San Marcos 6

Jesus yachachin Nazaretpi

(Mt 13.53-58; Lc 4.16-30)

1Chay llaktamanta, Jesuska rirka kikin allpanma, disipulunkunapas katirkakuna. 2Paktashpan samana punchaka, kallarirka yachachinata chay tantarina wasipi. Uyashpankuna Jesusta, achka tapunakurkakuna mancharishpa: “¿Maymantataya kay runaka yachan tukuyta? ¿Ima yachaytashi kuy tukushka? ¿Imashnataya makinkunawa kay mana atipaypa ruranakunata ruran? 3¿Manachu kayka karpintiru, Mariapa wawan, Santiagopa, Josepa, Judaspa, Simonpa wawkin, paninkunapas ñukanchiwa kawsanahun?”

Chasna riksishkankunarayku mana munarkakunachu payta kasunata.

4Chaypi Jesuska paykunata rimarka: “Shuk profetata shuk llaktakunapi kasunahun; ashwan kikin llaktanpi, kikin wasinpipas manami ayllunkunaka kasunahunchu”.

5Jesuska mana atiparkachu chaypi ruranata nima shuk mana atipaypa ruranata, masna unkushkakunallata makinta paykunapi churashpan anpirka. 6Payka yapa llakirirka mana payta kirishkankunarayku. Chaymanta kuchu llaktakunapi purirka Yayan Diospa shiminta yachachinanpa.

Jesuska chunka ishkay disipulunkunata kacharka

(Mt 10.5-15; Lc 9.1-6)

7Jesuska kayarka chay chunka ishkay disipulunkunata. Kallarirka kachanata ishkay ishkayta. Kurka poderta mana ali espiritukunata llukshichinankunapa. 8Paykunata kamachirka: “Ñanpita rihushpaykichi nima imata apaychichu, nima bulsaykichita, nima mikunaykichita, nima kullkikichita. Munashpaykichika shuk tulata apaychi urkitarinaykichipa. 9Chakikichipi churarishkaykichillawa, shuk churarinata churarishkaykichillawa riychi. Ama ashwan shuk churarinaykichitaka apankichichu”.

10Chaymanta rimarka: “Kankuna paktashpaykichi shuk wasipi, kipariychi chayllapi llukshinaykichikama chaymanta. 11Maypipas kankunata mana kayashpankunaka nima uyanayashpankunaka, anchuriychi chaymanta chawsiychi pulputa chakikichimanta, chasna ruraychi imamantami kastigay tukunkakuna”. [Shutipata rimaykichi, parisina punchakuna paktarishpan, parisinaka Sodomarayku Gomorraraykupas kashkanmanta ashwan sinchi parisinami kanka chay llaktaraykuka.]

12Chay chunka ishkay disipulunkuna llukshishpankuna rirkakuna rimashpa runakunata millaypa kawsanankunata sakinankunapa. 13Chaymantapas llukshichirkakuna achka supaykunata. Asiytiwa kakushpankuna achka unkushkakunata anpirkakuna.

Bawtisak Juan wañushkanmanta

(Mt 14.1-12; Lc 9.7-9)

14Jesuspa rurashkankunaka uyarihuspan yapa alita, chay apu Herodeska Jesusmanta yachashpan rimarka: “¡Bawtisak Juanmi kawsarishka wañushkanmanta! ¡Chayraykumi paypi tiyan chay poderkunaka!”

15Shukkunaka nirkakuna: “Eliasmi”. Shukkunaka ashwan nirkakuna: “Shuk profetami, mana kashpaka shuk paykunamanta”.

16Herodeska chayta uyashpan rimarka: “Kayka Juanmi, maykantami ñuka umanta kacharkani pitinankunapa. ¡Kunanka kawsarimushka wañushkanmanta!”

17Wawkin Felipepa warmin Herodiasta Herodeska warmiyashka karka. Chayrayku Herodes kikin kacharka apinankunapa Juanta karselpi kadenawa watanankunapa. 18Juanka rimarka Herodesta: “Manami alichu warmiyanaykipa wawkikipa warminta”. 19Chayrayku Herodiaska payta piñaripayan, munapayarka wañuchinata; chasna munashpanpas mana atipapayarkachu. 20Herodeska manchapayarka Juanta, yachaskanrayku kashkanta shuk kari kuska ucha illa. Juanka rimashpanpas mana uyashkashina kiparipayan chaymanta alita uyapayan kushilla chaymanta kishpichipayan.

21Paktarirka shuk puncha. Wawayarishkan punchapi, Herodeska kayarka mikunankunapa paypa kamachik runankunata, tukuy kapitankunatapas, chaymanta tukuy runa balik Galileamanta. 22Chaypi Herodiaspa shipas wawanka fiestapi llukshishpan baylarka, yapata kushichirka Herodesta chaymanta paywa kahukkunatapas mesapi. Chay apuka rimarka chay warmi shipasta: “Tapuway imatachari munanki, ñukami kushkayki”.

23Achka rikushkankunapi rimarka: “Ñuka kushkayki tukuy tapuwashkaykita, ¡chaymanta tapuwashpaykika chawpita kamachinaynimantapas!”

24Chaypi chay shipaska llukshishpan mamanta tapukrirka:

“¿Imatashi tapuynima?”

Mamanka aynirka:

“¡Tapuy Bawtisak Juanpa umanta!”

25Chay ratulla chay shipaska yaykurka kallpashpa rimakrinanpa chay aputa: “Munani kunalla kuwanaykipa, shuk kallanapi, Bawtisak Juanpa umanta”.

26Chayta uyashpan atun apuka yapa llakirirka, rimashkanrayku chay achka runakunapi chaymantapas maykankunami paywa pakta mesapi tiyahurkakuna, chayrayku mana munarkachu llullachinata. 27Chayraykulla, chay atun apuka kamachirka shuk suntalu kuyrakta apamunanpa Bautisak Juanpa umanta. 28Chay suntaluka karselpi rishpan pitikrirka umanta, aparka shuk kallanapi, kurka chay shipasta. Chay shipasña kurka mamanta.

29Chayta yachashpankuna Juanpa disipulunkunaka, rirkakuna tapukrinankunapa aychanta panpanankunapa.

Jesuska pichka waranka runakunata kararka

(Mt 14.13-21; Lc 9.10-17; Jn 6.1-14)

30Apostulninkunaka tantarishpankuna Jesuswa kwintarkakuna tukuy maykantami rurashkakuna yachachishkankunatapas.

31Chaypi Jesuska rimarka: “Shamuychi ñukawa kankuna sapallaykichi, shuk chunllama, samaychi shukratu”. Yapa achka runakuna shamupayan ripayanahun, paykunarayku mana tiyapayanchu nima tinpu mikunankunapa.

32Chasna rirkakuna sapallankuna shuk botipi shuk parti chunllama. 33Ashwan maykankunami rikurkakuna rihukkunata riksishpankuna katirkakuna chakillawa chay llaktakunamanta. Paktarkakuna nimara paykuna paktahushpankunara, chaypi tantarirkakuna paywa. 34Jesuska llukshishpan botimanta rikurka achka runakunata, paykunata rikushpan llakirirka, rikushpan obeha amu illakunatashina, kallarirka yachachinata achka imakunata. 35Tinpuka pasashpan chishiña karka, chaypi paypa disipulunkunaka kayllayashpankuna payta rimarkakuna: “Ña chishi kahunchi, kaypika mana tiyanchu nima ima. 36Rimay kay runakunata, rinankunapa atun llaktakunama uchilla llaktakunamapas kay kuchullapi, rantinankunapa imallatapas mikunankunapa”.

37Jesuska aynirka: “Kuychi kankuna mikunankunapa”.

Paykunaka aynirkakuna: “¿Munankichu rinanchipa rantinapa panta kunanchipa mikunankunapa? ¡Chaypa chaninka kamami ishkay pachak punchata tarawashpa ganashka kullki!”

38Jesuska rimarka: “Rikukriychi masna pantaya tiyan kankunapa”.

Rikukrishpankuna rimakrirkakuna: “Pichka panstu, ishkay challwastullami tiyan”.

39Chaymanta Jesuska kamachirka disipulunkunata rimanankunapa runakunata tiyarinankunapa kiwa awapi shuk muntun shuk muntun. 40Paykunaka chasna rurarkakuna, tantachirkakuna shuk pachak runata chaymanta pichka chunka runakunata. 41Jesuska apishpan chay pichka pankunata, ishkay challwakunatapas, awa siluma rikushpan mañarka. Chay washa pakishpan pankunata kurka disipulunkunata kunankunapa chay runakunata, chaymantapas kurka tukuyta chay ishkay challwakunatapas. 42Tukuy mikurkakuna saksanankunakama, 43mikushkankunawasha chunka ishkay tasata untachirkakuna pan challwawa chapu puchurishkata. 44Chay mikushka runakunaka karkakuna pichka warankashina karikuna.

Jesuska yaku awata purirka

(Mt 14.22-33; Jn 6.16-21)

45Chaymanta Jesuska disipulunkunata rimarka botipi uraykunanakunapa, chaypi paykunata nirka: ñawpahuychi chay kucha chinpama, Betsaidama, ñuka chay achka runakunata rimanaynikama kutinankunapa. 46Rimamushkan washa rirka sachama mañananpa. 47Ña tutayashpanña, chay botika kahurka chawpi yakupi, Jesuska kahurka allpapi sapallan; 48ña pakarihushkanpi rirka paykunama purishpa yaku awata, rikurka parisishpa kawihukkunata wayraka puntankunamanta shamuhushkanrayku. Puntankunata payka pasahukshina tukurka. 49Paykunaka, rikushpankuna purihushkanta yaku awapi, yuyarirkakuna supaychari nishpa kallarirkakuna kaparinata, 50tukuy paykuna rikurkakuna mancharirkakuna. Chayratulla payka rimarka paykunata: “¡Sinchikuriychi! ¡Ñukami kahuni! ¡Ama manchaychichu!” 51Uraykushpan botipi paykunawa, wayraka pasarirka. Paykunaka kahurkakuna yapa mancharishka.

52Ashwan, shunkunkunaka kahurkakuna sinchiyarishka, manara asirtahurkakunachu chay pankunamanta.

Jesuska achka unkushkakunata anpirka Genesaret allpapi

(Mt 14.34-36)

53Chay kuchata chinpashkankuna washa, Genesaret allpa mayanpi paktashpankuna chaypi llutarikrirkakuna. 54Chayratulla uraykuhushpankuna botimanta, runakunaka riksirkakuna Jesusta. 55Chasna purihushkankunapi tukuy muyukta, yachashpankuna maypimi kahurka Jesuska kallarirkakuna apanata tukuy partimanta unkushkakunata llanchamankunapi. 56Maypichari pay yaykupayarka, kachu uchilla llakta, atun llaktakunapas chaymanta maypipas purihushkanpi, ñanpikunapi unkushkakunata churapayanahun, paykunaka sinchi shimiwa tapupayanahun llankachinanpa churarinan puntanstullatapas. ¡Tukuy maykankunami llankapayanahun anpirishka kiparipayanahun!

Currently Selected:

San Marcos 6: QUP_B

Highlight

Copy