ᐃᔅᑕᐅᑉ ᐊᒡᓚᖏᑦ 6
6
ᐊᖓᔪᖅᑳᕐᔪᐊᑉ ᐅᐱᓐᓇᕐᓯᑎᑦᓯᓂᖓ ᒧᐊᑎᑬᒥᒃ
1ᑕᒪᑐᒪᓂᓕ ᐅᓐᓄᐊᒥ ᐊᖓᔪᖅᑳᕐᔪᐊᖅ ᓯᓂᒍᓐᓁᓪᓕᕗᖅ; ᑕᕝᕙ ᑎᓕᓯᕗᖅ ᐊᖓᔪᖅᑳᕐᔪᐊᑉ ᐱᕙᓪᓕᐊᔪᖁᑎᖏᓐᓂ ᑎᑎᕋᕐᓯᒪᔪᑦ ᑕᕝᕗᓐᖓᕐᑕᐅᓗᑎᒃ ᐊᑐᐊᕐᑕᐅᖁᓪᓗᒋᑦ; ᑕᕝᕙ ᐊᑐᐊᕐᑕᐅᓕᕐᐳᑦ ᐊᖓᔪᖅᑳᕐᔪᐊᕐᒧᑦ. 2ᑕᕝᕙᓂᓗ ᑎᑎᕋᕐᓯᒪᔪᓂᒃ ᓇᓂᓯᔪᖃᕐᐳᖅ ᒧᐊᑎᑬᑉ ᐅᖃᐅᓯᖃᕐᓂᕆᓚᐅᕐᑕᖓᓂᒃ ᐊᖓᔪᖅᑳᕐᔪᐊᑉ ᐃᒡᓗᒥᓂ ᐱᔨᒋᔭᖏᒃ, ᐱᒡᑖᓇ ᑎᕆᔅᓗ, ᐊᖓᔪᖅᑳᕐᔪᐊᑉ ᐃᒡᓗᖓᓂ ᐃᑎᕐᑕᕐᕕᖕᒥ ᑲᒪᔨᐅᕙᒃᑑᒃ, ᐊᖓᔪᖅᑳᕐᔪᐊᕐᒥᒃ ᐊᕼᐊᓱᐃᕋᔅᒥᒃ ᑐᖁᑦᓯᔪᒪᓚᐅᕐᓂᖏᖕᓂᒃ. 3ᑕᕝᕙ ᐊᖓᔪᖅᑳᕐᔪᐊᖅ ᐊᐱᕆᕗᖅ, “ᖃᓄᖅ ᒧᐊᑎᑬ ᐅᐱᒋᔭᐅᓯᒪᕚ ᖃᓄᕐᓗ ᓇᓗᓁᒃᑯᓯᕐᑕᐅᓯᒪᕚ ᑕᒪᑐᒧᖓ?”
ᐱᔨᖏᑦ ᑭᐅᕗᑦ, “ᐱᓇᓱᐊᕐᕕᐅᓯᒪᓐᖏᓚᖅ ᑕᒪᑐᒧᖓ.”
4ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑭᓇᒥᒃ ᐅᕙᓃᑦᑐᖃᕐᐹ?”
ᕼᐂᒪᓂᓕ ᑕᕝᕗᖓ ᓈᒻᒪᓈᕐᓗᓂ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐊᕙᓗᐊᓄᑦ ᐃᑎᓕᕐᐳᖅ; ᑕᕝᕗᓐᖓᓚᕿᕗᖅ ᐊᖓᔪᖅᑳᕐᔪᐊᕐᒥᒃ ᐊᐱᕆᔭᕐᑐᕈᒪᓪᓗᓂ ᒧᐊᑎᑬᒥᒃ ᕿᒥᑕᐅᑎᑦᓯᖁᓪᓗᒍ ᕿᒥᑦᓯᕕᖕᒧᑦ ᐊᑐᐃᓐᓇᕈᕐᑎᓯᒪᔭᒥᓄᑦ. 5ᐊᖓᔪᖅᑳᕐᔪᐊᑉ ᐱᔨᖏᑕ ᑭᐅᕚᑦ, “ᑕᕝᕙ ᕼᐂᒪᓂ ᑕᕝᕙᓃᑦᑐᖅ, ᐃᑎᑐᐃᓐᓇᕆᐊᖃᓕᕐᑐᖅ.”
ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐃᑎᕐᑎᑕᐅᓚᐅᕐᓕ.”
6ᑕᕝᕙ ᕼᐂᒪᓂ ᐃᑎᕐᐳᖅ, ᐊᖓᔪᖅᑳᕐᔪᐊᓪᓗ ᐊᐱᕆᕚ, “ᐊᖑᑦ ᖃᓄᐃᓕᐅᑕᐅᔪᓐᓇᕋᔭᕐᐹ ᐊᖓᔪᖅᑳᕐᔪᐊᑉ ᖁᕕᐊᒋᓗᓂᐅᒃ ᐅᐱᓐᓇᕐᓯᑎᒐᔭᕐᑕᖓ?”
ᕼᐂᒪᓂᓕ ᐆᒻᒪᑎᒥᒍᑦ ᐃᓱᒪᓕᕐᐳᖅ, “ᐊᖓᔪᖅᑳᕐᔪᐊᖅ ᐅᐱᒋᔭᒃᓴᖃᕐᓂᕐᓴᐅᔪᓐᓇᕐᐹ ᐊᓯᓐᓂᒃ.”
7ᕼᐂᒪᓂᐅᓪᓗ ᐊᖓᔪᖅᑳᕐᔪᐊᖅ ᑭᐅᕚ, “ᐊᖑᑦ ᖁᕕᐊᒋᓗᒍ ᐅᐱᓐᓇᕐᓯᑎᑦᓱᒪᔧᑦ, 8ᐅᓕᒡᔪᐊᕐᓂᒃ ᐊᑐᕐᓯᒪᔭᕐᓂᒃ ᐊᑎᑎᑕᐅᔪᒃᓴᐅᕗᖅ, ᕿᒻᒥᕐᔪᐊᕐᓂᓗ ᐃᑭᒪᕕᒋᓯᒪᔭᕐᓂ ᐃᑭᒪᓗᓂ, ᐊᑎᑎᑕᐅᓗᓂᓗ ᐊᖓᔪᖅᑳᕐᔪᐊᑉ ᓂᐊᖂᑎᖓᓂᒃ; 9ᐊᓐᓄᕌᕐᓗ ᕿᒻᒥᕐᔪᐊᕐᓗ ᐂᔭᐅᔪᒃᓴᐅᕗᑦ ᐊᖓᔪᖅᑳᕐᔪᐊᑉ ᐊᖓᔪᖅᑳᖑᓂᕐᐹᖁᑎᖏᑕ ᐃᓚᖓᓐᓄᑦ; ᑖᑦᓱᒧᖓ ᐊᓐᓄᕌᒥᒃ ᐊᑎᓯᑎᑕᐅᖁᓪᓗᒍ ᕿᒻᒥᕐᔪᐊᒧᓪᓗ ᐃᑭᑎᓪᓗᓂᐅᒃ ᑖᓐᓇ ᐊᖓᔪᖅᑳᕐᔪᐊᑉ ᐅᐱᓐᓇᕐᓯᑎᑦᓱᒪᔭᖓ, ᕿᒻᒥᕐᔪᐊᒥ ᐃᑭᒪᑎᓪᓗᒍ ᑕᓯᒍᐊᕐᓂᐊᕐᒪᒍ ᐃᒡᓗᒐᓮᑦ ᐊᖅᑯᓯᓂᖏᑎᒍᑦ, ᓯᕗᓂᖓᓂᓗ ᕾᒐᓛᕐᑐᒃᓴᐅᕗᖅ, ‘ᑍᒫᒃ ᑕᕝᕙ ᐊᖓᔪᖅᑳᕐᔪᐊᑉ ᓇᓪᓕᐊᑦ ᐊᖑᑦ ᐅᐱᒋᔪᒪᔭᓂ ᐅᐱᒋᖃᑦᑕᕐᓂᐊᕐᐰᑦ!’”
10ᑕᕝᕙ ᐊᖓᔪᖅᑳᕐᔪᐊᖅ ᕼᐂᒪᓂᒧᑦ ᐅᖃᕐᐳᖅ: “ᑐᐊᕕᕐᓗᑎᑦ ᐅᓕᒡᔪᐊᕋ ᕿᒻᒥᕐᔪᐊᕋᓗ ᐂᓕᒃᑭᑦ, ᑍᒫᒃ ᐅᖃᓚᐅᕋᕕᑦ, ᒧᐊᑎᑬᓗ ᔫᑎᐅᔪᖅ ᑍᒤᓕᐅᕐᕕᒋᓕᕈᒃ, ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᐊᓂ ᐃᒃᓯᕙᔪᖅ. ᐅᖃᐅᓯᕆᔭᑎᑦ ᐊᑐᑦᓯᐊᕐᓂᐊᕐᐸᑎᑦ ᓇᓪᓕᐊᓐᓂᒡᓘᓐᓃᑦ ᐊᑐᓐᖏᑕᖃᖏᓪᓗᑎᑦ.”
11ᑕᕝᕙ ᕼᐂᒪᓂᐅᑉ ᐅᓕᒡᔪᐊᖅ ᕿᒻᒥᕐᔪᐊᕐᓗ ᐂᓪᓗᓂᒋᑦ, ᒧᐊᑎᑬᒧᑦ ᐊᑎᑎᑉᐰᑦ ᕿᒻᒥᕐᔪᐊᖓᓗ ᑕᓯᒍᐊᓕᕐᐹ ᐃᒡᓗᒐᓮᑦ ᐊᖅᑯᓯᓂᖏᑎᒍᑦ, ᕾᒐᓛᕐᓗᓂᓗ ᑖᑦᓱᒪ ᓯᕗᓂᖓᓂ, “ᑍᒫᒃ ᑕᕝᕙ ᐊᖓᔪᖅᑳᕐᔪᐊᑉ ᓇᓪᓕᐊᑦ ᐊᖑᑦ ᐅᐱᒋᔪᒪᔭᓂ ᐅᐱᒋᖃᑦᑕᕐᓂᐊᕐᐰᑦ!”
12ᑭᖑᓂᖓᒍᑦ ᒧᐊᑎᑬ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᐊᑕ ᓴᓂᐊᓄᑦ ᐅᑎᓚᐅᕆᕗᖅ. ᕼᐂᒪᓂᓕ ᑐᐊᕕᕐᓗᓂ ᐊᖏᕐᕋᕐᐳᖅ, ᕿᒃᓵᕕᒡᔪᐊᕐᓗᓂ ᑮᓇᓂ ᒪᑐᓯᒪᓪᓗᓂᐅᒃ. 13ᕼᐂᒪᓂᓕ ᐅᓂᒃᑳᕐᒪᑦ ᓄᓕᐊᒥᓄᑦ ᔨᕆᓯᒧᑦ ᐃᓚᓐᓇᕆᔭᒥᓄᓪᓗ ᑕᒪᒃᑯᓂᖓ ᖃᓄᐃᓕᐅᖅᑲᐅᓂᕐᒥᓂᒃ, ᐃᓕᓯᒪᔪᖁᑎᖏᑕ ᓄᓕᐊᖓᑕᓗ ᔨᕆᓯᐅᑉ ᐅᖃᐅᑎᕚᑦ, “ᒧᐊᑎᑬᒧᑦ, ᔫᑎᒧᑦ ᓵᓚᐅᕙᓪᓕᐊᓕᕈᕕᑦ, ᓵᓚᒋᔪᓐᓇᕐᓂᐊᕈᓐᓁᕐᐸᑦ, ᓇᓗᓇᖏᑦᑐᒥᒡᓕ ᓵᓚᐅᖔᕐᓂᐊᓕᕐᐳᑎᑦ ᑖᑦᓱᒧᖓ.”
ᕼᐂᒪᓂᐅᑉ ᑐᖁᑕᐅᓂᖓ
14ᓱᓕᓕ ᐅᖃᓪᓚᒃᑎᓪᓗᒋᑦ ᑖᑦᓱᒧᖓ, ᐊᖓᔪᖅᑳᕐᔪᐊᑉ ᐱᔨᖏᑦ ᕾᕗᑦ, ᑐᐊᕕᕐᓗᑎᒃ ᕼᐂᒪᓂᒥᒃ ᐂᒃᓯᓕᕐᑐᑦ ᓂᕆᔭᕐᑐᖃᑕᐅᔭᕆᐊᖃᕐᒪᑦ ᐃᔅᑕᐅᑉ ᓂᕆᕕᒡᔪᐊᕐᑎᑦᓯᓂᖓᓄᑦ.
Currently Selected:
ᐃᔅᑕᐅᑉ ᐊᒡᓚᖏᑦ 6: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
