ᐃᔅᑕᐅᑉ ᐊᒡᓚᖏᑦ 7
7
1ᑕᕝᕙ ᐊᖓᔪᖅᑳᕐᔪᐊᖅ ᕼᐂᒪᓂᓗ ᓂᕆᖃᑎᖃᕆᐊᕐᑐᕐᐴᒃ ᐃᔅᑕᕐᒥᒃ. 2ᑕᕝᕙ ᐂᐸᖓᓂᒃ ᓂᕆᖃᑎᒌᓕᕋᒥᒃ ᐃᒥᕐᓗᑎᒡᓗ ᕔᓂᒥᒃ, ᐊᖓᔪᖅᑳᕐᔪᐊᖅ ᐃᔅᑕᕐᒧᑦ ᐅᖃᒃᑲᓐᓂᕐᐳᖅ, “ᓱᓇᒥᒃ ᐱᔪᒪᕖᑦ ᑯᐃᓐ ᐊᓯᑖ? ᑐᓂᓯᕕᒋᓂᐊᕐᐸᒋᑦ ᐱᔪᒪᔭᕐᓂᒃ. ᐱᔪᒪᓪᓚᕆᒃᑕᖃᕈᕕᑦ, ᐊᒡᓛᑦ ᐊᖓᔪᖅᑳᐅᕕᖕᒪ ᐊᕝᕙᓪᓗᐊᖓᓂᒃ ᐱᔪᒪᑐᐊᕈᕕᑦ ᐱᑎᑦᓱᓐᓇᕐᐸᒋᑦ!”
3ᑕᕝᕙ ᑯᐃᓐ ᐃᔅᑕᕐ ᑭᐅᓪᓗᓂ ᐅᖃᓕᕐᐳᖅ, “ᖁᕕᐊᒋᒍᕕᖓ, ᐊᖓᔪᖅᑳᕐᔪᐊᖅ, ᖃᓄᐃᒋᖏᒃᑯᕕᖓᓗ ᐊᖓᔪᖅᑳᕐᔪᐊᖅ, ᐃᓅᓯᕋ ᓴᐳᑎᔭᐅᖁᓪᓗᒍ ᕿᓄᕗᖓ, ᐃᓅᖃᑎᒪᓗ ᐃᓅᓯᖏᑦ ᓴᐳᑎᔭᐅᖁᓪᓗᒋᑦ ᕿᓄᑦᔪᑎᒋᕙᒃᑲ. 4ᐃᓅᖃᑎᒃᑲᓗ ᐅᕙᖓᓗ ᓂᐅᕐᕈᑎᒋᔭᐅᓯᒪᒐᑦᑕ, ᐊᓯᕈᕐᑕᐅᖁᓪᓗᑕ, ᑐᖁᑕᐅᖁᓪᓗᑕ, ᓄᖑᑕᐅᑦᓯᐊᖁᓪᓗᑕᓗ. ᓂᐅᕐᕈᑎᒋᔭᐅᓂᐊᕈᑦᑕᓕ ᐊᖑᑎᓪᓗ ᐊᕐᓁᓪᓗ ᓯᐊᓛᒃᓴᐅᖁᓪᓗᑕ, ᓂᓪᓕᕋᔭᓐᖏᓚᖓ, ᑕᒪᓐᓇ ᐅᖁᒤᑦᑐᒦᑎᑕᐅᓂᕗᑦ ᐊᑦᔨᐅᑎᑕᒃᓴᐅᖏᒻᒪᑦ ᐊᖓᔪᖅᑳᕐᔪᐊᑉ ᐊᓯᐅᔨᒐᔭᕐᓂᖓᓄᑦ.”
5ᑕᕝᕙ ᐊᖓᔪᖅᑳᕐᔪᐊᖅ ᐊᕼᐊᓱᐃᕋᔅ ᐊᐱᕆᕗᖅ ᑯᐃᓐ ᐃᔅᑕᕐᒧᑦ, “ᑭᓇᐅᕚ ᑍᓐᓇ, ᓇᓃᑉᐸᓗ, ᑍᒫᒃ ᐱᓇᓱᐊᕈᒪᓗᓂ ᐃᓱᒪᖃᕐᑐᖅ?”
6ᐃᔅᑕᐅᑉ ᑭᐅᕚ, “ᑐᖁᕅᓇᓱᒃᑐᖅ ᐊᑭᕋᕐᑐᕐᑎᓗ ᐅᓇᐅᕗᖅ ᐱᐅᖏᑦᑐᐊᓗᖕᒥᒃ ᐱᓇᓱᐊᕐᑐᖅ ᕼᐂᒪᓂ!”
ᑕᕝᕙ ᕼᐂᒪᓂ ᑲᑉᐱᐊᓱᒃᑐᐊᓘᓕᕐᐳᖅ ᐊᖓᔪᖅᑳᕐᔪᐊᑉ ᑯᐃᓪᓗ ᓵᖓᓂ. 7ᑕᕝᕙ ᐊᖓᔪᖅᑳᕐᔪᐊᖅ ᓂᓐᖓᕕᒡᔪᐊᕐᓗᓂ ᓂᑯᕕᑉᐳᖅ ᓂᕆᕕᒡᔪᐊᕐᕕᖕᒥᑦ ᐊᖓᔪᖅᑳᕐᔪᐊᒃᑯᕕᐅᓪᓗ ᐱᕈᕐᓰᕕᖓᓄᐊᕐᓗᓂ; ᕼᐂᒪᓂᓕ ᐃᔅᑕᕐᒧᑦ ᕿᓄᕗᖅ ᐃᓅᓯᕐᒥᓂ ᓴᐳᑎᔭᐅᔪᒪᓪᓗᓂ, ᖃᐅᔨᒐᒥ ᐊᖓᔪᖅᑳᕐᔪᐊᖅ ᑖᑦᓱᒧᖓ ᓈᒻᒪᖏᑦᑐᒥᒃ ᐃᓱᒪᖃᓕᕐᒪᑦ. 8ᐊᖓᔪᖅᑳᕐᔪᐊᕐᓗ ᐅᑎᕐᐳᖅ ᐊᖓᔪᖅᑳᕐᔪᐊᒃᑯᕕᐅᑉ ᐱᕈᕐᓰᕕᖓᓂᑦ ᑕᕝᕗᖓ ᓂᕆᕕᒋᔭᒥᖕᓄᑦ, ᕼᐂᒪᓂᓕ ᐹᒻᒪᖓᕗᖅ ᐃᔅᑕᐅᑉ ᐹᒻᒪᖓᕕᒋᔭᖓᑕ ᑭᒡᓕᖓᓂ; ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐅᓈ ᐊᒡᓛᑦ ᑯᐃᖕᒥᒃ ᐊᕐᓇᕐᓂᐊᕋᓱᒃᑐᖅ ᐊᖏᕐᕋᕐᓯᒪᑎᓪᓗᖓ?”
ᐊᖓᔪᖅᑳᕐᔪᐊᖅ ᑍᒫᒃ ᐅᖃᑐᐊᕐᒪᑦ, ᕼᐂᒪᓂᐅᑉ ᑮᓇᖓ ᐅᓕᒃᑕᐅᕗᖅ. 9ᕼᐊᕐᐴᓇᓕ ᐊᖓᔪᖅᑳᕐᔪᐊᑉ ᐱᔨᖓᑦ ᐊᕐᓇᕐᓂᐊᕈᓐᓁᓪᓕᑎᑕᐅᓯᒪᔪᖅ ᑕᕝᕙᓂ ᓇᔫᑎᔪᖅ ᐊᖓᔪᖅᑳᕐᔪᐊᕐᒧᑦ ᐅᖃᕐᐳᖅ, “ᑕᑯᒋᑦ! ᕿᒥᑦᓯᕕᒃᑕᖃᕐᐳᖅ, 75ᓂᒃ ᐃᑎᒐᖕᓂᒃ ᐳᕐᑐᓂᓕᖕᒥᒃ, ᕼᐂᒪᓂᐅᑉ ᓴᓇᔭᐅᖁᓚᐅᕐᑕᖓᓂᒃ ᐃᒡᓗᖓᑕ ᓴᓂᐊᓂ ᒧᐊᑎᑬᒥᒃ ᕿᒥᑦᓯᕕᒋᔪᒪᓪᓗᓂᐅᒃ, ᑖᑦᓱᒥᖓ ᐊᖓᔪᖅᑳᕐᔪᐊᑉ ᐃᓅᓯᖓᓂᒃ ᓴᐳᑦᔨᓚᐅᕐᑐᒥᒃ, ᖃᐅᔨᑎᑦᓯᓚᐅᕐᓂᕐᒥᓄᑦ!”
ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑕᕝᕙᓂ ᕼᐂᒪᓂ ᕿᒥᑕᐅᓕᕐᓕ!”
10ᑕᕝᕙᓂ ᕼᐂᒪᓂ ᕿᒥᑕᐅᕗᖅ ᕿᒥᑦᓯᕕᖕᒥ ᓴᓇᔭᐅᑎᓚᐅᕐᑕᒥᓂ ᒧᐊᑎᑬ ᐱᓪᓗᒍ. ᑕᕝᕙ ᐊᖓᔪᖅᑳᕐᔪᐊᖅ ᓮᒻᒪᕐᐳᖅ.
Currently Selected:
ᐃᔅᑕᐅᑉ ᐊᒡᓚᖏᑦ 7: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
