San Marcos 7

Maykanmi runata susyayachin

(Mt 15.1-20)

1Fariseokuna chaymanta Moisespa killkashkanta yachachikkuna, shamushpankuna Jerusalenmanta, Jesusta kayllayarkakuna. 2Rikurkakuna shuk disipulunkuna mikuhukkunata panta maki mana aliwa, chayka ninayan, mana mayllarishkawa. 3(Fariseokunaka, tukuy Israel runakunapas, kawsanahun kasushpa ñawpa rukukunapa ruranankunata, chayrayku, makinkunata achka kuti mana mayllashpankunaka mana mikunahunchu. 4Rantichina wasimanta kutishpankuna, mana mikunahunchu makinkunata mana mayllashpankunaka. Chay ñawpa kawsanakunatapas wakaychanahun, mayllanahun pusilluta maykanpimi upyanahun, mukawakunata, irmankakunata chaymanta puñunakunatapas). 5Chasna kashpan fariseokunaka chaymanta Moisespa killkashkanta yachachikkunapas Jesusta tapurkakuna: “¿Imaraykuta disipuluykikunaka mana katihunkunachu yaya rukunchikuna wañupa rurashkankunata, ashwan mikunahun panta makinkunata mana mayllashpa?”

6Jesuska aynirka: —¡Llullaysikikuna! Alita rimarka Isaiaska kankunamanta, killkashpan kasna:

“Kay runakunaka shiminkunallawami yuyawanahun,

shunkunkunaka kahun karupi ñukamanta.

7Runakunapa yachachishkankunallata katishkankunaraykumi

yankamanta ñukata mañana wasipi tantarinahun kushichiwanankunapa.”

8Kankunaka sakinkichi kinrayma Yaya Diospa kamachishkankunataka, ashwan kasunkichi ñawpa kawsashkankunata runakunapata. [Chayka ninayan, mayllanakunapi, mukawakunata, chay pusillukuna upyanapa, achka imakuna chasnallatata.]

9Chaymantapas rimarka: —¡Alimi mana balichinkichichu Yaya Diospa kamachishkankunata, kasunaykichi ranti kankuna kikinpa ñawpa kawsanaykichita!

10Chaymantapas Moiseska rimarka: “Yuyaychi yayaykichita mamaykichita”, chaymantapas: “Maykanchari kushway riman yayanta mamantapas, chayka wañunan tiyan nima llakichirishka”.

11Ashwan kankunaka rimankichi: “Chasna maykanpas rimashpanka yayanta mamanta: kankunata kunayni kullkita ñami Yaya Diosrayku kushkani ‘Escorban’, (chayka ninayan, ofrendayni Yaya Diosrayku)”. 12Chaywa kankunaka mana munankichiñachu nima pi yanapananpa yayanta mamantapas. 13Chasna kankunaka mana balichinkichiñachu Yaya Diospa shiminta chay ñawpa kawsanakunata yachakushkaykichirayku, chaymantapas rurankichi achka imakunatapas chasna rikurikkunata.

14Jesuska kutikashka kayarka tukuy runakunata, chaypi rimarka: “Uyawaychi tukuy, asirtaychi: 15Nima ima shamushka kanchamanta atipanchu millaypata rurachinata nima pita. Maykanmi millaypata rurachin runata kanmi maykanmi llukshin paymanta”. 16[Maykanmi tiyan rinrinka uyananpa, uyachun.]

17Yaykushpan wasipi, anchurishkan washa chay achka runakunamanta, disipulunkunaka tapurkakuna chay mana asirtaypa yachakunamanta.

18Jesuska paykunata rimarka: “¿Kankunapas manachu atipankichi asirtanata? ¿Manachu asirtankichi nima ima shamushka kanchamanta yaykushpan shuk maykanpi atipanchu millaypata rurachinata? 19Chayka mana yaykunchu shunkunpi, ashwan yaykun wiksanpi, chasna rin ismana wasima”. Chaywa Jesuska rimanayarka tukuy mikunakuna kan ali. 20Chasna rimashpanpas maykanmi susyachin kan maykanmi llukshin runamanta. 21Runapa shunkun ukumantami chay mana ali yuyaykunaka llukshinahun, musayana, shuwanakuna, chaymanta runata wañuchina, 22shuk warmiyu kari shuk warmiwa musayana, munarishpa kawsana, millaypa rurana, chiknina, llullashpa rimana, tukuy mana alikunata rurana, chaymanta tukuy mana alita yuyarishpa kawsana. 23Tukuy kay millaypakunami shamunahun ukumanta susyayachin runata.

Shuk mana Israel warmi Jesuspi sinchikurirka

(Mt 15.21-28)

24Chaymanta Jesuska rirka Tiro, Sidón allpamapas. Paktarka shuk wasipi, pakanata kamashpanpas nima pi yachananpa, mana atiparkachu pakanata. 25Chaypi shuk mana Israel warmi Jesusmanta yacharka. Chay warmipa shipas wawanpi supay yaykushka karka. Mamanka Jesús chay wasipi kahushkanta yachashpan wasima yaykushpan puntanpi kunkurik rirka. 26Chay warmika karka griega, sirofenisia llaktamanta, sinchi shimiwa tapurka supayta llukshichinanpa warmi wawanmanta.

27Chaypi Jesuska chay warmita rimarka: “Puntiru saki wawakunata mikunankunapa saksakta, mana alichu kan kichunanchipa wawakunata panta kunanchipa allkukunataña”.

28Chaypi chay warmika aynirka: “Shutipami, Yayayni. Ashwan allkustukunapas mikunahun mesa ukupi maykantami wawakunaka wichachinahun”.

29Chaypiña Jesuska rimarka: “Kayta rimashkaykirayku, atipanki rinata kushilla. Ñami supayka llukshishka warmi wawaykimanta”.

30Chay warmika paktashpan wasinpi, tarikrirka wawanta puñunanpi sirihukta. Supayka ña llukshishka kahurka paymanta.

Jesuska anpirka shuk mana uyakta

(Mt 15.29-31)

31Jesuska kutikashka llukshirka Tiro allpamanta, rirka Sidonma paktarka kucha Galilea kuchupi, pasashpa Dekapolis shutiyu allpata. 32Chaypi paktashpan shuk runakuna shuk runata mana uyanata, nima rimanata atipakta Jesusma aparkakuna. Chaypi Jesusta tapurkakuna makinta churashpa chay runata anpinanpa 33Jesuska anchuchirka tukuy chay runakunamanta, rinrinpi makinwa llankarka, llawsanwa llankarka kallunta; 34chay washa rikurka siluma, atunta samashpan rimarka: “¡Efata!”, Chayka ninayan, “¡Paskari!”

35Chayratulla rinrinka paskarirka kallunpas pankallayarka, kallarirka rimanataña sumakta. 36Jesuska rimarka nima pita kwintanankunapa kayta, chasna rimashpanpas, paykunaka ashwan ashwanta kwintarkakuna. 37Runakunaka kahurkakuna suma mancharishka rimarkakuna: “Tukuyta alita ruran. Atipan ruranata mana uyakkunaka uyanahun mana rimakkunapas rimanahun”.

Currently Selected:

San Marcos 7: QUP_B

Highlight

Copy