ᒫᑯᓯᐅᑉ ᐊᒡᓚᖏᑦ 14
14
ᔩᓱᓯᐅᑉ ᑐᖁᑕᒃᓴᕈᕐᑎᑕᐅᓇᓱᐊᕐᓂᖓ
ᒫᑎᐅᓯ 26:1-5; ᓘᑲᓯ 22:1-2; ᔪᐊᓇᓯ 11:45-53
1 #
ᒨᓯᓯ ᐂᑉᐸᖏᑦ 12:1-27. ᐅᓪᓘᒃ ᓱᓕ ᒪᕐᕉᑎᓪᓗᒋᒃ ᓇᓪᓕᐅᓐᓂᕐᓯᐅᕐᕕᖏᑕ ᖄᖏᕐᑕᐅᕕᖕᒥᒃ ᑍᔭᐅᔫᑉ ᐳᕙᓪᓚᖅᑯᑎᖃᖏᑦᑐᒥᒡᓗ#14:1 ᐳᑦᔪᓴᐅᑎᖃᖏᑦᑐᓂᒃ ᓂᐊᖂᔭᕐᑐᕐᕕᖏᑕ ᓯᕗᓂᖓᓂ. ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᐱᑦᔪᑎᒃᓴᕐᓯᐅᓕᕐᐳᑦ ᔩᓱᓯ ᖃᐅᔨᔭᐅᖏᓪᓗᑎᒃ ᑎᒍᔪᒪᓪᓗᒍ, ᑐᖁᑦᓱᒪᓪᓗᒍ; 2ᑖᒃᑯᐊ ᐅᖃᖃᑎᒌᒃᐳᑦ, “ᑕᕝᕙᓂ ᓇᓪᓕᐅᓐᓂᕐᓯᐅᕐᕕᖕᒥ ᐱᓇᓱᐊᕆᐊᖃᓐᖏᓚᕗᑦ, ᐃᓄᐃᑦ ᐅᐃᒪᔮᕐᑎᑕᐅᖁᓇᒋᑦ.”
ᔩᓱᓯᐅᑉ ᑯᕕᓯᕕᐅᓂᖓ ᐱᑕᓂᒥ
ᒫᑎᐅᓯ 26:6-13; ᔪᐊᓇᓯ 12:1-8
3 #
ᓘᑲᓯ 7:37,38. ᐱᑕᓂᒦᑎᓪᓗᒍ ᓮᒨᓂᐅᑉ ᐃᒡᓗᖓᓂ ᓯᕗᕐᖓᒍᑦ ᐸᕐᑎᓚᐅᕐᑐᒥ ᑲᑉᐱᐊᒋᔭᐅᔪᒥᒃ, ᑕᕝᕙᓂ ᓂᕆᑎᓪᓗᒍ, ᐊᕐᓇᒥᒃ ᐃᑎᕐᑐᖃᕐᐳᖅ ᑎᐱᑦᓯᐊᕆᒃᓴᐅᒻᒥᒃ ᓇᒃᓴᕐᑐᒥᒃ ᐊᑭᑐᔪᐊᓗᖕᒥᒃ ᐱᕈᕐᓯᐊᓂᑦ ᐱᓯᒪᔪᒥᒃ ᐃᓚᓯᒪᖏᑦᑐᒥᒃ ᐃᒪᓕᖕᒥᒃ, ᐊᕐᓇᐅᑉ ᑎᐱᑦᓯᐊᕆᒃᓴᐅᑦ ᒪᑐᐃᕋᒥᐅᒃ ᔩᓱᓯᐅᑉ ᓂᐊᖁᐊᓄᑦ ᑯᕕᕚ. 4ᐃᓄᐃᑦ ᐃᓚᖏᑦ ᑕᕝᕙᓃᑦᑐᑦ ᐊᑲᐅᒃᓴᕈᓐᓃᕐᐳᑦ ᐃᒻᒥᖕᓄᑦ ᐅᖃᕐᓗᑎᒃ, “ᓱᖕᒪᑦ ᑎᐱᑦᓯᐊᕆᒃᓴᐅᑦ ᐊᑐᕐᑕᐅᕙ ᑕᒪᐅᖕᒊᓐᓇᖅ? 5ᑎᐱᑦᓯᐊᕆᒃᓴᐅᑦ ᓂᐅᕐᕈᑕᐅᒍᓂ ᐊᑭᖃᕋᔭᕐᐳᖅ ᓯᐅᓪᕕᕆᓂᒃ 300 ᐅᖓᑖᓂ, ᑖᒃᑯᐊ ᐃᑲᔫᑕᐅᖔᕐᓗᑎᒃ ᐊᔪᕐᓴᕐᑐᓄᑦ.” ᐊᕐᓇᖅ ᑕᕝᕙᓃᑦᑐᓂᑦ ᓈᒻᒪᒋᔭᐅᖏᒻᒪᕆᓕᕐᐳᖅ.
6ᔩᓱᓯ ᐅᖃᕐᐳᖅ, “ᐊᕐᓇᖅ ᑲᒪᒋᓇᓯᐅᒃ; ᓱᖕᒪᑦ ᐸᒡᕕᓴᒃᐱᓯᐅᒃ? ᐅᓇ ᐅᕙᓐᓄᑦ ᐱᐅᔪᐊᓗᖕᒥᒃ ᐱᓇᓱᐊᕐᑐᖅ. 7#ᒨᓯᓯ ᑕᓪᓕᒪᖏᑦ 15:11.ᑍᒪᓐᖓᓕᒫᖅ ᐊᔪᕐᓴᕐᑐᓂᒃ ᐃᓚᕾᓐᓇᕐᓂᐊᕐᐳᓯ, ᖃᖓᑐᐃᓐᓇᓕᒫᕐᓗ ᐃᑲᔪᕈᒪᑐᐊᕈᑦᓯ ᐃᑲᔪᕈᓐᓇᕐᓂᐊᕐᐸᓯ; ᐅᕙᓐᓂᒡᓕ ᐃᓚᕾᓐᓇᕐᓂᐊᓐᖏᓚᓯ. 8ᐊᕐᓇᖅ ᐱᓇᓱᐊᕐᐳᖅ ᐱᔪᓐᓇᕐᑕᒥᒍᑦ; ᑎᐱᑦᓯᐊᕆᒃᓴᐅᒻᒥᒃ ᑯᕕᓯᕗᖅ ᑎᒥᓐᓄᑦ ᓯᕗᕐᖓᒍᑦ ᐅᐸᓗᖕᒊᔧᓪᓗᓂ ᐃᓗᕕᕐᑕᐅᓂᒃᓴᓐᓄᑦ. 9ᓱᓕᔪᒥᒃ ᐅᖃᐅᑎᕙᑦᓯ, ᓇᓂᓕᒫᖅ ᐅᖃᐅᓰᑦ ᑐᓴᕈᒥᓇᕐᑐᑦ ᐅᖃᐅᓯᐅᓕᕌᖓᑕ ᓯᓚᕐᔪᐊᓕᒫᒥ, ᑖᑦᓱᒪ ᐊᕐᓇᐅᑉ ᐱᓂᐊᕐᓂᕆᔭᖓ ᐅᖃᐅᓯᐅᕙᖕᓂᐊᕐᐳᖅ ᑖᓐᓇ ᐃᖅᑲᐅᒪᔭᐅᓗᓂ.”
ᔫᑕᓯᐅᑉ ᐊᖏᕐᓂᖓ ᔩᓱᓯᒥᒃ ᐱᔭᐅᑎᑦᓯᔪᒪᓪᓗᓂ
ᒫᑎᐅᓯ 26:14-16; ᓘᑲᓯ 22:3-6
10ᑕᕝᕙ ᔫᑕᓯ ᐃᔅᑲᕆᐊᑦ, ᐃᓕᓐᓂᐊᕐᑎᖏᑕ 12 ᐃᓚᖓᑦ, ᐊᓂᓪᓗᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᐊᕐᐳᖅ, ᔩᓱᓯᒥᒃ ᐱᔭᐅᑎᑦᓯᔪᒪᓪᓗᓂ ᑖᒃᑯᓄᖓ. 11ᑖᒃᑯᐊ ᐅᐸᒃᑕᖏᑦ ᖁᕕᐊᓱᒻᒪᕆᒃᐳᑦ ᔫᑕᓯᐅᑉ ᐅᖃᐅᓯᕆᔭᖓᓂᒃ, ᑮᓇᐅᔭᓂᒃ ᑐᓂᓯᓂᐊᕐᓂᕋᕐᓗᑎᒃ ᔫᑕᓯᒧᑦ ᐊᖏᕐᐳᑦ. ᔫᑕᓯ ᕿᓂᓕᕐᐳᖅ ᐱᕕᒃᓴᑦᓯᐊᕆᒐᔭᕐᑕᒥᓂᒃ ᔩᓱᓯ ᐱᔭᐅᑎᑦᓱᒪᓪᓗᒍ ᑖᒃᑯᓄᖓ.
ᔩᓱᓯᐅᑉ ᐃᓕᓐᓂᐊᕐᑎᒥᓂᒃ ᖄᖏᕐᑕᐅᕕᖕᒥ ᓂᕆᖃᑎᖃᕐᓂᖓ
ᒫᑎᐅᓯ 26:17-25; ᓘᑲᓯ 22:7-14,21-23; ᔪᐊᓇᓯ 13:21-30
12ᓇᓪᓕᐅᓐᓂᕐᓯᐅᕐᕕᐅᑉ ᓂᐊᖂᔭᓂᒃ ᐳᕙᓪᓚᖅᑯᑎᖃᖏᑦᑐᓂᒃ#14:12 ᐳᑦᔪᓴᐅᑎᖃᖏᑦᑐᓂᒃ ᓂᕆᕕᐅᑉ ᐅᓪᓗᖏᑕ ᓯᕗᓪᓕᕐᐹᖓᓂ, ᓰᐱᐅᑉ ᓄᕐᕋᖓᑕ ᑐᖁᑕᐅᕕᐊᓂ ᖄᖏᕐᑕᐅᕕᒃ ᐱᑦᔪᑎᒋᓪᓗᒍ, ᐃᓕᓐᓂᐊᕐᑎᖏᑕ ᐊᐱᕆᕚᑦ, “ᓇᓂ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕈᑎᒃᓴᒥᒃ ᐋᖅᑭᒃᓱᐃᔭᕐᑐᖁᕕᑎᒎᑦ ᓂᕆᓂᐊᕐᑕᕐᓂᒃ?”
13ᑕᕝᕙ ᔩᓱᓯ ᐃᓕᓐᓂᐊᕐᑎᒥᓂᒃ ᒪᕐᕉᖕᓂᒃ ᑎᓕᓯᕗᖅ, ᐅᖃᐅᑎᓪᓗᒋᒃ, “ᐃᒡᓗᒐᓴᖕᓄᐊᕆᑦᓯᒃ, ᑕᕝᕗᖓᓗ ᑎᑭᒃᑯᑦᓯᒃ ᐊᖑᒻᒥᒃ ᐃᒪᖃᐅᑎᒥᒃ ᐊᒡᔭᕐᓯᔪᒥᒃ ᑕᑯᓂᐊᕐᐳᓯᒃ; ᑖᓐᓇ ᒪᓕᒃᓯᒃᑯᒃ. 14ᐃᒡᓗᒧᑦ ᐃᑎᕐᕕᒋᔭᖓᓄᑦ, ᐃᒡᓘᑉ ᐃᓄᐊᓄᑦ ᐅᖃᕆᑦᓯᒃ: ‘ᐊᔪᕆᕐᑐᐃᔨ ᐅᖃᕐᒪᑦ, ᓇᐅᒃ ᑍᒪ ᐃᓂᒃᓴᕗᑦ ᐃᓕᓐᓂᐊᕐᑎᒃᑲᓗ ᓂᕆᕕᒋᓂᐊᕐᑕᕗᑦ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᓗᑕ?’ 15ᑕᕝᕙ ᑖᑦᓱᒪ ᐃᒡᓗᖃᕐᑑᑉ ᑕᑯᑎᓐᓂᐊᕐᐹᓯᒃ ᐃᒡᓘᑉ ᖁᓛᓂ ᓂᕈᑐᔪᒥᒃ ᐋᖅᑭᒃᓱᕐᓯᒪᔪᒥᒃ ᓱᓇᑐᐃᓐᓇᖃᑦᓯᐊᕐᑐᒥᒃ; ᑕᕝᕙᓂ ᐊᑐᐃᓐᓇᕈᐃᓂᐊᕐᐳᓯᒃ ᓂᕆᔭᒃᓴᑦᑎᓐᓂᒃ.”
16ᐃᓕᓐᓂᐊᕐᑏᒃ ᐊᓂᒐᒥᒃ ᐃᒡᓗᒐᓴᖕᓄᐊᕐᐳᒃ, ᑕᒤᓐᓂᑦᓯᐊᖅ ᔩᓱᓯᐅᑉ ᐅᖃᐅᓯᕆᖅᑲᐅᔭᖏᓐᓂᒃ ᐊᑐᕐᐳᒃ; ᑕᕝᕙᓂ ᖄᖏᕐᑕᐅᕕᒃ ᐱᑦᔪᑎᒋᓪᓗᒍ ᓂᕆᔭᒃᓴᒥᒃ ᐊᑐᐃᓐᓇᕈᐃᓪᓗᑎᒃ.
17ᐅᓐᓄᖕᒪᑦ ᔩᓱᓯ ᑕᕝᕗᓐᖓᕐᐳᖅ ᐃᓕᓐᓂᐊᕐᑎᓂ 12 ᐃᓚᒋᓪᓗᒋᑦ. 18#ᐃᓐᖏᕈᑦ 41:9.ᑕᕝᕙᓂ ᓂᕆᕕᖕᒥ ᓂᕆᖃᑎᒌᒃᑎᓪᓗᒋᑦ, ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐃᓚᑦᓯᓐᓄᑦ ᐱᔭᐅᑎᑕᐅᓂᐊᕐᐳᖓ, ᑕᕝᕙᓂ ᓂᕆᖃᑎᒋᔭᓐᓄᑦ.”
19ᐃᓕᓐᓂᐊᕐᑎᑦ ᑕᒪᑐᒧᖓ ᖁᕕᐊᓱᒍᓐᓃᕐᐳᑦ, ᔩᓱᓯ ᐊᑐᓂᑦ ᐊᐱᕆᖃᑦᑕᓕᕐᐹᑦ, “ᐅᕙᖓᐅᕚ?”
20ᔩᓱᓯᐅᑉ ᐅᖃᐅᑎᕔᑦ, “ᐃᓚᑦᓯᓐᓂᑦ 12ᓂᑦ, ᓂᐊᖂᔭᕐᑐᕐᑕᒥᓂᒃ ᑖᓐᓇ ᒥᓱᒃᓯᖃᑎᒋᔭᕋ ᑖᓐᓇᐅᓂᐊᕐᐳᖅ. 21ᐃᓅᑉ ᐃᕐᓂᖓ ᑐᖁᓂᐊᕐᐳᖅ ᒎᑎᐅᑉ ᐅᖃᐅᓯᖏᓐᓂ ᐅᖃᕐᓯᒪᔪᑦ ᒪᓕᒡᓗᒋᑦ, ᑲᑉᐱᐊᓐᓇᒦᒃ ᐊᖑᑦ ᑖᓐᓇ ᐃᓅᑉ ᐃᕐᓂᖓᓂᒃ ᐱᔭᐅᑎᑦᓯᓂᐊᕐᑐᖅ! ᐱᐅᓂᕐᓴᐅᒐᔭᓚᐅᕐᐳᖅ ᐃᓄᖕᒧᑦ ᑖᑦᓱᒧᖓ ᑖᓐᓇ ᐃᕐᓂᐊᖑᓚᐅᕐᓯᒪᓐᓂᖏᒃᑯᓂ.”
ᐊᑕᓂᐅᑉ ᐅᓐᓄᒍᒻᒥᑕᕐᓂᖓ
ᒫᑎᐅᓯ 26:26-30; ᓘᑲᓯ 22:14-20; 1 ᑯᕆᓐᑎ 11:23-25
22ᑕᕝᕙᓂ ᓂᕆᓪᓗᑎᒃ, ᓂᐊᖂᔭᖅ ᑎᒍᕚ, ᖁᔭᓕᔭᕇᕋᒥ, ᐊᕕᒃᐹ, ᐃᓕᓐᓂᐊᕐᑎᒥᓄᑦ ᑐᓂᓪᓗᒍ ᐅᖃᕐᓗᓂ, “ᑎᒍᓗᒍ ᓂᕆᓯᐅᒃ, ᑕᕝᕙ ᑎᒥᒐ.”
23ᐃᒥᐅᑎᒥᒃ ᑎᒍᓯᒋᕗᖅ, ᖁᔭᓕᔭᕇᕋᒥ ᑖᒃᑯᓄᖓ ᑐᓂᕚ, ᑕᕝᕙᓐᖓᑦ ᐃᒥᕐᑐᐃᓐᓇᐅᕗᑦ. 24#ᒨᓯᓯ ᐂᑉᐸᖏᑦ 24:8; ᔨᕆᒤᐊ 31:31-34.ᐅᖃᐅᑎᓪᓗᒋᑦ, “ᑕᕝᕙ ᐊᐅᒐ ᐊᖏᕈᑕᐅᓯᒪᔪᖅ, ᑯᕕᔭᐅᔪᖅ ᐊᒥᓱᑦ ᐱᓪᓗᒋᑦ. 25ᓱᓕᔪᒥᒃ ᐅᖃᐅᑎᕙᑦᓯ, ᐸᐅᕐᖎᑦ ᐃᑦᑎᖓᓂᒃ ᐃᒥᕐᓂᐊᕈᓐᓃᕐᐳᖓ ᐅᓪᓗᖅ ᑍᓐᓇ ᓇᓪᓕᐅᑎᖅᑳᕐᑎᓐᓇᒍ ᓄᑖᒥᒃ ᐃᒥᕈᒫᕐᕕᒃᓴᕋ ᒎᑎᐅᑉ ᐊᑕᓂᐅᕕᖓᓂ.”
26ᐱᓯᕐᒧᑦ ᐃᓐᖏᕇᕋᒥᒃ, ᑕᕝᕙᓐᖓ ᐊᓂᕗᑦ ᖃᖅᑲᒧᐊᕐᓗᑎᒃ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖃᓲᓂᒃ ᓇᐹᕐᑐᓕᖕᒧᑦ.
ᔩᓱᓯᐅᑉ ᐅᖃᕐᓂᖓ ᐲᑦᑐᕉᓯᐅᑉ ᖃᐅᔨᒪᖏᓐᓂᕋᕐᓂᒃᓴᖓᓂᒃ
ᒫᑎᐅᓯ 26:31-35; ᓘᑲᓯ 22:31-34; ᔪᐊᓇᓯ 13:36-38
27 #
ᓴᑲᕅᐊ 13:7. ᔩᓱᓯᐅᑉ ᐅᖃᐅᑎᕔᑦ, “ᐊᑕᖏᕐᓗᓯ ᕿᒫᓂᐊᕐᐳᓯ; ᒎᑎᐅᑉ ᐅᖃᐅᓯᖏᑦ ᐅᖃᕐᓯᒪᖕᒪᑕ, ‘ᐰᕐᓯᔨ ᑐᖁᓐᓂᐊᕐᐸᕋ, ᓰᐲᑦ ᐊᕙᒻᒧᐊᒡᓗᑎᒃ ᓯᐊᒻᒪᕐᓂᐊᕐᐳᑦ.’ 28#ᒫᑎᐅᓯ 28:16.ᒪᑭᒍᒪᓕ, ᒐᓕᓕᐊᒧᐊᓛᕐᐳᖓ ᓯᕗᓂᑦᓯᓐᓂ.”
29ᐲᑦᑐᕉᓯᐅᑉ ᐅᖃᐅᑎᕚ, “ᐊᑕᖏᕐᓗᑎᒃ ᑖᒃᑯᐊ ᕿᒤᒐᓗᐊᕐᐸᑕ, ᐅᕙᖓ ᕿᒪᖕᓂᐊᓐᖏᓚᒋᑦ!”
30ᔩᓱᓯᐅᑉ ᐅᖃᐅᑎᕚ, “ᓱᓕᔪᒥᒃ ᐅᖃᐅᑎᕙᒋᑦ, ᐅᓪᓗᒥ, ᐊᒡᓛᑦ ᐅᓐᓄᒥ ᑕᒪᑐᒪᓂ, ᐊᖑᑎᕕᐊᖅ#14:30 ᐊᖑᑎᕕᐊᑦ ᐊᕿᒡᒋᐅᔭᖅ ᐅᓪᓛᒃᑯᑦ ᖃᐅᒻᒪᒋᐊᓯᑐᐊᕐᒪᑦ ᓂᑦᔮᓯᖃᑦᑕᕐᒪᑕ, ᐊᒡᓛᑦ ᑍᑦᓱᒪᓂᐅᑎᓪᓗᒍ ᓯᕿᖑᔭᕆᔭᐅᕙᒃᑐᕕᓃᑦ ᒪᕐᕈᐃᕐᓱᕐᓗᓂ ᓂᓪᓕᓚᐅᕐᑎᓐᓇᒍ, ᐱᖓᓱᐃᕐᑐᕐᓗᑎᑦ ᐅᕙᓐᓂᒃ ᖃᐅᔨᒪᖏᓐᓂᕋᖃᑦᑕᕐᓂᐊᕐᐳᑎᑦ.”
31ᐲᑦᑐᕉᓯᐅᑉ ᐅᖃᐅᑎᕚ, ᓲᓕᓂᕐᓴᐅᓇᓱᒃᓗᓂ, “ᐊᒡᓛᑦ ᑐᖁᖃᑎᒋᔭᕆᐊᖃᕋᓗᐊᕈᒃᑭᑦ, ᖃᐅᔨᒪᖏᓐᓂᕋᕐᓂᐊᓐᖏᓚᒋᑦ.”
ᐃᓕᓐᓂᐊᕐᑎᐅᖃᑎᓕᒫᖏᓪᓗ ᑍᒫᒃ ᐅᖃᕆᕗᑦ.
ᔩᓱᓯᐅᑉ ᑐᒃᓯᐊᕐᓂᖓ ᒋᑦᓯᒪᓂᒥ
ᒫᑎᐅᓯ 26:36-46; ᓘᑲᓯ 22:39-46
32ᒋᑦᓯᒪᓂᒧᐊᕋᒥᒃ; ᐃᓕᓐᓂᐊᕐᑎᒥᓄᑦ ᐅᖃᕐᐳᖅ, “ᑕᒫᓂ ᐃᒃᓯᕙᒋᑦᓯ ᑐᒃᓯᐊᕆᐊᕐᑐᕐᑎᓪᓗᖓ.” 33ᐲᑦᑐᕉᓯ ᔧᒥᓯᓗ, ᔪᐊᓇᓯᓗ, ᑖᒃᑯᐊᑐᐊᖅ ᒪᓕᒃᑎᑉᐰᑦ, ᔩᓱᓯ ᐅᖃᒤᒃᓴᕐᓂᕐᒧᑦ ᐊᒃᓱᕈᕐᓇᕐᑐᒦᓕᕐᐳᖅ.#14:33ᑲᑉᐱᐊᓱᖕᓂᖅ ᐅᖁᒤᒃᓴᕐᓂᕐᓗ ᓯᕘᕋᓂᕐᓗ ᑖᒃᑯᐊ ᑲᑎᑦᓱᒋᑦ ᔩᓱᓯᐅᑉ ᐊᑐᓚᐅᕐᐰᑦ ᑕᕝᕙᓂ 34ᑖᒃᑯᓄᖓ ᐅᖃᕐᖢᓂ, “ᐊᒃᓱᐊᓗᒃ ᕿᒃᓵᕕᒡᔪᐊᕐᓂᕐᒦᓕᕋᒪ, ᐊᒡᓛᑦ ᑐᖁᑐᐃᓐᓇᕆᐊᖃᕐᑑᔮᓕᕋᒪ; ᑕᕝᕙᓃᑐᐃᓐᓇᕆᑦᓯ, ᐃᖅᑯᒪᓗᓯ.”
35ᔩᓱᓯ ᐅᖓᒻᒧᑦ ᐱᓱᒃᑲᓐᓂᕐᓗᓂ, ᓄᓇᒧᑦ ᐹᒻᒪᒃᓗᓂ ᑐᒃᓯᐊᕐᐳᖅ, ᐊᔪᕐᓇᖏᑉᐸᑦ ᐊᓐᓂᐊᕐᑎᑕᐅᓂᐅᑉ ᓇᓪᓕᐅᓐᓂᖓ ᐊᑐᕈᒪᓇᓂᐅᒃ. 36ᐃᒫᒃ ᑐᒃᓯᐊᕐᐳᖅ, “ᐋᐸ ᐊᑖᑖᒃ, ᓱᓇᓕᒫᓂᒃ ᐃᓕᖕᓄᑦ ᐊᔪᕐᓇᕐᑐᖃᖏᒻᒪᑦ; ᐃᒥᐅᑦ ᐅᓇ ᐲᕐᑎᓚᐅᕈᒃ ᐅᕙᓐᓂᑦ; ᐱᔪᒪᔭᕋᐅᖏᑦᑐᕐᓕ, ᐱᔪᒪᔧᓪᓕ ᐱᓕ.”
37ᐃᓚᒥᓄᑦ ᐅᑎᕋᒥ ᓯᓂᒃᑐᑦ ᑕᑯᕔᑦ; ᐲᑦᑐᕉᓯᒧᑦ ᐅᖃᕐᐳᖅ, “ᓮᒨᓃ, ᓯᓂᒃᐲᑦ? ᐃᑲᕐᕋᕐᒥᒃ ᐊᑕᐅᓯᕐᒥᒃ ᐃᖅᑯᒪᔪᓐᓇᓐᖏᓚᑏᑦ? 38ᐃᖅᑯᒪᒋᑦᓯ ᑐᒃᓯᐊᕐᓗᓯ ᐱᐅᓐᖏᑐᒧᑦ ᐱᔪᒥᓵᕐᑕᐅᓂᕐᒧᑦ ᑎᑭᖁᓇᓯ; ᐊᓂᕐᓂᖅ ᐱᔪᒪᑦᓯᐊᕋᓗᐊᕐᐳᖅ, ᑎᒥᓕ ᓴᓐᖐᑉᐳᖅ.”
39ᔩᓱᓯ ᕿᒪᕉᑎᒃᑲᓐᓂᕆᕗᖅ ᑐᒃᓯᐊᕐᓗᓂ, ᐅᖃᐅᓰᑦ ᑖᒃᑯᐊᑦᓮᓐᓁᑦ ᐊᑐᕐᓗᒋᑦ. 40ᐅᑎᕐᒥᒐᒥ ᐅᐸᒃᐰᑦ ᓯᓂᒃᑐᑦ, ᐅᐃᕐᖓᕐᓂᕐᒧᑦ ᐅᐃᓴᔪᓐᓁᓪᓕᕗᑦ; ᑕᒪᓐᓇ ᖃᓄᖅ ᐅᖃᕆᐊᒃᓴᖓ ᓇᓗᕚᑦ.
41ᐱᖓᔪᖓᓐᓂᒃ ᑐᒃᓯᐊᕆᐊᕐᑐᑲᓐᓂᓚᐅᕐᓗᓂ ᐅᑎᕐᒥᒐᒥ, ᐅᖃᐅᑎᕔᑦ, “ᓱᓕ ᓯᓂᒃᐱᓰ ᑕᕾᕐᓯᕐᓗᓯ?, ᓈᒻᒪᒃᓯᕗᖅ! ᐃᑲᕐᕋᖅ ᓇᓪᓕᐅᑎᕗᖅ; ᐃᓅᑉ ᐃᕐᓂᖓ ᐱᔭᐅᒃᑲᕐᑕᐅᓯᕗᖅ ᐊᔪᕐᑐᓕᔪᑦ ᐱᔪᓐᓇᕐᓂᖏᓐᓄᑦ. 42ᒪᑭᓪᓗᓯ, ᐱᓱᓕᕐᑕ. ᑕᑯᒋᑦ, ᐊᖑᑦ ᐅᕙᓐᓂᒃ ᐱᔭᐅᒃᑬᔪᖅ ᑎᑭᓕᕐᐳᖅ.”
ᔩᓱᓯᐅᑉ ᑎᒍᔭᐅᓂᖓ
ᒫᑎᐅᓯ 26:47-56; ᓘᑲᓯ 22:47-53; ᔪᐊᓇᓯ 18:3-12
43ᑕᕝᕔᓐᓇᖅ, ᓱᓕ ᑍᒫᒃ ᐅᖃᕐᑎᓪᓗᒍ, ᔫᑕᓯ, ᐃᓕᓐᓂᐊᕐᑎᖏᑕ 12 ᐃᓚᖓᑦ, ᑎᑭᑉᐳᖅ; ᐃᓚᖃᕐᓗᓂ ᐃᓄᒐᓴᒡᔪᐊᓂᒃ ᓴᕕᒡᔪᐊᓕᔭᕐᑐᓂᒃ ᐊᓇᐅᑕᓕᔭᕐᑐᓂᒡᓗ, ᑎᓕᔭᐅᓯᒪᔪᓂᒃ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ, ᐱᖁᔭᓂᒃ ᐃᓕᓮᔨᓄᑦ, ᔫᑎᓪᓗ ᐊᖓᔪᖅᑳᖏᓐᓄᑦ. 44ᑖᑦᓱᒪ ᐱᔭᐅᒃᑬᓂᐊᕐᑑᑉ ᐃᓄᒐᓴᒡᔪᐊᑦ ᓇᓗᓁᒃᑯᑕᒃᓴᒥᒃ ᐅᖃᐅᑎᓯᒪᕔᑦ ᐃᒫᒃ, “ᑖᓐᓇ ᑯᓂᖕᓂᐊᕐᑕᕋ ᑖᓐᓇᐅᓂᐊᕐᐳᖅ ᐱᔪᒪᔭᓯ; ᑖᓐᓇ ᑎᒍᓂᐊᕐᐸᓯ ᑕᕝᕙᓐᖓᓪᓗ ᐊᐅᓪᓚᕈᑎᓗᒍ.”
45ᔫᑕᓯ ᑕᕝᕗᖓ ᑎᑭᓐᓇᒥ, ᔩᓱᓯᒧᑦ ᐅᐸᒍᑎᑲᐅᑎᒋᕗᖅ ᐅᖃᕐᓗᓂ, “ᕌᐰ!” ᑯᓂᒃᐹ. 46ᑕᕝᕙ ᑖᒃᑯᐊ ᔩᓱᓯ ᐅᐸᒃᐹᑦ ᑎᒍᓪᓗᒍ. 47ᑕᕝᕙᓃᑦᑐᓪᓕ ᐃᓚᖓᑦ ᓴᕕᒡᔪᐊᒥᓂᒃ ᐊᒧᓯᓪᓗᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᖓᑦᑕ ᐱᔨᖓ ᐅᓕᒪᕐᓗᒍ ᓯᐅᑎᖓ ᓇᑲᑉᐹ. 48ᔩᓱᓯᐅᑉ ᐅᖃᐅᑎᕔᑦ, “ᐅᕙᓐᓂᒃ ᑎᒍᓯᔭᕐᑐᕐᐱᓰ ᐱᕋᔭᒃᑎᐅᔮᕐᑎᓪᓗᖓ ᓴᕕᒡᔪᐊᓕᔭᕐᓗᓯ ᐊᓇᐅᑦᑎᔭᕐᖢᓯᓗ? 49#ᓘᑲᓯ 19:47; 21:37.ᖃᐅᑕᒫᑦ ᐃᓚᒋᖃᑦᑕᓚᐅᕐᐸᑦᓯ ᐊᔪᕆᕐᑐᐃᑎᓪᓗᖓ ᑐᒃᓯᐊᕐᕕᒃᔪᐊᕐᒥ, ᑎᒍᓚᐅᓐᖏᓚᑦᓯᓐᖓ. ᒎᑎᐅᓪᓕ ᐅᖃᐅᓯᖏᑦ ᓇᓚᐅᑦᓯᔭᕆᐊᖃᕐᐳᑦ.”
50ᐃᓕᓐᓂᐊᕐᑎᓕᒫᑦ ᕿᒫᕗᑦ ᔩᓱᓯᒥᒃ ᕿᒤᓪᓗᑎᒃ.
51ᐃᓅᓱᒃᑐᒧᑦ ᔩᓱᓯ ᒪᓕᒃᑕᐅᓚᐅᕐᐳᖅ, ᖃᓪᓗᓈᕐᑕᒥᒃ ᓵᑦᑐᒥᒃ ᐅᓕᒃᓯᒪᑐᐃᓐᓇᕐᑐᒥᒃ. ᑖᓐᓇ ᑎᒍᖃᓯᐅᑎᓇᓱᐊᕐᐹᑦ, 52ᐅᓕᒋᔭᓂ ᖃᓪᓗᓈᕐᑕᖅ ᓵᑦᑐᖅ ᕿᒪᒃᓗᓂᐅᒃ ᐊᓐᓄᕌᖃᕋᓂ ᕿᒫᕗᖅ.
ᔩᓱᓯᐅᑉ ᐃᖅᑲᕐᑐᐃᔨᕐᔪᐊᑦ ᓵᖓᓃᓐᓂᖓ
ᒫᑎᐅᓯ 26:57-68; ᓘᑲᓯ 22:54-55,63-71; ᔪᐊᓇᓯ 18:13-14,19-24
53ᔩᓱᓯ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓄᐊᕈᑎᕚᑦ; ᑕᕝᕙᓂ ᑲᑎᒪᖕᒪᑕ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᓕᒫᖏᑦ, ᔫᑎᓪᓗ ᐊᖓᔪᖅᑳᖏᑦ, ᐱᖁᔭᓂᒡᓗ ᐃᓕᓮᔩᑦ. 54ᐲᑦᑐᕉᓯ ᒪᓕᓚᐅᕐᐳᖅ ᐅᖓᓯᒋᔮᓂᓪᓗᓂ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐃᒡᓗᖓᑕ ᐊᓃᕐᕕᖓᓄᑦ ᑎᑭᓪᓗᓂ; ᑕᕝᕙᓂ ᐃᒃᓯᕚᖃᑕᐅᓕᕐᐳᖅ ᖃᐅᔨᓴᕐᑎᓄᑦ, ᑕᕝᕙᓂ ᐃᑯᒪᐅᑉ ᓴᓂᐊᓂ ᐅᖅᑰᓇᓱᐊᖃᑕᐅᕗᖅ. 55ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐃᖅᑲᕐᑐᐃᔨᓕᒫᖏᓪᓗ ᔩᓱᓯᐅᑉ ᑐᖁᑕᐅᑦᔪᑎᒃᓴᖓᓂᒃ ᓇᓗᓁᕐᑕᐅᑎᑦᓯᓇᓱᐊᕐᐳᑦ; ᑭᓯᐊᓂ ᑐᖁᑕᐅᑦᔪᑎᒃᓴᒥᒃ ᓇᓂᓯᓚᐅᓐᖏᓚᑦ. 56ᐊᒥᓱᑦ ᓴᒡᓗᓪᓗᑎᒃ ᔩᓱᓯᒥᒃ ᐅᖃᐅᓯᖃᓚᐅᕐᐳᑦ, ᑭᓯᐊᓂᓕ ᐅᓂᒃᑲᐅᓯᕆᔭᖏᑦ ᐊᖏᖃᑎᒌᓚᐅᓐᖏᓚᑦ.
57ᐊᖑᑎᑦ ᐃᓚᖏᑦ ᓂᑯᕕᒃᐳᑦ, ᓴᒡᓗᓪᓗᑎᒃ ᐅᖃᕐᐳᑦ, 58#ᔪᐊᓇᓯ 2:19.“ᐅᓇ ᐅᖃᕐᑎᓪᓗᒍ ᑐᓴᓚᐅᕐᑕᕗᑦ, ‘ᑐᒃᓯᐊᕐᕕᒡᔪᐊᖅ ᓯᖁᒥᒍᒪᕙᕋ ᐊᒡᒐᓄᑦ ᓴᓇᔭᐅᓯᒪᔪᖅ, ᐅᓪᓗᐃᑦ ᐱᖓᓱᑦ ᓈᒃᐸᑕ ᐊᓯᐊᓂᒃ ᓴᓇᓂᐊᕆᕗᖓ, ᐊᒡᒐᓄᑦ ᓴᓇᔭᐅᓯᒪᖏᑦᑐᒥᒃ.’” 59ᐊᒡᓛᑦ ᑖᒃᑯᓄᖓ ᐅᖃᐅᓯᕆᔭᒥᖕᓄᑦ ᐊᖏᖃᑎᒌᒃᑎᑦᓯᔪᓐᓇᓐᖏᓚᑦ.
60ᑕᕝᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ ᓂᑯᕕᓪᓗᓂ ᑖᒃᑯᐊ ᓵᖏᓐᓂ ᔩᓱᓯ ᐊᐱᕆᕚ, “ᑭᒡᒍᓯᒃᓴᖃᓐᖏᓚᑏᑦ?#14:60 ᑭᐅᑦᔪᑎᒃᓴᖃᓐᖏᓚᑏᑦ ᐃᓕᖕᓂᒃ ᐅᖃᐅᓯᖃᕐᓂᒋᓐᓄᑦ?”
61ᔩᓱᓯ ᓂᓪᓕᓐᖏᓚᖅ ᑭᐅᓇᓂᓗ. ᓱᓕ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐊᐱᕆᒃᑲᓐᓂᕐᐹ, “᙭ᔅᑑᓯᐅᕖᑦ, ᒎᑎᐅᑉ ᓂᕐᑐᕐᓇᕐᑑᑉ ᐃᕐᓂᖓ?”
62 #
ᑖᓂᐊᓕ 7:13. ᔩᓱᓯᐅᑉ ᑭᐅᕚ, “ᐅᕙᖓᐅᕗᖓ; ᑕᒪᑦᓯ ᑕᑯᔪᒫᕐᐳᓯ ᐃᓅᑉ ᐃᕐᓂᖓ ᐊᔪᒐᖃᖏᑦᑑᑉ ᑕᓕᕐᐱᐊᓂ ᐃᒃᓯᕙᑎᓪᓗᒍ, ᕿᓚᖕᒥᓪᓗ ᐊᖅᑲᓕᕐᑎᓪᓗᒍ#14:62 ᑎᑭᓕᕐᑎᓪᓗᒍ ᓄᕗᔭᑎᒍᑦ!”
63ᑕᕝᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐊᓐᓄᕌᓂ ᐊᓕᒃᐰᑦ ᐅᖃᕐᓗᓂ, “ᓱᖕᒪᑦ ᓱᓕ ᖃᐅᔨᓇᓱᒋᐊᖃᕐᐱᑖ? 64#ᒨᓯᓯ ᐱᖓᔪᖏᑦ 24:16.ᑐᓴᕋᑖᕐᐸᓯ ᒎᑎᒥᒃ ᐅᖃᕐᓂᕐᓘᑎᖃᕐᑎᓪᓗᒍ! ᖃᓄᖅ ᐃᓱᒪᖃᓕᕐᐱᓰ?” ᑖᒃᑯᐊᓕᒫᑦ ᔩᓱᓯᒥᒃ ᐸᓯᔭᒃᓴᐅᓂᕅᕗᑦ ᑐᖁᑕᒃᓴᐅᖁᓪᓗᒍ.
65ᐃᓚᖏᑕ ᔩᓱᓯ ᑎᕝᕗᓗᒃᐹᑦ,#14:65 ᓯᑉᕗᐊᕐᐹᑦ ᒪᑐᐊᕐᓗᒍ ᑎᒡᓗᖃᑦᑕᓕᕐᐹᑦ, ᐅᖃᐅᑎᓪᓗᒍ, “ᓇᓚᐅᑦᓯᓇᓱᓕᕆᑦ ᑭᓇᒧᑦ ᑎᒡᓗᒃᑕᐅᖕᒪᖔᕐᐱᑦ!” ᖃᐅᔨᓴᕐᑏᑦ ᔩᓱᓯ ᑎᒍᓪᓗᒍ ᑎᒡᓗᖃᑦᑕᓕᕐᐹᑦ.
ᐲᑦᑐᕉᓯᐅᑉ ᔩᓱᓯᒥᒃ ᖃᐅᔨᒪᖏᓐᓂᕋᕐᓂᖓ
ᒫᑎᐅᓯ 26:69-75; ᓘᑲᓯ 22:56-62; ᔪᐊᓇᓯ 18:15-18,25-27
66ᐲᑦᑐᕉᓯ ᓱᓕ ᐃᒡᓘᑉ ᐊᓃᕐᕕᐊᓃᑎᓪᓗᒍ, ᐊᕐᓇᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐱᔨᖏᑕ ᐃᓚᖓᑦ ᑕᒪᐅᓐᖓᕐᐳᖅ. 67ᑖᑦᓱᒪ ᐲᑦᑐᕉᓯ ᑕᑯᒐᒥᐅᒃ ᐃᑯᒪᔫᑉ ᓴᓂᐊᓂ ᐅᖅᑰᓯᑦᑎᕐᑎᓪᓗᒍ, ᑕᑯᓐᓇᓕᕋᒥᐅᒃ ᐅᖃᕐᐳᖅ, “ᐃᕝᕕᑦᑕᐅᖅ ᔩᓱᓯ ᓈᓴᕇᑎᒥᐅᖅ ᐃᓚᒋᓚᐅᕐᐸᑦ.”
68ᐲᑦᑐᕉᓯ ᓴᒡᓗᓪᓗᓂ ᐅᖃᕐᐳᖅ, “ᖃᐅᔨᒪᓐᖏᓚᕋ ᐅᖃᐅᓯᕆᔭᑎᓪᓘᓐᓃᑦ ᑐᑭᓯᓐᖏᓚᒃᑲ,” ᑕᕝᕙᓐᖓᑦ ᐊᓂᓕᕐᑎᓪᓗᒍ, ᐊᖑᑎᕕᐊᖅ ᓂᓪᓕᕐᐳᖅ.#14:68 ᐊᒡᓚᒃᓯᒪᔪᑐᖃᕐᓂ ᐃᓚᖏᓐᓂ ᐱᑕᖃᖏᑦᑐᖅ “ᐊᖑᑎᕕᐊᖅ ᓂᓪᓕᕐᐳᖅ.”
69ᐱᔨᐅᑉ ᐊᕐᓇᐅᑉ, ᑕᕝᕙᓂ ᐲᑦᑐᕉᓯ ᑕᑯᒐᒥᐅᒃ, ᐅᖃᒃᑲᓐᓂᓕᕐᐳᖅ ᑕᒫᓃᑦᑐᓄᑦ, “ᐅᓇ ᐊᖑᑦ ᑍᒃᑯᓄᖓ ᐃᓚᒋᔭᐅᖕᒥᔪᖅ.” 70ᐲᑦᑐᕉᓯᓕ ᓱᓕ ᓴᒡᓗᒃᑲᓐᓂᕆᕗᖅ.
ᐊᑯᓂᐅᑎᓐᓇᒍ ᓱᓕ ᑕᒫᓃᑦᑐᓄᑦ ᐲᑦᑐᕉᓯ ᐅᖃᐅᑦᔭᐅᕗᖅ, “ᓇᓗᓇᕈᓐᓃᕐᐳᑎᑦ ᑖᒃᑯᓄᖓ ᐃᓚᒋᔭᐅᒐᕕᑦ; ᒐᓕᓕᐊᒥᐅᖑᒐᕕᑦ.”
71ᑕᕝᕙ ᐲᑦᑐᕉᓯ ᐅᖃᕐᓂᕐᓗᓕᕐᐳᖅ, ᐅᖃᕕᒃᓗᓂᓗ ᐊᖏᒻᒪᕆᒃᐳᖅ, “ᐊᖑᑦ ᐅᖃᐅᓯᕆᔭᓯ ᑖᓐᓇ ᖃᐅᔨᒪᓐᖏᓚᕋ.”
72ᑕᕝᕔᓐᓇᖅ ᐊᖑᑎᕕᐊᖅ ᓂᓪᓕᕐᐳᖅ ᐂᑉᐸᖓᓂᒃ, ᐲᑦᑐᕉᓯ ᑕᕝᕙ ᐃᖅᑬᕗᖅ ᔩᓱᓯᐅᑉ ᐅᖃᐅᑎᓚᐅᕐᒪᒍ, “ᐊᖑᑎᕕᐊᖅ ᒪᕐᕈᐃᕐᑐᕐᓗᓂ ᓂᓪᓕᖅᑳᕐᑎᓐᓇᒍ, ᐱᖓᓱᐃᕐᑐᕐᓗᑎᑦ ᖃᐅᔨᒪᖏᓐᓂᕋᓛᕐᐸᕐᒪ.” ᐲᑦᑐᕉᓯ ᐃᓗᐃᓪᓕᒐᒥ ᕿᐊᕗᖅ.
Currently Selected:
ᒫᑯᓯᐅᑉ ᐊᒡᓚᖏᑦ 14: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
