Nzyeté 38

Anò Yúndà pɔ́ Tamaa

1Yakwɔ̂b la nyé ńdʉa míŋ we Yesyɛ̂b lʉa, Yúndà fó lejʉ́ŋ mefɛ̌ pé ńgʉa ńtsɛ́ɛ tsɔ̌ ndÿò, á gwɔ́ nyìŋ Andulâm, lezíŋ sé gwɔ́ lê Ilaa. 2Yúndà kúu wó, ńgyá tsɔ̌ múɔngùɔ, lezíŋ tá we gwɔ́ lê Shúwà, á gwɔ́ nyìŋ Kánàhan. Ńdɔgɔ múɔ manzwě ŋwɛ́, ńgÿo nzwě we, pɔ́ yé nuŋe. 3Á shwoŋ, ńgÿo ńzyé múɔ mbàŋa, ńtsẅi lezíŋ sé lê Ɛɛ. 4À la gÿo ńgíŋe shwoŋ, ńgíŋ ńgÿo ńzyé tàʼ múɔ mbàŋa, ńtsẅi lezíŋ sé lê Onâŋ. 5Ńgÿo ńtáa ńgíŋe shwoŋ, ńgíŋe ńgÿo ńzyé tsɔ̌ múɔ mbàŋa, ńtsẅi lezíŋ sé lê Shÿélà. Mé la gwaa zyé wɔɔn múɔ ŋwɛ́, Yúndà gwɔ́ tsɛ̀ɛ láʼa Kezib.

6Yúndà la gÿo ńdúɔ múɔ manzwě, ńnáa mbwó Ɛɛ gẅie aa múɔ letwó we, lezíŋ sé gwɔ́ lê Tamaa. 7Efʉ̌ʼ nò Ɛɛ múɔ letwó Yúndà, é pÿága Cʉ̀apʉ̀a, tà Cʉ̀apʉ̀a gÿo á kwé. 8Á cʉa púʼu, Yúndà gɔɔn né Onâŋ ngie: «Ɔ̀ zsě ngie ndyè gù ka kwé pɛ́ʼɛ̀, ampfɔ̌g wɛ̂ líe pɔ́ gú, sɔgɔ yé, ńzsé ngie ɔ̀ gÿǒ ngẅɛ̀ fɛ̌ gù gwɔ́ wó.» 9Onâŋ la ne ńzsé ngie yɔɔn ngẅɛ̀, e te ye wɔ́. Áa mmó gie á la gÿo, afʉ̀ʼ ntsèm gie à nuŋé mpfɔ̌g fɛ̌ we, à gÿo pɔ́ páʼ ntse nnɛ́ wé, é ge cʉ́m pɔ́ ssé, ńdɔgɔ ńdʉʼʉ légÿo ngẅɛ̀ fɛ̌ we láʼ gwɔ́ wó. 10Yɔɔn ntí ngÿǒ menò pú ḿbÿága Cʉ̀apʉ̀a tà á gÿo Onâŋ kwé yé. 11Á cʉa púʼu, Yúndà gɔɔn né mpfɔ̌g míŋ we Tamaa ngie: «Páʼ ɔɔ mpfɔ̌g lɛ̂, gʉa ńnéŋe mbʉ̀a pi, ńzẅíʼte tà míŋ wɔ̀ɔn Shÿélà gÿo ńgúʼ.» Yúndà la gwaa gɔɔn púʼu, ḿbɔ́gɔ ngie ngwɔ́ Shÿélà gíŋe ńkwé yé páʼ mefɛ̌ pé. Tamaa júʼ púʼu, ḿbiŋ né mbʉ̀a pɔ́b.

12Etsɔ́ nzẅìŋ melyɛ̌ʼ ńtɔ́g, anzwě Yúndà gẅie à laa míŋ Shúwà kwé. Yúndà lʉa legwé tà ńtsẅé jʉʼ, pɔ́ shǔ we Ilaa nyìŋ Andulâm ne ḿbʉʉ né Timna, légyá pʉ̀a pie é la ne ńkwóon menoŋ na menjʉ̀njÿò mé. 13Tamaa la leen gwɔ́ tà ńjúʼ ngie tá ndúm we Yúndà ne ḿbʉʉ né Timna lékwóon menoŋ na menɔ̀ɔn pé, 14Ésẅɛ menzsǒ mpfɔ̌g na yé, ńdíe nkùɔ, éshu, ńgʉa ńnéŋe ncù tÿǒsoŋ Enayim á na mánzsè Timna. Ńtí páʼ à ka gyá ngie Shÿélà kéen ńgúʼ, mé piŋ ńké te náa yé mbwó yé, páʼ à ge sɔgɔ yé wɔ́. 15Yúndà ne ńcʉa, ńgyá Tamaa, ńdɔgɔ yé ńtóŋo káatÿǒ manzwě, ńtí páʼ à la shu nkùɔ. 16À te zsé ngie aa nzwě míŋ we wɔ́, ńkwaʼa yé. Ńgɔɔn né yé ngie: «Shúshu, zẅíŋe pɔ̀gɔ nuŋe.» Á tsɔ́ʼ ngie: «Ɔ̀ ge náa kɔ́ né mèŋ tá pɔ̀gɔ nuŋe?» 17Yúndà tsɔ́ʼ né yé ngie: «N ge gÿo túmo múɔ mvfó, mé ná ne gù.» Tamaa gɔɔn ngie «Náa mmó jÿɔ́ʼ, n deʼe, tà ɔ̀ láʼ ńtúm, tá n tsɔ́ʼ.» 18Yúndà zɛ́te ngie: «À lɔɔn ngwɔ́, n náa kɔ́ né gù páʼ jÿɔ́ʼ?» Á tsɔ́ʼ ngie: «Náa cÿɔʼɔ́liŋé#38:18 Le cÿɔ̀ʼ ɔ́ liŋé yé mé lɔɔn ńgwɔ́ tsɔ́ mefʉ̀ʼ ńcʉŋe na nkÿo, ńjÿɔ́gɔ lóŋ. jú, né nkÿo wɛ̌, ńgÿo tÿǒ gie ɔ̀ gẅiin mbwó lɛ̂.» Á tsege ńnáa mbwó yé. Pɔ́ yé nuŋe, á shwoŋ. 19Tamaa fó jʉʼó ńgʉa, ésẅɛ nkùɔ, ńgíŋe ḿbí menzsǒ mpfɔ̌g mé, ḿmaʼ.

20Yúndà la gÿo ńtúmo shǔ we nyìŋ Andulâm páʼ à ge gʉa é náa múɔ mvfó né manzwě wa, éfó mbwó yé, é kẅé shúm jÿɔ́ʼ sa, táʼ, á gʉa ńkú, à te yé gyá. 21Ńzɛ́te mbwó pʉ̀a Enayim ngie: «Káatÿǒ manzwě#38:21 Á laa Kánàhan, tsɔ́ megàŋmpfwɔ̀ʼ panzwě gwɔ́ wó, ńgwɔ́ pie mbàŋa gie é ne ńtʉʉ lézyé, sɔgɔ yɛ̌ pʉ̀ na pɔ́b. gẅie aa ńtyé ngʉ̀ŋe mánzsè jʉʼɔɔn la, aa nzɔ̌?» Pɔ́ tsɔ́ʼ ngie: «Atsɔ̌ káatÿǒ manzwě laa gwɔ́ jʉʼɔɔn wɔ́.» 22Ashǔ Yúndà piŋ nzèm, ńgɔɔn né yé ngie: «M bǔ faʼa yé, n te yé gyá. N gwɔ̌ tá ńzɛ́te pʉ̀a jʉʼó, pɔ́ gɔɔn ngie káatÿǒ manzwě, à zɔ̌ɔn laa gwɔ́ jʉʼó wɔ́.» 23Yúndà gɔɔn ngie: «À lɔg shúm jÿɔ́ʼ sie n ka ná né yé, ńgÿo sé. Tà pɔ̀gɔ gÿo, mé gẅe wɔ́gɔ̀. N kě ńdɔgɔ múɔ mvfó ńtúmo gú, tá ɔ̀ gʉa, ńtó, ɔ̀ te yé gyá.»

24É la cʉa mesaŋ méntá, atsɔ̌ nyìŋ tó shwóŋo Yúndà ngie: «Tamaa gẅie aa mpfɔ̌g míŋ gù, à kéen ńcʉ́ʼʉ káatÿǒ manzwě tà shwoŋo múɔ mpfwɔ̀ʼ.» Yúndà gɔɔn ngie: «Pi fó tÿǒsoŋ ńkẅile yé, ńzsé ngie mé tuɔ yé.»

25Mé la gwɔ́ tà ne ńdɔgɔ Tamaa éfóo tÿǒsoŋ ńkẅɛɛ, á túm shúm ngie mé gʉa ńnáa mbwó tá ndúm we, ńgɔɔn né yé ngie: «Mámbàŋa gẅie shúm sɔɔn ée sé, zɔ ka néŋe múɔ lepfòm mèŋ. Shúshu, cwoŋo ńdíe cÿɔʼɔ́liŋé yɔɔn, ńdíe nkÿo, ńdíe tÿǒ, tá ńgyá nyìŋ gẅie sɔɔn shúm, ée sé.» 26Yúndà líe shúm, ńdiŋ, ńgɔɔn ngie: «À zsé lepʉ̌ ńcʉa wɔ́ɔn. N ka gẅiin lénáa míŋ wɔ̀ɔn Shÿélà né yé. N ka piŋ te ná.» Yúndà gɔɔn púʼu, pɔ́ Tamaa te láʼ ńgíŋe ńnuŋe wɔ́.

27Afʉ̀ʼ gie Tamaa lɔ̌ɔn ńgee ńzye la gwɔ́ tà ńkuʼ, mé gyá gubé yépʉ́a gwɔ́ lepfòm yé. 28À la ne ńzyé, tàʼ múɔ tsege pwó, mɔ̌ɔn mánkẅè kúʼte, ńgwaa káte pàŋntsàŋ sìsyè mǒ, ńgɔɔn ngie: «Wɔɔn aa gẅie à vɔ̌g ńkẅɛ.» 29Táʼ, múɔ piŋe pwó yé, afɛ̌ we zɔ̌ cʉ́ʼ ńkẅɛ. Mɔ̌ɔn mánkẅè gɔɔn ngie: «Ɔ̀ kwǎʼ é nyiŋ nzsè nyiŋ tà ńkẅɛ!» Mé tsẅi lezíŋ sé lê Pelɛ́sè; (ńdɔgɔ ńgɔɔn ngie: «Nzsè gie mé nyǐŋ nyiŋ.») 30Afʉ̀ʼ kuʼ, afɛ̌ we gẅie mé katé pàŋntsàŋ sìsyè na pwó yé la, kẅɛ yé. Mé tsẅi lezíŋ sé lê Zela; (ńdɔgɔ ńgɔɔn ngie «ńdʉ́ate.»)

Currently Selected:

Nzyeté 38: nnh

Highlight

Copy

Compare