Nzyeté 36
36
Ezagẅi gʉ̌a ńnéŋe Éndɔ̀m
1Mezíŋ pʉ̀a na nkenkÿo ngẅɛ̀ ndá Ezagẅi gẅie mé gíŋe ńtóŋo yé lê Éndɔ̀m e mɔɔn. 2Ezagẅi la gʉa na nùɔ púɔ panzwě Kánàhan, éfaʼ mezwě pé, ńzɔ́ʼ: wɔɔn laa Andà míŋ Eloŋ nyìŋ Hɛ́d, wɔɔn gwɔ́ Oholibama míŋ Ánà, míŋ míŋ Simbeyoŋ, nyìŋ Hevid. 3À la gíŋe ńzɔ́ʼɔ Mbasemad míŋ Esemayɛ̂ɛ, Mbasemad ŋwɛ́ lɔgɔ ńgwɔ́ fɛ̌ Nembayɔd wemanzwě. 4Andà la gÿo ńzyé Elifaaze, Mbasemad zyé Lewɛɛ, 5Oholibama gÿo ńzyé yé Yegúshÿè pɔ́ Yalam ńgÿo Kola. Pɔɔn ée penkʉ́ Ezagẅi pembàŋa pie à la zyé ngwòŋ Kánàhan.
6Ezagẅi la fó lejʉ́ŋ fɛ̌ we Yakwɔ̂b, ńgʉa né tsɛ̀ɛ tsɔ́ ngwòŋ wendyɛ̀ʼɛ, á tàa ngʉ̀a shʉ̀shʉ̀a. Ńgwaa gʉa, ńdɔg mezwě pé, lâ gubé yé yembàŋa mbɔɔ yepanzwě, lâ megàŋafàʼ pé ntsèm, lâ menùɔ menɔ̀ɔn pé ntsèm, tà mbɔɔ shúm tʉ̀nzẅìŋ sie à la faʼa Kánàhan ńgʉa. 7Ńtí nue shúm sɔ́b la gwaa gwɔ́, mbà é gyɔ́ɔn tà pɔ́ légíŋe ńtem ńnéŋe tàʼa jʉʼ, à te gíŋe ńgwɔ́ wó wɔ́. Ńgwaa gwɔ́, mbà ngwòŋ gẅie pɔ́ laa wó ńgwɔ́ pakÿoláʼ gǐŋ ńkɔ́gɔ na nzẅìŋ menùɔ menɔ̀ɔn pie pɔ́ la gẅiin. 8Áa mmó gie á la gÿo Ezagẅi gẅie mé gíŋe ńtóŋo yé lê Éndɔ̀m gʉa ńnéŋe tsɛ̀ɛ mekwɛ́ Seyî.
Mezíŋ pʉ̀a na ngẅɛ̀ ndá Ezagẅi
9Mɔɔn ée mezíŋ pʉ̀a na ngẅɛ̀ ndá Ezagẅi gẅie aa mángʉanjʉʼ pʉ̀a Éndɔ̀m pie é lɔ́ɔn ńtsẅé tsɛ̀ɛ pàga láʼa mekwɛ́ Seyî. 10Mezíŋ penkʉ́ Ezagẅi pembàŋa emɔɔn: anzwě we Andà la zyé Elifaaze, wetsɔ̌ nzwě we Mbasemad zyé Lewɛɛ.
11Penkʉ́ Elifaaze pembàŋa gwɔ́ Temaŋ, Omâ, Sefo, Ngatâm ńgÿo Kenaaze. 12Timna la mágàb Elifaaze míŋ Ezagẅi. Pɔ́ Elifaaze gÿo ńzyé Amalɛg. Pɔɔn púɔ mbàŋa lɔgɔ ńgwɔ́ gubé míŋ Andà nzwě Ezagẅi.
13Penkʉ́ Lewɛɛ pembàŋa gwɔ́ Nahad, Zela, Shÿamaa ńgÿo Miza. Pɔɔn púɔ mbàŋa lɔgɔ ńgwɔ́ gubé míŋ Mbasemad nzwě Ezagẅi. 14Ńgʉa na Oholibama gẅie aa míŋ Ánà, ńgwɔ́ míŋ míŋ Simbeyoŋ, mbà pɔ́ Ezagẅi la zyé Yegúshÿè pɔ́ Yalam, ńgÿo Kola.
15Pɔɔn ée mefùɔ metsìŋendá púɔ Ezagẅi. Mefùɔ pie é fóo na tsìŋendá Elifaaze gẅie à laa múɔ letwó Ezagẅi, é mɔɔn: fùɔ Temaŋ, fùɔ Omâ, fùɔ Sefo, fùɔ Kenaaze, 16fùɔ Kola, fùɔ Ngatâm ńgÿo fùɔ Amalɛg. Pɔɔn lɔgɔ ńgwɔ́ mefùɔ pie é kẅɛɛ na ngẅɛ̀ Elifaaze pie é lɔ́ɔn ńtsẅé Éndɔ̀m. Ńdɔgɔ ńgwɔ́ gubé gubé Andà nzwě Ezagẅi.
17Mefùɔ pie é fóo na tsìŋendá Lewɛɛ míŋ Ezagẅi, é pɔɔn: fùɔ Nahad, fùɔ Zela, fùɔ Shÿamaa ńgÿo fùɔ Miza. Pɔɔn lɔgɔ ńgwɔ́ mefùɔ pie é kẅɛɛ na ngẅɛ̀ Lewɛɛ, é pie é lɔ́ɔn ńtsẅé Éndɔ̀m. Ńdɔgɔ ńgwɔ́ gubé gubé Mbasemad nzwě Ezagẅi.
18Mefùɔ pie é fóo na kwɔ̀ʼɔ ndá Oholibama nzwě Ezagẅi, é pɔɔn: fùɔ Yegúshÿè, fùɔ Yalam ńgÿo fùɔ Kola. Pɔɔn lɔgɔ ńgwɔ́ mefùɔ pie é kẅɛɛ na kwɔ̀ʼɔ ndá Oholibama. Ńdɔgɔ ńgwɔ́ gubé gubé Oholibama nzwě Ezagẅi, Oholibama gwɔ́ míŋ Ánà wemanzwě.
19Pɔɔn lɔgɔ páʼɔɔn, ńgwɔ́ mefùɔ pie é la kẅɛɛ na nkenkÿo ngẅɛ̀ ndá Ezagẅi gẅie mé gíŋe ńtóŋo yé lê Éndɔ̀m.
20Egubé Seyî nyìŋ Holi gie é laa mendùŋmvfò pʉ̀a létsẅé ngwòŋ Éndɔ̀m eyɔɔn: wɔɔn laa Lotaŋ, wɔɔn gwɔ́ Shÿombaa, wɔɔn gwɔ́ Simbeyoŋ, wɔɔn gwɔ́ Ánà, 21wɔɔn gwɔ́ Ndishÿoŋ, wɔɔn gwɔ́ Etsɛɛ ńgÿo Ndishÿaŋ. Yɔɔn lɔgɔ ńgwɔ́ páʼɔɔn, ńgwɔ́ gubé Seyî gie é laa mefùɔ pʉ̀a Holi, á ngwòŋ Éndɔ̀m. 22Oli pɔ́ Eemaŋ laa gubé Lotaŋ yembàŋa. Lotaŋ la gẅiin tsɔ̌ fɛ̌ we wemanzwě, lezíŋ sé gwɔ́ lê Timna. 23Alevaŋ, ńgÿo Manahad, ńgÿo Embaa, ńgÿo Shÿefo, ńgÿo Onam, é laa penkʉ́ Shÿombaa yembàŋa. 24Ayaa pɔ́ Ánà laa gubé Simbeyoŋ yembàŋa. Ánà ŋwɛ́ la gyá mesáʼa ntse#36:24 mesáʼa ntse: legɔ̀ɔn páʼɔɔn fóo na tsɔ̌ nzẅìŋe ŋwàʼne Siriag; mé té ne ńzsé mmó gie yɛ̌ ndù lɔgɔ ńgɔɔn na shwóŋè Ébɛ̀ wɔ́. ndum lum tsɛ̀ɛ kwòŋotsẅɛ fʉ̀ʼ gie à la ne ḿpféle menzikáasè tá we Simbeyoŋ. 25Ánà la gẅiin yé penkʉ́: Ndishÿoŋ gwɔ́ míŋ we wembàŋa, Oholibama gwɔ́ wemanzwě. 26Eemendaŋ, ńgÿo Ɛshÿembaŋ, ńgÿo Etelaŋ ńgÿo Kelaŋ, e laa penkʉ́ Ndishÿaŋ yembàŋa. 27Mbileyaŋ, ńgÿo Zavaŋ ńgÿo Akaŋ, é laa gubé Etsɛɛ yembàŋa. 28Úsè pɔ́ Alaŋ é laa gubé Ndishÿaŋ yembàŋa.
29-30Mefùɔ pʉ̀a Holi á tsɛ̀ɛ ngwòŋ Seyî epɔɔn: wɔɔn aa fùɔ Lotaŋ, wɔɔn gwɔ́ fùɔ Shÿombaa, wɔɔn gwɔ́ fùɔ Simbeyoŋ, wɔɔn gwɔ́ fùɔ Ánà, wɔɔn gwɔ́ fùɔ Ndishÿoŋ, wɔɔn gwɔ́ fùɔ Etsɛɛ ńgÿo fùɔ Ndishÿaŋ.
31Mezíŋ mefùɔ pie é la néŋe na lʉŋe lefùɔ tsɛ̀ɛ láʼa Éndɔ̀m tá mefùɔ láʼ ńzyete lésáʼ ngwòŋ Ésàlayɛ emɔɔn: 32Mbélà míŋ Mbeyɔɔ wembàŋa, à laa fùɔ Éndɔ̀m ayé tÿǒsoŋ gwɔ́ Ndinamba. 33Mbélà la táa ńkwé, Yombab míŋ Zela wembàŋa, gẅie à laa nyìŋ tÿǒsoŋ Mbosela kúbe twó yé, ńcʉ́ʼʉ fùɔ Éndɔ̀m. 34Yombab tǎa ńkwé, Hushÿam gẅie à lɔ̌ɔn fóo tsɛ̀ɛ ngwòŋ Temaŋ, kúbe twó yé, ńcʉ́ʼʉ fùɔ. 35Hushÿam tǎa ńkwé, Andad nyìŋ tÿǒsoŋ Avid, kúbe twó yé, ńcʉ́ʼʉ fúɔ. À laa púʼu, ńgwɔ́ míŋ Mbendad. À la lÿɔ́ʼ pʉ̀a Mandyaŋ tsɛ̀ɛ ngwòŋ Mowab lé ncù, ńjÿó. 36Andad tǎa ńkwé, Samla nyìŋ Maseleka kúbe twó yé ńcʉ́ʼʉ fùɔ. 37Samla tǎa ńkwé, Shÿawuu, nyìŋ Lehombɔd-Naha kúbe twó yé, ńcʉ́ʼʉ fùɔ. 38Shÿawuu tǎa ńkwé, Mbâa-Hanaŋ, míŋ Ashÿabɔɔ kúbe twó, ńcʉ́ʼʉ fùɔ. 39Mbâa-Hanaŋ míŋ Ashÿabɔɔ tǎa ńkwé, Handaa nyìŋ tÿǒsoŋ Pawu kúbe twó yé, ńcʉ́ʼʉ fùɔ. Lezíŋ nzwě Handaa laa lê Mehétambɛɛ, á gwɔ́ míŋ Matelɛd, ńdɔgɔ ńgwɔ́ míŋ míŋ Mé-Zahad.
40Mezíŋ mefùɔ na metsìŋendá pʉ̀a Ezagẅi na menkenkÿo tsìŋendá, mbɔɔ mejʉʼ mie pɔ́ lɔɔn ńnéŋe wó, emɔɔn: wɔɔn laa fùɔ Timna, wɔɔn gwɔ́ fùɔ Aleva, wɔɔn gwɔ́ fùɔ Yetɛd, 41wɔɔn gwɔ́ fùɔ Oholibama, wɔɔn gwɔ́ fùɔ Ela, wɔɔn gwɔ́ fùɔ Pinoŋ, 42wɔɔn gwɔ́ fùɔ Kenaaze, wɔɔn gwɔ́ fùɔ Temaŋ, wɔɔn gwɔ́ fùɔ Mibtsaa, 43wɔɔn gwɔ́ fùɔ Magndiyɛ ńgÿo fùɔ Elam. Pɔɔn lɔgɔ páʼɔɔn, ńgwɔ́ mefùɔ Éndɔ̀m pie é lɔ́ɔn ńtsẅé mejʉʼ mejʉʼ tsɛ̀ɛ ngwòŋ wɔ́b.
Ezagẅi lɔgɔ páʼɔɔn ńgwɔ́ mángʉanjʉʼ pʉ̀a Éndɔ̀m.
Currently Selected:
Nzyeté 36: nnh
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL
