑦ ᑲᓐᖑᓇᕐᑐᒦᓐᓂᕐᓂᒃ.
6ᓇᕐᕈᓇᕐᓯᑎᑦᓱᒫᕐᐸᒋᑦ ᓇᖁᔭᕐᓇᕐᓯᑎᓪᓗᑎᓪᓗ,
ᑕᑯᔭᒐᓐᖑᕐᑎᑦᓱᒫᕐᐸᒋᑦ, ᐃᓕᖕᓂᒡᓗ ᑕᑯᔪᑦ ᑕᑕᒥᑦᓱᒫᕐᐳᑦ.
7ᐃᓕᖕᓂᒡᓗ ᑕᑯᔪᓕᒫᑦ ᓇᕐᕈᖃᑦᑕᕈᒫᕐᐳᑦ,
ᐅᖃᕐᓗᑎᒡᓗ, ‘ᓂᓂᕕ ᓱᓇᐅᔪᓐᓃᑦᓯᐊᕐᐳᖅ,
ᑭᐊᓕ ᐅᒡᒍᐊᕆᓗᒍ ᕿᒃᓵᖃᑎᒋᓂᐊᕐᐸᐅ?
ᑭᐊᓗ ᓮᒻᒪᕐᓴᕐᓂᐊᕐᐸᐅᒃ?’”
8ᐄᑦᔨᑉᑎᒥᐅᑦ ᐊᖓᔪᖅᑳᒃᑯᕕᖓᓂᑦ ᑎᐱᓯᒥᑦ ᐱᐅᓂᕐᓴᐅᕖᑦ? ᑖᓐᓇ ᑰᒑᓗᖕᒥᒃ ᓁᐅᓪᒥᒃ ᓴᐴᓗᑕᖃᕐᒪᑦ, ᐊᕙᑎᒥᐅᑕᖃᕐᓗᓂ ᐃᒫᓗᖕᓂᒃ. 9ᑖᑦᓱᒪ ᓄᓇᓖᒃ ᒪᕐᕉᒃ ᓄᑭᒋᖕᒪᒋᒃ ᐃᑎᐅᐱᐊ ᐄᑦᔨᑉᑎᓗ, ᐱᔪᓐᓇᕐᓂᖓᓗ ᑭᒡᓕᖃᕋᓂ, ᓄᓈᒡᓗ ᐳᑎ ᓕᐱᐊᓐᓗ ᑖᑦᓱᒪ ᐃᑲᔪᕐᑎᒋᓪᓗᒋᒃ. 10ᑎᐲᓯᐅᓪᓕ ᐃᓄᖏᑦ ᐊᐅᓪᓚᕈᑦᔭᐅᓕᕐᐳᑦ, ᐊᖅᑯᑏᓪᓗ ᓴᖑᖓᓂᖏᓐᓂ ᕿᑐᕐᖓᖏᑦ ᑏᒐᕆᐅᑦᔭᐅᕙᒃᓗᑎᒃ ᑐᖁᕋᕐᑕᐅᕗᑦ; ᓯᓚᑐᓂᖏᓪᓗ ᓇᓚᐅᑦᑖᕈᑎᒃᑯᑦ ᐱᑖᕐᑐᒐᐅᕗᑦ, ᓯᕗᓕᕐᑎᓕᒫᖏᓪᓗ ᐊᕐᓵᕐᑑᔭᓄᑦ ᐃᐱᕐᑐᕐᑕᐅᓪᓗᑎᒃ.
11ᐃᕝᕕᑦᑕᐅᖅ ᐋᖓᔮᕐᑎᐅᓕᕈᒫᕐᐳᑎᑦ, ᑐᑭᖃᑦᓯᐊᕈᓐᓃᕐᓗᑎᑦ; ᕿᒫᕕᒃᓴᕐᓯᐅᕈᒫᕐᐳᑎᓪᓗ ᐊᑭᕋᕐᓄᑦ. 12ᐃᒡᓗᒐᓮᓪᓗ ᓴᐴᓗᑕᓕᖁᑎᓕᒫᓯ ᐱᒋᓕᒃᓴᓂᒃ ᐸᐅᕐᖓᓕᒃᑎᑐᑦ ᓯᕗᓪᓕᕐᐹᒥᒃ ᐱᕈᕐᑐᑦ ᐱᕈᕇᕋᒥᒃ ᑲᑕᒐᑐᐃᓐᓇᕆᐊᖃᓕᕐᑐᑎᑐᑦ ᑍᒤᑦᓱᒫᕐᐳᑦ: ᐊᐅᓚᑎᑕᐅᑐᐊᕈᑎᒃ ᑲᑕᒐᔭᓕᕐᑐᑎᑐᑦ ᓂᕆᕙᒃᑑᑉ ᖃᓂᖓᓄᑦ! 13ᑕᑯᒋᑦ, ᐅᓇᑕᕐᑐᒃᓴᖁᑎᓯ ᐊᕐᓇᑎᑐᑦ ᑍᒤᑉᐳᑦ ᐊᑯᓐᓇᑦᓯᓐᓂ, ᓄᓇᒋᔭᑦᓯᓗ ᐃᑎᕐᑕᕐᕕᖏᑦ ᐊᑭᕋᑦᓯᓐᓄᑦ ᒪᑐᐃᖓᑦᓯᐊᕐᐳᑦ; ᐃᑎᕐᑕᕐᕕᒃᔪᐊᑦᓯᓗ ᓴᕕᕋᔭᖏᑦ ᐃᑯᒪᒧᑦ ᓄᖑᑕᐅᕗᑦ. 14ᐃᒥᕐᑕᕐᓯᒪᓕᕆᑦᓯ ᐊᕙᓗᔭᐅᖅᑳᕐᑎᓐᓇᓯ, ᐊᕙᓗᕐᔪᐊᓯᓗ ᐊᑦᑕᕐᓁᔭᑦᓯᐊᕐᓗᒋᑦ; ᒪᕐᕋᕐᓂᒡᓗ ᑐᓪᓕᓕᕆᑦᓯ ᓂᐱᐅᑎᒃᓴᖓᓂᒡᓗ, ᓯᒃᑭᑕᓕᐅᕈᑎᓗ ᑎᒍᓗᒍ. 15ᑍᑲᓂ ᐃᑯᒪᒧᑦ ᓄᖑᑕᐅᔪᒫᕐᐳᓯ, ᐅᓇᑕᕐᓂᕐᒧᑦ ᑐᖁᑕᐅᓗᓯ. ᓄᖑᑕᐅᔪᒫᕐᐳᓯ ᐱᒡᓕᕐᑕᐅᔮᕐᑐᑦ ᓄᖒᑦᓯᓂᖏᑎᑐᑦ. ᐱᒡᓕᕐᑕᐅᔮᕐᑐᑎᑐᑦ ᐅᓄᕐᓯᕙᓪᓕᐊᓕᕆᑦᓯ, ᐱᒡᓕᕐᑕᑎᑐᓪᓗ ᐅᓄᕐᓯᕙᓪᓕᐊᑎᒋᓗᓯ! 16ᓂᐅᕕᕋᕐᑎᖁᑎᓯ ᐃᓚᕙᓪᓕᐊᑎᓯᒪᕙᓯ ᕿᓚᖕᒥ ᐅᓪᓗᕆᐊᓂᑦ ᐅᓄᕐᓂᕐᓴᓂᒃ. ᐱᒡᓕᕐᑕᐅᔮᕐᑐᑦ ᑎᖏᓪᓗᑎᒃ ᐊᐅᓪᓚᕐᑐᑎᑐᑦ. 17ᐊᖓᔪᖅᑳᖁᑎᓯ ᐱᒡᓕᕐᑕᐅᔮᕐᑐᑎᑐᑦ ᑲᑎᕐᓱᕐᑐᑎᑐᑦ ᑍᒤᑉᐳᑦ, ᓯᕗᓕᕐᑎᖁᑎᓯᓗ ᐱᒡᓕᕐᑕᐅᔮᕐᑐᑎᑐᑦ ᐅᓄᕐᑐᕐᔪᐊᑎᑐᑦ ᑍᒤᑉᐳᑦ, ᐊᕙᓘᑉ ᐅᖅᑯᐊᓕᓂᖓᓂ ᓂᒡᓚᓱᒃᑎᓪᓗᒍ ᒥᑦᓯᒪᔪᑎᑐᑦ; ᓯᕿᓂᕐᓕ ᓴᖅᑭᒻᒪᑦ ᕿᒪᒃᓯᓪᓗᑎᒃ ᑎᖏᕗᑦ; ᓇᓪᓕᐊᓐᓄᓪᓘᓐᓃᑦ ᖃᐅᔨᒪᔭᐅᓐᖏᓚᑦ ᓇᒧᓐᖓᕐᒪᖔᑕ.
18ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ, ᐰᕐᓯᔨᖁᑎᑎᑦ ᓯᓂᒃᐳᑦ, ᐊᖓᔪᖅᑳᖁᑎᑎᑦ ᓯᓐᓇᕆᒃᐳᑦ. ᐃᓄᖁᑎᑎᓪᓗ ᖃᖅᑲᓂ ᓇᓂᑐᐃᓐᓇᖅ ᓯᐊᒻᒪᕐᓯᒪᕗᑦ, ᑭᓇᒧᓪᓘᓐᓃᑦ ᑲᑎᕐᓱᕐᑕᐅᔪᓐᓇᕋᑎᒃ. 19ᐋᓐᓂᕈᑎᒋᓯᒪᔭᕐᓄᑦ ᒪᒥᑦᔪᑎᒃᓴᕐᑕᖃᕈᓐᓃᕐᐳᖅ, ᐃᑭᑎᑦ ᐊᖏᓗᐊᕐᒪᑕ. ᐃᓕᑦᓯᓐᓂᒃ ᑐᓴᕐᑐᓕᒫᑦ ᐸᑦᑕᒃᑐᕐᐳᑦ ᖁᕕᐊᓱᒧᑦ, ᑍᒃᑯᐊ ᐱᐅᖏᑦᑐᓕᓂᕐᒥᒃ ᐱᓇᓱᐊᕐᕕᒌᓐᓇᖃᑦᑕᓚᐅᕋᑦᓯᐅᒃ.
Currently Selected:
ᓇᕼᐅᒥᐅᑉ ᐊᒡᓚᖏᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
