ᐃᔅᑕᐅᑉ ᐊᒡᓚᖏᑦ 5
5
ᐃᔅᑕᐅᑉ ᓂᕆᔭᕐᑐᖁᔨᓂᖓ ᐊᖓᔪᖅᑳᕐᔪᐊᕐᒥᒃ ᕼᐂᒪᓂᒥᒡᓗ
1ᑕᕝᕙ ᐅᓪᓗᐃᑦ ᓂᕆᑦᑍᓕᓂᖏᑕ ᐱᖓᔪᒋᓕᕐᑕᖓᓂ ᐃᔅᑕᕐ ᐊᖓᔪᖅᑳᕐᓯᐅᑎᓂᒃ ᐊᓐᓄᕌᓂᒃ ᐊᑎᕗᖅ ᐊᖓᔪᖅᑳᕐᔪᐊᓪᓗ ᐃᒡᓗᖓᑕ ᐊᕙᓗᐊᑕ ᐃᓗᐊᓄᑦ ᐃᑎᕐᓗᓂ, ᐊᖓᔪᖅᑳᕐᔪᐊᑉ ᐃᒡᓗᖓᑕ ᐊᑭᓪᓗᐊᖓᓃᑦᑐᒧᑦ, ᐊᖓᔪᖅᑳᕐᔪᐊᕐᓕ ᐃᒃᓯᕙᐅᑕᕐᔪᐊᒥᓂ ᐃᒃᓯᕙᓚᐅᕐᐳᖅ ᐊᖓᔪᖅᑳᐅᕕᖕᒥᓂ, ᐃᑎᕐᑕᕐᕕᖓᓄᑦ ᓵᓐᖓᓪᓗᓂ. 2ᐊᖓᔪᖅᑳᕐᔪᐊᓪᓕ ᑯᐃᓐ ᐃᔅᑕᕐ ᑕᑯᒐᒥᐅᒃ ᐃᑎᕐᑕᕐᕕᐅᑉ ᓯᓚᑖᓂ ᓇᖏᕐᑐᖅ, ᖁᕕᐊᒋᓚᐅᕐᐹ, ᑎᒃᑯᐊᕐᓯᑦᔪᑎᒥᒡᓗ ᒎᓗᒥᒃ ᐃᓴᒡᕕᒋᕚ ᑎᒍᒥᐊᕐᑕᒥᓂᒃ. ᐃᔅᑕᕐᓗ ᕾᓪᓗᓂ ᐊᖓᔪᖅᑳᕐᔪᐊᑉ ᑎᒃᑯᐊᕐᓯᑦᔪᑎᖓᑕ ᓄᕗᐊ ᐊᒃᑐᕐᐹ. 3ᑕᕝᕙ ᐊᖓᔪᖅᑳᕐᔪᐊᖅ ᐊᐱᕆᓕᕐᐳᖅ ᐃᔅᑕᕐᒧᑦ, “ᑯᐃᓐ ᐊᓯᑖ ᓱᔪᒪᒐᕕᑦ? ᐱᔪᒪᔭᕐᓂᒃ ᐅᖃᐅᑎᓚᐅᓐᖓ, ᐱᔪᒪᔭᕐᓂᒃ ᑐᓂᓯᕕᒋᓂᐊᕐᐸᒋᑦ ᐊᒡᓛᑦ ᐊᖓᔪᖅᑲᐅᕕᖕᒪ ᐊᕝᕙᓪᓗᐊᖓᓂᒃ ᑐᓂᓯᕕᒋᔪᓐᓇᕐᐸᒋᑦ.”
4ᑕᕝᕙ ᐃᔅᑕᐅᑉ ᑭᐅᕚ, “ᐊᖓᔪᖅᑳᕐᔪᐊᖅ ᖃᓄᐃᒃᓴᖏᒃᑯᕕᑦ, ᕼᐂᒪᓂᓗ ᐃᓕᑦᓯᒃ ᓂᕆᔭᕐᑐᖁᕙᑦᓯᒃ ᐃᓕᑦᓯᖕᓄᑦ ᓂᕆᕕᒡᔪᐊᒃᓴᓕᐅᕐᓯᒪᒐᒪ.”
5ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑐᐊᕕᕐᓗᓯ ᕼᐂᒪᓂ ᕾᖁᔭᐅᓕ, ᐃᔅᑕᐅᑉ ᐱᖁᔨᓂᖓ ᒪᓕᒡᓗᒍ.” ᑕᕝᕙ ᐊᖓᔪᖅᑳᕐᔪᐊᖅ ᕼᐂᒪᓂᓗ ᓂᕆᔭᕐᑐᕐᐴᒃ ᐃᔅᑕᐅᑉ ᓂᕆᕕᒃᔪᐊᒃᓴᓕᐊᖓᓄᑦ. 6ᓂᕆᕕᒃᔪᐊᕐᕕᖕᒦᓕᕐᓗᑎᒃ ᐃᒥᓕᕋᒥᒃ ᕔᓂᒥᒃ, ᐊᖓᔪᖅᑳᕐᔪᐊᖅ ᐃᔅᑕᕐᒧᑦ ᐅᖃᕐᐳᖅ, “ᓱᓇᒥᒃ ᑐᒃᓯᕋᕈᒪᕖᑦ? ᑐᓂᓯᕕᒋᓂᐊᕐᐸᒋᑦ ᐱᔪᒪᔭᕐᓂᒃ. ᐱᔪᒪᓪᓚᕆᒃᑕᖃᕈᕕᑦ, ᐊᒡᓛᑦ ᐊᖓᔪᖅᑲᐅᕕᖕᒪ ᐊᕝᕙᓪᓗᐊᖓᓂᒃ ᐱᔪᒪᑐᐊᕈᕕᑦ ᑐᓂᓯᕕᒋᔪᓐᓇᕐᐸᒋᑦ.”
7ᑕᕝᕙ ᐃᔅᑕᕐ ᐅᖃᕐᐳᖅ, “ᑐᒃᓯᕋᕈᑎᒐ ᐱᔪᒪᔭᕋᓗ ᐃᒤᑦᑑᕗᖅ: 8ᐊᖓᔪᖅᑳᕐᔪᐊᖅ ᖁᕕᐊᒋᒍᕕᖓ, ᑐᒃᓯᕋᕈᒪᓂᕋᓗ ᐊᖓᔪᖅᑳᕐᔪᐊᑉ ᖃᓄᐃᒋᖏᑉᐸᒍ ᐱᔪᒪᔭᓐᓂᒡᓗ ᑐᓂᓯᕕᒋᓂᐊᕈᓂᖓ, ᑕᕝᕙ ᐊᖓᔪᖅᑳᕐᔪᐊᖅ ᕼᐂᒪᓂᓗ ᕾᖁᑲᓐᓂᕐᐸᑦᓯᒃ ᓂᕆᕕᒃᔪᐊᒃᓴᓕᐅᕐᓂᐊᕐᑕᓐᓄᑦ ᐃᓕᑦᓯᒃ ᐱᑦᔪᑎᒋᓗᓯᒃ, ᑕᕝᕙ ᖃᐅᒃᐸᑦ ᑕᕝᕗᖓ ᕾᒍᑦᓯᒃ ᐊᖓᔪᖅᑳᕐᔪᐊᑉ ᐅᖃᐅᓯᕆᓯᒪᔭᖓ ᒪᓕᒡᓗᒍ ᐱᔪᒪᔭᓐᓂᒃ ᐅᖃᐅᑎᓛᕐᐸᑦᓯᒃ.”
ᕼᐂᒪᓂᐅᑉ ᑐᖁᑦᓯᔪᒪᓂᖓ ᒧᐊᑎᑬᒥᒃ
9ᕼᐂᒪᓂᓕ ᑕᕝᕙᓐᖓᑦ ᐊᓂᓕᕐᐳᖅ ᖁᕕᐊᓱᒡᓗᓂ ᐆᒻᒪᑎᒥᒍᓪᓗ ᓮᒪᑦᓯᐊᕐᓗᓂ; ᒧᐊᑎᑬᓕ ᑕᑯᒐᒥᐅᒃ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᐊᑕ ᓴᓂᐊᓃᑦᑐᖅ, ᓂᑯᕕᖏᒻᒪᑦ ᐅᑯᖏᒻᒪᓪᓘᓐᓃᑦ ᕼᐂᒪᓂᒧᑦ, ᑕᕝᕙ ᕼᐂᒪᓂ ᒧᐊᑎᑬᒧᑦ ᓂᓐᖓᕕᒡᔪᐊᕐᐳᖅ. 10ᓮᒻᒪᕐᔫᒥᓇᓱᐊᕋᒥᓕ, ᕼᐂᒪᓐ ᐊᖏᕐᕋᕐᐳᖅ; ᑕᕝᕙ ᐃᓚᓐᓇᕆᔭᓂ ᐃᒡᓗᒥᓄᑦ ᕾᖁᕔᑦ ᓄᓕᐊᓂᓗ ᔨᕆᓯ ᐃᓚᒋᔭᐅᖁᕚ. 11ᑕᕝᕙ ᕼᐂᒪᓂᐅᑉ ᐱᐅᔪᕆᓪᓗᓂ ᐅᖃᕐᕕᒋᓕᕐᐰᑦ ᐊᔪᕐᓴᖏᑦᑐᕐᔪᐊᖑᓂᕐᒥᓂᒃ, ᕿᑐᕐᖓᖏᑕᓗ ᐅᓄᕐᓂᖏᓐᓂᒃ, ᐊᖓᔪᖅᑳᕐᔪᐊᒧᓪᓗ ᐊᖓᔪᖅᑳᕈᕐᑎᑕᐅᓯᒪᓂᕐᒥᓂᒃ, ᐊᖓᔪᖅᑳᕐᔪᐊᓪᓗ ᐊᖓᔪᖅᑳᖁᑎᒋᔭᖏᓐᓂᑦ ᐱᔨᒋᔭᖏᓐᓂᓪᓗ ᐱᓪᓚᕆᐅᑎᑕᐅᓂᕐᓴᐅᓂᕐᒥᓂᒃ. 12ᐊᒻᒪ ᕼᐂᒪᓂ ᐅᖃᒃᑲᓐᓂᕐᐳᖅ, “ᐊᒻᒪᑦᑕᐅᖅ ᑯᐃᓐ ᐃᔅᑕᕐ ᒪᑯᓂᖓᑐᐃᓐᓇᖅ ᕾᖁᔨᓇᓂ ᐅᕙᓐᓂᒡᓗ ᐊᖓᔪᖅᑳᕐᔪᐊᒥᒡᓗ ᓂᕆᕕᒃᔪᐊᕆᐊᕐᑐᖁᔨᖅᑲᐅᕗᖅ ᐅᐸᓗᖎᕐᓯᒪᔭᒥᓂᒃ; ᖃᐅᒃᐸᑦᑕᐅᖅ ᓱᓕ ᐅᕙᓐᓂᒃ ᕾᒋᐊᓪᓚᖁᔨᒋᕗᖅ, ᐊᖓᔪᖅᑳᕐᔪᐊᕐᒥᒃ ᐂᑉᐸᑲᕐᓗᖓ. 13ᑕᒪᒃᑯᐊᓕ ᐱᕚᓪᓕᕈᑎᒋᔪᓐᓁᖃᑦᑕᕐᐸᒃᑲ, ᑍᓐᓇ ᒧᐊᑎᑬ ᔫᑎᐅᔪᖅ ᑕᑯᑐᐊᕌᖓᒃᑯ ᐊᖓᔪᖅᑳᕐᔪᐊᑉ ᐃᒡᓗᖓᑕ ᓯᕗᕌᓂ ᐃᒃᓯᕙᔪᖅ.”
14ᑕᕝᕙ ᓄᓕᐊᖓᑕ ᔨᕆᓯᐅᑉ ᐃᓚᓐᓇᕆᔭᓕᒫᖏᑕᓗ ᐅᖃᐅᑎᕚᑦ, “ᕿᒥᑦᓯᕕᒃᓴᒥᒃ ᓴᓇᔭᐅᑎᑦᓯᓚᐅᕆᑦ 75ᓂᒃ ᐃᑎᒐᖕᓂᒃ ᐳᕐᑐᓂᖃᕐᑎᓪᓗᒍ, ᐅᓪᓛᒃᑯᑦ ᐊᖓᔪᖅᑳᕐᔪᐊᖅ ᐅᖃᐅᑎᓂᐊᕋᕕᐅᒃ ᒧᐊᑎᑬ ᑕᕝᕙᓂ ᕿᒥᑕᐅᖁᓗᒍ; ᑕᕝᕙ ᖁᕕᐊᓱᑦᓯᐊᕐᓗᑎᑦ ᐊᖓᔪᖅᑳᕐᔪᐊᖅ ᓂᕆᕕᒡᔪᐊᕆᐊᕐᑐᖃᑎᒋᓛᕐᐸᑦ.” ᑕᒪᓐᓇ ᕼᐂᒪᓂᐅᑉ ᖁᕕᐊᒋᒐᒥᐅᒃ; ᑕᕝᕙ ᕿᒥᑦᓯᕕᒃᓴᒥᒃ ᓴᓇᔭᐅᑎᑦᓯᓕᕐᐳᖅ.
Currently Selected:
ᐃᔅᑕᐅᑉ ᐊᒡᓚᖏᑦ 5: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
