ᒫᑯᓯᐅᑉ ᐊᒡᓚᖏᑦ 12
12
ᐅᐂᓂᓕᒃᓴᒥᒃ ᐱᕈᕐᓰᕕᖕᒥᒃ ᑲᒪᔩᑦ ᐊᑦᔨᐅᑎᑕᐅᓂᖏᑦ
ᒫᑎᐅᓯ 21:33-46; ᓘᑲᓯ 20:9-19
1 #
ᐂᓮᐊᓯ 5:1,2. ᔩᓱᓯᐅᑉ ᐊᔪᕆᕐᑐᕐᐰᑦ ᐊᑦᔨᐅᔪᑎᒍᑦ, ᐅᖃᕐᓗᓂ: “ᑍᑦᓱᒪᓂ ᐊᖑᑎᑕᖃᓚᐅᕐᐳᖅ ᐱᕈᕐᓰᕕᖕᒥᓂ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᔪᒥᒃ, ᐃᑎᕐᓴᓕᐅᕐᓗᓂ ᐅᐂᓂᑦ ᐃᑦᓯᔭᕐᑕᐅᕕᒃᓴᖓᓂᒃ, ᑕᕝᕙᓂ ᐃᒡᓗᓕᐅᕐᐳᖅ ᐳᕐᑐᔪᒥᒃ ᖃᐅᔨᓴᕐᕕᒃᓴᒥᒃ, ᐱᕈᕐᓰᕕᒃ ᐊᑐᕐᑕᐅᑎᑉᐹ ᑲᒪᔨᐅᓂᐊᕐᑐᓄᑦ, ᐱᔭᕇᕋᒥ ᓄᓇᐅᑉ ᐊᓯᐊᓄᑦ ᐊᐅᓪᓚᕐᐳᖅ. 2ᐱᕈᕐᑐᓂᒃ ᐅᐂᓂᒃᓴᓂᒃ ᑲᑎᕐᓯᕕᒃ ᓇᓪᓕᐅᑎᖕᒪᑦ, ᐱᔨᒥᓂᒃ ᑎᓕᓯᕗᖅ ᐱᕈᕐᓰᕕᖕᒥᒃ ᑲᒪᔨᐅᑎᑕᒥᓄᑦ, ᑖᓐᓇ ᐂᒃᓯᖁᓪᓗᒍ ᐱᕈᕐᑐᕕᓃᑦ ᐃᓚᖏᓐᓂᒃ ᐱᑎᑕᐅᔪᒪᓪᓗᓂ. 3ᐱᕈᕐᓰᕕᓕᕆᔪᑦ ᑖᓐᓇ ᑎᒍᕚᑦ ᐋᓐᓂᕐᓯᕐᓗᒍᓗ, ᐅᑎᕐᑎᑉᐹᑦ ᓱᓇᒥᒡᓘᓐᓃᑦ ᓇᒃᓴᕐᑎᓐᓇᒍ. 4ᐱᕈᕐᓰᕕᖕᒥᒡᓕ ᐱᖁᑎᓕᒃ ᑎᓕᓯᒃᑲᓐᓂᕐᐳᖅ ᐱᔨᒥᓂᒃ, ᑖᒃᑯᐊ ᐱᕈᕐᓰᕕᓕᕆᔪᑦ ᐋᓐᓂᕐᐹᑦ ᓂᐊᖁᐊᒍᑦ, ᒥᑕᐅᑎᒋᓪᓗᒍ ᐊᐅᓪᓚᕐᑎᑉᐹᑦ. 5ᐱᕈᕐᓰᕕᖁᑎᓕᒃ ᑎᓕᓯᒃᑲᓐᓂᕐᐳᖅ ᐱᔨᒥᒃ ᐊᓯᐊᓂᒃ, ᐱᕈᕐᓰᕕᓕᕆᔪᑦ ᑖᓐᓇ ᑐᖁᑉᐹᑦ; ᐊᓯᖏᓪᓗ ᐊᒥᓱᑦ ᑍᒤᓕᐅᖃᑦᑕᕐᐰᑦ, ᐃᓚᖏᑦ ᐋᓐᓂᕐᓯᕐᓗᒋᑦ ᐃᓚᖏᓪᓗ ᑐᖁᓪᓗᒋᑦ. 6ᐱᕈᕐᓰᕕᖁᑎᓕᒃ ᑎᓕᔭᒃᓴᑐᐊᖃᓕᕐᐳᖅ ᐃᕐᓂᕐᒥᓂᒃ ᓇᒡᓕᒋᒻᒪᕆᒃᑕᒥᓂᒃ; ᑭᖑᓪᓕᕐᐸᐅᑎᓪᓗᒍᓗ ᐃᕐᓂᓂ ᑎᓕᒋᕚ ᑖᒃᑯᓄᖓ, ᐅᖃᕐᓗᓂ, ‘ᐃᕐᓂᕋ ᐃᓕᕋᒋᓂᐊᕐᐹᑦ.’ 7ᐱᕈᕐᓰᕕᓕᕆᔪᑦ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, ‘ᑖᓐᓇ ᑕᕝᕙ ᑭᖑᕐᖑᑦᔨᔪᒃᓴᖅ; ᐊᑏ, ᑐᖁᓚᐅᕐᓚᕗᑦ, ᑖᑦᓱᒪ ᑭᖑᕐᖑᑎᔭᒃᓴᖏᑦ ᐱᑖᕆᓂᐊᕋᑦᑎᒍᑦ.’ 8ᑕᕝᕙ ᑎᒍᕚᑦ ᑐᖁᓪᓗᒍ, ᑎᒥᖓ ᐃᒋᑉᐹᑦ ᐱᕈᕐᓰᕕᐅᑉ ᓯᓚᑖᓄᑦ.
9“ᖃᓄᕐᓕ ᑕᕝᕙ ᐱᕈᕐᓰᕕᖁᑎᓕᒃ ᐱᓛᓕᕐᐸ? ᑎᑭᑦᓱᒫᕐᐳᖅ ᐱᕈᕐᓰᕕᓕᕆᔩᑦ ᑐᖁᑦᓴᕐᑐᕐᓗᒋᑦ, ᐱᕈᕐᓰᕕᒃ ᐊᓯᖏᓐᓄᑦ ᑲᒪᒋᔭᐅᖁᓕᕈᒫᕐᐹ. 10#ᐃᓐᖏᕈᑦ 118:22,23.ᐅᓇ ᐅᖃᓕᒫᕐᓯᒪᓐᖏᓚᓯᐅᒃ ᒎᑎᐅᑉ ᐅᖃᐅᓯᖏᓐᓂ?
‘ᐅᔭᕋᒃ ᐃᒡᓗᓕᐅᕐᑎᓂᑦ ᓇᕐᕈᒋᔭᐅᔪᖅ,
ᑖᓐᓇ ᐱᓪᓚᕆᐅᓂᕐᐸᐅᓪᓗᓂ ᑎᕆᖅᑰᓕᕐᐳᖅ;
11ᑕᒪᓐᓇ ᐊᑕᓂᐅᑉ ᐱᓂᐊᓚᐅᕐᐹ,
ᓴᖅᑭᔮᕐᓂᖓ ᐅᕙᑦᑎᓐᓄᑦ ᑕᑯᒥᓇᕐᑐᕐᔫᕗᖅ!’”
12ᑖᒃᑯᐊ ᔩᓱᓯ ᑎᒍᔪᒪᒐᓗᐊᕐᐹᑦ, ᐃᓄᒐᓴᒡᔪᐊᓂᒡᓕ ᑲᑉᐱᐊᓱᒃᐳᑦ, ᒪᓗᒍᓱᓕᕋᒥᒃ ᑕᒪᑐᒧᖓ ᐊᑦᔨᐅᔪᒧᑦ ᐅᖃᐅᓯᐅᓂᕐᒥᖕᓂᒃ; ᑍᒤᒻᒪᑦ ᕿᒪᒃᐰᑦ ᐊᓯᐊᓄᐊᓕᕐᓗᑎᒃ.
ᐊᐱᖅᑯᓯᖅ ᑖᒃᓰᔭᕆᐊᖃᕐᒪᖔᕐᒥᒃ
ᒫᑎᐅᓯ 22:15-22; ᓘᑲᓯ 20:20-26
13ᐹᕆᓯᑦ ᐃᓚᖏᑦ ᐃᕉᑕᓯᐅᓪᓗ ᒪᓕᒃᑎᖏᑕ ᐃᓚᖏᑦ ᔩᓱᓯᒧᐊᖁᔭᐅᕗᑦ, ᐊᐱᕐᓱᕐᓗᒍ ᓇᓗᓕᕐᑎᓐᓇᓱᐊᕈᒪᓪᓗᒍ. 14ᑖᒃᑯᐊ ᔩᓱᓯᒧᐊᕋᒥᒃ ᐅᖃᕐᐳᑦ, “ᐊᔪᕆᕐᑐᐃᔩ ᖃᐅᔨᒪᒐᑦᑕ ᓱᓕᔪᒥᒃ ᐅᖃᖃᑦᑕᕋᕕᑦ, ᐃᓄᐃᑦ ᐃᓱᒪᖏᑦ ᓯᕘᕋᒋᓇᒋᑦ ᓱᓕᑦᓯᐊᕐᑐᒥᒃ ᐅᖃᕐᐸᒃᑲᕕᑦ; ᐃᓄᐃᑦ ᖃᓄᐃᑦᑑᓂᖏᓐᓂᒃ ᑲᒪᒋᖏᓐᓇᕕᒋᑦ, ᐊᔪᕆᕐᑐᖃᑦᑕᕋᕕᒋᑦ ᓱᓕᔪᒥᒃ ᒎᑎᐅᑉ ᐱᓂᐊᕐᑕᐅᖁᔭᖏᓐᓂᒃ. ᐅᖃᐅᑎᓚᐅᕐᑎᒍᑦ, ᐱᖁᔭᑦᑎᓐᓄᑦ ᐊᑭᕋᕐᑐᕐᐹᑦ, ᑖᒃᓰᔭᕈᑎᓂᒃ ᑐᓂᓯᖃᑦᑕᕈᑦᑕ ᓰᓴᕆᒧᑦ ᐅᕝᕙᓗ ᑐᓂᓯᖃᑦᑕᕆᐊᖃᓐᖏᓚᒍᑦ?”
15ᔩᓱᓯᐅᑉ ᐱᖏᑦᓯᕐᓱᕋᓱᐊᕐᓂᖏᑦ ᖃᐅᔨᒪᒐᒥᒋᑦ ᐅᖃᐅᑎᕔᑦ, “ᓱᖕᒫᑦ ᐅᕙᓐᓂᒃ ᐆᒃᑐᕋᓱᐊᕐᐱᓰ? ᑮᓇᐅᔭᖅ ᕾᑕᐅᓚᐅᕐᓕ, ᑕᑯᓚᐅᕐᓚᒍ.”
16ᑮᓇᐅᔭᒥᒃ ᑐᓂᓯᕕᒋᕚᑦ. ᔩᓱᓯᐅᑉ ᐊᐱᕆᕔᑦ, “ᑭᓇᐅᑉ ᑮᓇᓐᖑᐊᖓ, ᑭᐊᓗ ᐊᑎᖓ?”
ᑖᒃᑯᐊ ᑭᐅᕚᑦ, “ᐊᖓᔪᖅᑳᕐᔪᐊᑉ ᓰᓴᕆᐅᑉ.”
17ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᐊᖓᔪᖅᑳᕐᔪᐊᖅ ᓰᓴᕆ ᑐᓂᓯᕕᒋᓯᐅᒃ, ᐱᖏᓐᓂᒃ, ᒎᑎᓗ ᑐᓂᓯᕕᒋᓗᒍ ᐱᖏᓐᓂᒃ.”
ᑖᒃᑯᐊ ᔩᓱᓯᐅᑉ ᑭᐅᑦᔪᑎᖓᓂᒃ ᑲᒪᕕᒃᔪᐊᕐᐳᑦ.
ᑐᖁᖓᔪᓂᑦ ᒪᑭᓐᓂᐅᒐᔭᕐᑐᒥᒃ ᐊᐱᕐᓲᑏᑦ
ᒫᑎᐅᓯ 22:23-33; ᓘᑲᓯ 20:27-40
18 #
ᐋᐴᓯᑕᓖᑦ 23:8. ᑭᖑᓂᖓᒍᑦ ᓵᑦᔪᓰᑦ ᐅᐸᒃᐹᑦ, ᑖᒃᑯᐊ ᐃᓄᖕᓂᒃ ᑐᖁᖓᔪᓂᑦ ᒪᑭᕝᕕᒃᓴᖃᖏᓐᓂᕅᕙᒃᑐᑦ, ᔩᓱᓯᒧᐊᕐᐳᑦ ᐊᐱᕆᓪᓗᒍ ᐅᖃᕐᐳᑦ, 19#ᒨᓯᓯ ᑕᓪᓕᒪᖏᑦ 25:5.“ᐊᔪᕆᕐᑐᐃᔩ, ᒨᓯᓯᐅᑉ ᐱᖁᔭᕐᑖᕐᑎᓚᐅᕐᐹᑎᒍᑦ, ‘ᐊᖑᑦ ᓄᓕᐊᓕᒃ ᑐᖁᒃᐸᑦ ᕿᑐᕐᖓᕐᑖᓚᐅᕋᓂ, ᑕᕝᕙ ᓄᑲᖓᑕ ᐅᐃᒡᒐᕐᓂᖅ ᓄᓕᐊᕐᑖᕆᔭᒃᓴᕆᕚ ᑖᒃᑯᐊᒃ ᕿᑐᕐᖓᕐᑖᖁᓪᓗᒋᒃ, ᕿᑐᕐᖓᖏᑦ ᑐᖁᓚᐅᕐᑐᒧᑦ ᕿᑐᕐᖓᕆᔭᐅᓂᕋᕐᑕᐅᖁᓪᓗᒋᑦ.’ 20ᑍᑦᓱᒪᓂ ᓄᑲᕇᒃᑕᖃᓚᐅᕐᐳᖅ ᐊᖑᑎᓂᒃ 7ᓂᒃ; ᐊᖓᔪᒃᖠᕐᐹᖅ ᓄᓕᐊᓂᒃᐳᖅ, ᕿᑐᕐᖓᕐᑖᓚᐅᕋᓂᓗ ᑐᖁᕗᖅ. 21ᑕᕝᕙ ᓄᑲᖓᑕ ᐊᕐᓇᖅ ᓄᓕᐊᕐᑖᕆᕚ, ᑖᓐᓇᑦᑕᐅᖅ ᑐᖁᒋᕗᖅ ᕿᑐᕐᖓᕐᑖᓚᐅᕋᓂ; ᓄᑲᖓᑕ ᐱᖓᔪᖓᑦ ᑍᒫᑦᓮᓐᓇᖅ ᐱᒋᕗᖅ. 22ᑖᒃᑯᐊ ᓄᑲᕇᑦ 7 ᑖᑦᓱᒥᖓ ᐊᕐᓇᒥᒃ ᓄᓕᐊᓂᓚᐅᕐᐳᑦ, ᑕᒪᕐᒥᒃ ᕿᑐᕐᖓᕐᑖᓚᐅᕋᑎᒃ ᑐᖁᓚᐅᕐᐳᑦ. ᑭᖑᓪᓕᕐᐸᐅᓪᓗᓂᓕ ᐊᕐᓇᖅ ᑐᖁᒋᕗᖅ. 23ᑐᖁᖓᔪᑦ ᒪᑭᑉᐸᑕ ᒪᑭᕝᕕᒃᓴᐅᔪᒫᕐᑐᒥ, ᓇᓪᓕᐊᑦᑕ ᑖᓐᓇ ᐊᕐᓇᖅ ᓄᓕᐊᕆᓛᕐᐸᐅᒃ? ᑖᒃᑯᐊ ᖃᑕᓐᖑᑎᒌᑦ 7 ᑕᒪᕐᒥᒃ ᓄᓕᐊᕆᓚᐅᕐᒪᑦᔪᒃ.”
24ᔩᓱᓯᐅᑉ ᐅᖃᐅᑎᕔᑦ, “ᐃᒫᒃ ᐱᑦᔪᑎᖃᕐᖢᓯ ᑕᒻᒪᕋᑦᓯ, ᒎᑎᐅᑉ ᐅᖃᐅᓯᖏᑦ ᖃᐅᔨᒪᖏᓐᓇᑦᓯᐅᒃ ᐊᒻᒪᓗ ᒎᑎᐅᑉ ᐱᔪᓐᓇᕐᓂᖓ ᖃᐅᔨᒪᓇᒍ. 25ᑐᖁᖓᔪᓪᓕ ᒪᑭᒃᑯᑎᒃ, ᓄᓕᐊᓂᒃᐸᒍᒫᓐᖏᓚᑦ ᐅᐃᓂᒃᐸᖏᓪᓗᑎᒡᓗ, ᐂᖏᓖᑎᑐᑦ ᕿᓚᖕᒦᑦᑐᑎᑐᑦ ᑍᒤᑦᓱᒫᕐᐳᑦ. 26#ᒨᓯᓯ ᐂᑉᐸᖏᑦ 3:6.ᑐᖁᖓᔪᑦ ᒪᑭᑎᑕᐅᓂᖓᓂᒃ ᐅᖃᕐᓯᒪᔪᓂᒃ ᐊᒡᓚᖕᓂ ᐊᑐᐊᕐᓯᓚᐅᕐᓯᒪᓐᖏᓚᓰ ᒨᓯᓯᐅᑉ ᐊᒡᓚᖏᓐᓂ ᐅᖃᐅᓯᖃᕐᑐᓂᒃ ᐅᕐᐱᒐᕐᒥᒃ ᐃᑯᐊᓚᔪᒥᒃ, ᑕᕝᕙᓂ ᐅᓂᒃᑲᐅᓯᕐᒥ ᒎᑎᐅᑉ ᒨᓯᓯ ᐅᖃᐅᑎᓚᐅᕐᒪᒍ, ‘ᐅᕙᖓ ᐂᑉᕋᕼᐋᒻ ᒎᑎᖓ, ᐂᓴᑭᐅᓪᓗ ᒎᑎᖓ, ᔧᑰᓪᓗ ᒎᑎᖓ?’ 27ᒎᑎ ᐃᓅᔪᓄᑦ ᒎᑎᐅᕗᖅ, ᑐᖁᖓᔪᓪᓕ ᒎᑎᒋᓐᖏᓛᑦ; ᑍᒤᒻᒪᑦ ᑕᒻᒪᕐᓯᒪᓪᓚᕆᒃᐳᓯ.”
ᐱᖁᔭᖅ ᐱᓪᓚᕆᐅᓂᕐᐸᐅᔪᖅ
ᒫᑎᐅᓯ 22:34-40; ᓘᑲᓯ 10:25-28
28ᐱᖁᔭᓂᒃ ᐃᓕᓮᔩᑦ ᐃᓚᖓᑦ ᑕᒪᑐᒥᖓ ᐅᖃᖃᑎᒌᒃᑎᓪᓗᒋᑦ ᑐᓵᕗᖅ, ᑕᑯᒐᒥ ᔩᓱᓯᐅᑉ ᓵᑦᔪᓰᑦ ᑭᐅᑦᓯᐊᕐᒪᒋᑦ, ᑍᒤᒻᒪᑦ ᔩᓱᓯᒧᐊᕐᐳᖅ ᐊᐱᕆᓪᓗᒍ, “ᓇᓪᓕᐊᑦ ᐱᖁᔭᓂᑦ ᑕᒤᓐᓂᑦ ᓯᕗᓪᓕᕐᐸᐅᔭᕆᐊᖃᕐᐸ?”
29 #
ᒨᓯᓯ ᑕᓪᓕᒪᖏᑦ 6:4,5. ᔩᓱᓯᐅᑉ ᑭᐅᕚ, “ᐅᓇ ᑕᕝᕙ ᓯᕗᓪᓕᕐᐸᐅᔪᖅ ᐱᖁᔭᓂᑦ, ‘ᐃᓴᕆᐊᓕᒥᐅᖑᔪᓯ ᑐᓴᕆᑦᓯ! ᐊᑕᓂᖅ ᒎᑎᕗᑦ, ᑖᓐᓇ ᐊᑕᓂᑑᕗᖅ. 30ᐊᑕᓂᖅ ᒎᑎᓯ ᓇᒡᓕᒋᔭᒃᓴᕆᕙᓯ ᐆᒻᒪᑎᑦᓯᓐᓄᑦ ᑕᒤᓐᓄᑦ, ᑕᕐᓂᑦᓯᓐᓄᓪᓗ ᑕᒤᓐᓄᑦ, ᐃᓱᒪᑦᓯᓐᓄᓪᓗ ᑕᒤᓐᓄᑦ, ᐱᔪᓐᓇᕐᓂᑦᓯᓐᓄᓪᓗ ᑕᒤᓐᓄᑦ.’ 31#ᒨᓯᓯ ᐱᖓᔪᖏᑦ 19:18.ᐂᑉᐸᖓᓗ ᐃᒤᓕᕗᖅ, ‘ᐃᓅᖃᑎᓯ ᓇᒡᓕᒋᔭᒃᓴᕆᕙᓯ ᓇᖕᒥᓂᖅ ᓇᒡᓕᒋᓂᕐᑐᑦ.’ ᐊᓯᖏᓐᓂᒃ ᑖᒃᑯᓇᖓᑦ ᐱᓪᓚᕆᐅᓂᕐᓴᓂᒃ ᐱᖁᔭᕐᑕᖃᓐᖏᓚᖅ.”
32 #
ᒨᓯᓯ ᑕᓪᓕᒪᖏᑦ 4:35. ᐱᖁᔭᓂᒃ ᐃᓕᓮᔨ ᔩᓱᓯᒧᑦ ᐅᖃᕐᐳᖅ, “ᐊᔪᕆᕐᑐᐃᔩ, ᓱᓕᑦᓯᐊᕐᐳᑎᑦ; ᑕᒪᓐᓇ ᓱᓕᖕᒪᑦ ᓲᕐᓗ ᐅᖃᕋᕕᑦ, ᐊᑕᓂᖅ ᑭᓯᒥ ᐊᑕᐅᓯᐅᖕᒪᑦ, ᑖᑦᓱᒪ ᐊᓯᐊᓂᒃ ᒎᑎᑕᖃᓐᖏᓚᖅ, ᑖᓐᓇᑐᐊᖅ ᑭᓯᐊᓂ. 33#ᕼᐆᓯᐊ 6:6.ᐃᓄᒃ ᒎᑎᒥᒃ ᓇᒡᓕᒍᓱᒃᑐᒃᓴᐅᖕᒪᑦ ᐆᒻᒪᑎᒥᓄᑦ ᑕᒤᓐᓄᑦ, ᐃᓱᒪᒥᓄᓪᓗ ᑕᒤᓐᓄᑦ, ᐱᔪᓐᓇᕐᓂᕐᒥᓄᓪᓗ ᑕᒤᓐᓄᑦ, ᐃᓅᖃᑎᒥᓂᒡᓗ ᓇᒡᓕᒍᓱᒃᑐᒃᓴᐅᓪᓗᓂ ᐃᒻᒥᓂᒃ ᓇᒡᓕᒋᓂᕐᒥᑐᑦ, ᑖᒃᑯᐊᒃ ᐱᓪᓚᕆᐅᓂᕐᓴᐅᕘᒃ ᑐᓂᕐᕈᑕᐅᖁᔭᐅᔪᓂᑦ ᐆᒪᔪᕕᓂᕐᓂᒃ ᑐᓂᕐᕈᓯᕐᕕᒥ, ᑐᓂᕐᕈᑕᐅᖁᔭᐅᓯᒪᔪᓂᓪᓗ ᑕᒤᓐᓂᑦ.”
34 #
ᓘᑲᓯ 10:25-28. ᔩᓱᓯᐅᑉ ᖃᐅᔨᒐᒥᐅᒃ ᑭᒡᒍᓯᖓ ᓯᓚᑐᔪᒻᒪᕆᐅᖕᒪᑦ, ᐅᖃᐅᑎᕚ, “ᒎᑎᐅᑉ ᐊᑕᓂᐅᕕᖓᓄᑦ ᐅᖓᓯᒍᓐᓃᕐᐳᑎᑦ.”
ᑕᒪᑐᒪ ᑭᖑᓂᖓᒍᑦ ᑭᓇᒧᓪᓘᓐᓃᑦ ᔩᓱᓯ ᐊᐱᕆᔭᐅᔪᒪᔪᓐᓃᕐᐳᖅ.
ᒥᓮᐊᓯᐅᑉ ᒥᒃᓵᓄᑦ ᐊᐱᖅᑯᓯᖅ
ᒫᑎᐅᓯ 22:41-46; ᓘᑲᓯ 20:41-44
35ᔩᓱᓯ ᑐᒃᓯᐊᕐᕕᒡᔪᐊᕐᒥ ᐊᔪᕆᕐᑐᐃᓪᓗᓂ, ᐅᖃᕐᐳᖅ, “ᓱᖕᒪᓂᒃᑯᐊ ᐱᖁᔭᓂᒃ ᐃᓕᓮᔩᑦ ᐅᖃᕐᐸᑦ ᙭ᔅᑑᓯ ᑍᕕᑎᒧᑦ ᑭᖑᕚᕆᔭᐅᓂᐊᕐᓂᕋᕐᖢᒍ? 36#ᐃᓐᖏᕈᑦ 110:1.ᑍᕕᑎ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐃᓱᒪᑖᕐᑎᑕᐅᓪᓗᓂ ᐅᖃᓚᐅᕐᐳᖅ:
‘ᐊᑕᓂᖅ ᐊᑕᓂᓐᓄᑦ ᐅᖃᕐᐳᖅ, “ᐅᕙᓂ ᑕᓕᕐᐱᓐᓂ ᐃᒃᓯᕙᒋᑦ, ᐊᑭᕋᕐᑐᕐᑎᖕᓂᒃ ᐃᓕᓯᖅᑳᕐᑎᓐᓇᖓ ᐃᑎᒐᕕᑦ ᐊᑖᓄᑦ.”’
37“ᑍᕕᑎᐅᑉ ᐊᑕᓂᕐᒥᓂᒃ ᑍᖕᒪᒍ; ᖃᓄᖅ ᑕᕝᕙ ᙭ᔅᑑᓯ ᑍᕕᑎᐅᑉ ᑭᖑᕚᕆᒐᔭᕐᐸᐅᒃ?”
ᐃᓄᒐᓴᒡᔪᐊᑦ ᐊᒥᓱᑦ ᔩᓱᓯᒥᒃ ᓈᓚᒃᐳᑦ ᖁᕕᐊᓱᒡᓗᑎᒃ.
ᔩᓱᓯᐅᑉ ᐃᒃᐱᒍᓱᑦᓯᐊᖁᔨᓂᖓ ᐱᖁᔭᓂᒃ ᐃᓕᓮᔨᓂᒃ
ᒫᑎᐅᓯ 23:1-36; ᓘᑲᓯ 20:45-47
38ᐊᔪᕆᕐᑐᕐᓗᒋᑦ ᐃᒫᒃ ᐅᖃᕐᐳᖅ, “ᖃᐅᔨᓴᑦᓯᐊᕆᑦᓯ ᐱᖁᔭᓂᒃ ᐃᓕᓮᔨᓂᒃ, ᐱᓱᑲᑕᒍᒪᕙᖕᒪᑕ ᐊᓐᓄᕌᕐᓯᒪᓗᑎᒃ ᑕᑭᔪᓂᒃ ᐅᓕᒡᔪᐊᓂᒃ, ᐃᒃᐱᒋᔭᐅᑦᓯᐊᕐᓗᑎᒃ ᓂᓪᓕᐅᑦᔭᐅᔪᒪᕙᒃᓗᑎᒃ ᓂᐅᕕᕐᕕᖕᓂ. 39ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂ ᐱᐅᓂᕐᐹᓂ ᐃᒃᓯᕙᐅᑕᖃᕈᒪᕗᑦ, ᐅᐱᓐᓇᕐᓂᕐᐹᓂᓗ ᐃᓂᖃᕈᒪᕙᒃᓗᑎᒃ ᓂᕆᕕᒃᔪᐊᕐᑐᖃᕐᑎᓪᓗᒍ. 40ᐅᐃᒡᒐᕐᓃᑦ ᓴᖐᑦᑐᕐᓂᐊᒐᕆᓪᓗᒋᑦ ᐱᖁᑎᖏᓐᓂᒃ ᐋᑎᕆᕙᒃᐳᑦ#12:40 ᐊᕐᓵᕐᓯᕙᒃᐳᑦ ᐊᖏᕐᕋᖏᓐᓂᑦ, ᑭᖑᓂᖓᒍᑦ ᑕᑯᓐᓇᕐᑕᐅᔪᒪᓪᓗᑎᒃ ᑕᑭᔪᓂᒃ ᑐᒃᓯᐅᑎᖃᑦᑕᕐᐰᑦ. ᑍᒤᒻᒪᑦ ᓱᒋᐊᕐᑕᐅᓂᒃᓴᖏᑦ ᐊᖏᓂᒃᓴᐅᔪᒫᕐᐳᑦ.”
ᐅᐃᒡᒐᕐᓂᐅᑉ ᑐᓂᕐᕈᓯᕐᓂᖓ
ᓘᑲᓯ 21:1-4
41ᔩᓱᓯ ᑐᒃᓯᐊᕐᕕᒡᔪᐊᑉ ᑮᓇᐅᔧᕐᕕᖓᑕ ᖃᓂᒋᔮᓄᑦ ᐃᖏᑉᐳᖅ, ᑕᑯᓐᓈᓕᕐᓗᓂ ᐃᓄᖕᓂᒃ ᑮᓇᐅᔧᕐᕕᖕᒧᑦ ᐃᓕᐅᖅᑬᔪᓂᒃ. ᐊᒥᓱᑦ ᐊᔪᕐᓴᖏᑦᑐᑦ ᑐᓂᓯᕗᑦ ᑮᓇᐅᔭᓂᒃ ᐊᒥᓱᓂᒃ. 42ᑭᖑᕐᖓᒍᓪᓕ ᐅᐃᒡᒐᕐᓂᖅ ᐊᔪᕐᓴᕐᑐᖅ ᑕᒪᐅᓐᖓᕆᕗᖅ, ᐃᓕᓯᓪᓗᓂ ᑮᓇᐅᔮᖕᓂᒃ ᒪᕐᕉᖕᓂᒃ ᒥᑭᔪᑯᓘᖕᓂᒃ. 43ᐃᓕᓐᓂᐊᕐᑎᓂ ᕾᖁᓪᓗᒋᑦ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᑖᓐᓇ ᐅᐃᒡᒐᕐᓂᖅ ᐊᔪᕐᓴᕐᑐᖅ ᑐᓂᓯᕗᖅ ᐊᖏᓂᕐᐹᒥᒃ ᐊᓯᓕᒫᒥᓂᑦ. 44ᐊᓯᖏᑦ ᑐᓂᓯᕗᑦ ᐊᑐᕐᓂᐊᖏᑕᒥᖕᓂᒃ ᐊᔪᕐᓴᖏᑦᑑᒐᒥᒃ; ᐅᓇᓕ ᐊᕐᓇᖅ ᐊᔪᕐᓴᕐᑑᓪᓗᓂ ᑐᓂᓯᕗᖅ ᐱᒋᔭᑐᐊᒥᓂᒃ, ᐃᓅᑦᔪᑎᒃᓴᑐᐊᒥᓂᒡᓗ.”
Currently Selected:
ᒫᑯᓯᐅᑉ ᐊᒡᓚᖏᑦ 12: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
