Nzyeté 37

YESYƐ̂B

(37–50)

Anò na menjÿòon Yesyɛ̂b

1Yakwɔ̂b lɔ̌ɔn ńtsẅé Kánàhan, á tsɛ̀ɛ ngwòŋ gẅie tá we la tsẅé wó, ńgwɔ́ kÿoláʼ. 2Mɔɔn ée mezíŋ pʉ̀a na nkenkÿo ngẅɛ̀ ndá Yakwɔ̂b. Yesyɛ̂b la gwɔ́ tà ńgẅiin ngùʼ ntsɔ̀b sɔɔnmbʉ́a né legém, pâ mefɛ̌ pé pféle menjʉ̀njÿò lâ mvfó. À laa múɔ mbàŋa, ńkwoŋo lézse nzèm gubé Mbila lâ ye Zilépà pie é laa mezwě tá we Yakwɔ̂b. Táʼ, Yesyɛ̂b lɔ̌ɔn ńgwá ḿbíte meshwóŋò tepòŋ mie é kẅɛɛ ncwò mefɛ̌ pé, éshwóŋo tá wɔ́b. 3Yakwɔ̂b lɔ̌ɔn ńkwoŋo Yesyɛ̂b, ńcʉa yetsɔ́ gubé yé yembàŋa ntsèm. Ńtí páʼ à laa múɔ gẅie à la zẅiŋ tá ńzyé. À la gÿo ńtém nzsǒ sɔ́ʼ#37:3 nzsǒ sɔ́ʼ: etsɔ́ mekyàgte mesesaga mbwó kà gie ée mentsaʼá mentsaʼá. ńná né Yesyɛ̂b. 4Mefɛ̌ Yesyɛ̂b gyá ngie tá wɔ́b kwoŋo yé ńcʉa wɔ́b metsèm, ńzyete lépʉa Yesyɛ̂b, ńcʉ́ʼʉ ńdɔgɔ pɔ́ mbÿàg lóŋ, ńgɔɔn nò né yé.

5Á gÿo ńgwɔ́ tsɔ́ lyɛ̌ʼ, Yesyɛ̂b lyé tsɔ̌ njÿòon, ḿbíte éshwóŋ mefɛ̌ pé. Pɔ́ júʼ, ńgíŋe ńkẅiʼi ḿbʉa yé. 6À la gɔɔn né pɔ́b ngie: Shúshu, pi júʼ tsɔ̌ njÿòon gie n ně ńdyé: 7«N ně ńdyé njÿòon, ńgyá pege gwɔ́ tsɛ̀ɛ nkáʼ, mbà pege kwɛté membwɔ̀ʼ ngesáŋ ntsíŋ, n deen ńgyá, eyɔ̀ɔn mbwɔ̀ʼ pʉʼʉ ńtyé tyé; emí membwɔ̀ʼ tÿɔ́ʼte yɔ̀ɔn, ńŋwéʼte, ésɔb metwó mɔ́b ssé, á mvfò yɔ̀ɔn mbwɔ̀ʼ.» 8Mefɛ̌ pé zɛ́te yé ngie: «Ɔ̀ lɔgɔ ńgɔɔn ngie ɔ̀ ge gÿo cʉ́ʼʉ fùɔ weg keen? Kà pɔ́ ngie gù zɔ ge cʉ́ʼʉ sáʼa wég?» Pɔ́ gɔɔn púʼu, ńgíŋe ńkẅiʼi ḿbʉa yé, ńtí menjÿòon mé lâ meshwóŋè mé.

9À la tǎa ńgíŋe ńdyé tsɔ̌ njÿòon tsɔ́ lyɛ̌ʼ, ńgíŋe ḿbíte, éshwóŋ mefɛ̌ pé ńgɔɔn ngie: «N gǐŋ ńdyé tsɔ́ njÿòon, ńgyá nèm, ńgyá saŋ, ńgÿo mecÿɔ́ʼsaŋ ntsɔ̀b wémɔʼɔ́ né legém, é ne ńŋwɔ́ʼɔ nnɛ́ mvfò mèŋ.» 10À la píte púʼu, éshwóŋo tá we, éshwóŋ mefɛ̌ pé. Táʼ, tá we cÿɔ́gte yé, ńzɛ́te yé ngie: «Ee yɛ̌ ntí njÿòon gie ɔ̀ laʼte pɛ́ʼɛ̀? Ɔ̀ lɔgɔ ńgɔɔn ngie peg lâ má gù lâ mefɛ̌ pú ge tó, é ŋwɔ́ʼ nnɛ́ mvfò gù tà zǐ yég kíbe ssé keen?» 11Mefɛ̌ pé pú ńdíe yé ńkwɔ́ʼɔ lóŋ; táʼ, tá we ké ńnéŋe ńkwaŋte mɔɔn menjÿòon kwaŋte.

Mefɛ̌ Yesyɛ̂b sẅiŋé yé

12Mefɛ̌ Yesyɛ̂b la gʉa né Sishÿɛ̂m lépféle menjʉ̀njÿò lâ mvfó tá wɔb. 13Á gÿo ńgwɔ́ tsɔ́ lyɛ̌ʼ, Yakwɔ̂b gɔɔn né Yesyɛ̂b ngie: «Mefɛ̌ pú té Sishÿɛ̂m ḿpféle menɔ̀ɔn wɔ́ le? Tóo, n túmo gú wó!» Yesyɛ̂b tsɔ́ʼ ngie: «Oon, n jǔʼ!» 14Yakwɔ̂b gíŋe ńgɔɔn ngie: «Shúshu, gʉa ńdíe kà pɔ́ ée jʉʼó ńgwɔ́ ntentʉ́ wɔ́ɔ, tà mbɔɔ menɔ̀ɔn. Gʉa ńdíe wɔ́b, ḿbiŋ ńtó shwóŋo wɔ́ɔn páʼ pɔ́ ée jʉʼó ńgwɔ́.»

Yakwɔ̂b lɔ̌ɔn páʼɔɔn, éfóo kwòŋo Embeloŋ ńtúmo Yesyɛ̂b á Sishÿɛ̂m. Yesyɛ̂b la gʉa tà ńkúu Sishÿɛ̂m, 15Atsɔ̌ ndÿò gyá páʼ aa tsẅɛ ńgwá ḿbúu, ńzɛ́te yé ngie: «Ɔ̀ faʼa pɔ́ kɔ́?» 16Á tsɔ́ʼ ngie: «Mèŋ faʼa mefɛ̌ pɔ́ɔn! Shúshu, ngwɔ́ ɔ̀ zsé jʉʼ gie pɔ́ pféle menɔ̀ɔn pɔ́b wó ka?» 17Andÿò wa tsɔ́ʼ ngie: «Pɔ́ fǒ jʉʼɔɔn ńgʉa; n ka júʼ pɔ́ ne ńgɔɔn ngie pɔ́ ge gʉa né Ndɔtâŋ.» Yesyɛ̂b júʼ púʼu, ńcʉ́me mánzsè, ńké ńgiŋe faʼa mefɛ̌ pé faʼ, tà ńkúu Ndɔtâŋ, ńgyá wɔ́b.

18Yesyɛ̂b la nyé ńgwɔ́ pɔ́ ngʉ̀a shʉ̀shʉ̀a pɔ́ gyá yé, á gwaa gʉa tà kúu lejʉ́ŋ pɔ́b, mbà pɔ́ lɔ̌ɔn ncù wé, páʼ pɔ́ ge zẅé yé. 19Pɔ́ la ne ńgɔɔn tsetsɛ̀ɛ pɔ́b ngie: «Andyè menjÿòon wɛ̂ gẅie à tóo lɛ̂. 20Afʉ̀ʼɔɔn la, pi tó pege zẅé yé, ḿmaʼa yé tsɛ̀ɛ tɔ́ɔn ntse ntǔŋ gie ntse té tsoló wɔ́. Ńzsé ngie pege gÿǒ shwóŋo tá wege ngie nɔ̀ɔn mbàʼ ka gwaa yé. É gyá mmó gie á ge gÿo, tá menjÿòon mé e pumte.» 21Lẅímbèŋ júʼu nò ŋwɛ́, éfaʼ shÿó lékẅé twó Yesyɛ̂b, ńgɔɔn né mefɛ̌ pé ngie: «Tà pege zẅé yé.» 22Ńgíŋe ńgɔɔn né pɔ́b ngie: «Tà pi pfɛte metse nyìŋ. Pi maʼa yé pɔ́ tsɛ̀ɛ tɔ́ɔn ntse ntǔŋ yɔɔn gie áa kwòŋotsẅɛ lɔɔn. Pi pɔ́ɔn lézába pwó na yé.» Lẅímbèŋ lɔ̌ɔn ńgɔɔn né pɔ́b púʼu, légwɔ́ gie Yesyɛ̂b ge tsẅɛ́, à gʉa ńtsege yé mbwó tá we.

23Yesyɛ̂b gʉa tà ńkúu lejʉ́ŋ mefɛ̌ pé, pɔ́ gwoon yé, ésẅɛ nzsǒsɔ́ʼ mentsaʼá mentsaʼá gie à la maʼ. 24É maʼa yé tsɛ̀ɛ tsɔ́ tɔ́ɔn ntse ntǔŋ gie ntse té tsoló wɔ́. 25Pɔ́ la gÿo púʼu, ńdíe jʉʼ, ńnéŋe wó, lépfɛ́ɛ mmó. Ńdeen ḿmaʼ nÿɔ́g, ńgyá nùɔ ngàŋ legìŋ pʉ̀a Esemayɛ̂ɛ ne fóo Ngalad ńgee né Egíbtò. Mekamɛɛ pɔ́b piʼi laméndɔ̀ɔn mentí tà ńgyɔ́ɔn, páʼ shúm gyě, lâ tÿǒ mbɔ̂m ńgÿo landanẅim. 26Yúndà gɔɔn né mefɛ̌ pé ngie: «Pege lɔɔn ńgwɔ́ páʼɔɔn ńzẅé fɛ̌ wege, ńdÿoon metse mé, mbà pì gie pege gee jÿǒ, áa kɔ́? 27Pi tó pege cʉ́ʼ sẅiŋe yé pɔ́ mbwó pʉ̀a Esemayɛ̂ɛ. Pege pɔ́ɔn lézába pwó na yé. Ńtí nue aa fɛ̌ wege, pege lâ pɔ̌ gẅiin tàʼ metse.» Yúndà la gɔɔn púʼu, mefɛ̌ pé zẅíŋ. 28Patáŋ sɔ̌ɔn pie é fóo láʼa Mandyaŋ ne ńcʉa jʉʼó, pɔ́ fó tsɛ̀ɛ tɔ́ɔn ntse ntǔŋ, éshwoŋo Yesyɛ̂b, ńnáa kwóŋ, ésẅiŋe yé mbwó pʉ̀a Esemayɛ̂ɛ. Ńkẅé nkáb pàg móm mbʉ́a. Ngàŋ legìŋ ŋwɛ́, lɔgɔ yé ńgʉa né Egíbtò. 29Lẅímbèŋ la gÿo ńkwɔ́ʼ, ńgʉa jʉʼʉ tɔ́ɔn ntse ntǔŋ, ńgyá Yesyɛ̂b te gíŋe ńgwɔ́ tsoló wɔ́. Á shʉate menzsǒ mé. 30Ńdeen ńké ḿbiŋ né jʉʼ gie mefɛ̌ pé laa wó. Ńgɔɔn né pɔ́b ngie: «N dǐe múɔ wa, n te yé gyá, tà n gee páʼɔɔn ńdɔgɔ yɛ̌ fʉ̀ʼɔɔn?»

31Ńzáʼa lóŋ tàʼa pwɔ́b, ḿbí nzsǒsɔ́ʼ Yesyɛ̂b, ńtsaba na metse pwɔ́b ŋwɛ́. 32Ńdeen ńké ńtúm nzsǒsɔ́ʼ ŋwɛ́ gie e laa mentsaʼá mentsaʼá la, ńnáa mbwó tá wɔb. Ńgɔɔn né yé ngie «Gyá mmó gie peg ka gyá. Shúshu, líe jú, kà nzsǒ yɛ̂, ee pɛ́ʼɛ̀ ńgwɔ́ nzsǒ míŋ gù wɔ́ɔ?» 33Yakwɔ̂b líe, ńgaʼte ńgɔɔn ngie: «Eyɔɔn ńgwɔ́ nzsǒ míŋ wɔ̀ɔn, mbà nɔ̀ɔn mbàʼ ka gwaa yé. Awɔɔn mbà mé ka pú ésyɛte Yesyɛ̂b ḿpfɛ́.» 34Yakwɔ̂b gyá púʼu, éshʉate menzsǒ mé, ńcwóŋo pɔ̀ɔn zẅɛ̌ʼ yé. Ńdɔg ńdʉa míŋ we, tà é gwɔ́ melyɛ̌ʼ tà ńgyɔ́ɔn. 35Egubé yé ntsèm, é yembàŋa lâ yepanzwě, é láŋte yé lêkɔ́ wɔ́ɔ, à te júʼ. Ńne ńgɔɔn ngie: «N ge lʉa míŋ wɔ̀ɔn tà kwé, é gʉa tsɛ̀ɛ yé, á láʼ mepfó!» Wɔɔn aa páʼ Yakwɔ̂b la lʉa míŋ we Yesyɛ̂b púʼu.

36Táʼ, ńké ńdʉa yé púʼu páʼɔɔn, mbà pʉ̀a Mandyaŋ#37:36 Pʉ̀a Mandyaŋ: Áa tsɛ̀ɛ mezẅìŋe ŋwàʼne á na nkàŋ 28; anzẅìŋe ŋweʼe na shwóŋè Ébɛ̀ gɔɔn jʉʼɔɔn ngie Pʉ̀a Mandyaŋ Ée pʉ̀a pie é té gíŋe ńkíme wɔ́b tsɔ́ jʉʼ tsɛ̀ɛ Nzẅìŋe Kʉ̀a wɔ́. Ngwɔ́ sɔɔn lezíŋ lɔgɔ ńgwɔ́ kwàʼ páʼ é la púʼ ssé ńgwɔ́, tá mé tóo na nkàŋ 28, ńkúbe né lezíŋ sie mé pú ńzsé Pʉ̀a Mandyaŋ. ka sẅiŋe Yesyɛ̂b á Egíbtò á mbwó Potifaa gẅie à laa máa káŋatwó, yé zɔ̌ tyé twómvfò na papyɛ́b jʉʼ, á nɔʼɔ Falahoŋ.

Currently Selected:

Nzyeté 37: nnh

Highlight

Copy

Compare