San Marcos 5

Gadarapi supayyashka runata Jesús anpirka

(Mt 8.28-34; Lc 8.26-39)

1Paktashpankuna chay kucha chinpama, gerasenukunapa llaktankunapi, 2Jesuska llukshishpan botimanta, chaypi kayllayarka shuk runa mana ali espirituyu. 3Chay runaka kawsapayarka panpanankuna uchkukunapipas, nima pi atiparkachu apinata, nima kadenakunawa. 4Achka kuti watarishka kashka kadenawa. Payka pitipayarka kadenakunata, grilletekunatapas, chayrayku nima maykan atiparkachu winsinata. 5Chay karika puripayarka punchapi tutapipas urkukunapi rumi allarishka uchkukunapipas, kaparishpa waktarishpa rumikunapi. 6Jesusta karumanta rikushpan, kallparka kunkurikrinanpa paypa puntanpi.

7Sinchita kaparishpan rimarka: “Jesús, tukuymanta atun yachayyu Yaya Diospa Wawan, ¿Imatata munanki ruranata ñukawa? ¡Ñuka kanta tapuni Yaya Diospa shutinpi ama parisichiwaychu!” 8Chasna kaparirka chay runaka Jesus rimashkanrayku “¡mana ali Espiritu, sakiy kay karita!”

9Chaypi Jesuska tapurka:

“¿Imataya shutikika?”

Payka aynirka:

“Shutinika kanmi Warankakuna, achka kashkanchirayku”.

10Chaymanta chay supaykunaka Jesusta sinchita tapurkakuna mana paykunata wichunanpa karuta chay allpamanta.

11Chay urku kuchupi mikushpa kahurkakuna achka kuchikuna.

12Chay tukuy supaykuna sinchita tapushpalla katirka: “¡Kachay ñukanchita kuchikunapi yaykunachipa!”

13Jesuska ari nirka. Chay mana ali espiritukunaka llukshishpankuna chay karimanta, yaykurkakuna kuchikunapiña. Karkakuna ishkay warankashina kuchikuna. Tukuy chay kuchikunaka kallpashpa saltarkakuna lumamanta yakuma, chaypi chinkarirkakuna.

14Chay kuchita kuyrakkunaka mitikurkakuna. Rirkakuna kwintanapa tukuy kayta llaktata, shuk uchilla llaktastukunatapas. Runakunaka llukshirkakuna rikunankunapa imami pasashka. 15Paktashpankuna maypimi kahurka Jesuska, rikurkakuna maykanmi kahurka parisichirishka chay waranka supaykuna ranti kahurka tiyashpa, suma churarishkata ali yuyaywaña. Chayta rikushpankuna mancharirkakuna. 16Chay washa, maykankunami rikushkakuna chay supay yaykushkawa pasashkata, kuchikunawapas, kwintarkakuna shukkunatapas.

17Chay washa kallarirkakuna Jesusta tapunata sinchi shimiwa anchurinanpa kuchunkunamanta.

18Jesuska ña uraykushpan botipi, maykanmi karka supayashka sinchita tapurka paywa rinanpa.

19Chasna tapushpanpas Jesusta, mana munashpan rimarka: “Riy wasikima, aylluykikunama. Kwintakriy paykunata atun imakunata Dioska kanwa rurashkanmanta. Kwintay imashnami kanta llakichishka”.

20Chay karika rirka, Dekapolispi kallarirka kwintanata chay atun imakunata paypi Jesuska rurashkanta. Chayta uyashpankuna tukuy chay runakuna kushikurkakuna.

Jesuska Jairopa warmi wawanta kawsachirka, chaymantapas anpirka shuk unkushka warmita

(Mt 9.18-26; Lc 8.40-56)

21Jesuska kutirka shuk botipi chay yaku mayan chinpata. Chaypi achka tantarishka karkakuna muyukta paypi, chay yaku mayanpi yuyarirka kiparinata. 22Chaypi shamurka Jairoka, pay karka apu chay tantarina wasimanta. Jesusta rikushpan, kunkurikrirka chakinpi. 23Sinchi shimiwa tapurka: “¡Shamuy, warmi wawaynimi wañuhun! Makikiwa llankashpayki anpik ripay mana wañunanpa.”

24Chaypiña Jesuska paywa pakta rirka. Achka runakuna katirkakuna tankanakushpa.

25Chaypi kahurka shuk warmipas unkuywa chunka ishkay watata parisishpa yawar urmanawa. 26Achkata parisirka achka anpikkunapa makinpi. Yankamanta tukuy iman tiyashkanta tukuchirka, nima maykan atiparkachu anpinata. 27Uyashpan rimahuskankunata Jesusmanta, kayllayarka washanmanta, achka runakunapi, llankarka llachapanta. 28Payka yuyarirka: “Llachapanllatapas paktashpaynika apinata, anpirisha.”

29Llankashkan ratulla Jesuspa llachapanta, yawarnin urmahushkanka kasillayarka. Chaypi aychanpi musyarirka ña anpirishka kiparishkanta chay unkuymanta. 30Jesuska chay ratulla musyarka paymanta llukshishkanta poderninka. Chayrayku muyurishpan chay achka runakunata tapurka: “¿Pitaya llankashka churarinaynita?”

31Disispulunkunaka rimarkakuna: “Rikuhunki achka runakunata takarihukkunata kanpi, chasna tapunki: ‘¿pitaya llankawashka?’.”

32Chasna rimashpankunapas Jesuska katirkalla rikushpa muyukta, yachananpa pimi payta llankashka. 33Chaypi chay warmika, yachashpan imashnami pasashka paywa, yapa mancharishpan chukchurishpa kayllayarka, kunkurishpan paypa puntanpi, rimarka tukuy shutipata.

34Chaypiña Jesuska rimarka:

“Wawayni, kiriwashpaykimi anpirishkanki. Riy kushilla, anpirishkankimi unkuykimanta”.

35Jesuska chasna rimahushkanllapi chay tantarina wasipi kamachik apupa wasinmanta shamurkakuna payta rimanankunapa: “Amaña killachiychu yachachikta. Wawaykika ñami wañushka”.

36Chaypi Jesuska, uyashpan rimahushkankunata, rimarka chay tantarina wasipa apunta: “Ama manchaychu. Kiriwaylla”.

37Jesuska akllarka Pedrota, Jakobota chaymanta wawkin Juanta. Chaymantaka nima pita munarkañachu kunpañak rinankunapa Jairopa wasinma.

38Paktashpan chay tantarina wasipi kamachik apupa wasinpi, rikurka achka musparihukkunata, runakuna wakashpa yanka rimarihukkunata. 39Yaykushpan, rimarka paykunata: “¿Imaraykutaya yapa wakahunkichi musparihunkichi? Kay warmi wawaka manami wañushkachu, puñuhunmi”.

40Runakunaka paymanta asirirkakuna, ashwan payka kamachirka tukuy llukshinankunapa. Kayashpan papanta mamanta chay warmi wawapata, chaymanta paywa kahukkunatapas, chaypi yaykurka maypimi kahurka chay warmi wawaka. 41Jesuska chay wawata makinmanta apishpan, rimarka: “¡Talita kumi!” Chayka ninayan, “Kanta, warmi wawa, rimani: ¡Atari!”

42Chayratulla chay warmi wawa chunka ishkay watayuka, atarishpan kallarirka purinata. Chay runakunaka kiparirkakuna mancharishka. 43Jesuska rimarka paykunata nima pita kwintanankunapa chay pasashkata. Chaypi rimarka karanankunapa chay warmi wawata.

Currently Selected:

San Marcos 5: QUP_B

Highlight

Copy