ᒫᑯᓯᐅᑉ ᐊᒡᓚᖏᑦ 13
13
ᔩᓱᓯᐅᑉ ᐅᖃᐅᓯᖃᕐᓂᖓ ᑐᒃᓯᐊᕐᕕᒡᔪᐊᑉ ᐊᓯᕈᕐᑕᐅᓂᒃᓴᖓᓂᒃ
ᒫᑎᐅᓯ 24:1-2; ᓘᑲᓯ 21:5-6
1ᑐᒃᓯᐊᕐᕕᒡᔪᐊᕐᒥᑦ ᐊᓂᓕᕐᒪᑦ, ᐃᓕᓐᓂᐊᕐᑎᖏᑕ ᐃᓚᖓᑦᑕ ᐅᖃᐅᑎᕚ, “ᑕᑯᒋᑦ, ᐊᔪᕆᕐᑐᐃᔩ, ᒪᑯᐊ ᐅᔭᕅᑦ ᓴᓇᒪᓂᖏᑦ ᐊᒃᓱᐊᓗᒃ ᑕᑯᒥᓇᕐᐳᑦ, ᐃᒡᓗᑦᓯᐊᕙᒻᒪᕆᐊᓘᓪᓗᓂᓗ!”
2ᔩᓱᓯᐅᑉ ᐅᖃᐅᑎᕚ, “ᐃᒡᓗᓕᐊᕆᓯᒪᔪᑦ ᒪᒃᑯᐊ ᓴᓇᒪᑦᓯᐊᕐᑐᑦ ᑕᑯᕕᒌᑦ? ᐅᔭᕋᒃᑕᖏᑦ ᐊᑕᐅᓯᕐᓘᓐᓃᑦ ᐃᓂᒥᓃᑦᑐᖃᕈᓐᓃᕈᒫᕐᐳᑦ, ᑕᒪᕐᒥᑦᓯᐊᖅ ᐅᕐᕈᑎᑕᐅᔪᒫᕐᒪᑕ.”
ᐃᓗᐊᖏᑦᔪᑎᒃᓴᑦ ᐊᑭᕋᕐᑐᕐᑕᐅᓃᓪᓗ
ᒫᑎᐅᓯ 24:3-14; ᓘᑲᓯ 21:7-19
3ᖃᖅᑲᐅᑉ ᖄᖓᓂ ᐃᒃᓯᕙᓕᕐᒪᑦ ᓇᐹᕐᑐᓕᖕᒥᒃ ᐸᐅᕐᖓᖃᕐᑐᓂ ᐅᕐᓱᒃᓴᕐᑕᓕᖕᓂᒃ ᑐᒃᓯᐊᕐᕕᒡᔪᐊᑉ ᓇᓕᓪᓗᐊᖓᓂ, ᐲᑦᑐᕉᓯᐅᑉ ᔧᒥᓯᐅᓪᓗ ᔪᐊᓇᓯᐅᓪᓗ ᐋᓐᑐᕉᓪᓗ ᐅᐸᒃᐹᑦ ᑖᒃᑯᑑᓪᓗᑎᒃ. 4ᐅᖃᕐᓗᑎᒃ, “ᐅᖃᐅᑎᓚᐅᕐᑎᒍᑦ, ᖃᖓ ᑕᒪᓐᓇ ᑍᒤᑦᓱᒫᕐᐸ, ᓱᓇᓂᒃ ᓇᓗᓁᒃᑯᑕᖃᕈᒫᕐᐸ ᑕᒪᑐᒪ ᓇᓪᓕᐅᑎᓂᖓ?”
5ᔩᓱᓯᐅᑉ ᐅᖃᐅᑎᕔᑦ, “ᖃᐅᔨᓴᑦᓯᐊᕆᑦᓯ ᐅᐃᕖᕐᕆᔭᐅᖁᓇᓯ. 6ᐊᒥᓱᑦ ᐊᑎᓐᓂ ᐅᕙᖓᐅᓂᕋᕐᓗᑎᑦ ᑎᑭᑦᓱᒫᕐᒪᑕ ᐅᖃᕐᓗᑎᒃ, ‘ᑖᓐᓇᐅᕗᖓ!’ ᐊᒥᓱᑦ ᐅᐃᕖᕐᕆᔪᒫᕐᐰᑦ. 7ᐅᓇᑕᕐᑐᓂᒃ ᑐᓵᓕᕈᑦᓯ ᐅᓇᑕᕐᑐᓪᓗ ᐅᓂᒃᑲᐅᓯᐅᓂᖏᓐᓂᒃ ᑐᓴᕐᑎᑕᐅᒍᑦᓯ, ᑲᑉᐱᐊᓱᖕᓂᐊᕋᓯ; ᑕᒪᒃᑯᐊ ᓇᓪᓕᐅᑎᔭᕆᐊᖃᕐᒪᑕ, ᓯᓚᕐᔫᑉ ᓇᒡᒐᑖ ᓱᓕ ᓇᓪᓕᐅᑎᓐᖏᓚᖅ. 8ᐃᓅᖃᑎᒌᒡᔪᐊᑦ ᐅᓇᑕᕈᒫᕐᐳᑦ ᐃᓅᖃᑎᒌᒡᔪᐊᓄᑦ ᐊᓯᒥᖕᓄᑦ, ᐊᖓᔪᖅᑲᐅᕖᑦ ᐅᓇᑕᕈᒫᕐᐳᑦ ᐊᖓᔪᖅᑲᐅᕕᖕᓄᑦ ᐊᓯᒥᖕᓄᑦ; ᓄᓇᒥ ᓇᓂᑐᐃᓐᓇᖅ ᓴᔪᒃᐱᓪᓚᖃᑦᑕᕈᒫᕐᐳᖅ, ᑳᖕᓇᕐᑐᕐᔪᐊᖃᖃᑦᑕᕐᓗᓂᓗ; ᑕᒪᒃᑯᐊ ᑕᕝᕙ ᐃᕐᓂᓱᒃᑑᑉ ᐃᒃᐱᖕᓂᐊᓕᕐᓂᖓᑐᑦ ᐱᒋᐊᕐᐸᓪᓕᐊᓕᕐᑐᑦ.
9 #
ᒫᑎᐅᓯ 10:17-20; ᓘᑲᓯ 12:11,12. “ᐃᓕᑦᓯ ᓇᖕᒥᓂᖅ ᖃᐅᔨᓴᕆᑦᓯ; ᑎᒍᔭᐅᔪᒫᕐᐳᓯ ᐃᖅᑲᕐᑐᐃᕕᖕᒧᑦ ᐱᑎᑕᐅᓗᓯ; ᐋᓐᓂᕐᓯᕐᑕᐅᔪᒫᕐᐳᓯ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ; ᐋᑕᐅᔪᒫᕐᐳᓯ ᐊᐅᓚᑦᓯᔨᓄᑦ ᐊᖓᔪᖅᑳᕐᔪᐊᓄᓪᓗ ᓇᖏᖁᓪᓗᓯ ᓵᖏᓐᓂ ᐅᕙᖓ ᐱᑦᔪᑎᒋᓗᖓ, ᓇᓗᓁᕐᓯᔪᓐᓇᖁᓪᓗᓯ ᑖᒃᑯᓄᖓ. 10ᐅᖃᐅᓰᑦ ᑐᓴᕈᒥᓇᕐᑐᑦ ᐅᖃᐅᓯᐅᖅᑳᕆᐊᖃᕐᐳᑦ ᐃᓅᖃᑎᒌᒡᔪᐊᓄᑦ ᑕᒤᓐᓄᑦ. 11ᑎᒍᔭᐅᒍᑦᓯ ᐃᖅᑲᕐᑐᐃᕕᖕᒧᓪᓗ ᐋᑕᐅᒍᑦᓯ, ᐃᓱᒪᔮᕐᓂᐊᕋᓯ ᓯᕗᓂᖓᓂ ᖃᓄᖅ ᐅᖃᕆᐊᖃᕐᓂᐊᕐᒪᖔᑦᓯ; ᐅᖃᐅᓯᖃᕆᑦᓯᓕ ᑕᕝᕙᓂ ᓇᓪᓕᐅᑦᑐᒥ ᐅᖃᐅᓯᒃᓴᕐᑖᕐᑎᑕᐅᓂᕆᔭᑦᓯᓐᓂᒃ, ᓇᖕᒥᓂᖅ ᐅᖃᓪᓚᖏᓐᓇᑦᓯ, ᐊᓂᕐᓂᕐᓕ ᐃᑦᔪᕐᓁᑦᑐᖅ ᐅᖃᓪᓚᒃᐳᖅ. 12ᐃᓄᐃᑦ ᑎᒍᔭᐅᑎᑦᓯᔪᒫᕐᐳᑦ ᖃᑕᓐᖑᑎᒥᖕᓂᒃ ᑐᖁᑕᐅᖁᓪᓗᒋᑦ, ᐊᑖᑕᐅᔪᑦ ᑍᒤᑦᓱᒫᕆᕗᑦ ᕿᑐᕐᖓᒥᖕᓂᒃ, ᕿᑐᕐᖎᑦ ᐊᑭᕋᕐᑐᓕᕈᒫᕐᐳᑦ ᐊᖓᔪᖅᑳᒥᖕᓄᑦ ᑐᖁᑕᐅᑎᑦᓯᓗᑎᒃ. 13#ᒫᑎᐅᓯ 10:22.ᑕᒤᓐᓄᑦ ᐆᒥᒋᔭᐅᓕᕈᒫᕐᐳᓯ ᐅᕙᖓ ᐱᑦᔪᑎᒋᓗᖓ. ᓇᓪᓕᐊᓪᓕ ᕿᓄᐃᓵᕐᓗᓂ ᐊᓂᒍᐃᔪᖅ ᑖᓐᓇ ᐱᐅᓕᔭᐅᔪᒫᕐᐳᖅ.”
ᑕᑯᒥᓁᑦᑐᕐᔪᐊᖅ ᑲᑉᐱᐊᓇᕐᑐᖅ
ᒫᑎᐅᓯ 24:15-28; ᓘᑲᓯ 21:20-24
14 #
ᑖᓂᐊᓕ 9:27; 11:31; 12:11. “ᑕᑯᓕᕈᑦᓯ ᑕᑯᒥᓁᑦᑐᕐᔪᐊᕐᒥᒃ ᓇᑉᐸᕐᑕᐅᔪᒥᒃ ᑕᒫᓂ ᐃᓂᒃᓴᕆᓐᖏᑕᖓᓂ (ᐊᑐᐊᕐᓯᔫᑉ ᑐᑭᓯᓕᐅᒃ ᖃᓄᖅ ᑐᑭᖃᕐᒪᖔᑦ), ᑕᕝᕙ ᔫᑎᐊᒦᑦᑐᑦ ᕿᒫᔭᕆᐊᖃᓕᕈᒫᕐᐳᑦ ᖃᖅᑲᓄᑦ. 15#ᓘᑲᓯ 17:31.ᐃᒡᓘᑉ ᖄᖓᓃᑦᑐᖅ ᐃᒡᓗᒥᓄᑦ ᐊᖅᑲᕆᐊᖃᕈᒫᓐᖏᓚᖅ, ᓱᓇᑐᐃᓐᓇᕐᒥᒃ ᓇᒃᓴᕈᒪᔭᒥᓂᒃ ᐂᒃᖠᕋᓱᒡᓗᓂ. 16ᐱᕈᕐᓰᕕᖕᒦᑦᑐᖅ ᐂᒃᖠᕆᐊᖃᕈᒫᓐᖏᓚᖅ ᐅᓕᒡᔪᐊᒥᓂᒃ. 17ᑲᑉᐱᐊᓇᕐᑐᐊᓘᔪᒫᕐᐳᖅ ᐊᕐᓇᓄᑦ ᓄᑕᕋᒃᓴᖃᕐᑐᓄᑦ ᕿᑐᕐᖓᓛᓕᖕᓄᓪᓗ! 18ᑐᒃᓯᐊᕆᑦᓯ ᕿᒫᕕᒃᓴᓯ ᐅᑭᐅᒥ ᓇᓪᓕᐅᑎᖁᓇᒍ. 19#ᑖᓂᐊᓕ 12:1; ᑕᑯᑎ 7:14.ᐅᓪᓗᐃᑦ ᑖᒃᑯᐊ ᑲᑉᐱᐊᓇᕐᑐᑦ ᓇᓕᖃᕈᒫᖏᒻᒪᑕ ᓯᓚᕐᔪᐊᑉ ᐱᒋᐊᕐᓂᖓᓂᑦ ᒎᑎᐅᑉ ᐱᓐᖑᕐᑎᑦᓯᓚᐅᕐᓂᖓᓂᑦ ᒫᓐᓇᒧᑦ ᑎᑭᓪᓗᒍ, ᑭᖑᓂᖓᒍᑦ ᑍᒫᒃ ᑲᑉᐱᐊᓇᕐᑎᒋᔪᒥᒃ ᐱᑕᖃᕈᒫᓐᖏᓚᖅ. 20ᐊᑕᓂᐅᑉ ᐅᓪᓗᐃᑦ ᓁᒡᓕᒋᐊᕐᓂᐊᖏᑉᐸᒋᑦ, ᐃᓄᓕᒫᑦ ᐱᐅᓕᔭᐅᔪᖃᕋᔭᓐᖏᓚᑦ; ᓂᕈᐊᕐᓯᒪᔭᓂᓕ ᐱᑦᔪᑎᒋᓪᓗᒋᑦ, ᐅᓪᓗᐃᑦ ᑖᒃᑯᐊ ᓁᒡᓕᒋᐊᕐᓯᒪᕔᑦ.
21“ᓇᓪᓕᐊᓐᓄᑦ ᐅᖃᐅᑦᔭᐅᒍᕕᑦ, ‘ᑕᑯᒋᑦ, ᐅᓇ ᑕᕝᕙ ᙭ᔅᑑᓯ!’ ᐅᕝᕙᓗ, ‘ᑕᑯᒋᑦ, ᙭ᔅᑑᓯ ᑍᑲ!’ ᐅᒃᐱᕆᓂᐊᕋᓯᒋᒃ. 22᙭ᔅᑑᓯᐅᓂᕋᕐᑐᑦ ᓱᓕᖏᑦᑐᑦ, ᓇᓚᐅᑦᑍᔫᓂᕋᕐᑐᓪᓗ ᓱᓕᖏᑦᑐᑦ ᓴᖅᑭᕈᒫᕐᒪᑕ ᓇᓗᓁᒃᑯᑕᕐᓂᒃ ᓴᖅᑭᑎᑦᓯᔪᒫᕐᐳᑦ ᑲᒪᓇᕐᑐᓕᓂᕐᓂᒡᓗ, ᑕᒻᒪᕐᑎᑦᓯᓗᑎᒃ, ᐊᒡᓛᑦ ᓂᕈᐊᕐᑕᐅᓯᒪᔪᑦ ᐊᔪᕐᓇᓐᖏᑉᐸᑕ ᑕᒻᒪᕐᑎᓐᓇᓱᐊᕐᓗᒋᑦ. 23ᖃᐅᔨᓴᑦᓯᐊᕆᑦᓯ; ᑕᒪᒃᑯᓂᖓ ᑕᒤᓐᓂᒃ ᐅᖃᐅᑎᕙᑦᓯ ᓱᓕ ᑕᒪᒃᑯᐊ ᓇᓪᓕᐅᑎᖅᑳᕐᑎᓐᓇᒋᑦ.”
ᐃᓅᑉ ᐃᕐᓂᖓᑕ ᑎᑭᓐᓂᖓ
ᒫᑎᐅᓯ 24:29-31; ᓘᑲᓯ 21:25-28
24 #
ᐂᓮᐊᓯ 13:10; ᔪᐃᓕ 2:10,31; 3:15; ᑕᑯᑎ 6:12;
ᐂᓮᐊᓯ 13:10; ᐃᓯᑭᐊᓕ 32:7. “ᐅᓪᓗᐃᑦ ᑖᒃᑯᐊ ᑲᑉᐱᐊᓇᕐᑐᑦ ᑭᖑᕐᖓᑦᑎᒍᑦ, ᓯᕿᓂᖅ ᑖᕐᓯᔪᒫᕐᐳᖅ, ᑕᖅᑭᕐᓗ ᖃᐅᒪᔪᓐᓃᕈᒫᕐᐳᖅ, 25#ᐂᓮᐊᓯ 34:4; ᑕᑯᑎ 6:13; ᔪᐃᓕ 2:10.ᐅᓪᓗᕆᐊᓪᓗ ᕿᓚᖕᒥᑦ ᑲᑕᒐᕈᒫᕐᐳᑦ, ᕿᓚᖕᒥ ᐱᔪᓐᓇᕐᓃᑦ ᐊᐅᓚᑎᑕᐅᔪᒫᕐᐳᑦ. 26#ᑖᓂᐊᓕ 7:13; ᑕᑯᑎ 1:7.ᑕᕝᕙ ᐃᓅᑉ ᐃᕐᓂᖓ ᑕᑯᔪᒫᕐᐹᑦ ᓄᕗᔭᑎᒍᑦ ᐊᖅᑲᕐᑐᖅ ᐱᔪᓐᓇᕐᓂᕐᔪᐊᖃᕐᓗᓂ ᓂᕐᑐᕐᓇᕐᓂᕐᔪᐊᖃᕐᓗᓂᓗ. 27ᑖᑦᓱᒪ ᐂᖏᓖᑦ ᑎᓕᔪᒫᕐᐰᑦ, ᑲᑎᕐᓱᐃᖁᓪᓗᒋᑦ ᓂᕈᐊᕐᓯᒪᔭᖏᓐᓂᒃ ᓄᓇᕐᔪᐊᑉ ᐊᓄᕌᕐᕕᒋᕙᒃᑕᖏᓐᓂᑦ ᓯᑕᒪᓂᑦ, ᓄᓇᕐᔪᐊᑉ ᐃᓱᐊᓂᑦ ᕿᓚᐅᑉ ᐃᓱᐊᓄᑦ.”
ᓇᐹᕐᑐᒥᑦ ᐱᒋᓕᖕᓂᒃ ᐸᐅᕐᖓᓕᖕᒥᑦ ᐃᓕᓐᓂᐊᕈᑎᒃᓴᖅ
ᒫᑎᐅᓯ 24:32-35; ᓘᑲᓯ 21:29-33
28“ᓇᐹᕐᑑᑉ ᐱᒋᓕᖕᓂᒃ ᐸᐅᕐᖓᓕᐅᑉ ᐊᔪᕆᕐᑐᕐᓕᓯ ᐃᓕᓐᓂᐊᕈᑎᒃᓴᑦᓯᓐᓂᒃ: ᐊᕙᓚᖓᔪᖏᑦ ᐆᒻᒪᕈᑦᓯᐊᕌᖓᒥᒃ ᐱᕈᕐᕕᐅᓕᕐᐸᒃᐳᑦ ᐅᖃᐅᔭᖃᓕᕐᓗᑎᒡᓗ, ᑕᕝᕙ ᖃᐅᔨᕙᒃᐳᓯ ᐊᐅᔭᐅᔭᕆᐊᒃᖠᓕᕐᒪᑦ. 29ᑍᒫᒃᑕᐅᖅ, ᑕᒪᒃᑯᐊ ᐅᖃᐅᓯᕆᔭᒃᑲ ᑕᑯᓕᕈᑦᓯᒋᒃ ᐱᕙᓪᓕᐊᓕᕐᑐᑦ, ᑕᕝᕙ ᖃᐅᔨᒪᓂᐊᕐᐳᓯ ᖃᓂᑦᑑᓕᕐᒪᑦ ᐃᓯᕐᑕᕐᕕᖕᒦᓕᕐᓗᓂᓗ.#13:29 ᐅᕝᕙᓗ ᑎᑭᑐᐃᓐᓇᕆᐊᖃᓕᕐᒪᑦ ᐅᒃᑯᐊᒦᓕᕐᓗᓂᓗ 30ᓱᓕᔪᒥᒃ ᐅᖃᐅᑎᕙᑦᓯ, ᒫᓐᓇ ᐃᓅᔪᑦ ᓄᖑᓚᐅᖅᑳᕐᑎᓐᓇᒋᑦ ᑕᒪᒃᑯᐊ ᑕᒪᕐᒥᒃ ᓇᓪᓕᐅᑎᔪᒫᕐᐳᑦ. 31ᕿᓚᒡᓗ ᓄᓇᓗ ᓄᖑᔪᒫᕐᐴᒃ, ᐅᖃᐅᓯᒃᑲᓕ ᓄᖑᔪᒫᓐᖏᓚᑦ.”
ᓇᓪᓕᐊᓐᓄᑦ ᖃᐅᔨᒪᔭᐅᓐᖏᓚᖅ ᐅᓪᓗᖅ ᐃᑲᕐᕋᕐᓘᓐᓃᑦ
ᒫᑎᐅᓯ 24:36-44
32 #
ᒫᑎᐅᓯ 24:36. “ᐅᓪᓗᑉ ᑕᒪᑐᒪ ᓇᓪᓕᐅᓐᓂᖓ ᐃᑲᕐᕋᕐᓘᓐᓃᑦ ᓇᓪᓕᐊᓐᓄᑦ ᖃᐅᔨᒪᔭᐅᓐᖏᓚᖅ, ᐂᖏᓖᑦ ᐊᒡᓛᑦ ᕿᓚᖕᒦᑦᑐᑦ, ᐃᕐᓂᐅᓪᓘᓐᓃᑦ ᖃᐅᔨᒪᖏᓐᓂᕚ, ᐊᑖᑕᐅᑉ ᑭᓯᒥ ᖃᐅᔨᒪᕚ. 33ᖃᐅᔨᒪᓇᓱᐊᑦᓯᐊᕆᑦᓯ, ᖃᐅᔨᓴᑦᓯᐊᕐᓗᓯ; ᖃᖓ ᓇᓪᓕᐅᑎᔪᒫᕐᒪᖔ ᖃᐅᔨᒪᖕᒋᓐᓇᑦᓯᐅᒃ. 34#ᓘᑲᓯ 12:36-38.ᐊᖑᑎᑐᑦ ᐊᐅᓪᓚᕐᑐᑐᑦ ᑍᒤᑦᓱᒫᕐᐳᖅ, ᐊᖏᕐᕋᒥᓂᒃ ᕿᒤᓕᕋᒥ ᐱᔨᒥᓂᒃ ᑲᒪᔨᐅᑎᑦᓯᔪᑐᑦ, ᑖᒃᑯᐊ ᐊᑐᓂᑦ ᐱᓇᓱᐊᕆᐊᖃᕐᑕᖏᓐᓂᒃ ᐅᖃᐅᑎᑦᓯᐊᕐᐰᑦ, ᐅᒃᑯᐊᒥᒃ ᖃᐅᔨᓴᕐᑎᐅᓂᐊᕐᑐᖅ ᖃᐅᔨᓴᑦᓯᐊᖁᕚ. 35ᑍᒤᒻᒪᑦ ᖃᐅᔨᓴᑦᓯᐊᕆᑦᓯ, ᐃᒡᓘᑉ ᐊᖓᔪᖅᑳᖓᑕ ᑎᑭᕝᕕᒋᓂᐊᕐᑕᖓ ᖃᐅᔨᒪᖏᓐᓇᑦᓯᐅᒃ, ᐅᓐᓄᒃᑯᑦ ᑎᑭᑐᐃᓐᓇᕆᐊᖃᕐᒪᑦ, ᐅᕝᕙᓗ ᐅᓐᓄᐊᓪᓗᐊᒃᑯᑦ ᑎᑭᑐᐃᓐᓇᕆᐊᖃᕐᓗᓂ, ᐅᕝᕙᓗ ᖃᐅᒻᒪᓕᕐᑎᓪᓗᒍ ᐊᖑᑎᕕᐊᑉ ᓂᓪᓕᕐᕕᖓᓂ, ᐅᕝᕙᓗ ᐅᓪᓛᓐᖑᕐᑎᓪᓗᒍ. 36ᑕᕝᕔᓐᓇᖅ ᑎᑭᑲᓪᓚᒃᐸᑦ ᓯᓂᒃᑎᓪᓗᓯ ᑎᑭᑕᐅᖁᓇᓯ. 37ᐃᓕᑦᓯᓐᓄᑦ ᐅᖃᐅᓯᕆᔭᕋ ᑕᒤᓐᓄᑦ ᐅᖃᕐᐸᕋ: ᐃᖅᑯᒪᑦᑎᐊᕆᑦᓯ.”
Currently Selected:
ᒫᑯᓯᐅᑉ ᐊᒡᓚᖏᑦ 13: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
